“Mwana-Mukaji Mulumbuluke”

1, 2. (a) Le i mwingilo’ka wādi wingila Luta? (b) Le i bintu’ka biyampe byājingulwile Luta bitala Kijila kya Leza ne bantu bandi?

LUTA ufukete kubwipi na bīta bya mebele a buluba byaabuñanga mu dyuba. Papo dyuba kedikapone, bengidi bavule bādi ku madimi a kubwipi na Betelema bādi kebakalubuka bityebitye, ne kukapityila ku kibelo kya kibundi kityetye kyādi peulu pa ngulu. Pano Luta watyoboka mu bidyoma mwanda wa kwingila kwaangila difuku dyonso dituntulu na kininga tamba lubanga. Kadi ukyendelela kwingila, waboya mutyi nansha kapini kapūla bīta bya mebele a buluba mwanda wa miseke ikukuke’ko. Nansha mwingilo byowādi mukomo, ino aye wamwene bu dyādi difuku diyampe​—diyampe kupita’ko mwaādi ulangila.

² Lelo bintu byāshilwile kulumbuka kudi uno nsongwakaji wa kishala? Enka namotwekimwenanga mu shapita ubadikile, Luta wālamete bininge kudi inandi muko Naomi, wamutyipila amba ukekalanga nandi nyeke, kadi amba Leza wa Naomi, Yehova, ukekala Leza wandi. Bano bana-bakaji babishala babidi, i batambe ku Moabu, abaiya mu Betelema, ne kwija mpika Luta mwine Moabu wājingulula amba mpangiko ya mu Bijila bya Yehova ya kukwasha balanda ne beni mu Isalela i miyampe kutabuka. Ne kadi wāmwene amba bantu bamo ba Yehova bādi bendejibwa na Bijila kadi bādi bebilonda, bādi bantu basenswe Leza ne ba kanye; kine kyāmutengele mpata ku mutyima.

3, 4. (a) Lelo Boaza wākankamikile Luta muswelo’ka? (b) Le kimfwa kya Luta kibwanya kwitukwasha namani mu ino myaka ikomene misokwe?

³ Umo bidi mu bano bantu ba Yehova i Boaza, mwana-mulume mpeta mwinē madimi ādi akōkolola’mo Luta. Wate Luta mutyima’nka na wandi mwana. Luta nandi umungamunga mundamunda kitatyi kyonso kyavuluka binenwa bya Boaza bya kumutendela pa kulela kwalela Naomi ne pa kutonga kwaatonga kwifya mu mapapa a Leza wa bine, Yehova.​—Tanga Luta 2:11-14.

⁴ Luta ye uno wādi wiipangula nyeke mukekadila būmi bwandi kumeso. Byadi mulanda kadi mweni wampikwa mulume nansha mwana, le i muswelo’ka waādi ubwanya aye mwine kwisasaketa ne kusasaketa Naomi mu mafuku āya kumeso? Lelo kukokolola kwadi kwa kuvuija bisakibwa byabo byonso? Ne kadi le i ani wadi wa kukamulela shi wanunupa? Bidi’tu na buluji shi ino milangwe yāmulēmenene mu ñeni. Mu ino myaka ikomene misokwe, bantu bavule bekondanga na kuno kuzumbija mutyima. Shi twifunde muswelo lwitabijo lwa Luta molwamukwashishe kitatyi kyaādi mu bino bikoleja, netu tukamwiula mu myanda mivule.

5, 6. (a) Lelo Luta wābwenye namani kukokolola mu budimi bwa Boaza mu difuku dibajinji? (b) Le Naomi wālongele namani paāmwene Luta?

⁵ Luta pa kupwa kupūla bīta ne kukongakanya miseke yonso pamo, ku mfulo wāmwene amba wākokolwele efa imo ya mebele a buluba nansha matyupa 22. Kivwe kyandi kyādi kilēma kintu kya makilo 14! Weapungulula, padi ne kwiakutyila mu kisandi, kupwa wetwika’o pa mutwe kaenda ku Betelema, dyuba papo kedikapone.​—Luta 2:17.

⁶ Naomi wāsangele pa kumona muko wandi muswe Luta, ne kadi ye uno wātulumukile pa kumumona uselele kivwe kilēma kya mebele a buluba. Luta nandi wāmupaile bidibwa byāshele ku byobādile byāletēle Boaza bengidi bandi, penepa Luta ne Naomi badya tuno tubidibwa tupēla. Naomi wamwipangula amba: “Lelo ko wakōkolola dyalelo dino’di i kwepi, a? Kadi ko waingidila i kwepi le? eselwe dyese yewa wakuyukidija.” (Luta 2:19) Naomi wādi na ñeni; kitatyi kyaāmwene Luta uselele kivwe kilēma kya bidibwa, wājingulwile amba kudi muntu kampanda wāmwivwanina lusa uno nkasampe wakishala ne kumulongela biyampe.

7, 8. (a) Le Naomi wāmwene amba kanye ka Boaza katambanga kudi ani, ne mwanda waka? (b) Le Luta wālombwele monka buswe bwa dikōkeji kudi inandi muko muswelo’ka?

⁷ Bano bana-bakaji babidi bashilula kwisamba, Luta kalombola Naomi mwikadile Boaza na kanye. Naomi nandi wamulondolola na nsangaji amba: “Eselwe dyese kudi Yehova, bya kalekelepo buntu bwandi ku bōmi ne ku bafwe bene kumo.” (Luta 2:20) Naomi wāmwene kanye ka Boaza bu katambanga kudi Yehova, mwine usakilanga bengidi bandi bekale na buntu, ne ulayanga kupala bantu bandi pangala pa kanye kabo.a​—Tanga Nkindi 19:17.

⁸ Naomi wasoñenye Luta etabije byāmunene Boaza kukōkolola mu madimi andi, ne kwikala kubwipi na bansongwakaji bandi, kutyina amba bana-balume bādi bangula bakamukambakanya. Luta wālondele ano madingi. Ne kadi wāendelele ‘kwikala ne inandi muko.’ (Luta 2:22, 23) Mu bino binenwa, tumona’mo kadi ngikadila yandi mikatampe​—ke buswe bwa dikōkeji kadi. Kimfwa kya Luta kitutonona twibandaule shi tulēmekele kijimba kya kisaka, shi tukwatakanyanga baswe betu bya binebine ne kwibakwasha pobifwaninwe. Yehova umonanga nyeke buno buswe bwa dikōkeji.

 9. Le i ñeni’ka yotukokeja kuboila kudi ba Luta ne Naomi pa bitala kisaka?

⁹ Le tubwanya kunena amba ba Luta ne Naomi bādi pamo bwa kisaka? Bamo banenanga amba kisaka kya “binebine” kifwaninwe kwikala na bantu bavuija biselwa bishileshile​—mulume, mukaji, bana bana-balume ne bana bana-bakaji, bankambo, ne bakwabokwabo. Inoko kimfwa kya Luta ne kya Naomi kituvuluja amba bengidi ba Yehova nansha shi badi mu kisaka kipatuke, bakokeja kushitula mityima yabo ne kwikala na kizaji, kanye ne buswe. Lelo usangelanga kisaka kyenu? Yesu wāvulwije balondi bandi amba kipwilo kya bwine Kidishitu kibwanya kwikala bu kisaka ku boba kebadipo na kisaka.​—Mako 10:29, 30.

10. Lelo Naomi wādi usaka kukwasha Luta muswelo’ka?

¹⁰ Luta wāendelele kukōkolola mu madimi a Boaza, tamba ku mwangulo wa mebele a buluba mu Kweji wa buná kutūla ne ku mwangulo wa ñano mu Kweji wa busamba. Mayenga pa kupita’po, Naomi wādi kalanga byakokeja kulongela wandi muko muswe. Pobādi bakidi mu Moabu, Naomi wādi uyukile amba kakabwanyapo kumwena Luta mulume mukwabo wa kumusonga. (Luta 1:11-13) Ino pano, milangwe yandi ibashinta. Wafwena Luta kamunena amba: “Wami mwana le nkikakukimbilapo mwa kōlolokwa’ni, amba ukamone biyampe senene shē, a?” (Luta 3:1) Mu oa mafuku, bambutwile bādi na kibidiji kya kukimbila babo bana balume nansha bakaji, ino Luta nandi wādi kadi’nka bwa mwanā Naomi wa kwibutwila. Wādi usaka kusokwela Luta “mwa kōlolokwa,” ko kunena amba kifuko kya mutyima-nteke ne bulami, ke njibo ne mulume kadi. Ino le i bika byādi bya kulonga’po Naomi?

11, 12. (a) Naomi paāityile Boaza bu “mpyana-impolo,” le wādi usaka kwisambila pa mpangiko’ka ya buswe ya mu Mukanda wa Bijila wa Leza? (b) Lelo i muswelo’ka wātambwile Luta madingi a inandi muko?

¹¹ Luta musunsa mubajinji waātelele Boaza, Naomi wānene amba: “Mukelenge’wa i wetu mubutule ye wa ku bampyana-impolo.” (Luta 2:20) Le wādi ukimba kunena bika? Mu Mukanda wa Bijila wa Leza waāpele bene Isalela mwādi mubadilwa ne mpangiko ya buswe ya kukwasha bisaka bidi mu bufudile nansha boba bafwilwe. Shi mwana-mukaji wafwilwa mulume ne kushala kwampikwa mwana, wādi mu malwa a bine mwanda dijina dya mulumyandi, ne lutundu lwandi, byādi bya kutukila ne kujimankana ku nkongo īya’ko. Inoko, Mukanda wa Bijila wa Leza wādi witabije mwanabo na ufwile apyane wa kishala’wa mwanda wa babutule mpyana wadi wa kwityilwa pa dijina dya mulumyandi wafwile ne wadi wa kukwatakanya bintu bya kisaka.b​—Kup. 25:5-7.

¹² Naomi wāsapwidile Luta mwa kulongela. Fwatakanya’po bidi mubambidile uno nsongwakaji meso sō kudi inandi muko kitatyi kyaesamba. Luta wādi ukimona Bijila ne bibidiji bya bene Isalela bu byeni. Nansha nankyo, wādi ulēmekele Naomi bininge, o mwanda wātejeje na katentekeji byonso byaādi umusapwila. Madingi a Naomi ādi abwanya kumweka bu ampikwa kufwaninwa, apuñanya​—nansha bu a kumufwija bumvu​—inoko Luta aye wēalondele. Wāmulondolwele na butūkanye bonso amba: “Kyonsololo kyonena nkalonga’kyo.”​—Luta 3:5.

13. Le i ñeni’ka yotuboila kudi Luta pa mwanda utala kwitabija madingi a bakulwa-kala? (Tala ne Yoba 12:12.)

¹³ Kyaba kimo bikalanga bikomo ku bankasampe kuteja madingi a bakulwa-kala badi na bwino buvule. Bipēla kulanga amba bakulu kebevwanijangapo bikoleja ne makambakano ekonda nao bankasampe. Kimfwa kya Luta kya kwityepeja kituvuluja amba kuteja madingi a ñeni a bakulu betuswele ne betutele mutyima kudi na kamweno kakatampe. (Tanga Mitōto 71:17, 18.) Ino le i madingi’ka Naomi awādingile Luta, ne kadi le Luta wāmwenine’mo bya binebine pa kwialonda?

14. Le kipūdilo i kika, ne bādi bekingidija muswelo’ka?

¹⁴ Ke ku kyolwa, Luta waenda pa kipūdilo​—kifuko kya nshi mikomo kadi myumu pō, pendanga babidimye kukapūla miseke ne kupepa. Kino kifuko kyādi nyeke ku mpulumuko ya lūlu nansha pa lūlu, pene pādi papukuma luvula lukomo shi ke ku kyolwa. Pa kupepula mfumba nansha bityani, bengidi bādi bengidija nkanya milampe nansha maposholo bebisalwila mūlu, ebiya bityani byobipēla byapepukila mu luvula, ino miseke byoilēma, yaponena panshi.

15, 16. (a) Shintulula byāpityile ku kipūdilo kyolwa pāpwile Boaza kwingila. (b) Le Boaza wājingulwile namani amba Luta ulēle ku binyantyilo byandi?

¹⁵ Kitatyi kyādi kekivuya bengidi mwingilo wabo ku kyolwa, Luta wādi wibatala mu bufyafya. Boaza wādi wimanine mwingilo wa kupepa nkunwa yandi, yayudile milwi mivule. Pa kupwa kudya biyampe, wakalēle ku mfulo ya mulwi umo. Mo mobadi balongela mungya kibidiji kya kwabo, padi mwanda wa kulama byangulwa byabo ku bangivi ne ku batubwalala. Luta wamone amba Boaza walāla. Pano kitatyi kibabwana kya kulonga byāmunene Naomi.

¹⁶ Luta wafwena pabwipi na Boaza koku mutyima umutwa. Wadi wilaija Boaza alāle tulo bukū. Enka mwāmulombwedile Naomi, Luta waenda bityebitye wamuputula binyantyilo byandi ne kulāla konka. Kupwa kailaije. Papita kitatyi kilampe. Luta wakōka kwilaija. Mfulo mfulō, ke pa bukata bwa bufuku Boaza wasantamuka. Pa kuzakala mashika, wetamuna, padi wādi ukimba kwipūta monka ku maulu. Ino waivwana kilēmeneji amba kudi muntu. Nsekununi inena amba, “Talapo, mwana-mukaji au ulēle pa binyantyilo byandi.”​—Luta 3:8.

17. Boba banena amba byobya byālongele Luta byādi byampikwa kwendela’mo, kebayukilepo bintu’ka bibidi?

¹⁷ Wamwipangula amba, “Lelo i abe ani, a?” Luta wāmulondolwele padi koku diwi dizakala, amba: “I ami Luta mwingidi obe; ala nanshi mbwija obe pa mwingidi obe, mwanda abe udi mpyana-impolo.” (Luta 3:9) Bashintuludi bamo ba mu ano mafuku banenanga amba, byobya byālongele Luta ne byaānene bilombola amba wādi usaka kulāla na Boaza, inoko kudi bintu bibidi byokebayukilepo. Kibajinji bidi, Luta wālongēle mungya bibidiji bya mu oa mafuku, bivule mu bino bibidiji kebikilondwangapo dyalelo. O mwanda ke biyampepo kudingakanya byālongele Luta na misoñanya ya mu mwikadilo wa dyalelo. Kya bubidi, muswelo wālondolwele Boaza ulombola patōka amba wāmwene mwiendelejo wa Luta bu wādi muyampe kadi wa kutendelwa.

18. Le i bika byānene Boaza byākankamikile Luta, ne i myanda’ka ibidi itala buswe bwa kanye bwa Luta yēsambile’po Boaza?

¹⁸ Kwisamba kwesambile Boaza na kinyenye ne na diwi dya kusenga, byākankamikile Luta. Wānene amba: “Weselwe dyese kudi Yehova, wami mwana; ubandaija buntu butabuke kuno kumfulo kuno na kungalwilo’kwa, pa mwanda o kwalondelepo bansongwalume, shi balanda, shi bampeta.” (Luta 3:10) Binenwa bya amba, “kungalwilo’kwa” bifunkila pa buswe bwa dikōkeji bwa Luta pa kwitabija kujoka pamo na Naomi ku Isalela ne pa kumulela kwāmulelele. Binenwa bya amba, “kuno kumfulo kuno” bifunkila pa kino kyaalonga. Boaza wāmwene amba bansongwakaji pamo bwa Luta bakimbanga balume mu bansongwalume, shi mpeta shi mulanda. Inoko Luta aye wādi usaka kulonga biyampe, ke enkapo kudi Naomi, ino ne kudi mulumya Naomi wafwile’wa, kutyina amba dijina dya ufwile dyakajimina mu ntanda yandi. Nanshi i kipēla kumona mwanda waka Boaza wātengelwe mpata na uno nsongwakaji wampikwa kwisakila.

19, 20. (a) Mwanda waka Boaza kāsongelepo Luta ponka na ponka? (b) Le i mu miswelo’ka mwālombwele Boaza wādi utele mutyima ku bulēme bwa Luta?

¹⁹ Boaza wābwejeje’ko amba: “Penepo pano wami mwana, kokakwatwapo moyo, nkakulongela byonso byonena; mwanda kibundi kyonso kya bantu bami bayukile’mba abe wi mwana-mukaji mulumbuluke.” (Luta 3:11) Wāsangedile bininge mulangwe wa kusonga Luta; padi kātulumukilepo kitatyi kyāmunene Luta ekale mpyana-impolo wandi. Inoko Boaza kāsakilepo kulonga bintu mungya mwasakila aye mwine, wādi muntu moloke. Wālombwele Luta amba kudi mpyana-impolo mukwabo, mubutule wa pabwipi mpata na mulumya Naomi wafwile’wa. Boaza wādi wa kukamona uno muntu dibajinji ne kumunena asonge Luta.

²⁰ Boaza wāsoñenye Luta alāle bidi monka mwanda wa kukōkolokwa kufika’nka ne ku lubanga futwi, ebiya abuke ne kwenda kwampikwa kumonwa na muntu. Boaza wādi usaka kulama bulēme bwa Luta ne bwa aye mwine, mwanda bantu bādi babwanya kwibafwatakenya amba basambakenine pamo. Luta walāla monka kubwipi na binyantyilo, padi mutyima mutūke mwanda Boaza wamulondolola na kanye. Kupwa, mu meso mukifita Luta wābuka. Ebiya Boaza wāmupa byabuntu bya mebele a buluba ne kwiadinga mu mutwelo wandi, ne kumunena ajokele mu Betelema.​—Tanga Luta 3:13-15.

21. Le i bika byālengeje Luta ayukane bu “mwana-mukaji mulumbuluke,” ne i muswelo’ka otukokeja kwiula kimfwa kyandi?

²¹ Luta wāsangele’po kashā kitatyi kyaādi uvuluka binenwa bya Boaza—byaāmunene amba i “mwana-mukaji mulumbuluke” mu bantu bonso! Ne kutatana kwine mpika, wātumbile uno muswelo mwanda wa mutyima wandi wa kusaka kuyuka Yehova ne kumwingidila. Wālombwele kadi kanye ka binebine ne lusa kudi Naomi ne kudi bantu bandi, waitabija kulonda mikadila ne bibidiji kebyādipo kwabo. Shi twiule lwitabijo lwa Luta, nabya tukalēmeka mikadila ne bibidiji bya bakwetu. Shi tulonge namino, netu tukayukana bu bantu balumbuluke.

22, 23. (a) Lelo kyabuntu kyāpelwe Luta na Boaza kyādi padi kishintulula bika? (Tala ne kunshi kwa dyani.) (b) Le Naomi wādingile Luta kulonga bika?

²² Kitatyi kyāfikile Luta ku njibo, Naomi wāmwipangwile amba, “Lelo i namani, wami mwana?” Kino kipangujo kilombola’amba padi Luta wājokele pakifita, ino kadi Naomi wādi usaka kuyuka shi Luta wādi kasokwele mulume, nansha shi abamulaa kumupyana. Bukidibukidi bonka, Luta walombola Naomi, inandi muko byonso byamulongēle Boaza. Kadi wamupa ne kyabuntu kya mebele a buluba amutumine Boaza.c​—Luta 3:16, 17.

²³ Naomi wādingile Luta bya ñeni amba shikata ku njibo talāla pa kyaba kya kukakokolola monka mu madimi. Wamukulupija amba: “Mwanda mukelenge’wa kutūja mpika, poso’nka avuye kino kintu kino’ki dyalelo dino’di.”​—Luta 3:18.

24, 25. (a) Le i muswelo’ka wālombwele Boaza amba i muntu moloke kakimbepo enka kamweno ka aye mwine? (b) Lelo Luta wāeselwe namani?

²⁴ Naomi wānene bya bine padi Boaza. Boaza waenda ku kibelo kya kibundi, kwādi kuketaninanga bakulumpe ba kibundi, kashikete utengele mwana-mulume mwine mubutule wa pabwipi apite. Ebiya Boaza wānena mwana-mulume’wa ku meso a batumoni, na kumupa mukenga wa kwikala bu mpyana-impolo na kusonga Luta. Inoko, mwana-mulume’wa wapela, amba kutyina wakona kipyanwa kyandi. Penepo, Boaza wanena kumeso a batumoni konka ku kibelo kya kibundi, amba aye usa kwikala bu mpyana impolo, na kukūla byonso byādi bya Edimeleke mulumya Naomi wafwile’wa, ne kusonga Luta wakishala, wādi mukaja Malone, mwana Edimeleke. Boaza walombola byaādi ukulupile amba kumupyana kukakwasha “kulangula dijina dya mufu’dya pa kipyanwa kyandi.” (Luta 4:1-10) Boaza wadi bine muntu moloke, kakimbepo enka kamweno ka aye mwine.

²⁵ Boaza wāsonga Luta. Kupwa papo, tutanga amba: “Yehova wamupa kwimita, kadi wabutula mwana mwana-mulume.” Bana-bakaji ba mu Betelema kebesela Naomi ne kutendela Luta mwanda kudi Naomi wādi utabukile buyampe bāna basamba-babidi bana-balume. Mwenda mafuku, uno mwanā Luta mwana-mulume wāikala ke nkambulula wa Davida Mulopwe mukatampe. (Luta 4:11-22) Davida nandi, wāikala ke nkambulula wa Yesu Kidishitu.​—Mat. 1:1.d

26. Lelo kimfwa kya Luta ne kya Naomi kituvuluja bika?

²⁶ Luta wāeselwe binebine, enka mwāesedilwe Naomi, mwine walelele mwana’wa pamo’nka bwa wandi wa kwibutwila. Būmi bwa bano bana-bakaji babidi i kimfwa kyūmi kituvuluja amba Yehova Leza umonanga boba bonso baputuma na mingilo na kwityepeja mwa kumwena kadilo ne kumwingidila pamo ne bantu bandi batongwe. Kalekangapo kashā kupala mpalo bantu ba kikōkeji, pamo bwa Boaza, Naomi, ne Luta.