Twipangulei Bidi Yesu

Bantu bavule bakaminwe Leza balañanga amba kipwilo kifwaninwe kwikuja mu politike. Balañanga amba kipwilo kibwanya kulonga bivule mu mwanda utala kupwija makambakano a bantu. Inoko, bantu bakwabo betabije bampikwa budimbidimbi balañanga amba kipwilo ne politike kebifwaninwepo kwityanga. Lelo abe nobe ulanga namani pa kipwilo kwikuja mu myanda ya politike? Lelo ino mpusa mikomo ibwanya kwingila kakasa-kakasa?

YESU KIDISHITU wātelelwe bu muntu “wādi na lupusa lukatampe mu mānga ya mitōtelo ya bantu.” Shi ke pano, langa’po bidi shi twamwipangula kipangujo kya amba: Le kipwilo kifwaninwe kwikuja mu politike? Le wadi wakulondolola namani? Kitatyi kyaādi pano panshi, wālondolwele kino kipangujo kupityila ku binenwa ne bilongwa byandi. Kimfwa, mu Busapudi bwandi bwa ku Lūlu bwa kasekuseku, Yesu wāletele’mo bulombodi bwākweshe balondi bandi bajingulule mwingilo mukatampe obādi bafwaninwe kwingila mu bifuko mobādi. Tubandaulei’ko bidi myanda imo ya mu buno busapudi butumbe.

Yātengele Būmi bwa Bakwabo

Yesu wālombwele muswelo ufwaninwe balondi bandi kumona ino ntanda. Wānene amba: “Bānwe nanshi mudi bwa mwepo wa panopantanda, ino shi mwepo nao udyuluke nankyo kadi butobaji bwao budi paka le? Nankyo keukinengelele nansha paka, poso kwiumwanga’tu panja, bantu ke banyantapo. Bānwe kadi mudi mwinya wa panopantanda. . . . Bu-mwinya bwenu busokokele ku bantu, amba bemumone mīngilo yenu miyampe, nabo batumbije Shenu wa mūlu.” (Mateo 5:13-16) Mwanda waka Yesu wādingakenye balondi bandi na mwepo ne mwinya?

Binenwa bya Yesu bya amba balondi bandi badi pamo bwa mwepo, kebitalepo’tu enka kabumbo katyetye, ino i bantu bonso. Badi pamo bwa mwinya, kebitalepo’tu bantu batyetye kete, ino i bonso basaka kumona senene. Yesu pa kwingidija bino binenwa bya kyelekejo, wālombwele patōka amba kādipo usaka balondi bandi betolwele kulampe na bantu. Mwanda waka?

Langulukila pa uno mwanda: Mwepo keubwanyapo kulama bidibwa shi kewelelwe’mopo. Kinanu kekikokejapo kutōkeja mu kyumba shi kekitūdilwe’mopo. Nanshi, ke kya kutulumukapo shi Yesu kāsoñenyepo nansha dimo bandi bana ba bwanga kwitolwela ku kifuko kampanda kya ntanda kukashimika bisaka bya bantu betabije. Kadi kākankamikilepo balondi bandi batūle mukalañano pa bukata bwabo ne malongolodi a bipwilo. Inoko, monka mwelelwanga mwepo mu bidibwa ne mwinya nao umunika mu mfindi, ngikadilo ya Bene Kidishitu nayo ifwaninwe kwikala na lupusa pa būmi bwa bakwabo.

“Kebadipo bwa bapano-pantanda”

Ino, musoñanya wa Yesu wa amba balondi bandi bādi ba kwityanga na bantu-nabo, ukolomona kipangujo kya mvubu kitala muswelo umona Mwine Kidishitu politike. Mwanda waka? Kitatyi kityetye’tu kumeso kwa lufu lwandi, Yesu wālombele kudi Leza pangala pa balondi bandi amba: “Kadi nkilombelepo na’mba: Wibafundule panopantanda; ehe, nanshi na’mba: Wibalamininepo [kudi yewa umbi]. Kebadipo bwa bapano-pantanda, ehe, monka mo nkīkadile amiwa bu-wapanopantanda.” (Yoano 17:15, 16) Ino penepa, Bene Kidishitu babwanya namani kuleka kwikala ba pano pa ntanda koku bekele mu bibundi byabo? Pa kutana malondololo, tubandaulei bidi bipangujo bikwabo bibidi:

• Le Yesu wādi umwene politike namani?

• Le i bika bifwaninwe kulonga Bene Kidishitu dyalelo?