“Wikale Mulondi Wami” —Le Yesu Wādi Usaka Kunena Bika?

1, 2. Lelo i lwito’ka luyampe kutabuka lwityilwe umo ne umo, ne i kipangujo’ka kyotukokeja kwiipangula?

LELO i lwito’ka lwa mvubu lokodi mutambule? Ukokeja kuvuluka kitatyi kyobakwityile kwenda ku kinkumenkume kya pa bula, padi i ku butundaile bwa bantu bosenswe. Nansha padi ubavuluka pobakwityile kukengila kaji ka kamweno. Shi kodi mwitwe lwito lwa uno muswelo, kepabulwe padi wasangele ne kwimona bu mulēmekwe pa kwitwa. Ino na bubine kudi lwito lwa mvubu loityilwe. Eyo, i lwa batwe bonso. Kadi muswelo otutonga kwitaba’lo ushintanga bininge būmi bwetu. I butongi bwa mvubu mpata.

² Le alo lwine i lwito’ka? I lolwa lwitwita Yesu Kidishitu, Mwana wa bunka wa Yehova Leza Mwine Bukomo Bonso, kadi ludi ne mu Bible. Tutanga binenwa bya Yesu mu Mako 10:21 amba: “Iya wikale mulondi wami.” Na bubine luno lo lwito lwita Yesu umo ne umo. Penepa i biyampe twiipangule amba, ‘Le nketaba namani?’ Kilondololwa kikokeja kumweka bu kipēla. Le kudi ubwanya kupela luno lwito lwa ntumbo? Ino yo, kya bulanda! bavule i bapele’lo. Mwanda waka?

3, 4. (a) Le i bintu’ka bimweka bu byābilwa na bantu byādi na muntu wāfwenene kudi Yesu kumulomba mwa kumwena būmi bwa nyeke? (b) Lelo i ngikadilo’ka milumbuluke yāmwene Yesu mu uno nsongwalume muledi mpeta?

³ Ivwana kimfwa kya muntu umo wāityilwe na Yesu pano kepadi myaka 2 000. Wādi muntu mulēmekibwe. Mwanda wādi na bintu bisatu bisakwa, pakwabo byabilwa na bavule—bunsongwa, bupeta, ne bulopwe. Bible utela uno muntu bu “nsongwalume’wa,” bu “mpeta mukatampe,” ne bu “muledi umo.” (Mateo 19:20; Luka 18:18, 23) Inoko uno nsongwalume wādi na kintu kikwabo kya mvubu. Wāivwene Yesu Mufundiji Mukatampe, wāsanswa kiponka na ponka byaāivwene.

⁴ Bambikavu bavule mu oa mafuku, bākankelwe kulēmeka Yesu mobifwaninwe. (Yoano 7:48; 12:42) Ino uno muledi wālongele kintu kishile na bakwabo. Bible unena’mba: “[Yesu] Paadi kaenda, muntu umo waiya lubilo wapona manwi pa nshi ku meso andi kamwipangula’mba: “A Mufundiji Muyampe, i kika kyomfwaninwe kulonga nkapyane būmi bwa nyeke?” (Mako 10:17) Tala bidi uno muntu wādi na mutyima wa kwisamba na Yesu, wānyemena kwadi, bantu bonso batala, enka mwādi mulongela balanda ne bafudile. Pakwabo kadi, wāiya kufukamina Kidishitu na bulēme. Nanshi uno muntu wādi mwityepeje mu muswelo kampanda ne wādi uyukile bisakibwa byandi bya ku mushipiditu. Yesu wādi utendela ino ngikadilo milumbuluke. (Mateo 5:3; 18:4) Ke kya kutulumukapo shi “Yesu wamutala sō, wamusanswa.” (Mako 10:21) Shi ke pano, Yesu wālondolwele namani kipangujo kya uno nsongwalume?

 5. I muswelo’ka wālondolwele Yesu yewa nsongwalume mpeta, ne tuyukile namani amba bulanda ke akyopo “kintu kimo” kyādi kimubudilwe? (Tala ne kunshi kwa dyani.)

⁵ Yesu wālombwele amba Shandi wāletele kala musapu utala pa myanda ya mvubu ya mwa kumwena būmi bwa nyeke. Wātelele Bisonekwa, ne uno nsongwalume wāitabije amba ulondanga Bijila bya Mosesa byonso. Ino Yesu byaādi na bujinguludi bukatampe, wāmwene bine bidi mu uno muntu. (Yoano 2:25) Wāyukile kikoleja kya uno muledi ku mushipiditu—kikoleja kikatampe. O mwanda Yesu wānene amba: “Kudi kintu kimo kyowabulwa.” Lelo kino “kintu kimo” i kika? Yesu wānene amba: “Enda, kapoteje bintu byodi nabyo ne kupāna ku balanda.” (Mako 10:21) Lelo Yesu wādi usaka kunena amba muntu ufwaninwe kwikala mulanda pa kwingidila Leza? Mhm.a Kidishitu wādi usaka kusokola kintu kimo kya mvubu mpata.

 6. Lelo Yesu wāityile muledi nsongwalume mpeta lwito’ka, ne muswelo waāitabile usokola namani byādi mu mutyima wandi?

⁶ Yesu pa kusokola kyābudilwe muntu’wa, wāmupele mukenga umo wa kutendelwa amba: “Iya wikale mulondi wami.” Langa’po bidi—Mwanā Leza Mwine Mukatakata Mwine wita muntu mpala na mpala, āye amulonde! Kadi Yesu wāmulaile ne mpalo yokubwanyapo kulangila. Wānenene amba: “Ukekala na byabulēme mūlu.” Lelo muledi nsongwalume mpeta wāitabije bukidibukidi uno mukenga, luno lwito lwa ntumbo? Nsekununi yendelela’mba: “Mutyima wamusansa pa kino kilondololwa, wataluka mufītwe mutyima, mwanda wadi na bintu bingibingi.” (Mako 10:21, 22) Nanshi binenwa byāmusapwidile Yesu mu kitulumukila byāsokwele kine kyādi mu mutyima wa uno muntu. Wādi ulamete ndamatyidile ku bya bupeta byandi, pampikwa kwilwa bulopwe ne ntumbo yabo. Kya bulanda, kuswa kwaādi uswele bino bintu kwādi kukatampe kupita’ko kuswa Kidishitu. Nanshi “kintu kimo” kyaādi ubudilwe i kuswa Yesu ne Yehova na mutyima umo, pampikwa kwisakila. Uno nsongwalume pa kubulwa buno buswe, wāpela luno lwito lwa pa bula! Lelo uno mwanda ukutala namani ne abe?

 7. Mwanda waka tukulupile amba lwito lwa Yesu lwitutala ne batwe dyalelo?

⁷ Lwito lwa Yesu kelwāimaninepo enka pa uno muntu, nansha pa bantu batyetye kete. Yesu wānenene amba: “Shi muntu usaka kunonda, . . . anonde nyeke.” (Luka 9:23) Yuka amba “muntu” ense ukokeja kwikala mulondi wa Kidishitu shi enka “usaka.” Leza ukokelanga bantu ba mityima myoloke uno muswelo kudi wandi Mwana. (Yoano 6:44) Ke enkapo mpeta, nansha mulanda, ke enkapo muntu wa muzo nansha wa kabila kampanda, kadi ke enkapo boba bashikete mu kitatyi kampanda bapelwe mukenga wa kwitaba lwito lwa Yesu, ino i bonso. Nanshi pānenene Yesu amba “iya wikale mulondi wami,” wādi ukwita ne abe. Mwanda waka ufwaninwe kulonda Kidishitu? Ne kino kilomba bika ne bika?

 8. Lelo bantu basakilwa bika, ne mwanda waka?

⁸ Kudi bubinebine botufwaninwe kuyuka, i buno: Tusakilwa nakampata buludiki buyampe. Eyo, ke bonsopo betabija amba basakilwa’bo, ino nansha nankyo basakilwa’bo. Yelemia mupolofeto wa Yehova wāsonekele ku bukomo bwa mushipiditu buno bubinebine bwa nyeke amba: “A Yehova, ndyukile biyampe amba dishinda dya muntu ke dyandipo, aa. Muntu wenda kadipo na lupusa lwa kōlola ditabula dyandi.” (Yelemia 10:23) Bantu kebadipo na bukomo ne mbila ya kwiludika abo bene. Na bubine, mānga ya bantu i miyule nsekununi ya muludikilo mumbi. (Musapudi 8:9) Mu myaka ya Yesu, bendeji bādi basusula bantu, kwibamwesha malwa, ne kwibalubija. Yesu wānenene bya bine amba bantu bitupu bādi “pamo bwa mikōko yampikwa mukumbi.” (Mako 6:34) Ye mokikadile ne dyalelo. Bantu bonso mu kikonge nansha umo ne umo, basakilwa buludiki bukulupilwa ne bulēmekibwe. Lelo Yesu ubwenye kino kisakibwa? Ivwana bubinga bwishileshile botwanenena amba i mubwanye’kyo.

 9. Le Yesu i mwishile na bendeji bakwabo mu muswelo’ka?

⁹ Bubajinji, Yesu wātongelwe na Yehova Leza. Bendeji bavule i batongwe na bantu bakubulwa kubwaninina, bongolwa divule ne kuluba. Yesu i mwendeji mwishile na bakwabo. Monka mwikilombwela bitenta byandi. Kishima “Kidishitu” nansha “Meshiasa” kishintulula “Mushingwe Māni.” Bine, Yesu i mushingwe māni, ko kunena’mba mutongwe mwanda wa kwingila mwingilo ukola, umutongele ke ungipo, i Mfumu Mubikadi wa diulu ne ntanda. Yehova Leza wānene wandi Mwana amba: “Tala! Mwingidi wami onatongele, muswedibwe wami, ondoelelwe! Nkatūla mushipiditu wami pādi.” (Mateo 12:18) Kekudipo muntu mukwabo uyukile senene mwendeji otusakilwa poso’nka Umpangi kete. Tunangu twa Yehova ketudi mpwilo, o mwanda tudi na bubinga bwa kukulupidila butongi bwaatonga.—Nkindi 3:5, 6.

10. Mwanda waka Yesu i kimfwa kilumbuluke kifwaninwe kulondwa na bantu?

¹⁰ Bwa bubidi, Yesu wētushidile kimfwa kibwaninine kadi kikunka. Mwendeji mulumbuluke wikalanga na ngikadilo yabilwa na babikalwa ne yobabwanya kwiula. Uludikanga na kuleta kimfwa ne kukankamika bakwabo bekale biyampe kutabuka mobadi bekadile kala. Lelo i ngikadila’ka yosaka ikale na mwendeji? Le i bukankamane? Tunangu? Lusa? Le i kubulwa moyo mu bikoleja? Posa kwifunda mānga ya būmi bwa Yesu paādi pano pa ntanda, usa kumona amba wādi na ino ngikadila—ne mikwabo’po. Yesu wāiwile Shandi wa mūlu mu muswelo mubwaninine, o mwanda udi na ngikadila yonso idi na Leza. Wādi muntu mubwaninine mu byonso. Nanshi mu bintu byonso byaālongele, ne byonso byaānene, ne byaādi ulanga bine, mutanwa kintu kyotukokeja kwiula. Bible unena amba i “kimfwa mwanda wa mulonde senene mu mayo andi.”—1 Petelo 2:21.

11. I muswelo’ka wēlombwele Yesu bu “mukumbi mulumbuluke”?

¹¹ Bwa busatu, Kidishitu wālongele mungya byaanenene amba: “Ne mukumbi mulumbuluke.” (Yoano 10:14) Bantu ba mu myaka isekunwinwe mu Bible, bādi bebidile kala uno muneneno. Bakumbi bādi bengila bininge pa kulama mikōko yabo. “Mukumbi mulumbuluke” wādi usaka bidi luombe lwikale biyampe ne na mutyima-ntenke kumeso kwa bisakibwa byandi. Kimfwa, Davida nkambo wandi wādi mukumbi tamba pa bunkasampe, ne divule dine, wātūdile būmi bwandi mu kyaka mwanda wa kukinga mikōko yandi ku banyema ba budyani. (1 Samwele 17:34-36) Ino Yesu aye wālongēle balondi bandi bivule. Wāpēne būmi bwandi pa mwanda wabo. (Yoano 10:15) Lelo i bendeji banga badi na mutyima wa kwipāna namino?

12, 13. (a) Le mukumbi uyukile mikōko yandi mu buluji’ka, ne nayo i muyukile muswelo’ka? (b) Mwanda waka usakanga kuludikwa na Mukumbi Muyampe?

¹² Yesu wādi “mukumbi mulumbuluke” mu buluji bukwabo. Wānenene amba: “Ndyukile mikōko yami, mikōko yami nayo indyukile.” (Yoano 10:14) Langa’po bidi byādi bisaka kunena Yesu. Ku muntu ubandila, ukamona luombe lwa mikōko bu banyema bitupu bebungile pamo. Ino mukumbi aye uyukile mukōko ne mukōko. Uyukile owa ubutwile usakilwa bukwashi, owa usakilwa kukwatakanibwa mwanda ukidi mwana ne muzoze pa kwenda ao mwine kulampe, ne owa usunkuta nansha ubela. Mikōko nayo iyukile mukumbi wayo. Imvwananga diwi dyandi, pampikwa kwidifwanija na dya mukumbi mukwabo. Itabanga lubilo shi ibaivwana diwi dya kidyumu dya mukumbi. Ilondanga konso kwawiitwala. Kadi mukumbi uyukile kwa kwiitwala. Uyukile kudi biyombo bilumbuluke kadi bidimbile, kudi mema atalala ne atōka, ne kudi madyo mayampe. Kitatyi kyatala mikōko, wiimonanga ikele mu mutyima-ntenke.—Ñimbo ya Mitōto 23.

¹³ Mwene nobe wabilanga buludiki pamo bwa buno? Mukumbi Muyampe i muyukane bu muntu wikalanga uno muswelo na balondi bandi. I mulaye kukutūla ku būmi bwa nsangaji ne botondwa tamba’nka pano kutūla ne myaka yonso nyeke. (Yoano 10:10, 11; Kusokwelwa 7:16, 17) Nanshi tusakilwa kuyuka bine bitulombwa pa kulonda Kidishitu.

14, 15. Pa kwikala mulondi wa Kidishitu, mwanda waka ke kiyampepo’tu kwitela bu Mwine Kidishitu nansha kulanga amba mulamete?

¹⁴ Bantu bavule dyalelo balanga’mba i betabe ku lwito lwa Kidishitu. Le kadi, i batonge kutelwa bu Bene Kidishitu. Padi i betabile mu kipwilo kya bambutwile babo. Nansha balañanga’mba balamete Yesu ne kumwitabija’mba i Mukūdi wabo. Lelo kino kibekadije bu balondi ba Kidishitu? Le kyo akyo kyādi kilanga Yesu pāetwityile kwikala balondi bandi? Mhm, kudi bintu bivule bya kulonga.

¹⁵ Tala’po bidi mizo ya Kine Kidishitu—yoya idi na bantu bavule betela bu balondi ba Kidishitu. Molangila, bipwilo bya Kine Kidishitu bilondanga bufundiji bwa Yesu Kidishitu? Nansha umwene mushikwa mu abo matanda, lwana, butumbula, ne bukondame monka mobikadile ntanda yonso?

16, 17. Le divule dine i kika kibudilwe boba betela bu Bene Kidishitu, ne i kika kiyukanya balondi ba bine ba Kidishitu?

¹⁶ Yesu wānene balondi bandi ba bine amba bakayukena bidi ku bilongwa byabo, ke enkapo ku binenwa nansha ku majina a kwiinika. Kimfwa, wānenene amba: “Ke muntupo ense wa kunena ami amba, ‘Mfumwami, Mfumwami,’ ukatwela mu Bulopwe bwa mūlu, poso’nka yewa ulonga kiswa-mutyima kya Tata udi mūlu.” (Mateo 7:21) Mwanda waka bavule batela Yesu bu Mfumwabo bakomenwanga kulonga kiswa-mutyima kya Shandi? Vuluka muledi nsongwalume mpeta. Kudi kintu ‘kimo kibudilwe’ bano betela bu Bene Kidishitu—kuswa Yesu na muya onso ne kuswa Yewa wāmutumine.

¹⁷ Le bibwanika namani? Mwene bavule betela bu Bene Kidishitu banenanga’mba basenswe Kidishitu? I amo kadi. Ino kuswa Yesu ne Yehova kulomba bivule, kupita’ko buswe bwa ku milomo. Yesu wānenene amba: “Shi muntu unsenswe, ukalama mwanda wami.” (Yoano 14:23) Kadi Yesu pa kwitela bu mukumbi wānenene amba: “Mikōko yami ivwananga diwi dyami, neiyukile, kadi nayo inondanga.” (Yoano 10:27) Eyo, payukenanga buswe botuswele Kidishitu i pa bilongwa byetu, ke enkapo mu binenwa ne mu malango.

18, 19. (a) Le byotwifunda padi Yesu biketutenga namani ku mutyima? (b) Dino dibuku didi na kitungo’ka, ne i muswelo’ka ukamwena’mo boba bonso bemona bu balondi ba Kidishitu myaka mivule?

¹⁸ Inoko bilongwa byetu kebiilangapo abyo bine. Bilombolanga mwine motwikadile mu mutyima. Mwanda mo mutambanga byotulonga. Yesu wānene amba: “Buno’bu bo būmi bwa nyeke, bendelele kukuyuka abe, Leza umo kete wa bine, ne yewa owatumine, Yesu Kidishitu.” (Yoano 17:3) Shi twikale na buyuki bwa bine butala padi Yesu ne kulangulukila’po, nabya mutyima wetu ukatengwa. Tukamusanswa bininge, ne kutamija mutyima wa kusaka kumulonda difuku ne difuku.

¹⁹ Pano po pemanine kino kitabo. Kitungo kyakyo, ke kya kusekununapo mu kīpi būmi bwa Yesu ne mwingilo wandi, ino i kwitukwasha tumone biyampe muswelo otukokeja kumulonda.b Dino dibuku i dilupwilwe mwanda wa kwitukwasha twitale mu kiyo kya Bisonekwa ne kwiipangula amba, ‘Lelo nondanga Yesu binebine?’ (Yakoba 1:23-25) Padi ke myaka mivule yowimona bu mukōko wendejibwa na Mukumbi Mulumbuluke. Ino ubulwe’po kwitabija’mba kudi nyeke kintu kamukaya kyobwanya kulumbulula? Bible witusoñanya’mba: “Mwitompei nyeke shi mudi mu lwitabijo; jingululai nyeke momwikadile banwe bene.” (2 Bene Kodinda 13:5) I kipite buya kwibandaula tuyuke shi twendejibwanga na Yesu, Mukumbi Mulumbuluke wa buswe, utongelwe na Yehova mwine amba etuludike.

20. I bika byotukabandaula mu shapita ulonda’ko?

²⁰ Tulomba dino dibuku dyowifunda dikukwashe utamije buswe bosenswe Yehova ne Yesu. Pa kuludika buno buswe mu būmi bobe, ukamona ndoe ne kuloelelwa mu ludingo kampanda mu ino ntanda minunu, kadi ukekala na būmi bwa kutendela Yehova nyeke pa Mukumbi Mulumbuluke waetupele. Bine, byotwifunda padi Kidishitu bifwaninwe kwimanina pa kyalwilo kya binebine. O mwanda i kyendele’mo nanshi Shapita 2 ashintulule mwingilo wa Yesu mu mpango ya Yehova itala diulu ne ntanda.