Leza Ukutele Mutyima bya Binebine

KE KYENIPO kwabija Leza shi tudi mu ngikadilo ya malwa. Ke-pantu aye “i mukatampe, ye mukatakata wa bukomo, ñeni yandi [i] yaendaenda’tu.” (Mitōto 147:5) I aye kete ubwanya kwitukwasha tunekenye makambakano etu. Ne kadi Bible wituzenza amba “pungulwilai mityima yenu” kwadi. (Mitōto 62:8) Ino mwanda waka bavule bamona amba Leza kalondololangapo milombelo yabo? Le kino kishintulula amba Leza kebatelepo mutyima?

Pa kyaba kya kwiyumbila kutopeka Leza pa byobya byotumona amba ketwitabilepo, i biyampe kuvuluka bidi powadi ukidi mwanuke. Bambutwile bobe pokebadipo bakupa byonso byowadi wibalomba, le wadi wibatopeka amba kebakuswelepo? Eyo, bana bavule batopekanga. Ino pano powatama ubamone amba buswe bulombolwanga mu miswelo mivule ne amba kwitabija kulonga byo-byonso bilomba mwana na bubine ke buswepo.

Mo monka ne Yehova nandi, shi kalondololapo milombelo yetu na kulonga byotusaka, ke kunenapo amba wetwilwa, mhm. Na bubine, Leza witutanga mutyima batwe bonso mu mashinda mavule.

“I Aye Witupele Bumi”

Dibajinji bidi, shi tudi’ko i pa mwanda wa Leza “witupele bumi.” (Bilongwa 17:28, Myanda Miyampe ku Bonso) Bine, kwitupa kwaetupele būmi kulombola amba witutele mutyima na buswe!

Kadi Yehova witupele byonso bitusakilwa pa kwikala bōmi. Tutanga’mba: “Umeneja biyombo bya bañombe, ne mani a mīngilo ya muntu; amba alupule bidibwa panshi.” (Mitōto 104:14) Bine, Umpangi wetu ketupelepo enka bisakibwa bya kyalwilo bya umbūmi kete, mhm. Ino kadi upānanga na buntu “mvula ya mūlu, ne myaka ya kupa bipa, ne kuyūja mityima ne bidibwa, ne tusepo.”—Bilongwa 14:17.

Inoko bamo bakokeja kwiipangula’mba, ‘Shi Leza wituswele mpata, mwanda waka wituleka tususuka? Le ukokeja kulondolola kino kipangujo?’

Le Leza Ye wa Kutopeka?

Masusu mavule asusuka bantu i obekokela abo bene. Kimfwa, bintu bimo bileta kyaka kikatampe i biyukane patōka. Ino bantu kebalekelepo kulonga busekese, kukolwa malwa, kutoma dyamba ne mfwanka, kukaya makayo aleta lufu, kwendeja myotoka lubilo lupite, ne bikwabokwabo. Shi uno mwiendelejo wa kyaka ubaleta masusu, le i ani ufwaninwe kutopekwa? I Leza’ni, i muntu mwine walonga bya busenga’wa? Kinenwa kya Leza kya ku bukomo bwa mushipiditu kinena’mba: “Kemukyongolwai; Leza kabengwepo kibengo, mhm, ke-mintu kyonka kikunine muntu, shi kika, shi kika, kyo kyonka kyākāngula.”—Ngalatea 6:7.

Ne kadi, bantu divule besanshijanga abo bene na bene. Shi mizo ibetambe mavita, na bubine, Leza kafwaninwepo kutopekwa pangala pa masusu alupuka’ko. Shi kipolapola watambe muntu nandi, le tukatopeka Leza shi kudi watapwa bilonda nansha kwipaibwa? Nansha dimo! Le shi mbikavu wa kasusu umwesha bekadi bandi malwa, ne kwibepaya, tukatopeka’nka Leza? Kino kekyendele’mopo.—Musapudi 8:9.

Le midiyo ne midiyo ya balanda badi makasa ne bafwa nzala nabo le? Le Leza ye ufwaninwe kutopekwa? Mhm. Ke-pantu umbuo wetu ulotomonanga bidibwa bibwanya kutondwa muntu ne muntu. (Mitōto 10:2, 3; 145:16) Mwabilo mubi wiabila bantu ntundubuko ipāna Leza o utwala bantu mu nzala pi na pi ne mu bulanda bwa tyō. Kadi mwino wa bantu o ukomeja ano makambakano aleke kupwa.

Kashilushilu ka Mwanda

Penepa i ani ufwaninwe kutopekwa shi muntu wabela nansha kufwa bununu? Ubulwe kutulumuka pa kuyuka amba ke Lezapo wa kulambikwa ne bino bine? Bine, Leza kāpangilepo muntu amba anunupe ne kufwa.

Yehova pa kupanga ba Adama ne Eva, ba mulume ne mukaji babajinji, wēbatūdile mu budimi bwa Edena, wēbapa ne kyepelo kya būmi bwa nyeke mu paladisa pano panshi. Inoko wālombwele patōka amba usaka ntanda iyule bantu baloelelwa kipyanwa kyaebapele. O mwanda wēbapele mikalo pa kusaka bamwene mu byepelo byabo bya kumeso. Ba Adama ne Eva bādi ba kwikala mu Paladisa enka shi abakōkela nyeke Umpangi wabo wa buswe.—Ngalwilo 2:17; 3:2, 3, 17-23.

Ino yō, ba Adama ne Eva bātomboka. Eva wātonga kulonda bya Satana Dyabola. Wāmubepela amba byobya binene Leza i bimusuminwe kintu kilumbuluke. Nandi wēkuja mu būmi bwa bwanapabo bwa kupaluka kudi Leza, wāsaka kwikala pamo “bwa Leza, kuyuka biya ne bibi.” Adama nandi wēlunga na Eva mu buno butomboki.—Ngalwilo 3:5, 6.

Ba Adama ne Eva pa kuluba mu uno muswelo, bēlombwele amba kebafwaninwepo kwikala’ko nyeke. Bāangula bipa bilula bitamba ku bubi. Bukomo ne buninge bwabo byāzoza, ne mwenda myaka bāfwa. (Ngalwilo 5:5) Inoko, butomboki bwabo bwādi na bipa bityani bivule bine. Ne batwe bano tukisusuka pangala pa bubi bwa ba Adama ne Eva. Mutumibwa Polo wāsonekele amba: “Monka mwatwelele bubi panopantanda ku muntu umo [Adama], ne lufu nalo ponka pa bubi, mo monka mwasambakanine lufu ku bantu bonso, mwanda abo bonso bapīle mambo.” (Loma 5:12) I amo, pa mwanda wa butomboki bwa ba Adama ne Eva, bubi ne lufu i bisambakane pamo bwa luba luleta lufu mu muzo onso wa muntu.

Bukamoni Bukatakata Bulombola Amba Leza Witutele Mutyima

Lelo kino kishintulula amba bantu bapangilwe na Leza abaoneka lonsololo? Nansha dimo, mwanda pano po padi bukamoni bukatakata bulombola amba Leza witutele mutyima. Leza i mwele kitapwa kya lupoto lukomo mwanda wa kukūla bantu ku bubi ne lufu. Mfutwa ya kikūlwa i būmi bubwaninine bwa Yesu, bwaājimije na mutyima tō pangala petu. (Loma 3:24) O mwanda mwine mutumibwa Yoano wāsonekele amba: “Mwanda aye Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.” (Yoano 3:16) Pa mwanda wa kino kilongwa kikatampe kya buswe, tubaikala kadi dikwabo na kyepelo kya kukekala’ko nyeke. Polo wātumīne bene Loma mukanda amba: “Pa boloke bwa umo kyabuntu kyaīdile ku bantu bonso kubingijibwa bubinga bwa būmi.”—Loma 5:18.

Tukulupilei amba mu kitatyi kitungile Leza mwine, masusu ne lufu kebikekala’kopo kadi pa uno umbuo wa Ntanda. Ino, ngikadilo ilailwe mu mukanda wa Kusokwelwa yo ikabikala konso: “Talaipo bidi, kipema kya Leza byo kidi pa bantu, ne ukēkalanga nabo, nabo bakēkala bantu bandi, ne Leza mwine ukēkala nabo, ke Leza wabo kadi. Kadi Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.” (Kusokwelwa 21:3, 4) Padi ukanena’mba, ‘Ami nkikatanwa’kopo mu mine myaka’yo.’ Ino na bubine, ukokeja kutanwa’ko, mwanda nansha shi ubafu, Leza ukokeja kukusangula mu bafwe. (Yoano 5:28, 29) Ino yo mpango ikwete Leza potudi, kadi bine ikafikidila. Nanshi kunena’mba Leza katelepo bantu mutyima i kwiongola bya binebine!

“Fwenai Kudi Leza”

Tuseñwanga ku mutyima pa kuyuka amba Leza wāshilwile kala kukwata mpango ya kupwija lonso makambakano a muzo wa muntu. Lelo dyalelo nadyo? Le tukalonga bika shi muntu otuswele wafu, nansha shi wetu mwana wabela? Eyo, kitatyi kitungile Leza kufundula misongo ne lufu kekyabwene. Bible ulombola amba tufwaninwe kwilaija’ko bityetye kumeso kwa kufikidila’byo. Ino Leza ketwelelepo. Mwanā bwanga Yakoba wānene amba: “Fwenai kudi Leza, nandi ukemufwena.” (Yakoba 4:8) Bine, Umpangi wetu witwita tupwane nandi kipwano kya mpwaninine, ne kadi boba bapwana nandi kebabulwangapo kwimwena kuboko kwandi kwa bukwashi mu bitatyi bikomokomo.

Le tukafwena kwadi namani? Mulopwe Davida wēipangwile kipangujo pamo bwa kino pano kepadi myaka kintu kya tununu tusatu amba: “Abe Yehova, . . . lelo kadi ukēkalanga mu lūlu lobe lukola i ani?” (Mitōto 15:1) Davida wālondolwele aye mwine kino kipangujo na kunena’mba: “Wakunangila moloke, swā, wingila byaboloke, wisamba byabinebine mu mutyima wandi. Wakubulwa kubēpa ne ludimi lwandi, nansha kulonga mulunda nandi bibibibi.” (Mitōto 15:2, 3) Ko kunena’mba Yehova utundailanga boba balonda mwiendelejo wāpelele kulonda ba Adama ne Eva. Ufwenanga boba balonga kiswa-mutyima kyandi.—Kupituluka 6:24, 25; 1 Yoano 5:3.

Le tubwanya kulonga kiswa-mutyima kya Leza namani? Tufwaninwe bidi kuyuka “kiyampe kisangaja ne ku mutyima wa Leza Mupandiji wetu,” kupwa ne kulongela monka. (1 Temote 2:3) Kino kilomba kwikala na buyuki bwa binebine bwa Bible, Kinenwa kya Leza. (Yoano 17:3; 2 Temote 3:16, 17) Ketufwaninwepo enka kutanga bitupu Bible. Ino tufwaninwe kwiula Bayuda ba mu Belea ba mu myaka katwa kabajinji bātejeje busapudi bwa Polo. Tutanga pangala pabo amba: “[Bāikele] kusepelela mwanda ne mutyima onka wa lubilo, ke basakesake mu bisonekwa mafuku onso mo bukila, mo bukila’mba, shi momo byendele.”—Bilongwa 17:11.

Ne dyalelo nadyo monka na monka, kwifunda Bible na mutyima wa kusakasaka kukomejanga lwitabijo mudi Leza ne kwitukwasha tupwane nandi. (Bahebelu 11:6) Ne kadi kwitukwasha twivwanije muswelo Yehova walongela bantu bintu—ke enkapo pa mwanda wa kamweno ka dyalelo, mhm, ino i ne kamweno ka nyeke ka boba bonso ba mityima myoloke.

Ivwana bidi binenwa bimo bya bene Kidishitu babala-banga bapwene bya binebine na Leza. “Nswele Yehova bininge, kadi ndi na bintu bivule bya kumufwijija’ko,” mo munenena Danielle nsongwakaji wa myaka 16. “I mumpe bambutwile baswe bamuswele bya binebine kadi nabo i bamfundije mungya Kinenwa kyandi.” Mwine Kidishitu wa mu Uruguay wasonekele amba: “Mutyima wami i muyule kufwija’ko, kadi mfwijanga’ko Yehova pa buntu bwandi ne pa bulunda bwandi.” Leza utundailanga bonso, nansha ke bana batyetye bene. Gabriela, mwana wa myaka isamba-ibidi unena’mba: “Nswele Leza kutabuka kintu kyo-kyonso pano pa ntanda ne bukata! Ndi na wami Bible. Nswele kwifunda myanda itala padi Leza ne padi wandi Mwana.”

Dyalelo, pi na pi, bantu bavule betabije na mutyima umo byānene mulembi wa Mitōto amba: “I kinengelele ami kufwena kudi Leza.” (Mitōto 73:28) I batambule bukwashi bwa kunekenya makambakano obalwa nao, ne bakulupile na kusumininwa amba bakekala nyeke ne nyeke mu Paladisa pano pa ntanda. (1 Temote 4:8) Mwene nobe ukokeja kwitungila kitungo kya ‘kufwena kudi Leza’? Bine, tukulupile amba: “Aye kadipo ne kulampe kwine na bātwe bonso.” (Bilongwa 17:27) Bine ne bine ponka, Leza ukutele mutyima bya binebine!

[Kifwatulo pa paje 5]

Kuta kwitutele Leza mutyima kumwekanga mu miswelo mivule

[Kifwatulo pa paje 7]

Ne bana batyetye bene bakokeja kufwena kudi Leza

[Bifwatulo pa paje 7]

Dyalelo, Yehova witukwashanga tūminine. Mu kitatyi kitungwe ukafundula misongo ne lufu