Tulondei kimfwa kya bapolofeto ba Leza

“Ebiya, bānwe bāna betu, talaipo bidi, ku bapolofeto banenene mu dijina dya Mfumwetu ke kitompekejo kyenu kya kumweshibwa malwa abo batūkija ne mityima monka.”​—YAKOBA 5:10.

BENGIDI ba Yehova basepelelanga bininge nansha byenda bitandabuka ngikadila ifityija mityima kujokoloka ntanda yonso mu ano mafuku amfulo. Kidi uno muswelo mwanda bayukile’mba basangajanga Leza. Ba Tumoni twa Yehova kebazonzejangapo mityima mwanda wa lwāna ne kupangwapangwa pamwanda wa musapu obayukanyanga ku bantu bonso, bayukile’mba basusulwanga mwanda bakimbanga boloke. Yesu Kristu wāsapwidile balondi bandi amba: “Dyese dyo dyabo boba bakupangilwapangilwa pa mwanda uno wa boloke, ke-buntu bulopwe bwa mūlu i bwabo ne bwabopo. Dyese dyenu bānwe nenu shi bantu bakemunene, ne kwimupangapanga, kadi ne kwimubepela bya bubela pa mwanda wa amiwa uno. Nankyo mukasepelele ne ku mutyima to-ō, mwanda mpalo yenu i mikatampe, mūlu, ke-bantu kadi badi bapangapanga ne bapolofeto enka nankyo, boba ba kalā bemubadikile kumeso.” (Mateo 5:​10-12) Kyabine, kitatyi kyonso kitanwanga bengidi ba Leza na matompo pamwanda wa lwitabijo, bekimonanga bu nsangaji.​—Yakoba 1: 2, 3.

² Mwana-bwanga Yakoba wāsonekele’mba: “Ebiya, bānwe bāna betu, talaipo bidi, ku bapolofeto banenene mu dijina dya Mfumwetu ke kitompekejo kyenu kya kumweshibwa malwa abo batūkija ne mityima monka.” (Yakoba 5:​10) Ba W. F. Arndt ne F. W Ging­rich bashintulula kishima kya Kingidiki kitelwa bu “kimfwa” (hy·poʹdeig·ma) bu “kilomboji, kitompekejo, kimfwa, mu buluji bulumbuluke bu kintu kitonona nansha kifwaninwe kutonwena ku kwikiula.” Ka na mokilombwelwe mu Yoano 13:​15, “kino kitabukile kimfwa. I kilomboji kibajinji.” Dibuku dya Teoloji dishintulula Bishima bya mu Kipwanino Kipya. (Angele) Shi kepano, bengidi ba Yehova ba mu kino kyetu kitatyi, bakokeja kumona bapolofeto bandi bakikōkeji bu kimfwa na buleme bukatampe mu mwanda utala ‘kuminina bubi’ ne ‘kutukija mutyima.’ I kika kikwabo kyotukokeja kujingulula na kwifunda būmi bwabo? Ne kino kikokeja kwitukwasha muswelo’ka mu mwingilo wetu wa busapudi?

Bāuminine Bubi

³ Pavule, bapolofeto ba Yehova bādi bominina bubi nansha myanda imbi yobādi balongelwa. Kimfwa, mu myaka tutwa kitema K.K.K., amazia kitobo wādi utōta kana ka ñombe wādibulwile mupolofeto Amose. Amazia wādi ufwatakanya bubela’mba Amose wākutyile Yeloboame II kitumba na kutoba butobo’mba mulopwe ukafwa na kipete ne amba Isalela ukaselwa bu-misungi. Amazia wāsapwidile Amose na kafutululo kakatampe amba: “Abe umoni enda, nyemena muntanda ya Yuda, kabidi udye konka bidibwa, ne kufumika konka; ino kokafumikapo monka mu Betele; mwanda i kipandulwemo kya mulopwe, kadi i njibo ya bulopwe.” Amose kāuvwinepo moyo pamwanda wa bino binenwa bya bukalabale, wālondolwele’mba: “Amiwa nkyadipo mupolofeto nansha patyetye, nansha bu-mwana mupolofeto ami mhm; ino nādi mukumbi ne mwapudi wa bipa bya bikuyu; ino Yehova wangyata ko nādi nonda luombe, penepo Yehova waunena’mba: Enda bangila ku bantu bami bene Isalela.”​—Amose 7:​10-15.

⁴ Mushipiditu wa Yehova wāpele Amose bukomo bwa kutoba butobo na bukankamane. Langa bidi mwēuvwanine Amazia pāmusapwidile Amose’mba: “Ino pano namino kadi teleka kyakanwa kya Yehova: Abe ubanena wa’mba: Kokafumikapo padi Isalela, kadi kokatebula kinenwa kyobe pa njibo ya Isake; po pa mwanda wanenena Yehova namino amba: Mukaji obe ukekalanga mwitwa mu kibundi, ne bāna bobe bana-balume ne bana-bakaji bene bakapona ku kipete, ne ntanda yobe ikabanibwa pa monji; kadi ne abe mwine ukafwila mu ntanda ya disubi, ne Isalela binebine ukaselwa bu-misungi mu ntanda yandi.” Bwine bupolofeto’bwa bwāfikidile. (Amose 7:​16, 17) Bine, kapondo Amazia wāikele kutenekwa ku mutyima bininge!

⁵ Kino kidi muswelo umo na ngikadila ya bantu ba Yehova dyalelo. Tumininanga bubi mwanda tusapulanga misapu ya Leza, ne bantu bavule besambilanga pa mwingilo wetu wa busapudi na kafutululo. Kyabine, lupusa lwetu lwa kusapula lotupelwe kelutambangapo ku masomo a teoloji. Ino, mushipiditu sandu wa Yehova witutakikanga tusapule myanda miyampe ya Bulopwe. Ketwalamunangapo nansha kutyepeja mvubu ya musapu wa Leza. Inoko, pamo bwa Amose, twiusapulanga na kikōkeji nansha shi bomvwaniki netu balondolola muswelo’ka.​—2 Kodinda 2:15-17.

Bālombwele Butukanye

⁶ Bapolofeto ba Leza bālombwele butukanye. Kimfwa, Isaya wādi wingila bu mupolofeto wa Yehova mu myaka tutwa mwanda K.K.K. wādi na butukanye. Leza wāmusapwidile’mba: “Enda, ukasapwile bano bantu bano’ba amba: Kwivwana mwivwananga, ino kwivwanija mpika; kadi kumona nako mumonanga, ino’nka kumwenenejapo mpika. Wibalonge bano bantu bano’ba mutyima kulēma, kabidi ulēmeje matwi abo, ne kupūtyija meso abo, kutyina’mba bakamona ne meso abo, ne kwivwana ne matwi abo, ne kwivwanija ne mutyima wabo, ne kwalamuka monka, ne kūndapijibwa.” (Isaya 6:​9, 10) Kyabine, bantu bālondolwele enka uno muswelo. Lelo kino kyāubije Isaya? Mhm. Ino, wādi usapula na butukanye ne na bupyasakane misapu ya kidyumu kya Yehova. Mu Kihebelu binenwa bya Leza bitelelwe kungala’bi bilombola mulangwe wa “kwendelela mu kitatyi kilampe” kwa misapu ya mupolofeto, yādi yumvwana bantu “monka na monka.”​—Gesenius Hebrew Grammar.

⁷ Dyalelo bantu bavule balondololanga ku myanda miyampe pamo’nka na mwālondolwele bantu ku binenwa bya Yehova byebāyukenye Isaya. Inoko, pamo bwa uno mulopofeto wa kikōkeji, tujokelanga mu musapu wa Bulopwe “monka na monka.” Twendelelanga na kwikilonga na bupyasakane ne butukanye mwanda i kiswamutyima kya Yehova.

‘Bālongele Monka’

⁸ Mupolofeto Mosesa wādi kimfwa kilumbuluke kya butukanye ne kikōkeji. Wātongele kwikala ku mutamba umo na bene Isalela bādi mu bupika, ino wādi ufwaninwe kwilaija na butukanye kitatyi kya bunyongolodi bwabo. Wāshikete mu ntanda ya Madiana umbula bwa myaka 40 kufika ne pāmwingidije Leza mwanda wa kuludika bene Isalela tamba mu bupika. Pādi Mosesa ne tutu wandi Alone kumeso kwa muludiki wa Edipito, bānene ne bālongele na kikōkeji byobya byebālombwele Leza. Kyabine, ‘bālongele monka.’​—Divilu 7:​1-6; Bahebelu 11:​24-29.

⁹ Mosesa wāuminine na butukanye myaka 40 mikomo bininge yāpityije bene Isalela mu ntanda mutuputupu. Kadi wālondele misoñanya ya Leza na kikōkeji pāshimikile madabahu a bene Isalela ne kupunga bintu bikwabo byādi bingidijibwa mu mutōtelo wa Yehova. Uno mupolofeto wālondele kamo ne kamo mu misoñanya ya Leza yo tutanga’mba: “Enka namino e mwalongele Mosesa; monka mwendele byonso byamusoñaninye Yehova, e mwālongele.” (Divilu 40:16) Shi kepano, mu kuvuija mwingilo wetu pamo na bulongolodi bwa Yehova, tuvuvukei kikōkeji kyādi na Mosesa ne twingidijei madingi a mutumibwa Polo unena’mba: “Kōkelai boba bemulelele.”​—Bahebelu 13:17.

Bādi na Ngikadila ya Kumona Myanda Enka Mubuyampe

¹⁰ Bapolofeto bādi basakilwa kwikala na ngikadila ya kumona myanda enka mubuyampe pobādi bayukija misapu ya butyibi pamo ne bupolofeto bwādi bulombola Buswe bwa Leza pa bantu bakikōkeji bādi bakusankene mu Isalela. Kino kyājingulwilwe mu mwanda wa Hosea, wādi mupolofeto umbula bwa myaka kupita 59. Na kumona myanda enka mubuyampe, wāendelele na kusapula misapu ya Yehova ne wāfudije dibuku dyandi dya bupolofeto na bino bishima: “Lelo yewa wañeni i ani? aye ukevwanijanga bino bintu bino’bi, lelo yewa mudyumuke i ani? aye ukebiyukanga, mwanda mashinda a Yehova i moloke, kabidi boloke bakanangila monka; ino bakujilula bakaponenamo.” (Hosea 14:​9) Bikitupele Yehova lupusa lwa kusapula, nanshi twikalei na ngikadila ya kumona myanda enka mubuyampe ne kwendelela na kukimba boba bakekala na tunangu twa kwitabija kyabuntu kya kanye ka Leza.

¹¹ Pa ‘Kukimba bantu bakusaka kuyampe,’ tusakilwa kuminina ne kumona myanda enka mubuyampe. (Mateo 10:11) Kimfwa, shi twājimije mfungulo yetu, tufwaninwe kujokela motwapishile ne kukimba mu bifuko bishileshile motwadi. Tukokeja kwiimona enka pakupwa kwa kujokelamo misunsa mivule. Shi kepano, tumininei muswelo umo onka mu kukimba mikoko ya kyelekejo. I nsangaji ya muswelo’ka yotumvwananga poilondololanga ku myanda miyampe mu bipindi bingilwangamo kitatyi ne kitatyi! Ne twikalanga na nsangaji mikatampe bininge na kumona’mba Leza weselanga mwingilo wetu mu matanda mwādi mupelejibwe mwingilo wetu wa busapudi ku bantu bonso!​—Ngalatea 6:10.

Nsulo ya Bukankamane

¹² Binenwa bya bapolofeto ba Yehova bikokeja kwitupa bukankamane bukatampe mu mwingilo wetu. Kimfwa, tubandaulei bupolofeto bwa Yoela. Mudi misapu ya butyibi yāsapwidilwe tupondo twa mu Isalela ne tupondo tukwabo mu myaka tutwa kitema K.K.K. Ino Yoela wātobele monka butobo ku bukomo bwa mushipiditu amba: “Byobiya kadi kikafika nenki, pakupita’byo [Yehova] nkapungulula Mushipiditu wami pa ngitu yonsololo; penepo benu bāna bāna-balume ne bana-bakaji bene bakafumika, banunu bana-balume benu bakalota bilotwa, ne bansongwalume benu bakamona bimonwa. Kabidi ne pa bapika nabo bana-balume ne bana-bakaji mu oa mafuku nkapungulula Mushipiditu wami.” (Yoela 2:​28, 29) Kino kyājingulwilwe pa balondi ba Yesu kushilwila mu pentekota wa mwaka wa 33 K.K. Tumonanga kufikidila kukatampe bininge kwa buno bupolofeto mu kino kyetu kitatyi! Dyalelo tudi na ma miliyo a bantu “batoba butobo” nansha basapula musapu wa Yehova​—umbukata mwabo mudi bantu kupita 600 000 bavuijanga mwingilo wa kitatyi kyonso.

¹³ Basapudi bavule ba Bulopwe i bansongwazele. Kekibapēlelangapo kwisamba na bantu batame pamwanda utala Bible. Kitatyi kimo-kimo bengidi ba Yehova bansongwazele basapwilwanga’mba: ‘Upityija kitatyi kyobe bitupu mu kusapula,’ ne amba ‘ufwaninwe kulonga mingilo mikwabo.’ Bansongwazele ba Tumoni twa Yehova padi bakokeja kwingidija manwa ne kulondolola’mba bafitwanga mutyima bininge kuvwana milangwe ya uno muswelo. Nsongwalume umo musapudi wa myanda miyampe wāmwene’mba kikamukwasha na kutentekelapo’mba: “Mwenanga kamweno kakatampe mu kwisamba na bantu batame pamo bwa abe, ne kinsangajanga bininge.” Kyabine, kusapula myanda miyampe kekujimijapo kitatyi bitupu. Būmi bwa bantu budi mu kyaka. Kupityila padi Yoela, Leza wānene monka’mba: “Ebiyampe kikafika nenki enselele ukēta dijina dya Yehova ukanyongololwa.”​—Yoela 2:32.

¹⁴ Bāna bashinjikilanga babo bambutwile mu mwingilo wa busapudi bwa Bulopwe basangelanga bukwashi bwa bambutwile mu kwitungila bitungo byabo byakasuku. Bano bankasampe bendelelanga kumeso bityebitye, ku ngalwilo, bādi batanga enka kisonekwa kupwa, bashilula kuyukija nsulo ya kikulupiji kyabo kimanine pa Bible ne kupāna mikanda mifwaninwe ku bantu basangela musapu. Pobamonanga muswelo obendelela kumeso ne madyese obeselwanga na Yehova, bankasampe basapudi ba Bulopwe bekalanga na nsangaji mikatampe mu kusapula myanda miyampe.​—Mitoto 110:3; 148:​12, 13.

Bupyasakane ne Ngikadila ya Kwelaija

¹⁵ Bapolofeto ba Leza bādi monka bimfwa bilumbuluke mu kulombola bupyasakane ne ngikadila ya kwelaija​—tuyukeno totufwaninwe kwikala nato mu mwingilo wetu wa busapudi. Potwēfundile bubinebine musunsa umbajinji mu Kinenwa kya Leza, bine twādi na bupyasakane bwādi bwitutonona twisambe na kininga. Ino, tamba kitatyi kyotwāshilwile kwifunda Bible, padi kepadi myaka, padi ketwibasapule kala mu kyetu kipindi misunsa mivule. Pakwabo enka bantu batyetye bokebetabije musapu wa Bulopwe. Lelo kino kityepejanga bupyasakane bwetu? Shi kidi namino, tubandaulei kimfwa kya mupolofeto Ezekyele, wa dijina dishintulula’mba “Leza upāna kininga.” Nansha Ezekyele byātenwe na bantu ba mityima mikomo mu Isalela wakalā, Leza wāmupele kininga ne mu kyelekejo tukanena’mba wākomeje mpala yandi kupita ne dibwe. Mu uno muswelo, Ezekyele wādi na bukomo bwa kukasapula musapu wandi ku bantu bavule, kupwa kwa myaka mivule kupitapo nansha shi bantu bādi beuvwana nansha shi bādi beupela.​—Ezekyele 3:​8, 9; 2 Temote 4:5.

¹⁶ Kimfwa kitulumukwa bininge kyāmupele butukanye, i kya Mika wātobele butobo mu myaka tutwa mwanda K.K.K. Wāsonekele’mba: “Ino ami nami nkatala kudi Yehova; nkakungila Leza wa lupandilo lwami; Leza wami ukangivwana.” (Mika 7:7) Kikulupiji kyādi na Mika kyādi kitamba ku miji ya lwitabijo lwandi lukomo. Pamo bwa mupolofeto Isaya, Mika wādi uyukile’mba kyonso kilaya Yehova, pakubulwa kwalakana, Ukekifikidijanga. Netu twikiyukile. (Isaya 55:11) Shi kepano, tutamijei ngikadila ya kwelaija kufikidila kwa milao ya Leza. Ne tusapulei myanda miyampe na bupyasakane, nansha mu bipindi mudi bantu balombola kusaka kutyetye mu musapu wa Bulopwe.​—Tetusa 2:14; Yakoba. 5:​7-10.

Kulombola Butukanye mu Ano Etu Mafuku

¹⁷ Bapolofeto bamo-bamo ba Yehova bāendeleje mingilo yabo na butukanye umbula bwa myaka mivule ino kebāmwenepo kufikidila kwa bupolofeto bwabo. Ino, kwendelela na kuminina kwabo na butukanye, pavule nansha byobādi basusulwa, kwitukwasha tuyuke’mba netu tukokeja kuvuija mwingilo wetu. Tukokeja monka kumwena mu kimfwa kya bashingwe māni bakikōkeji bādiko umbula bwa makumi a myaka imbajinji mu kino kyetu kitatyi. Nansha shi kikulupiji kyabo kya kukekala na būmi momwa mūlu kekyāfikidilepo bukidibukidi mobādi bekilangila, nansha byokyāmwekele bu kyāijije, ino kekyātyepejepo bupyasakane bwabo bwa kulonga kiswamutyima kya Leza mwēbalombwedilekyo.

¹⁸ Umbula bwa myaka, bavule ba mu bano bakristu bāabenye Kiteba kya Mulami ne mulunda nakyo Amkeni!, (wādi utelwa pakalā bu Miaka ya Nsahabu (Angele) ne mafuku pakupitapo bu Kusengwa ku Mutyima. Bāpene ino mikanda ya mvubu ku bantu mu mashinda ne ku mobo abo, kyo kyotutelanga dyalelo bu kupāna milami. Pafwile kaka umo mununu wādi na kibidiji kya kupāna bukamoni mu dishinda, bantu bādi bapityila mu dine dishinda’dya bājingulwile lufu lwandi. Wāshile bukamoni buyampe bininge umbula bwa myaka mivule yādi usapula na kikōkeji, mwikilombwela binenwa bya kwanya byānene boba bādi balonda busapudi bwandi bwa ku bantu bonso! Byodi musapudi wa Bulopwe, lelo upānanga Kiteba kya Mulami ne Amkeni! kitatyi ne kitatyi ku bantu bowisambakananga nabo mu mwingilo obe wa busapudi?

¹⁹ Tubandaulei monka butukanye ne mwingilo wa kikōkeji wa bana betu bengilanga ku Kitango Kyendeji kya ba Tumoni twa Yehova. Bavule umbukata mwabo pano kebadi na myaka 80 nansha 90 ya būmi bwabo, ino ne pano bakidi basapudi ba Bulopwe bakwatakanya biselwa byabo na bupyasakane. (Bahebelu 13:7) Lelo tukanena namani pamwanda wa bakulumpe bakwabo badi na kikulupiji kya kukekala na būmi momwa mūlu pamo ne bamo-bamo umbukata bwa “mikoko mikwabo” kebadi na myaka mivule? (Yoano 10:16) Bakokeja kukulupila’mba Leza kakokejapo nansha dimo kwingidija bukondame ne kwilwako mingilo yabo ne buswe bobalombolanga pamwanda wa dijina dyandi. Shi kepano, ba Tumoni twa Yehova batame, pamo ne balunda nabo ba mu lwitabijo bankasampe, bendelele na kulonga byobakokeja kubwanya, kwingidija lwitabijo ne kulombola butukanye mu mwingilo wa Leza. (Bahebelu 6:​10-12) Namino, ikale kupityila ku lusangukilo, mokikalongelwa bapolofeto bapakalā, nansha na kupanda ku “kyamalwa kibuke” kitutengele, bakatambulanga, mpalo milumbuluke ya būmi bwa nyeke.​—Mateo 24:21.

²⁰ I kimfwa kilumbuluke kashaa kyētushidile bapolofeto ba Leza! Mwanda bāuminine masusu, bādi na butukanye, ne bālombwele ngikadila mikwabo ya Leza, bādi na madyese a kwisambila mu dijina dya Yehova. Byotudi ba Tumoni twandi twa mu kino kyetu kitatyi, twikalei pamo bwa abo ne kwikala basumininwe pamo bwa mupolofeto Habakuka wānene’mba: “NKEMANA pa bulami bwami, ne kwibika pa kitēba’kya; kadi nkēla meso kumona kyakesamba [Leza] nami, ne kyo nkalondolola mungya mwanda wami.” (Habakuka 2:​1) Twikalei na kusumininwa kwa muswelo umo na kwingidija butukanye ne kwendelela na nsangaji kuyukanya ku bantu bonso dijina dikatampe dya Umpangi wetu Mukatakata, Yehova!​—Yelemia 8:10; Loma 10:10.

1. I kika kikwashanga bengidi ba Yehova bekale na nsangaji nansha byobekalanga bapangwapangwa?

2. Kukwatañana na Yakoba 5:​10, i kika kikokeja kwitukwasha twikale na butukanye?

3, 4. I muswelo’ka wālondolwele mupolofeto Amose ku binenwa bya Amazia bya kapikululo?

5. I kwenzakana’ka kudi umbukata bwa ngikadila ya bengidi ba Yehova ba mu kino kyetu kitatyi ne ya mupolofeto Amose?

6, 7. (a) I myanda’ka yādi mu bupolofeto bwa Isaya? (b) Bengidi ba Yehova ba mu kino kyetu kitatyi bengilanga pamo bwa Isaya muswelo’ka?

8, 9. Mosesa mupolofeto wa Yehova wādi kimfwa kilumbuluke mu myanda’ka?

10, 11. (a) I kika kilombola’mba mupolofeto Hosea wādi umona myanda enka mubuyampe? (b) I muswelo’ka otukokeja kumona myanda enka mubuyampe kitatyi kyotukasapulanga ku bantu ba mu kyetu kipindi?

12. I bupolofeto’ka bwa Yoela bufikidila mu kino kyetu kitatyi ne muswelo’ka?

13, 14. I kika kikokeja kukwasha bansongwazele basangele mwingilo wa busapudi?

15. Kimfwa kya Ezekyele kikokeja kwitukwasha muswelo’ka tutamije bupyasakane bwetu mu kuvuija mwingilo wa busapudi bwa Bulopwe?

16. I ngikadila’ka yādi na Mika yotufwaninwe kutamija?

17, 18. I bimfwa’ka byakalā ne bya mu kino kyetu kitatyi bikokeja kwitukwasha twikale batukanye?

19. Bahebelu 6:​10-12 witukankamika muswelo’ka?

20. (a) I kika kyowifundile mu “bimfwa” bya bapolofeto? (b) Kwikala na butukanye na bwādi na bapolofeto kikokeja kwitukwasha muswelo’ka?

[Bilembwa bya pa Bifwatulo]

Nansha Amazia byākalabele bininge na kapikululo, mushipiditu wa Yehova wāpele Amose bukankamane bwa kutoba butobo

Bakristu bakikōkeji bashingwe māni bāshile kimfwa kilumbuluke na kwingidija butukanye mu mwingilo wa Yehova

Lelo Ulamine Ino Milangwe?

◻ Mupolofeto Amose wāshile kimfwa’ka kya bukankamane?

◻ Mosesa mupolofeto wa Yehova wādi kimfwa kilumbuluke mu myanda’ka?

◻ Bengidi ba Yehova ba mu kino kyetu kitatyi bengilanga pamo bwa Amose ne Isaya muswelo’ka?

◻ Basapudi bakristu bakokeja kwifunda kika mu mwiendelejo wa Hosea ne Yoela?

◻ I muswelo’ka otukokeja kumwena kamweno mu kimfwa kya Ezekyele ne Mika?