Bālamine Dikōkeji Kudi Yehova

DIKŌKEJI i ngikadilo iyukilwanga’po bengidi ba Yehova, Leza wabine, nansha byodisakene mu bantu dyalelo. Muntu wa dikōkeji ushalanga nyeke mwimanije mu matompo, ne kusunkanibwa mpika nansha pabapite kitatyi kilampe. Tala kifwa kya Hezekia, Mulopwe muyampe. Bible unena’mba: “[Ku] bakumulonda aye kekwadipo nansha umo pamo bwa aye umbukata mwa balopwe bonsololo ba Yuda, nansha umbukata mwa boba bamubadikile nansha umo mwine.” Mwanda waka Hezekia wādi mwishile na bakwabo? Mwanda “walamete kudi Yehova,” nansha byaādi ujokolokelwe na batōtyi ba Moloka, leza wa bubela. I bine, Hezekia “kafundukilepo pa kumulonda, ehe, [ino] walama bijila bya Yehova.”—2 Balopwe 18:1-6.

Muntu mukwabo wālamine dikōkeji kudi Yehova i mutumibwa Polo. Nsekununi ya mwingilo wandi idi mu Bisonekwa bya Kingidiki bya bwine Kidishitu i bukamoni bulumbuluke bwa mingilo yaādi wingidila nyeke Leza na mutyima umo. O mwanda, ku mfulo kwa būmi bwandi pano pa ntanda, wānenene padi aye mwine amba: “Napu kulwa divita dilumbuluke, nafikija ponka pamfulo pa lubilo lwami, ndaminine ne lwitabijo.”—2 Temote 4:7.

Bine, ba Hezekia ne Polo i bifwa bilumbuluke kotudi bya bantu bādi na dikōkeji! Twiulei lwitabijo lwabo, netu tulame nyeke dikōkeji kudi Yehova, Leza wetu Mukatampe Mwine.—Bahebelu 13:7.