KIFUNDWA 58
Lamata Nyeke Yehova
Bene Kidishitu ba bine i basumininwe kupela kintu nansha kimo ne muntu nansha umo epatyike pa butōtyi bwabo bobatōta Yehova. Tukulupile amba nobe usumininwe kulonga namino. Yehova ukwete na bulēme lulamato lobe. (Tangai 1 Bilongwa bya Mafuku 28:9.) Le i ngikadilo’ka ibwanya kutūla pa ditompo lulamato lobe kwadi ne i muswelo’ka obwanya kunekenya’yo?
1. Le i bika bibwanya kutūla pa ditompo lulamato lwetu kudi Yehova?
Bantu bamo babwanya kwitukankaja tuleke kwingidila Yehova. Le i bāni babwanya kulonga kino kintu? Bantu bamo batalukile mu bubine banenanga myanda ya bubela itala bulongolodi bwa Leza mwanda’tu wa kuzozeja lwitabijo lwetu. Betwanga bu batupondo. Kadi, bakulu ba bipwilo bamo basambakanyanga myanda ya bubela potudi mwanda wa kulengeja boba ba kubulwa kushimatyija batambe mu bubine. I kyaka kikatampe kotudi kwipatanya na bano bantu balwana, kutanga mabuku abo, marezo abo, masite abo, nansha ke kutala mavideo abo kwine. Yesu wānenene pangala pa bano bantu bazozeja bakwabo kwingidila Yehova na lulamato amba: “Mwibalekei. I batulombwe bampofu. Mwanda shi mpofu uludika mpofu mukwabo, bonso babidi bakaponena mu kīna.”—Mateo 15:14.
Le tukalonga namani shi muntu otuyukile watonge aye mwine kuleka kwikala bu Kamoni wa Yehova? Shi muntu wa pabwipi walonga kino kintu, tutyumukwanga bine mutyima. Kadi muntu wa uno muswelo ubwanya’nka ne kwituningila netu amba tutonge’po pa Yehova ne aye. Tufwaninwe kusumininwa kushala nyeke balamate kudi Yehova kupita kintu kyo-kyonso kikwabo. (Mateo 10:37) O mwanda tukōkelanga musoñanya wa Yehova wa kuleka kupwana na bantu ba uno muswelo.—Tangai 1 Bene Kodinda 5:11.
2. I butyibi’ka bwa batwe bene bubwanya kutūla pa ditompo lulamato lwetu kudi Yehova?
Buswe botusenswe Yehova buketutonona tuleke kwikuja mu kintu kyo-kyonso kikwatañene na bipwilo bya bubela. Nanshi, kaji kotwingila, kitango kampanda kyotudi’mo nansha ke bintu bikwabo byotulonga, kekufwaninwepo kwikala nansha kimo kikwatañene na bipwilo bya bubela. Yehova witudyumuna’mba: “Tambai’mo [mu Babiloni Mukatampe], banwe bantu bami.”—Kusokwelwa 18:2, 4.
LANGULUKA BININGE
Wifunde mwa kupelela muntu ense ukimba kuzozeja lulamato lobe kudi Yehova. Kadi tala ne muswelo wa kulombola lulamato lobe na kutamba mu Babiloni Mukatampe.
3. Dyumuka bafundiji ba bubela
Le tufwaninwe kulonga namani shi tubaivwana myanda ya bubela yobanenena bulongolodi bwa Yehova? Tangai Nkindi 14:15, ne kwisambila pa kino kipangujo:
Mwanda waka tudyumukanga na kuleka kwitabija bukidi kintu kyonso kyotwivwana?
Tangai 2 Yoano 10, ne kwisambila pa bino bipangujo:
Le tufwaninwe kulonga namani na batupondo?
Nansha shi ketudipo nabo mu kipwano kya patōkelela, i mu miswelo’ka motubwanya kwivwana bufundiji bwabo?
Le Yehova ukeivwana namani shi ketute mutyima ku binenwa bibi byobamunenena ne byobanenena bulongolodi bwandi?
4. Lamata nyeke kudi Leza kitatyi kilonga mwanetu bubi
Shi tubayuka’mba muntu umo mu kipwilo i mulonge bubi bukatampe, le batwe tufwaninwe kulonga’po bika? Tala musoñanya utamba mu Bijila bya Leza byaāpele Isalela wa kala.—Tangai Bene Levi 5:1.
Monka mokisoñanibwe mu uno vese, shi tubayuka’mba kudi muntu ulongele bubi bukatampe, tufwaninwe kusapwila’mo bakulumpe byobya byotuyukile. Inoko kumeso kwa kwibasapwila, i biyampe kuzenza mwine ulongele bubi’wa akamone bakulumpe ne kusaba bubi bwandi. Shi wapele kukebamona, nabya lulamato lwetu kudi Yehova luketutonona twende tukasapwile bakulumpe byobya byotuyukile. Mwanda waka kulonga namino kulombola’mba tudi na buswe bwa ndamatyidile . . .
kudi Yehova Leza?
ku muntu mwine ulongele bubi?
ne ku bakwabo mu kipwilo?
Shi mwanenu mu lwitabijo udi mu kyaka, mukwashe!
5. Ikala panja pa Babiloni Mukatampe
Tangai Luka 4:8 ne Kusokwelwa 18:4, 5, ne kwilondolwela bino bipangujo:
Le dijina dyami dikidi dilembwe mu mulongo wa bantu badi mu kipwilo kya bubela?
Lelo nekidi mu kitango kampanda kingidila pamo na kipwilo kikwabo?
Lelo kaji kami kakwatakanyanga kipwilo kya bubela mu muswelo kabidye?
Le mu būmi bwami mukidi mwanda kampanda unomba kwisansanya’mo na kipwilo kya bubela?
Shi ubalondololanga’mba, en-en, ku kipangujo’tu nansha kimo, le i kushinta’ka koukisakilwa?
Nansha bikale namani, kwata butyibi bukakukwasha ushale na mutyima wa mundamunda utōka ne bulombola’mba ulamete Yehova.
Le ukalonga namani shi abakulombe mukongo wa bukwashi mu kipwilo kya bubela?
BANTU BAMO BANENANGA’MBA: “Mfwaninwe kuyuka bine binenanga batupondo pa Batumoni ba Yehova, mwanda wa mone mwa kubingijija bubine.”
Le i kya tunangu kulonga nankyo? Mwanda waka?
MU KĪPI
Pa kushala balamate kudi Yehova, tufwaninwe kupela kupwana na boba bonso ba kubulwa kumulamata. Kadi tufwaninwe ne kwisansanya ne pa mfulo na bipwilo bya bubela.
Pitulukai’mo
Mwanda waka ketufwaninwepo kutala, kutanga, ne kuteja milangwe ya batupondo?
Le tufwaninwe kumona namani boba kebakidipo monka bu Batumoni ba Yehova?
I muswelo’ka otukalonda kidyumu kitunena kunyema mu bipwilo bya bubela?
KIMBA
Wifunde umone mwa kulongela kitatyi kyobasambakenya Batumoni ba Yehova myanda ya bubela.
“Le Udi na Bubinga Bulombola’mba I Myanda ya Bine?” (Kiteba kya Mulami, Kweji 8, 2018)
Le ukajingulula namani twaji ne bitango bikwatakanya Babiloni Mukatampe?
Le i bika bilongele balwana bamo mwanda wa kuzozeja lwitabijo lwetu?
Tanga nsekununi inena’mba, “Nadi Nkimba Leza Tamba pa Bwanuke,” umone mumpe wa mu kipwilo kya Shinto mwawenyongolwedile mu kipwilo kya bubela.
“Bible Ushintanga Būmi” (Kiteba kya Mulami, 1 Kweji 7, 2011)