“Yehova Kakēlapo Bantu Bandi”

“Byamalwa bya moloke i bya ntanda ne ntanda; ino Yehova umunyongolola mu byonsololo.”​—MITŌTO 34:19.

BUPOLOFETO bwa mu Bible i bufikidile, pano batōtyi ba Yehova bashikete mu paladisa ya kumushipiditu. (2 Kodinda 12:​1-4) Batumoni ba Yehova kujokoloka ntanda yonso badi mu kipwano kya bulunda kiyukena ku buswe ne ku bumo bwabo. (Yoano 13:35) Badi na buyuki buvule kadi bukunkane bwa Bible. (Isaya 54:13) Bine, bafwijanga’ko Yehova pakatampe, mwanda wibapele kyepelo kya kutambulwa’bo mu dipema dyandi dya kumushipiditu!​—Mitōto 15:1.

² Eyo, nansha bantu bonso badi mu bulongolodi bwa Yehova byobamona kutubuluka kwa kumushipiditu, ino na bubine bamo bamwekanga bu badi na ndoe, bashikete ku matwi talala nyā mu myanda imoimo, ebiya bakwabo nabo bekonda na bikoleja bya miswelo ne miswelo. Bene Kidishitu bavule bafikilwanga na ngikadilo ya bulanda mu bula bwa kitatyi kilampe, ino kumona’bo kintu kya kwibasenga mpika. Bine, kupungija mutyima mu ngikadilo ya uno muswelo i kwendele’mo. (Nkindi 13:12) Lelo kumona malwa namino kulombola amba Leza wetufityilwa mutyima? Lelo Yehova ukiñanga bene Kidishitu bamobamo mu muswelo wa pa bula, bakwabo webela?

³ Bible ulondolola’mba: “Kadi pa kutompibwa kekukinena nansha umo’mba: Natompibwa na Leza; mhm; ke-muntu Leza kayūkilepo kutompibwa ne bubi, ne aye mwine mo monka katompangapo muntu, mhm.” (Yakoba 1:13) Yehova i Mpakala ne Ngabo ku bantu bandi. (Mitōto 91:​2-6) “Yehova kakēlapo bantu bandi.” (Mitōto 94:14) Kino kekishintululapo amba batōtyi bakikōkeji kebakafikilwapo na masusu. Ngikadilo ya ntanda ya dyalelo iludikwanga na bantu bāpyene kubulwa kubwaninina. Bavule i boneke, bakwabo nabo i babipidile bipēe. I kutupu nansha umo umbukata mwabo ulombanga kupebwa tunangu na Yehova. Kino kyo kiletela bantu masusu makatampe. Bible i munene pakubulwa kafinda amba, bantu ba Yehova kebakokejapo kwepuka nyeke byamalwa bilupuka ku kubulwa kubwaninina ne ku bubi bwa bantu.​—Bilongwa 14:22.

Bene Kidishitu Badikōkeji Beyukile Amba I ba Kususuka

⁴ Nansha balondi ba Yesu byokebadipo mu bya ntanda, ino badi umbukata mwa ino ngikadilo ya bintu. (Yoano 17:15, 16) Satana utelelwe mu Bible bu ye mwine utādīle ino ntanda. (1 Yoano 5:​19) Omwanda bene Kidishitu bonso bayukile amba, dyakadilwe kantu dino’di, bakafikilwa na makambakano makomokomo. Mutumibwa Petelo wādi uyukile kino, omwanda wānene amba: “Tūkijai mityima, tengelai, wimushikilwe, ke dyabola kadi, unangakana bwa ntambo ubuluma, ukimba wakubokota. Ino aye mukomenei ne bukankamane bwa mu kwitabija kwenu, pa kuyūka’mba i misongo īmo yonka īmonwa ne ku bāna benu badi panopantanda.” (1 Petelo 5:​8, 9) Bine, kitango kyonso kya bene Kidishitu kiyukile amba i kya kususuka.

⁵ Nansha shi tusenswe Yehova bininge ne kwikala badikōkeji ku misoñanya yandi, tuyukei’tu amba tukafikilwa na myanda ya bulanda umbūmi. Yesu wālombwele kino kintu patōka mu kyelekejo kyandi kidi mu Mateo 7:​24-​27, mwaālombwele kwishila kudi pa bukata bwa boba bakōkela ku binenwa byandi ne boba bakubulwa kukōkela’ko. Wāenzankenye bana-babwanga bakikōkeji na muntu wamanwa ūbaka njibo pa mwala wa dibwe. Ino boba bakubulwa kukōkela ku binenwa byandi wēbēnzankenye na muntu mwendalale ūbaka njibo yandi umusenga. Kimpumpu pa kupukuma, kwapanda enka njibo yūbakilwe pa dibwe kete. Ivwana, ne ku njibo ya muntu wamanwa nako, “mvula [w]anokele, ne minonga nayo yaleta, bivula nabyo byatetuka, ke bikupila ku yoya njibo ne kupona mpika.” Yesu kālailepo amba muntu wamanwa ukekala nyeke na ndoe, ushikete talala nyā, ehe. Ino, wānene amba manwa a uno muntu o akamupa bwino bwa kwiteakanya ku kimpumpu. Tutana mulangwe umo onka mu kyelekejo kya mukushi wa nkunwa. Yesu ushintulula’mo amba nansha ke batōtyi bakikōkeji ba “mutyima umo wa kunengela” bene nabo “bapanga bipa ne [kūminina] ponka.”​—Luka 8:​4-​15.

⁶ Pātumine mutumibwa Polo mukanda kudi bene Kodinda, wāingidije muneneno wa kyelekejo mwanda wa kushintulula mvubu ya kwikala na ngikadilo milumbuluke yaendaenda ikokeja kwitupa muswelo wa kunekenya bikambija. Wādingakenye byūbakwa nabyo kebipi mudilo pamo bwa nsahabu, ndalama, ne mabwe makwabo a bulēme, na ngikadilo ya bwine Leza. (Enzankanya na Nkindi 3:​13-​15; 1 Petelo 1:​6, 7.) Ku mutamba mukwabo, wādingakanya mingilo ya bungitu na byūbakwa nabyo bikokeja kutema. Omwanda Polo wānene amba: “Mīngilo ya bantu bonso, wa yandi, wa yandi, īkasokokela pa tōka, ke-dintu dyodya difuku dikasokolanga’yo, ke-mintu i misokolwe na mudilo; kadi ne mudilo ukatompa mīngilo ya bantu bonso, wa yandi, wa yandi, shi wa muswelo ka, shi wa muswelo ka. Shi mīngilo ya muntu yāshimikile yopoke, nabya ukamonanga mpalo.” (1 Kodinda 3:​10-​14) Pano napo, Bible ushintulula amba batwe bonso twi ba kutanwa na matompo makomo.

⁷ Mu Bible mudi nsekununi mivule ya bengidi ba Leza badikōkeji bāikele kūminina mu malwa, pakwabo umbula bwa kitatyi kilampe. Ino, Yehova kēbelelepo. Kekubulwe padi byo bimfwa byādi bivuluka Polo paānene amba: “Ke-bintu byonsololo byasonekelwe kala byasonekelwe mwanda wa kwitufundija’mba, pa kutūkija mutyima, ne pa kusengibwa na bisonekwa, twikale ne kukulupila.” (Loma 15:4) Tubandaulei bidi bimfwa bya bana-balume basatu, bāmwene malwa mavule nansha byobādi mu kipwano kya pabwipi na Leza.

Ñeni Yotuboila mu Bible

⁸ Yosefa mwanā Yakoba, tamba ku bwanuke bwandi, bāmutokelwe pa mutyima kudi Yehova. Ino wāmwene malwa ādi elonda lunkunkwa mulongo, pakubulwa mwanda umbi waālongele. Wāselelwe ne kususulwa na banababo. Bāmupoteja bu umpika mu ntanda ya bweni, ebiya wāsambilwa’mo byabubela, ne kumwela bāmwela mu “kifungo kya lubao.” (Ngalwilo 40:15) Mwine’mwa, “maulu andi basanshije ne bikulo; waelelwe mu nkano ya bilonda.” (Mitōto 105:17, 18) Ino kitatyi kyonso kyādi Yosefa mu bupika, mukutwe mu kifungo, wādi nyeke wabija Yehova amunyongolole. Eyo, nansha byaādi ukankamikwa na Yehova mu miswelo mishileshile, ino wālele myaka 13 mituntulu, lubanga ne lubanga ulangukila’nka mu bupika, mukutwe.​—Ngalwilo 37:2; 41:46.

⁹ Davida nandi monka na monka. Kitatyi kyādi kitonga Yehova muntu ubwenye bisakibwa wa kuludika Isalela, wānene’mba: “Nasokola Davida mwana Yese, muntu wa monka mwendele mutyima wami.” (Bilongwa 13:22) Ino Davida wāsusukile bininge, nansha byāmutōkelwe Yehova pa mutyima. Wālele myaka mivule mu kyakanwa kya lufu, wenda ufyamakana mu ntanda mutuputupu, mu mitá, mu binkolankola, ne mu ntanda ya bweni. Wāsusukile na mpungiji ne moyo pobādi bamulondalonda pamo bwa nyema wa ntanda. Inoko, wādi ūminina na bukomo bwa Yehova. Omwanda Davida, pa kuvuluka bino byonso byādi bimufikila, wānene amba: “Byamalwa bya moloke i bya ntanda ne ntanda; ino Yehova umunyongolola mu byonsololo.”​—Mitōto 34:19.

¹⁰ Mu mafuku a mupolofeto Ediya, mu Isalela mwādi enka bantu 7 000 kete bāpelele kufukatyila Bala, leza wabubela. (1 Balopwe 19:18; Loma 11:4) Nabote, wādi umo umbukata mwabo, wāmwene malwa pangala pa mboloji. Wāikele kufwijibwa bumvu bwa kubepelwa amba udi na mutonko. Kupwa kumuponeja amba i kipya-mambo, bāmutyibila nsambu kudi mulopwe amba epaibwe lwa kwaswa mabwe, wāipaibwa, mashi andi ālakwa na bambwa. Ne bandi bana bene bāipailwa kumo! Bine, aye kādipo na mwanda. Batumoni bāmutemwinine myanda bādi bambepai. Mwanda mwine wādi’po i uno, Muntwabene Yezelele ye wākutyile kitumba kya kwipaya Nabote, amba mulopwe ashale amuyate budimi bwa mañanza.​—1 Balopwe 21:​1-​19; 2 Balopwe 9:​26.

¹¹ Yosefa, Davida, ne Nabote i bantu basatu kete batelwa, ino kudi bantu bavule bene bakikōkeji, bana-balume ne bana-bakaji, bāmweshibwe malwa batelelwe mu Bible. Mutumibwa Polo wāsonekele mukanda wa kupituluka mu lusango lwa bengidi ba Yehova bakala mungya nkongo yabo. Mu uno mukanda ye amo mwaātelele boba “batompelwe ne byakibengo, ne bikupilwa kutentekelwapo, ne nkano, ne bifungo, bāshibwa mabwe, bangi nabo baladibwa lupasu umbukata; aba batompibwa, aba batapibwa ku lupete, bangi benda bapōtakana, bavwele biseba bya mikōko ne bya bambuji; bafudilwa, ne kususulwa ne kumweshibwa malwa. (Nanshi panopantanda kepafwaninwepo ne abo, mhm) badi ke bapōtakana bibi muntanda mutuputupu, ne mu ngulu, ne mu mita, ne mu mēna a panshi.” (Bahebelu 11:36-​38) Ino Yehova kēbelelepo.

Yehova Ukwatakanyanga Boba Basusuka

¹² Lelo kidi namani ku bantu ba Yehova dyalelo? Tudi mu bulongolodi bwandi, omwanda tufwaninwe kukulupila amba Leza udiko wa kwitukinga ne kwitupityija senene mu ano mafuku a kumfulo ne pa kyamalwa kibūke. (Isaya 54:17; Kusokwelwa 7:​9-​17) Inoko, byotudi bantu, tuyukei amba ‘bitatyi ne bimyanda bya mu kitulumukila’ bifikilanga bantu bonso. (Musapudi 9:​11) Dyalelo kudi bene Kidishitu bavule bakikōkeji bamona malwa. Bamobamo badi mu bulanda bwa mu meso fututu. Bible wisambila pa bene Kidishitu ‘bana banshiye ne bana-bakaji bakishala’ badi mu byamalwa. (Yakoba 1:​27) Bakwabo basusuka pangala pa bimpengele bya ntanda, mavita, butapani, kōnwa ku bukomo, misongo, ne lufu.

¹³ Kimfwa, mu lapolo watuminwe ku Kitango Kyendeji kya Batumoni ba Yehova mu 1996, misambo ya Watch Tower yalombwele’mo amba, batutu ne bakaka bamobamo basusuka mu bifungo mu ngikadilo isansa mutyima, mwanda wa lulamato lwabo lobalamete ku misoñanya idi mu Bible. Bipwilo bisatu bituntulu bya mu Amerika wa Kunshi byapalankene mpala mpala kitatyi kyaile bibumbo bya bajenese byavilwile Batumoni bavule mu mwaba wabo ku bukomo. Mu ntanda imo ya mu Afrika wa Kushika, Batumoni bamo bakwetwe kitatyi kya bulwi bwa basivile na basivile, baipaibwa. Mu ntanda imo ya mu Amerika wa pa Bukata, bufudile bwa kubulwa kwa lupeto bwadi’mo kala banabetu bwabipīle’ko mpata na kimpengele kyebafikile kya kimpumpu kya luvula lwa malwa. Mu bifuko bikwabo, bulanda ne bimpengele bya nzala i bityetye’mo, ino namo lupusa lubi lo lubikele’mo lukokeja kujimijija bamo nsangaji. Bakwabo balēmenenwa na būmi bwa dyalelo. Bakwabo nabo bakokeja kupungila pa kumona buñumauma budi na bantu bobasapwila myanda miyampe ya Bulopwe.

¹⁴ Ino ngikadilo yonso keilombolangapo amba Leza wetufītyilwa mutyima. Vuluka kimfwa kya Yoba ne malwa mavule aāmwene. Wādi “muntu moloke ne wampikwa kakoba.” (Yoba 1:​8, BB) Ino Yoba wātyumwinwe umbidyoma pa kwivwana Edifaza umushinga kishoto kya bu nonga-bibi! (Yoba shapita 4, 5, 22) Nansha shi byamalwa bibetutana, ketufwaninwe kwiyumba kunena amba kudi kintu kampanda kyotulongele kyafityija Yehova mutyima, nansha amba mwanda Yehova wetusonsolola madyese andi. Kwifwatakenya bibi mu kitatyi kya byamalwa kukokeja kuzozeja lwitabijo lwetu. (1 Tesalonika 3:​1-3, 5) Kitatyi kyotufikilwa na kinzengele, i kiyampe kulanguluka pa kino, Yehova ne Yesu badi kubwipi na bantu boloke mu ngikadilo yo-yonso yobatanwa’mo.

¹⁵ Mutumibwa Polo witukankamika panena’mba: “Lelo uketukalañanya ne lusa lwa Kidishitu i ani? I bumona-malwa’ni, i bufudile, i kupangwapangwa’ni, le i nzala, i mutaka’ni, i mu kyakanwa kya lufu, i lupete lwa butapa[ni]’ni? . . . Ami ne musumininwe byamwiko, na’mba: Nansha lufu, nansha būmi, nansha bamwikeulu, nansha bēne bakatampe bene, nansha bintu bidipo panopano, nansha bikāyako kumeso, nansha bilobo, nansha bula bwa mūlu, nansha bula bwa panshi, nansha kipangwa kikwabo, shi kika, shi kika, kikamona mwakwitukalañanya ne lusa lwa Leza, ludi mudi Kidishitu Yesu Mfumwetu.” (Loma 8:​35, 38, 39) Yehova witutele mutyima bininge, kadi uyukile masusu etu. Davida wāsonekele, kitatyi kyaādi wenda unyemakana, amba: “Meso a Yehova adi pa boloke, kadi matwi andi nao i majikuke ku lwito lwabo. Yehova udi pa bwipi na boba ba mutyima mutyumuke.” (Mitōto 34:15, 18; Mateo 18:​6, 14) Tata wetu wa mūlu witukwatakanyanga, ne kadi ukwatyilwanga boba basusuka lusa. (1 Petelo 5:​6, 7) Witupanga bintu bya kwitupa bukomo bwa kunekenya masusu o-onso akokeja kwitutana.

Byabuntu bya Yehova Bitukwashanga

¹⁶ Eyo, tuyukile amba ketubwanyapo kwikala na būmi bwampikwa byamalwa mu ino ngikadilo ya bintu ke minunu, ino ‘ketwelelwepo.’ (2 Kodinda 4:​8, 9) Yesu wālaile kupa balondi bandi mukwashi. Wānene’mba: “Nami nkalomba kudi Tata ino aye ukemupa Nsenga-mukwashi mukwabo wakwikala nandi mafuku onso nyeke. Ke mushipiditu wa binebine kadi.” (Yoano 14:16, 17) Mu difuku dya Pentekosa mu mwaka wa 33 K.K., mutumibwa Petelo wāsapwidile bemvwaniki bandi amba bādi bakokeja kutambula “kyabuntu kya mushipiditu sandu.” (Bilongwa 2:​38) Lelo mushipiditu sandu witukwashanga ne batwe dyalelo? Eyo witukwashanga! Bukomo bwingila bwa Yehova bwitupanga bipa bilumbuluke: ‘Buswe, nsangaji, ndoe, kitūkijetyima, kanye, buyampe, lwitabijo, kutalala, kwifula.’ (Ngalatea 5:​22, 23) Ino yonso i ngikadilo ibwanya kwitukwasha tūminine.

¹⁷ Kadi mushipiditu sandu witupanga muswelo wa kwivwanija amba, ano malwa otumona dyalelo i “apela, kadi i a kakitatyi katyutyutyutyu” pa kwiadingakanya na mpalo ya būmi bwanyeke. (2 Kodinda 4:​16-​18) Twi bayuke biyampe amba Leza kakavulaminwapo mingilo yetu ne buswe botumulombola. (Bahebelu 6:​9-​12) Potutañanga binenwa bya ku bukomo bwa mushipiditu bidi mu Bible, tuseñwanga pa mutyima na bimfwa bya bengidi bakikōkeji ba mu kitatyi kya kala bāuminine mu malwa mavulevule, ino bātelwa bu badyese. Yakoba usonekele amba: “Bānwe bāna betu, talaipo bidi, ku bapolofeto banenene mu dijina dya Mfumwetu ke kitompekejo kyenu kya kumweshibwa malwa abo batūkija ne mityima monka. Monaipo bidi, byo tutela boba [bāuminine’mo] bu-badyese.” (Yakoba 5:​10, 11) Bible ulaile kwitupa ‘bukomo butabukile pa bukomo bwa bantu’ mwanda wa tuminine mu matompo. Kadi Yehova i mwitwesele na kwitupa kikulupiji kya lusangukilo. (2 Kodinda 1:​8-​10; 4:7) Kutanga Bible difuku ne difuku ne kulanguluka pa ino milao, kukomeja lwitabijo lwetu ne kusumininwa kwetu kwa kutengela Leza na kitūkijetyima.​—Mitōto 42:5.

¹⁸ Kadi, Yehova witupele paladisa ya kumushipiditu yotukokeja kuloelelwa’mo buswe bwabinebine bwa batutu ne bakaka. Batwe bonso tudi na kiselwa kya kwikankamika umo ne mukwabo. (2 Kodinda 1:​3, 4) Nakampata, batadi bene Kidishitu bo bene bafwaninwe kwikala nsulo mikatampe ya busengi, ba kutalaja bakwabo mityima. (Isaya 32:2) Abo i ‘bantu bu byabuntu,’ bapelwe mwingilo wa kūbaka boba basusuka, ‘kukankamika bampungiji ya ku mutyima’ ne ‘kukwasha bakōkekōke.’ (Efisesa 4:​8, 11, 12; 1 Tesalonika 5:​14) Bakulumpe bakankamikwa kwingidija senene mapepala a Kiteba kya Mulami ne Amkeni!, ne mabuku makwabo otupebwa kupityila kudi ‘umpika wabinebine ne wamanwa.’ (Mateo 24:45-​47) Mo amo mutanwa madingi a ntanda ne miseke emanine pa Bible, etupanga manwa a kuyuka mwa kupwijija​—nansha mwa kwepukila​—makambakano amoamo etuzumbijazumbija mityima. Bine, twiulei Yehova, twisengei ne kwikankamika umo ne mukwabo mu bitatyi bya makambakano!

¹⁹ Byotwenda tutakamana mu mafuku a kumfulo, mushikatyilo wa mu ino ngikadilo ya bintu nao koku wenda ubipila’ko, nanshi po pene pafwaninwe kwilama bene Kidishitu ku bibi. (Nkindi 22:3) Twikalei na butyibi bulumbuluke, na ñeni mijalale, ne na buyuki bwa misoñanya idi mu Bible, byo bintu bikokeja kwitupa manwa a kutyiba mbila na tunangu. (Nkindi 3:​21, 22) Tutejei Kinenwa kya Yehova ne kwikikōkela, shi tulonge namino, tukepuka kuluba bilubo bya bituputupu. (Mitōto 38:4) Tuyukei amba bukomo bonso botukokeja kulonga kebubwanyapo kufundula lonso masusu mu būmi bwetu. Mu ino ngikadilo ya bintu, bantu bavule boloke basusuka mpata na bibi bivule bibafikila. Pano, tukimonei bidi malwa’nka namino, inoko batwe koku tukulupile na mutyima umo amba “Yehova kakēlapo bantu bandi.” (Mitōto 94:14) Mwanda tuyukile amba ino ngikadilo ya bintu ne bikambija byayo bisa kufundulwa’ko panopano ponka. Shi kepano, tusumininwei byabinebine, “ketukikōkai mu kulonga bilumbuluke; ke-twi-bantu tukāngulanga mwaka pa kufikila ponka, wivwane ne kupungila mpika.”​—Ngalatea 6:9.

Lelo Tubefunde Bika?

◻ Le i matompo’ka afikila kitango kya bene Kidishitu kyonso kituntulu?

◻ I bimfwa’ka bitelelwe mu Bible bitupa muswelo wa kwivwanija amba byamalwa bitufikila kebilombolapo amba Yehova i mwitufityilwe mutyima?

◻ Lelo Yehova wiivwananga namani pa kumona bantu bandi basusuka?

◻ I byabuntu’ka bimobimo bitupele Yehova bitupanga bukomo bwa kūminina mu matompo?

[Kipangujo kya Kifundwa]

1, 2. (a) Lelo Yehova weselanga bantu bandi muswelo’ka dyalelo? (b) Lelo bene Kidishitu bavule batanwanga na bika, ne i bipangujo’ka bilupuka’ko?

3. (a) Lelo Yehova ye ulambikwa makambakano afikila bantu bandi? (b) Mwanda waka ne batōtyi bakikōkeji ba Yehova bene basusuka?

4. Lelo bene Kidishitu bonso bayukile kala amba i bika bisaka kwibafikila pano pobakidi mu ino ngikadilo imbi ya bintu, ne mwanda waka?

5. I muswelo’ka wālombwele Yesu patōka amba bene Kidishitu bakikōkeji bakafikilwa na bintu bya bulanda umbūmi?

6. Mu kyelekejo kya Polo kya byūbakwa nabyo kebipi mudilo, le i ani ufikilwa na bitompibwa bikomokomo?

7. Kukwatañana na Loma 15:4, Bisonekwa bikokeja kwitukwasha muswelo’ka tūminine matompo?

8. Yehova wālekele Yosefa afikilwe na bika, mu bula bwa myaka inga?

9. Lelo Davida wāūminine bika mu bula bwa myaka mivule?

10. I malwa’ka mapite kipimo āfikile Nabote ne kisaka kyandi?

11. Le i kika kitulombola mutumibwa Polo kitala pa bana-balume ne bana-bakaji bakikōkeji batelelwe mu mānga idi mu Bible?

12. I malwa’ka amoamo amonanga Batumoni ba Yehova dyalelo?

13. Lelo i myanda’ka isansa mutyima yālupwilwe panopano mu lapolo?

14. (a) I ñeni’ka yotwaboila pa kimfwa kya Yoba? (b) Nansha shi tubafikilwa na byamalwa, pa kyaba kya kwinyenga na milangwe imbi, ino i kika kyotufwaninwe kulonga’po?

15. Le tubayuka namani amba Yehova utele mutyima bininge ku byamalwa bifikila bantu bandi?

16. Lelo i mpangiko’ka itūdile’ko Yehova itukwashanga tūminine, ne itukwashanga muswelo’ka?

17. I bubinebine’ka bumobumo bwa mu Bible bukomejanga lwitabijo lwetu ne kusumininwa kwetu kwa kutengela Yehova na kitūkijetyima?

18. (a) Lelo 2 Kodinda 1:​3, 4 witukankamika tulonge kika? (b) Bene Kidishitu batadi lelo bakokeja muswelo’ka kwikala nsulo ya busengi ya kutalaja ba mityima?

19. (a) Lelo i bika bikokeja kwitupa manwa a kwilama ku bibi? (b) Shi kepano, tufwaninwe kukulupila mudi ani, ne i kika kibwanya kwitupa bukomo bwa kūminina mu matompo?

[Kifwatulo pa paje 23]

Davida, Nabote, ne Yosefa, bano bantu basatu bāmwene malwa