Milombelo

4 Kulomba Bika le?

ITELWANGA bu milombelo itabukile kupitulukwa mu milombelo yonso ya Bene Kidishitu. Bikale bya bine nansha bya bubela, milombelo ya kulondela’po yāshile Yesu—itwa kyaba kimo bu Lulombelo lwa Mfumwetu nansha bu milombelo ya Tata Wetu—ibadilwa mu bintu kebimvwanijepo bantu. Midiyo ya bantu bapitulukanga binenwa byayo difuku ne difuku, padi misunsa mingi ku difuku. Ino Yesu kādipo usaka nansha dimo amba milombelo’ya ingidijibwe uno muswelo. Mwanda waka tunena namino?

Kumeso tu kwa kutela yoya milombelo, Yesu wānene amba: “Pa kulombela napo kokipituluka bitupu bitupu, wa dimo kō dimo.” (Mateo 6:7) Lelo Yesu wādi wipatanya aye mwine na kuleta mulongo wa binenwa bya kukwata pa mutwe ne kupituluka’mo? Nansha dimo! Ino, Yesu wētufundije bintu bifwaninwe kulomba, kadi wētutelele patōka bintu bidi pa kifuko kibajinji bya kulama mu ñeni kitatyi kyotulombela. Tubandaule byaānenene. Milombelo mine i misonekwe mu Mateo 6:9-13.

“Abe Tata wetu wa mūlu, dijina dyobe dijile kijila.”

Pano Yesu wāvulwije balondi bandi amba milombelo yonso ifwaninwe kulombelwa kudi Shandi Yehova. Ino le uyukile mwanda waka dijina dya Leza didi na mvubu ne mwanda waka disakilwa kujidikwa kijila, nansha kutōkejibwa?

Tamba ku ngalwilo ya mānga ya muntu, dijina dijila dya Leza dyāsubijibwe na bubela. Satana, walwana na Leza, wātelele Yehova bu mbepai, Mulopwe wa mwino kafwaninwepo kuludika bipangwa Byandi. (Ngalwilo 3:1-6) Bantu bavule i belunge kudi Satana, bafundija’mba Leza i mulāle mashi, wa nshikani, wa kasumalomo nansha kupatana’mba kadipo Umpangi. Bakwabo batambanga enka ne dijina dyandi dine, batalula dijina Yehova mu malamuni a Bible ne kupeleja kwidingidija.

Bible ulombola’mba Leza ukapwa buno bukondame bonso. (Ezekyele 39:7) Na kulonga uno muswelo, ukavuija bisakibwa byobe byonso ne makambakano mene. Muswelo’ka? Binenwa bilonda’ko bya mu lulombelo lwa Yesu bilondolola.

“Bulopwe bobe bufike.”

Dyalelo, kudi kavutakanya mu bafundiji ba mitōtelo pa bitala Bulopwe bwa Leza. Ino enka mwādi muyukile bemvwaniki ba Yesu, bapolofeto ba Leza bāsapwile tamba kala amba Meshiasa, Mukūdi utongelwe na Leza, ukabikala pa Bulopwe bukashinta ntanda. (Isaya 9:6, 7; Danyele 2:44) Bukajidikanga dijina dya Leza na kutanda bubela bwa Satana, kupwa bukaponeja Satana ne mingilo yandi mine. Bulopwe bwa Leza bukafudija mavita, misongo, nzala—nansha ke lufu lwine. (Mitōto 46:9; 72:12-16; Isaya 25:8; 33:24) Kitatyi kyolombela Bulopwe bwa Leza bwiye, ulombelanga ino milao yonso ifikidile.

“Muswidile mutyima obe mūlu ne panopantanda pene i monka.”

Binenwa bya Yesu bilombola’mba kiswa-mutyima kya Leza kekikatunyapo kulongeka pano panshi enka mokilongelwa mūlu, mwine mushikete Leza. Kiswa-mutyima kya Leza kekikankajibwepo mūlu, mwine’mwa, Mwanā Leza watambile divita Satana ne bandi, webela pano panshi. (Kusokwelwa 12:9-12) Kulomba kino kintu kya busatu kya mu lulombelo lwa kulondela’po, enka na bibidi bibajinji, kitukwasha tulame mu ñeni bintu bya mvubu kutabuka—ke kiswa-mutyima kyetupo, ino i kya Leza. Kiswa-mutyima kyandi kyo kiletelanga nyeke bipangwa byandi bintu biyampe. O mwanda, nansha ke muntu mubwaninine mwine Yesu wānene Shandi amba: “Kemuswidile mutyima wami mhm poso muswidile mutyima obe muyūkanike.”—Luka 22:42.

“Bēkale kwitupapo bidibwa byetu bya mafuku onso, mo bukila, mo bukila.”

Penepo Yesu wālombwele kadi amba milombelo yetu keyakikala enka ya kwisakila. Kekibipo kulomba Leza bitala bisakibwa byetu bya difuku ne difuku. Kulonga uno muswelo kwituvuluja’mba Yehova ye “upāna ku bonsololo būmi ne muya ne bintu byonso.” (Bilongwa 17:25) Bible ulombola’mba i mbutwile wa buswe uloelelwe kupa bandi bana byobya byobasakilwa. Inoko, pamo bwa mbutwile muyampe, kakapanapo bamulomba bintu byokebakamwena’mopo.

“Betulekele byamāpu byetu.”

Lelo bine udi na māpu kudi Leza? Lelo usakilwa kulekelwa? Bantu bavule dyalelo kebakiyukilepo buluji ne bukatampe bwa bubi. Ino Bible ufundija amba bubi bo bulengeje makambakano mabi etutana, mwanda bo bwine bulengeje lufu mu bantu. Byotubutwilwe mu bubi, tulubanga dingi, kadi lukulupilo lwetu lwa mafuku a kumeso lwimanine enka pa kulekelwa na Leza. (Loma 3:23; 5:12; 6:23) I kintu kitūkija mutyima pa kuyuka binena Bible amba: “Abe, Mfumwami, wi muyampe, ne mutyima wa lubilo wa kulekela.” —Mitōto 86:5.

“Betunyongolole kudi yewa mubi.”

Lelo ujingulwile’mba wi mukolelwe usakilwa kukingwa bukidibukidi na Leza? Bavule bapelanga kwitabija’mba “yewa mubi,” Satana udi’ko. Ino Yesu wāfundije amba Satana udi’ko bine, wāmutela ne bu “mulopwe wa panopantanda.” (Yoano 12:31; 16:11) Satana i mone ino ntanda yaludika, kadi usakanga kukona ne abe mwine, uleke kupwana kipwano na Shobe Yehova. (1 Petelo 5:8) Inoko, Yehova udi na bukomo kutabuka Satana kadi usangedile kukinga boba bamusenswe.

Buno bubandaudi bwīpi bwa myanda mikatampe ya mu lulombelo lwa kulondela’po lwa Yesu kebwisambilepo pa myanda yonso ikokeja kutelwa mu milombelo. Vuluka bitulombola 1 Yoano 5:14 bitala padi Leza amba: “Wivwane tulombe kintu, shi kika, shi kika, monka muswidile mutyima wandi, nankyo witwivwana.” Shi ke pano, kokalanga’mba makambakano obe keadipo na mvubu ya kulombwela’o Leza.—1 Petelo 5:7.

Ino le kitatyi ne kifuko nakyo le? Le kitatyi ne kifuko pene potulombela bidi na mvubu?