Mwingidi wa Yehova—“Wāshilwa pa Kujilula Kwetu”

“Ino wāshilwa pa kujilula kwetu, wasonselwa pa bukondame bwetu; . . . kabidi ne ku bivimvilwa byandi e ko twaundapibwa.”—IS. 53:5.

 1. I myanda’ka yotufwaninwe kuvuluka mu ñeni potulonga Kivulukilo, ne i bupolofeto’ka buketukwasha kuvuluka’yo?

TULOÑANGA Kivulukilo mwanda wa kuvuluka lufu lwa Kidishitu ne byonso bilongelwe na lufu ne lusangukilo lwandi. Kivulukilo kituvulujanga kubingijibwa kwa bubikadi bwa Yehova, kutumbijibwa kwa dijina dyandi ne kufikidila kwa mpango yandi, kubadila’mo ne yoya ya kukūla bantu. Padi kekudipo bupolofeto bukwabo mu Bible bushintulula senene kitapwa kya Kidishitu ne byobya byokifikidije kutabuka bwa Isaya 53:3-12. Isaya wālaile mukasusukila Mwingidi ne myanda mikwabo itala pa lufu lwa Kidishitu ne pa madyese akamwenwa mu lufu lwandi na banababo bashingwe-māni ne yandi “mikōko mikwabo.”—Yoa. 10:16.

 2. I bukamoni’ka bulombwelwe mu bupolofeto bwa Isaya, ne kino kisa kwitukwasha namani?

² Myaka tutwa tusamba-tubidi kumeso kwa Yesu kubutulwa pano pa ntanda, Yehova wāpele Isaya mushipiditu afumike amba Mwingidi wandi mutongwe ukekala na kikōkeji nansha ke mu matompo makomo. Buno i bukamoni bulombola amba Yehova ukulupile amba wandi Mwana udi na dikōkeji. Potubandaula buno bupolofeto, mityima yetu isa kukunkwa kadi lwitabijo lwetu nalo lusa kukomejibwa.

“Mufutululwe” ne ‘Kulēmekibwa Mpika’

 3. Mwanda waka Bayuda bādi bafwaninwe kutundaila Yesu, ino bālongele namani?

³ Tanga Isaya 53:3. Fwatakanya’po bidi mokyāikadile, Mwana umo kete wa Leza pa kushiya nsangaji ya kwikala pamo na Shandi ne kwiya pa ntanda kupāna būmi bwandi bu kitapwa mwanda wa kukūla bantu ku bubi ne ku lufu! (Fid. 2:5-8) Kitapwa kyaālambwile i kilete kulekelwa kwinekwine kwa bubi, kwādi kwelekejibwe ne bitapwa bya mu Bijila bya Mosesa. (Bah. 10:1-4) Mwene wādi ufwaninwe kutundailwa ne kulēmekwa, nakampata na Bayuda, bene bādi batengele Meshiasa wālailwe? (Yoa. 6:14) Ino, Kidishitu wādi “mufutululwe” na Bayuda, ne “kumulēmekapo mpikila” enka na mwānenene Isaya. Mutumibwa Yoano wāsonekele amba: “Waiya kufikila ku byandi aye mwine, ino bandi aye mwine ne kumulubula mpika.” (Yoa. 1:11) Mutumibwa Petelo nandi wānena Bayuda amba: “Leza wa bakulutuba betu watumbija Mwana wandi Yesu ntumbo, o mwafikijije, mwamupelelela ku meso a Pilato pādi ne mutyima wa kumukutulula. Ino bānwe mwapelelela mukole, wakoloka.”—Bil. 3:13, 14.

 4. Lelo Yesu wāyukile bukōkekōke bwetu namani?

⁴ Kadi Isaya wāfumikile amba Yesu wādi “muyuke bukōkekōke.” Yesu, umbula bwa mwingilo wandi, wādi ukōka kyaba kimo, ino kekudipo palombola’mba wābelele. (Yoa. 4:6) Ino wāyukile misongo ya boba baādi usapwila. Wēbemvwanina lusa ne kundapa bangi. (Mako 1:32-34) Mu uno muswelo Yesu wāfikidije bupolofeto bunena’mba: “I binebine aye waselele bukōkekōke bwetu, ne kwitwika misongo yetu.”—Is. 53:4a; Mat. 8:16, 17.

Pamo bwa “Mutapwe na Leza”

 5. Le Bayuda bavule bāmwene lufu lwa Yesu namani, ne mwanda waka kino kyāmubwejeje’ko misanshi?

⁵ Tanga Isaya 53:4b. Bantu bavule ba mu mafuku a Yesu kebāivwanijepo mwanda waka Yesu wāsusukile ne kufwa. Bālangile amba i Leza wamupa mfuto, na kumuletela kinzengele kampanda. (Mat. 27:38-44) Bayuda bābepele Yesu amba i wa butukani. (Mako 14:61-64; Yoa. 10:33) Na bubine, Yesu kādipo nonga-bibi nansha wa butukani. Ino pa mwanda wa buswe bukatampe bwaswele Shandi, kufwa lufu lwa kulambikwa butukani kwādi kwa kubweja’ko misanshi ya Mwingidi wa Yehova. Nansha nabya, wāitabije kukōkela kiswa-mutyima kya Yehova.—Mat. 26:39.

6, 7. Yehova ‘wāsonsakenye’ Mwingidi wandi wa kikōkeji mu buluji’ka, ne mwanda waka kino ‘kyāmutōkeje’ Yehova?

⁶ Bupolofeto bwa Isaya bunena pabajinji amba bantu bādi ba kunena amba Kidishitu i “mutapwe na Leza” ino padi ukatulumuka pobufumika’mba: “Kyamutōkeja Yehova kumusonsakanya.” (Is. 53:10) Le byānene Yehova amba: “Talapo bidi, mwingidi wami . . . mutongwe wami o ntōkelwe ku mutyima,” i muswelo’ka kadi o “kyamutōkeja Yehova kumusonsakanya”? (Is. 42:1) I mu buluji’ka mokinenenwa amba kyāsangeje Yehova?

⁷ Pa kwimvwanija buno bupolofeto, tuvulukei bidi amba, Satana pa kulwa bubikadi bwa Yehova, waālakene kikōkeji kya bengidi ba Leza badi mūlu ne badi panshi. (Yoba 1:9-11; 2:3-5) Yesu wālondolwele senene ku luno lonji lwa Satana na kukōkela kufika ne ku lufu. O mwanda Yehova wālekele Kidishitu epaibwe na balwana nandi, na bubine Yehova nandi wāimvwene bibi pa kumona bepaya Mwingidi wandi watongele. Inoko, Yehova wāsangele bininge pa kumona wandi Mwana ukōkela umbyonso. (Nk. 27:11) Kutabukidila, kuyuka byabuyabuya byādi bya kumwena bantu besāsa mu lufu lwa wandi Mwana, kwāsangeje Yehova mpata.—Luka 15:7.

“Wāshilwa pa Kujilula Kwetu”

8, 9. (a) Lelo Yesu ‘wāshilwe pa kujilula kwetu’ namani? (b) I muswelo’ka ulombola’kyo mutumibwa Petelo?

⁸ Tanga Isaya 53:6. Bantu ba bubi badi balumbakana pamo bwa mikōko mijimine, bakimba kunyongololwa mu misongo ne mu lufu lobāpyene kudi Adama. (1 Pet. 2:25) Bana ba Adama byobadi bakubulwa kubwaninina, i kutupu nansha wadi ubwanya kukūla kyājimije Adama. (Mit. 49:7) Ino mu buswe bwandi bukatampe, “Yehova wamutwika bukondame bwa batwe bonso,” ke wandi Mwana muswedibwe ne Mwingidi wandi mutongwe kadi. Kidishitu pa kwitabija ‘kwashilwa pa kujilula kwetu’ ne ‘kusonselwa pa bukondame bwetu,’ wētwikile bubi bwetu pa mutyi ne kufwa pa kyaba kyetu.

⁹ Mutumibwa Petelo wālembele amba: “Ko konka ko mwityilwe; ke-muntu Kidishitu nandi wemususukile, wemushia bu-kitompekejo kya kumulonda bānwe mu māyo andi; Enka aye mwine enka waselele myanda yetu mu ngitu ya aye mwine ku mutyi, amba bātwe tubafuko ku myanda, twikale bōmi ba ku boloke.” Kupwa, Petelo wābweja’ko na kutela bupolofeto bwa Isaya amba: “Kadi i ku bivimvilwa byandi ko mwaundapibwa.” (1 Pet. 2:21, 24; Is. 53:5) Ne kino kyāpele banonga-bibi muswelo wa kupwana na Leza, enka na mubwejeja’ko Petelo amba: “Kidishitu nandi wasusukile dimo pa myanda, aye moloke pa bakubulwa boloke, amba ētulete kudi Leza.”—1 Pet. 3:18.

Wāselwa “bwa Kanakamukōko Katwalwa ku Kwipaibwa”

10. (a) Lelo Yoano mubatyiji wāityile namani Yesu? (b) Binenwa bya Yoano bilombola namani amba wādi na bubinga?

¹⁰ Tanga Isaya 53:7, 8. Yoano mubatyiji paāmwene Yesu wiya, wānena’mba: “A! talaipo bidi ku Mwana-mukōko wa Leza wakushikuna bubi bwa panopantanda.” (Yoa. 1:29) Pa kwita Yesu bu Mwanā mukōko, padi Yoano wāvulukile binenwa bya Isaya amba: ‘Waselwa pamo’nka bwa kana ka mukōko katwalwa ku kwipaibwa.’ (Is. 53:7) Isaya wāfumikile amba: “Waelele mūya wandi ku lufu.” (Is. 53:12) Kintu kitendelwa i kino amba, Yesu mu bufuku bwaāshilwile Kivulukilo kya lufu lwandi, wāpele batumibwa bandi ba kikōkeji 11 kitomeno, kanena’mba: “Ke-kintu kino i mashi ami a kipwanino kipya o amwangikila bavule bene, mwanda wa kulekelwa mambo.”—Mat. 26:28.

11, 12. (a) Le kwitabija kwāitabije Isake na mutyima umo kwelwa bu kitapwa, kulombola bika pa kitapwa kya Kidishitu? (b) I bika byotufwaninwe kuvuluka padi Yehova, Abalahama Mukatampe kitatyi kyotulonga Kivulukilo?

¹¹ Yesu, pamo’nka bwa Isake, wāitabije kwelwa bu kitapwa pa madabahu mwādi musakila Yehova. (Ngal. 22:1, 2, 9-13; Bah. 10:5-10) Nansha byāitabije Isake na mutyima umo kwelwa bu kitapwa, ino mwine wāsakile kwela kitapwa i Abalahama. (Bah. 11:17) Ne Yesu nandi mo monka, wāitabije na mutyima umo kufwa, ino Yehova ye mwine wākwete mpangiko ya kikūlwa. Leza wālombwele buswe bwandi bukatampe bwaswele bantu pa kupāna wandi Mwana bu kitapwa.

¹² Yesu mwine wānene amba: “Mwanda aye Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.” (Yoa. 3:16) Mutumibwa Polo wāsonekele amba: “Leza aye wetwanina lusa lwa aye mwine, pa kunena’mba, po twakidi bipya-mambo, Kidishitu wetufwila.” (Loma 5:8) Nanshi, potulēmeka Kidishitu na kuvuluka lufu lwandi ketufwaninwepo kwilwa nansha dimo amba mwine wākwete mpango amba kitapwa kikale’ko i Yehova, Abalahama Mukatampe. Tuloñanga Kivulukilo mwanda wa kumutumbija.

Mwingidi ‘Wabingija Bangibangi’

13, 14. Lelo Mwingidi wa Yehova ‘wabingije bangibangi’ muswelo’ka?

¹³ Tanga Isaya 53:11, 12. Yehova unena pangala pa Mwingidi wandi mutongwe amba: “Mwingidi wami moloke ukabingija bangibangi.” Muswelo’ka? Tutanga kilondololwa ku mfulo kwa vese 12. Mwingidi ‘wasengela bakujilula.’ Bana bonso ba Adama i babutulwe na bubi, “bakujilula,” o mwanda batambulanga “mpalo ya bubi,” ke lufu kadi. (Loma 5:12; 6:23) Bilomba pa bukata bwa Yehova ne bantu pekale kipwano. Shapita 53 wa bupolofeto bwa Isaya ulombola senene muswelo ‘wāsengele’ Yesu, nansha kunenena bantu ba bubi, amba: “Madingi a ndoe yetu watwikwa’o; kabidi ne ku bivimvilwa byandi e ko twaundapibwa.”—Is. 53:5.

¹⁴ Pa kusela bubi bwetu ne kwitufwila, Kidishitu ‘wabingije bangibangi.’ Polo wālembele amba: “Kyamusangeje Shandi pa mutyima’mba, biyūjibwa byonso bīkale monka mudi aye [Kidishitu]; kadi ne padi aye kupwanya bintu byonso kudi aye mwine, Leza, ponka pa kutalaja talala, nyā, pa mashi a [mutyi wa masusu] wandi; i ponka padi aye, shi bintu bya momwa mūlu, shi bya panopantanda.”—Kol. 1:19, 20.

15. (a) Le “bintu bya momwa mūlu” bitelele Polo i bāni? (b) I bāni kete badi na lupusa lwa kudya ku byelekejo bya ku Kivulukilo, ne mwanda waka?

¹⁵ “Bintu bya momwa mūlu” bipwanyijibwe na Yehova kupityila ku mashi amwangile Kidishitu i Bene Kidishitu bashingwe-māni, betyilwe kukabikala na Kidishitu momwa mūlu. Bene Kidishitu “ba kwiabanya lwito lwa mūlu” i babingijibwe “bubinga bwa būmi.” (Bah. 3:1; Loma 5:1, 18) Penepa Yehova webetabija bu bandi bana ba ku mushipiditu. Mushipiditu sandu witabijanga bukamoni mobadi amba i “bakupyana pamo na Yesu,” ke balopwe ne bapidishitu mu Bulopwe bwandi bwa mūlu. (Loma 8:15-17; Kus. 5:9, 10) Abaikala ke ba mu Isalela wa ku mushipiditu, “bene Isalela ba Leza,” kadi kebadi mu “kipwano kipya.” (Yel. 31:31-34; Ngat. 6:16) Byobadi mu kipwano kipya, badi na lupusa lwa kudya ku byelekejo bya ku Kivulukilo, ne kutoma ku kitomeno kya vinyu ityila, yātelele Yesu amba: “Kino kitomeno nakyo i kipwanino kipya kya mu mashi ami a kwimumwangikila.”—Luka 22:20.

16. Lelo bintu “bya panopantanda” i bintu’ka, ne i muswelo’ka obibingijibwa kumeso a Yehova?

¹⁶ Bintu “bya panopantanda” i mikōko mikwabo ya Kidishitu, ikulupile kukekala nyeke pano pa ntanda. Ne abo bene, Mwingidi mutongwe wa Yehova wibabingijanga kumeso a Yehova. Byobetabije kitapwa kya kikūlwa kya Kidishitu, kadi “abakendeja bivwalwa byabo ne kwibitōkeja, tō, mu mashi a Kāna-ka-mukōko,” o mwanda Yehova webatela bu boloke, ke bu bana ba ku mushipiditupo, mhm, ino bu balunda nandi, ne kwibapa lukulupilo lwa kutendelwa lwa kukapanda ku “malwa makatakata.” (Kus. 7:9, 10, 14; Yak. 2:23) Bano ba mu mikōko mikwabo, byokebadipo mu kipwano kipya ne kadi kebadipo na lukulupilo lwa kukekala mūlu, o mwanda kebadyangapo ku byelekejo bya ku Kivulukilo inoko batanwanga’ko ne kubandila na bulēme.

Fwijai’ko Yehova ne Mwingidi Wandi Mwitabijibwe!

17. Le kubandaula buno bupolofeto bwa Isaya bwisambila pa Mwingidi kubateakanya namani mityima yetu mwanda wa Kivulukilo?

¹⁷ Kubandaula kotwabandaula buno bupolofeto bwa Isaya bwisambila pa Mwingidi kubateakanya senene mityima yetu mwanda wa Kivulukilo kya lufu lwa Kidishitu. Kubetukwasha “kwela meso konka kudi aye Yesu kilongoji kya kwitabija kwetu, ke mubingiji wako kadi.” (Bah. 12:2) Tubayuka’mba Mwanā Leza ke ntombokipo. Kadipo bwa Satana, mwanda Mwana usangelanga kufundijibwa na Yehova, ne kumuyuka amba aye ye Mfumu Mubikadi. Tubamone amba, mu bula bwa mwingilo wandi pano panshi, Yesu wādi na kanye ku bantu baādi usapwila, kadi wāundapa bavule bene ku ngitu ne ku mushipiditu. Mu uno muswelo wālombwele byakalonga bu Meshiasa Mulopwe mu ngikadilo impya ya bintu ‘pakabīka kidye pano panshi.’ (Is. 42:4) Bupyasakane bwandi mu kusapula Bulopwe, bu “mwinya wa baJentaila,” buvuluja balondi bandi basapule myanda miyampe na bupyasakane pano pa ntanda ponsololo.—Is. 42:6.

18. Mwanda waka bupolofeto bwa Isaya bubetupe mutyima wa kufwija’ko Yehova ne Mwingidi wandi wa kikōkeji?

¹⁸ Kadi bupolofeto bwa Isaya bubetwivwanijija senene bukomo bwalongele Yehova pa kutuma Mwana wandi muswedibwe pano panshi etususukile ne kwitufwila. Yehova kāsangelepo pa kumona wandi Mwana ususulwa, ino wāsangele pa kumona Yesu umukōkela umbyonso kufika ne ku lufu. Tufwaninwe kusangala pamo na Yehova, kufwija’ko pa byonso byālongele Yesu pa kulombola’mba Satana i mbepai ne kutumbija dijina dya Yehova, ebiya tulombole amba Yehova ye ufwaninwe kubikala. Kadi Kidishitu wāshikwine bubi bwetu ne kwitufwila. Aye pa kulonga nabya, wape ba kaluombe katyetye ka banababo bashingwe-māni ne mikōko mikwabo mukenga wa kubingijibwa kumeso a Yehova. Nanshi, potukabungakana mwanda wa Kivulukilo, twikalei na mutyima wa kufwija’ko Yehova ne Mwingidi wandi wa kikōkeji.

Tupitulukei’mo

• Yehova ‘wāsonsakenye’ Mwingidi wandi wa kikōkeji mu buluji’ka, ne mwanda waka kino ‘kyāmutōkeje’ Yehova?

• Lelo Yesu ‘waāshilwe pa kujilula kwetu’ namani?

• Lelo Mwingidi ‘wabingije bangibangi’ muswelo’ka?

• Le kubandaula bupolofeto bwisambila pa Mwingidi kubateakanya namani ñeni ne mutyima obe mwanda wa Kivulukilo?

[Kifwatulo pa paje 26]

“Wādi mufutululwe, ino batwe kumulēmekapo mpikila”

[Kifwatulo pa paje 28]

“Waelele mūya wandi ku lufu”

[Kifwatulo pa paje 29]

“Mikōko mikwabo” itanwanga ku Kivulukilo ne kubandila na bulēme