Lelo Leza I Ani?

Mu bula bwa mānga ya muntu, bantu i batōte baleza bavule, baleza bana-balume ne baleza bana-bakaji. Inoko Bible wisambilanga pa Leza umo “mukatampe kupita baleza bakwabo bonso.” (2 Bilongwa bya Mafuku 2:5) Lelo aye mwine i ani? Ne i bika bimulengeja ekale mukatampe kupita baleza bakwabo batōtwa na bantu? Tala, uno Leza aye mwine kaetela kodi mu kino kifundwa.

1. Le dijina dya Leza i dijina’ka, ne mwanda waka tukokeja kunena’mba usakanga twidiyuke?

Mu Bible, Leza i mwitele kotudi. Unena’mba: “Ami ne Yehova. Dyo dyami dijina.” (Tangai Isaya 42:5, 8.) “Yehova” i dijina ditambile ku Kihebelu, mobimwekela dishintulula’mba “Yewa Wikadija Ke.” Yehova usakanga tuyuke dijina dyandi. (Divilu 3:15) Mwanda waka tubanena namino? Mu Bible, dijina dyandi i mwidilembeje’mo misunsa 7 000 ne kupita!a Dijina Yehova i ditelelwe’nka “Leza wa bine momwa mūlu ne pano panshi pene.”​—Kupituluka mu Bijila 4:39.

2. Lelo i bika bitusapwila Bible padi Yehova?

Bible unena’mba mu baleza bonso batōtwa na bantu, Yehova ye Leza umo kete wa bine. Mwanda waka? Kudi bubinga buvule. Yehova udi na lupusa lupite lonso, kadi Aye bunka bwandi ye “Mwine wa Peulu Mwine pa ntanda yonso.” (Tangai Ñimbo ya Mitōto 83:18.) Aye ye “Mwinē Bukomo Bonso,” kushintulula ko kunena’mba, udi na bukomo bwa kulonga kintu kyonso kyatonga kulonga. “Wapangile bintu byonso”​—diulu, ne ntanda, ne byūmi bidi’po. (Kusokwelwa 4:8, 11) Yehova i mwishile na muntu mukwabo yense, mwanda aye udi’ko nyeke, kadi ukekala’ko nyeke.​—Ñimbo ya Mitōto 90:2.

3. Leza udi na bitenta bivule, ino udi na dijina’tu dimo

Pa kumona mwishidile kitenta kya muntu ne dijina dyandi, talai VIDEO, ne kwisambila pa kino kipangujo:

VIDEO: Wa Bitenta Bivule, Ino na Dijina Dimo (0:41)

• Lelo kitenta pamo bwa “Mfumwetu,” i kishile namani na dijina?

Bible unena’mba bantu batōtanga baleza bavule ne bamfumwabo bavule. Tangai Ñimbo ya Mitōto 136:1-3, ne kwisambila pa kino kipangujo:

• Lelo “Leza wa baleza” ne “Mfumwandya bamfumu” i ani le?

4. Yehova usakanga abe uyuke dijina dyandi ne kumwita’dyo

VIDEO: Lelo Leza Udi na Dijina?​—Kakipindi (3:11)

• Le ulanga Yehova usakanga dijina dyandi diyukane? Mwanda waka?

Yehova usakanga bantu bamwite pa dijina dyandi. Tangai Bene Loma 10:13, ne kwisambila pa bino bipangujo:

• Le kwita dijina dya Leza, Yehova, kudi na mvubu’ka?

• Le wiivwananga namani shi muntu wavuluka dijina dyobe ne kwiditela?

• Le ulanga Yehova wiivwananga namani shi ubamwite pa dijina dyandi?

5. Yehova usaka umufwene bininge

VIDEO: Nadi Nkimba Leza wa Bine (8:18)

• Mu ino video, būmi bwa Soten bwashintyile namani paefundile dijina dya Leza?

Kumeso kwa kupwana na muntu, divule, ukasaka bidi kuyuka dijina dyandi. Tangai Yakoba 4:8a, ne kwisambila pa bino bipangujo:

• Lelo i bika bikusakila Yehova kulonga?

• Kuyuka dijina dya Leza ne kumwita’dyo, bikakulengeja namani wiivwane bu udi pabwipi nandi?

MU KĪPI

Dijina dya Leza umo kete wa bine i Yehova. Usakanga twidiyuke kadi tumwite’dyo amba tufwene pabwipi nandi.

Pitulukai’mo

• Le Yehova i mwishile namani na baleza bakwabo batōtwa na bantu?

• Mwanda waka tufwaninwe kutela dijina dya Leza?

• I bika bilombola’mba Yehova usakanga tumufwene?

KIMBA

Tala bubinga butano bukulupilwa bulombola’mba Leza udi’ko.

“Lelo Leza Udi’ko?” (Kishinte kya pa Entelenete)

Tala umone mwanda waka kukulupila’mba Leza udi’ko nyeke i kwendele’mo.

“Lelo I Ani Wāpangile Leza?” (Kiteba kya Mulami, 1 Kweji 8, 2014)

Wifunde umone mwanda waka tufwaninwe kutela dijina dya Leza, nansha shi mutelelo wadyo wa kala keuyukenepo.

“Le Yehova I Ani?” (Kishinte kya pa Entelenete)

Lelo kutela Leza monso motusakila kudi na mwanda? Tala umone mwanda waka tunena’mba Leza udi na dijina dya bunka dimo kete.

“Lelo Leza Udi na Majina Anga?” (Kishinte kya pa Entelenete)