A Bana-balume Batongwe Boilai Ñeni Kudi Temote

MU MWAKA wapityile’u, bana-balume bavule batongelwe bu bakulumpe ne bu bengidi ba mingilo mu bukata mwa Batumoni ba Yehova kujokoloka ntanda yonso. Shi nobe ubadilwa mu bano batutu baswe, nabya sangela dino dyese dya mwingilo obe mupya.

Inoko, kyaba kimo ubwanya ne kusela mutyima kūlu. Jason mukulumpe umo nkasampe unena’mba, “Ponatongelwe, dibajinji neivwene bu navudilwa mingilo.” Ba Mosesa ne Yelemia nabo bēmwene bu kebabwanyapo mwingilo wēbapele Yehova. (Divilu 4:10; Yelemia 1:6) Shi nobe ye mowimwena, le i muswelo’ka obwanya kunekenya ino milangwe ne kwendelela kumeso? Tala kimfwa kya Temote, mwana bwanga mwine Kidishitu.​—Bilongwa 16:1-3.

Bimweka bu Temote wādi na myaka isenselela ku 20 nansha ne musubu pāmuselele mutumibwa Polo ekale mwendi nandi. Byaādi nkasampe, dibajinji Temote ye uno kādipo wikulupile kadi ye uno wādi wikaka pa bya kulonga mu mwingilo wandi mupya. (1 Temote 4:11, 12; 2 Temote 1:1, 2, 7) Nansha nankyo, myaka dikumi pa kupita’po, Polo wālembēle kipwilo kya mu Fidipai amba: “Ami nkulupile mudi Mfumwetu Yesu kwimutumina Temote panopano ponka . . . Mwanda nkidipo na muntu mukwabo wa milangwe na yandi.”​—Fidipai 2:19, 20.

Lelo i bika byālengeje Temote ekale mukulumpe ukulupilwa? Tala ñeni yobwanya kuboila ku kimfwa kyandi mu ino myanda isamba.

1. Wādi utele bantu mutyima bya binebine. Polo wāsapwidile banabetu ba mu Fidipai amba: “[Temote] ukata mutyima bya binebine ku myanda yenu.” (Fidipai 2:20) Bine, Temote wādi utele mutyima ku myanda ya bantu. Wādi utele mutyima bininge ku būmi bwabo bwa ku mushipiditu, kadi wādi wipāna na mutyima tō pa mwanda wabo.

Epuka kwikala pamo bwa shofele wa motoka wipangila kufika kumeso kwa kitatyi pa kishīko kya myotoka, inoko pampikwa kwimana asele’mo bakidiya. William, mukulumpe umo mulēmekibwe kadi ke mwingile bu mukulumpe mu myaka 20 ne kupita, udingila bana-balume batongwe amba: “Sanswai banabetu. Tai mutyima ku bisakibwa byabo pa kyaba kya kuta’o’nka ku madyese enu.”

2. Wādi utūdile mwingilo wa busapudi pa kifuko kibajinji. Polo pa kwisambila pa kwishila kwādi kwishidile Temote na bantu bakwabo wānenene amba: “Bakwabo bonso bakimbanga tumweno twa abo bene, ke tumwenopo twa Kidishitu Yesu.” (Fidipai 2:21) Polo wālembēle uno mukanda mu Loma. Wājingulwile amba banababo bādi batele mutyima’nka ku tumweno twa abo bene. Mu muswelo kampanda, kebādipo basaka kwingila bininge mingilo ya ku mushipiditu. Inoko Temote wādi mwishile na bano bantu! Paādi umona mikenga ya kuzambalaja myanda miyampe, wādi wiivwana pamo bwa Isaya wānenene amba: “Ami uno, ntume bidi.”​—Isaya 6:8.

Lelo i muswelo’ka obwanya kwikala na ndiñamano pa mingilo yobe ne mingilo ya ku mushipiditu? Dibajinji, ta mutyima ku bintu bya mvubu mikatampe. Polo wānenene amba, “Mujingulule bintu bya mvubu mikatampe.” (Fidipai 1:10) Mona na mvubu bintu bimona Leza bu bya mvubu. Dya bubidi, pēleja bintu. Epuka bintu bikujimijija kitatyi ne bukomo bitupu. Polo wāsapwidile Temote amba: “Nyema bya kusakasaka bya bunkasampe, ino londalonda boloke, lwitabijo, buswe, ne ndoe.”​—2 Temote 2:22.

3. Wādi wingila bikomo mwingilo ukola. Polo wāvulwije bene Fidipai amba: “Banwe muyukile [Temote] mwaelombwedile aye mwine bu mufwaninwe, amba pamo bwa mwana na shandi, waingile nami bu umpika mwanda wa kwendeleja myanda miyampe kumeso.” (Fidipai 2:22) Temote kādipo muzoze. Wādi wingila bikomo pamo na Polo, ne kino kyāningije kijimba kyabo kya buswe.

Dyalelo mu bulongolodi bwa Leza mudi mingilo mivule. Ino mingilo i isangaja kadi ibwanya kukulengeja upwane bininge na batutu ne bakaka. O mwanda witungile kitungo kya kuvudilwa “mafuku onso bya kulonga mu mwingilo wa Mfumwetu.”​—1 Kodinda 15:58.

4. Wādi wingidija byobādi bamufundija. Polo wālembēle Temote amba: “Abewa ulondanga biyampe shē bufundiji bwami, mwiendelejo wami, mpango yami, lwitabijo lwami, kitūkijetyima kyami, buswe bwami, kūminina kwami.” (2 Temote 3:10) Temote byaādi wingidija byobya byobādi bamufundija, o mwanda wābwenye bisakibwa bya kwingila mwingilo mukatampe.​—1 Kodinda 4:17.

Lelo nobe udi na mulunda nobe mutame ku mushipiditu wa kukupa kimfwa kya kulondela’po? Shi kudipo nandi, wabulwa’po kumukimba? Tom, mukulumpe ke mwingile mu bula bwa myaka mivule, uvuluka’mba: “Mukulumpe umo wa bwino wadi untele mutyima kadi wadi umfundija biyampe. Kyaba kyonso nadi mulomba madingi ne kwiengidija. Kino kyaumpele kikulupiji bukidi bonka.”

5. Wādi nyeke wifunda pa kasuku. Polo wāsoñenye Temote amba: “Wiibidije na kitungo kya kulombola bwine Leza.” (1 Temote 4:7) Munyemi wa lubilo ubwanya kwikala na kotyi wa kumwibidija, inoko kadi usakilwa ne kwiibidija aye mwine pa kasuku. Polo wāsoñenye Temote amba: “Abe wielele’ko nyeke kutanga ku meso a bantu, kukankamika, ne kufundija. . . . Langa bininge bino bintu’bi; wielelele monka, amba bantu bonso bamone kwendelela koendelela.”​—1 Temote 4:13-15.

Nobe ufwaninwe kutamija nyeke bwino bobe. Ikala mwifundi musumininwe kadi londa bulombodi bwa panopano buletwa na bulongolodi bwa Yehova. Kadi, epuka kwikulupila bipitepite​—padi na kulanga’mba kodi na bwino buvule, ne kwanza kubandaula mwanda o-onso pampikwa kulonga bukimbi na mushike. Pamo bwa Temote, “kyaba kyonso wite mutyima abe mwine ne bufundiji bobe.”—1 Temote 4:16.

6. Wādi ukulupile mushipiditu wa Yehova. Pa kulangulukila pa mwingilo wa Temote, Polo wāmuvulwije amba: “Lama kino kyabulēme kyowapelwe kupityila ku mushipiditu ujila, mwine udi motudi.” (2 Temote 1:14) Pa kusaka’mba Temote alame mwingilo wandi, wādi ufwaninwe kukulupila mu mushipiditu wa Leza.

Donald, mukulumpe ke mwingile myaka mivule, unena’mba: “Bana-balume batongwe bafwaninwe kusanswa kipwano kyabo na Leza. Boba balonga uno muswelo bakenda ino ‘bukomo bwabo kutyepa mpika.’ Shi balomba mushipiditu wa Leza ne kutamija bipa byao, nabya bakekala bu dyese ku banababo.”​—Ñimbo ya Mitōto 84:7; 1 Petelo 4:11.

I kikankamika’po kashā pa kumona batutu bavule batongelwe panopano kubadila’mo ne abe, bendelela ku mushipiditu. Jason utelelwe ku ngalwilo, unena’mba: “Mu kitatyi kyonaikele bu mukulumpe, nefundile bintu bivule kadi kikulupiji kyami kyatamīne’ko. Pano nsangelanga mwingilo wami ne kwiumona bu dyese dikatampe!”

Lelo usakanga Yehova endelele na kukwingidija? Nabya witungile kitungo kya kuboila ñeni kudi Temote. Shi ulonge uno muswelo, nabya ukekala bu dyese ku bantu ba Leza.