“Boba Bakulonda Kāna-ka-mukōko”

“Bo boba bakulonda Kāna-ka-mukōko konso kwaēnda.” —KUS. 14:4.

 1. Lelo bana ba bwanga ba bine ba Yesu bāmwene namani mulangwe utala kumulonda?

YESU ‘wādi ufundija mu shinakoka pādi mu Kapanama,’ kintu kya myaka ibidi ne musubu mu mwingilo wandi. Paānene binenwa byākoleje bavule, “bāna-bandi-babwanga bangi bangi bajokela munyuma, kwenda kadi nandi dikwabo mpika.” Yesu pāipangwile batumibwa 12 shi nabo bakimba kufunduka, penepa Shimona Petelo wāmulondolola’mba: “Abe Mfumwami, le tukenda kudi ani? Abewa wi wa binenwa bya muya wa nyeke ne nyeke. Bātwe tubaitabija, ne kuyūka kadi tubayūkidija’mba: Abe wi ukola wa Leza.” (Yoa. 6:48, 59, 60, 66-69) Ino, bana ba bwanga ba bine bāpela kuleka kulonda Yesu. Nansha pobāpwile kutambula mushipiditu sandu, bāendelele kulonda buludiki bwandi.—Bil. 16:7-10.

 2. (a) Lelo “umpika wa binebine, udi na manwa,” nansha “kalama wa bine” i ani? (b) Le kabumbo ka umpika i kayukane senene namani bu bo “boba bakulonda Kāna-ka-mukōko”?

² Lelo tukanena bika pangala pa Bene Kidishitu bashingwe māni ba dyalelo? Yesu, mu bupolofeto bwandi butala “pa kwiya [kwandi] pano ne pamfulo ya panopantanda,” wātelele kisumpi kyonso kya balondi bandi bashingwe māni badi pano panshi bu “umpika wa binebine, udi na manwa,” nansha bu “kalama wa bine.” (Mat. 24:3, 45; Luka 12:42) Kabumbo ka umpika, kisumpi kyonso, i kayukane senene bu bo “boba bakulonda Kāna-ka-mukōko konso kwaēnda.” (Tanga Kusokwelwa 14:4, 5.) Bashingwe māni bonso i bajike ku mushipiditu mwanda kebekujijepo mu nkulupilo ne bilongwa bya disubi bya “Babiloni Mukatakata,” umbikalo wa ntanda yonso wa mutōtelo wa bubela. (Kus. 17:5) “Mu byakanwa byabo” kemudipo lufundijo lwa bubela, kadi i “bakubulwa nansha kabulema kēne” mu ntanda ya Satana. (Yoa. 15:19) Mu myaka ya kumeso, bashingwe māni bashele pano panshi ‘bakalonda’ Kana ka Mukōko momwa mūlu.—Yoa. 13:36.

 3. Mwanda waka i kyendele’mo tukulupile kabumbo ka umpika?

³ Yesu wāpele umpika wa binebine udi na manwa “kipango” kyandi, ke mushingwe māni umo ne umo kadi, amba “ulēlamo ne babidibwa pa kitungo kya mwaka po kitungilwe.” Kadi wāmubikile uno umpika amba alame “lupeto lwandi lonso.” (Mat. 24:45-47) Mu luno “lupeto” mubadilwa ne “kibumbo kikatampe” kya “mikōko mikwabo.” (Kus. 7:9; Yoa. 10:16) Mwene i kyendele’mo mushingwe māni umo ne umo ne “mikōko mikwabo” ikulupile umpika? Kudi bubinga buvule bwine bwa kukulupidila kabumbo ka umpika. Ino pano ivwana bidi bubinga bubidi bukatampe: (1) Yehova ukulupile kabumbo ka umpika. (2) Yesu nandi ukulupile umpika. Tubandaulei nanshi byobya bilombola amba Yehova Leza ne Yesu Kidishitu bakulupile ne mutyima umo umpika wa binebine udi na manwa.

Yehova Ukulupile Umpika

 4. Mwanda waka tunenwe kukulupila mu bidibwa bya ku mushipiditu bitupa umpika wa binebine udi na manwa?

⁴ Ivwana bidi kyokya kikwasha umpika wa binebine udi na manwa alete bidibwa bya ku mushipiditu binune, kadi pa kitatyi kifwaninwe. Yehova unena’mba: “Nkakulombolanga ñeni, ne kukufundija mu dishinda dyōkendanga.” Kadi amba: “Nkakupanga ñeni ne dīso dyami ponka padi abe.” (Mit. 32:8) Eyo, Yehova uludikanga umpika. O mwanda tukulupilei ne pa mfulo bujinguludi bwa mu Bisonekwa, kwivwanija, ne bwendeji botupebwa na umpika.

 5. I bika bilombola amba mushipiditu wa Leza upanga kabumbo ka umpika bukomo?

⁵ Kadi Yehova weselanga kano kabumbo ka umpika na mushipiditu sandu wandi. Nansha mushipiditu wa Yehova byokeumwekangapo, ino byoulupula mu boba beutambula bimwekanga. Langa’po byobya bilongele umpika wa binebine udi na manwa pa kupāna bukamoni ntanda yonso butala padi Yehova Leza, wandi Mwana, ne Bulopwe. Batōtyi ba Yehova pano basapulanga musapu wa Bulopwe mu matanda ne bisanga 230 ne kupita. Mwene buno i bukamoni kebupatanibwapo bulombola mushipiditu wa Leza upanga uno umpika bukomo? (Tanga Bilongwa 1:8.) Kabumbo ka umpika kakwatanga butyibi bukatampe pa kupa bantu ba Yehova ba ntanda yonso bidibwa bya ku mushipiditu pa kitatyi kifwaninwe. Pa kukwata ne kwingidija buno butyibi, umpika ulombolanga buswe, butalale ne miswelo mikwabo ya kipa kya mushipiditu.—Ngat. 5:22, 23.

6, 7. Lelo i bika bilombola’mba Yehova ukulupile umpika wa binebine?

⁶ Pa kusaka amba twivwanije kine kikulupidile Yehova mudi umpika wa binebine, tala byalaile ku mushingwe māni umo ne umo. Mutumibwa Polo wālembele amba: “Mpungi īkavuma, ne bafu bakasangulwa ke bampikwa kubola, ne bātwe tukālamunwa. Ke-muntu mo kyendele i muno’mba, kino kibole kivwale kyakubulwa kubola, kadi kino kyalufu nakyo kivwale kyakubulwa kufwa.” (1 Kod. 15:52, 53) Balondi ba Kidishitu bashingwe māni, bengidila Leza na kikōkeji ne bafwa mu imbidi ya bantu ya kubola, basangulwanga ne kupebwa būmi bwa nyeke butabukile ne bwa bipangwa bya ku mushipiditu. Ke-bantu batambulanga kubulwa kufwa—kwikala’ko nyeke ne koneka mpika. Ne kadi, batambulanga būmi bwampikwa kubola, imbidi keikokejapo koneka ne mobimwekela ikwatakanya ayo mine. Kusokwelwa 4:4 unena’mba boba bakasangulwa i bashikate pa bipona ne bilukwa bya nsahabu ku mitwe yabo. Ntumbo ya bulopwe itengele bano Bene Kidishitu bashingwe māni. Ino kudi bubinga buvule.

⁷ Tutanga mu Kusokwelwa 19:7, 8 amba: “Butundaile bwa Kāna-ka-mukōko bubafika, ne mukajandi mwilongolole kala. Kadi wapelwe’mba uvwale bukonge bufindule tō, bwēñenya ne kweñenya; mwanda bukonge bufindule byo bilongwa byoloke bya bapandulwemo.” Yehova wātongele Bene Kidishitu bashingwe māni amba bo bakekala bu mutundaile wa wandi Mwana. Bine, bino byabuntu bileta’nka ne luzakalo—kubulwa kubola, kubulwa kufwa, bulopwe, “butundaile bwa Kāna-ka-mukōko”! Byonso bino bilombola’mba Yehova ukulupile bashingwe māni, “bakulonda Kāna-ka-mukōko konso kwaēnda.”

Umpika Ukulupilwe na Yesu

 8. Le Yesu ulombola namani’mba ukulupile balondi bandi bashingwe māni?

⁸ I bika bilombola’mba Yesu ukulupile ne pa mfulo balondi bandi bashingwe māni a ku mushipiditu? Yesu, mu bufuku bwandi bwa mfulo pano panshi, wālaile batumibwa bandi ba kikōkeji 11 mulao. Amba: “Nanshi bānwe mudi boba bakushikilwa nami mu kutompwa kwami konso. Nami eyo nkemutongela bulopwe monka mwāntongele Tata. Amba mudye mutome pa mesa ami umbulopwe bwami mutentamine ponka pa bipona kuketa myanda ya ku bisaka dikumi ne bibidi bya bwine Isalela.” (Luka 22:28-30) Ebiya Yesu wasamba kipwano na ba 11, kipwano kyafikile ne ku Bene Kidishitu bonso bashingwe māni 144000. (Luka 12:32; Kus. 5:9, 10; 14:1) Lelo Yesu wādi wa kusamba nabo kipwano kya kubikala nabo Bulopwe shi kadipo wibakulupile?

 9. Mu ‘lupeto lonso lwa Kidishitu’ mubadilwa bika ne bika?

⁹ Kadi Yesu Kidishitu i mupe umpika wa binebine ne udi na manwa “lupeto lwandi lonso”—tumweno twa Bulopwe tonso tudi pano panshi. (Mat. 24:47) Mu luno lupeto mubadilwa mobo adi ku kité kya ntanda yonso kya Batumoni ba Yehova, mabilo a misambo adi mu matanda palapala, Mobo a Kubungakena’mo ne a Bulopwe. Kadi mubadilwa ne mwingilo wa kusapula Bulopwe ne kulonga bana ba bwanga. Lelo muntu ukokeja kupāna bituntwa byandi bilēme ku muntu wa kakulupilepo?

10. Lelo i bika bilombola’mba Yesu Kidishitu udi pamo na balondi bandi bashingwe māni?

¹⁰ Kumeso’tu kwa Yesu musanguke kukanda mūlu, wāmwekēle bana bandi ba bwanga ba kikōkeji ne kwibalaya’mba: “Ami nami kadi, ngidi nenu mafuku onso nyeke, ne kumfulo kwine kwa panopantanda.” (Mat. 28:20) Lelo Yesu i mufikidije uno mulao? Mu myaka 15 ishele kunyuma kibalwa kya bipwilo bya Batumoni ba Yehova ntanda yonso kyelundile’ko kutamba pa 70000 kutula ku 100000—ko kunena’mba bipwilo 40 pa katwa. Le kibalwa kya bana ba bwanga bapya nakyo le? Kubwipi kwa bana ba bwanga midiyo 4 ne kipindi babatyijibwe mu myaka 15 yadi’mo—ko kunena’mba mwayene wa bapya 800 ku difuku. Bine kuno kwilundila’ko kutulumukwa kulombola’mba Kidishitu udi pamo na balondi bandi bashingwe māni pobapwila kadi wibakwatakanyanga mu mwingilo wabo wa kulonga bana ba bwanga.

Umpika I wa Binebine Kadi Udi na Manwa

11, 12. Le umpika wilombwele namani amba i wa binebine kadi udi na manwa?

¹¹ Yehova Leza ne Yesu Kidishitu byobakulupile umpika wa binebine ne udi na manwa, lelo ketukokejapo netu kulongela monka? Le kadi, umpika wilombolanga aye mwine bu wa binebine na kuvuija mwingilo wapelwe. Kimfwa, ulupulanga Kiteba kya Mulami pano ke myaka 130 mituntulu. Kupwila, kubungakana, ne bitango bya Batumoni ba Yehova bikyendelela na kwitūbaka ku mushipiditu.

¹² Umpika wa binebine udi kadi na manwa mwanda kaloñangapo bintu byakubulwa kwendela’mo, katangidilangapo Yehova kumeso, nansha kushala kunyuma mu kulonda bwendeji bwandi bwa patōkelela. Kimfwa, petabija bendeji ba bipwilo bya bubela na lushiñanya nansha kutala kilomo-nyeka mwiendelejo wampikwa bwine Leza ne wa kwisakila wa bantu ba ino ntanda, umpika aye wibadyumunanga ku makinga a ngikadilo imbi ya Satana. Umpika i mulete bidyumu biyampe ne bifika pa kitatyi kitungwe mwanda weselwanga na Yehova Leza ne Yesu Kidishitu. Pa kino umpika ufwaninwe kukulupilwa ne mutyima onso. Penepa tukalombola namani amba tukulupile umpika wa binebine udi na manwa?

‘Twendei’ na Bashingwe Māni Pobalonda Kana ka Mukōko

13. Kukwatañana na bupolofeto bwa Zekadia, i muswelo’ka otukokeja kukulupila mudi umpika wa binebine udi na manwa?

¹³ Mukanda wa mu Bible wa Zekadia ulombola “bantu dikumi” bafwena “yewa udi bumwine Yudea” kebamunena’mba: “Batwe tukenda nenu.” (Tanga Zekadia 8:23.) Uno ‘mwine Yudea’ byatelwa bu “nenu” nanshi i kisumpi kya bantu. Dyalelo, welekeja basheleshele ba Bene Kidishitu bashingwe māni—kipindi kya “Isalela wa Leza.” (Ngat. 6:16, Myanda Miyampe ku Bonso) “Bantu dikumi ba mu ndimi yonsololo ya mizo” nabo belekeja kibumbo kikatampe kya mikōko mikwabo. Bashingwe māni balondanga Yesu konso kwaenda, mo monka ne kibumbo kikatampe nakyo ‘kyendanga’ na umpika wa binebine udi na manwa. Kibumbo kikatampe kekikwatwangapo bumvu bwa kwiyukanya bu bapwani ba boba “ba kwiabanya lwito lwa mūlu.” (Bah. 3:1) Yesu nandi kafwangapo bumvu bwa kwibatela “bu-bāna betu.”—Bah. 2:11.

14. I muswelo’ka otukokeja kukwasha bamwanabo na Kidishitu?

¹⁴ Yesu Kidishitu umwene bukwashi bobakwasha bamwanabo pamo bwa aye obakwasha’bo. (Tanga Mateo 25:40.) Penepa, i muswelo’ka ukokeja boba bakulupile kwikala pano panshi kukwasha bamwanabo na Kidishitu bashingwe māni? Dibajinji i na kwibakwasha mu mwingilo wa kusapula Bulopwe. (Mat. 24:14; Yoa. 14:12) Penda patyepa kibalwa kya bashingwe māni pano panshi mu bula bwa myaka, kibalwa kya mikōko mikwabo akyo kyendanga kikanda. Boba bakulupile kwikala pano panshi pobasapula, padi bu bengidi ba kitatyi kyonso, bakwashanga’ko Bene Kidishitu bashingwe māni mu kuvuija mwingilo wa kulonga bana ba bwanga obapelwe. (Mat. 28:19, 20) Mikenga mikwabo ya kwibakwasha i na kukwatakanya uno mwingilo na byabuntu bya lupeto mu miswelo mishileshile.

15. Le umo ne umo ufwaninwe kumona namani bidibwa bya ku mushipiditu bitupa umpika wa binebine pa kitatyi ne butyibi bwakwata butala pa bulongolodi?

¹⁵ Lelo Mwine Kidishitu umo ne umo ufwaninwe kumona namani bidibwa bya ku mushipiditu bitupa umpika wa binebine pa kitatyi, kupityila ku mabuku esambila pa Bible ne ku kubungakana kwa Bwine Kidishitu? Lelo tufwijanga’ko na kutanwa’ko ne na kwingidija byotwifunda na kampeja-bukidi? Le tuloñanga bika pakwata umpika butyibi butala pa bulongolodi? Mutyima wetu wa kukōkela ku bwendeji botupebwa i kilomboji kya lwitabijo lwetu mu mpangiko ya Yehova.—Yak. 3:17.

16. Mwanda waka Bene Kidishitu bonso bafwaninwe kuteja bamwanabo na Kidishitu?

¹⁶ Yesu wānene amba: “Mikōko yami īngivwananga diwi dyami, nami neīyūkile ne kulonda īnonda.” (Yoa. 10:27) Kino i kifikidile pa Bene Kidishitu bashingwe māni. Lelo ku boba ‘benda’ pamo nabo le? Nabo bafwaninwe kuteja Yesu. Bafwaninwe kadi ne kwivwana bamwanabo na Yesu. Mwene mwine kiselwa kya kulela bantu ba Leza ku mushipiditu ye wibapele kino kyepelo? Shi ke pano, kuteja diwi dya bamwanabo na Kidishitu kulomba bika ne bika?

17. Lelo kuteja kabumbo ka umpika kulomba bika?

¹⁷ Dyalelo umpika wa binebine udi na manwa wimaninwe na Kitango Kyendeji, kiludika ne kukwatakanya mwingilo wa kusapula Bulopwe wingilwa ntanda yonso. Batutu ba mu Kitango Kyendeji i bakulumpe ba bwino ne bashingwe māni. Kotudi bo batelwa nakampata bu ‘boba betulelele.’ (Bah. 13:7) Bano batadi bashingwe māni pobaludika basapudi ba Bulopwe kintu kya 7000000 ntanda yonso mu bipwilo 100000 ne musubu, bine i ‘bavudilwe pakatampe pene monka mu mīngilo ya Mfumwetu.’ (1 Kod. 15:58) Nanshi kuteja kabumbo ka umpika kulomba ne kwingidila ne pa mfulo na kyako Kitango Kyendeji.

Boba Bateja Umpika I Beselwe

18, 19. (a) Lelo boba bateja umpika wa binebine udi ne manwa i beselwe muswelo’ka? (b) Lelo tufwaninwe kusumininwa kulonga bika?

¹⁸ Umpika wa binebine tamba kasha utongelwa kemwalamwine “bangibangi ku boloke.” (Dan. 12:3) Mu bano bangibangi mubadilwa ne boba bakapanda pakoneka ino ngikadilo imbi ya bintu. Bine, i kya dyese’po kashā pa kumona bano boloke bemene ku meso a Leza!

¹⁹ Lelo i dyese’ka dikekala na boba bateja diwi dya umpika mu mafuku āya kumeso, pakatūka “kibundi kikola’kya, Yelusalema umpya, [ubundilwe na ba 144000] mūlu kudi Leza, mulongolwe kala bwa musongwa, mudyangibwe dyangi dya ku mulume wandi”? Bible unena’mba: “Ne Leza mwine ukēkala nabo.” Kadi amba: “Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.” (Kus. 21:2-4) Bine ne bine ponka, tutejei Kidishitu ne bamwanabo bashingwe māni a ku mushipiditu bakulupile.

Lelo I Bika Byowefunda?

• Lelo i bika bilombola amba Yehova ukulupile umpika wa binebine udi na manwa?

• Le i bika bilombola amba Yesu Kidishitu ukulupile na mutyima umo kabumbo ka umpika?

• Mwanda waka tufwaninwe kukulupila kalama wa bine?

• Tukalombola namani amba tukulupile umpika?

[Kifwatulo pa paje 19]

Lelo uyukile boba batongelwe na Yehova bu bakekala bu mutundaile wa wandi Mwana?

[Kifwatulo pa paje 20]

Yesu Kidishitu upele umpika wa binebine udi na manwa “lupeto” lwandi

[Kifwatulo pa paje 21]

Potusapula bukamoni, tukwashanga’ko bashingwe māni a mushipiditu