Lelo Wingilanga Biyampe na Bakwenu?

Yesu wēfundile ino ngikadila yāmukweshe ekale kimfwa kiyampe ku bengidi nandi baādi wingila nabo pano pa ntanda. Le kimfwa kya Yesu kibwanya kwitukwasha namani? Shi tubandaule senene kimfwa kyandi, tubwanya kuyuka misoñanya isatu ikokeja kwitukwasha twingile biyampe na bakwetu. Ino misoñanya iketukwasha twingile mu bumo na bakwetu ne kwingidila nabo pamo.

Muntu wingila biyampe na bakwabo wikalanga mwityepeje, umona baingila nabo amba badi na bulēme kadi kebetatwilangapo. Yesu wēfundile ino ngikadila ya kwityepeja kudi Shandi. Nansha Yehova kete byafwaninwe kwitwa bu Umpangi, inoko wadi usaka bantu bakwabo bamone amba mwingilo wāingile wandi Mwana ne bakwabo udi na mvubu. Kino i kimweke mu binenwa bya Leza bya amba: “Tulonge muntu mu kyelekejo kyetu.” (Ngo. 1:26) Kupityila ku bino binenwa, Yesu wāmwene amba Yehova i mwityepeje.​—Ñim. 18:35.

Yesu nandi wētyepeje paādi pano pa ntanda. Pobādi bamutendela pa byaālongele, aye wātumbije yewa wādi ufwaninwe kutumbijibwa. (Mako 10:17, 18; Yoa. 7:15, 16) Yesu wālongele bukomo bwa kwikala mu ndoe na bandi bana ba bwanga, kadi wēbamwene bu balunda pa kyaba kya kwibamona bu bapika. (Yoa. 15:15) Wēboije’nka ne ku maulu mwanda wa kwibafundija kwityepeja. (Yoa. 13:5, 12-14) Netu i biyampe tumone botwingila nabo na bulēme pa kyaba kya kusaka betutendele. Shi ‘twilēmeka batwe bene na bene’ ne kuleka kukimba kuyuka i ani ufwaninwe kutendelwa pa byotwingila, tukalonga bivule.​—Loma 12:10.

Kadi muntu mwityepeje wivwanijanga’mba “pa badingidi bavule kudi kufikidila.” (Nki. 15:22) Nansha shi tudi na bwino’ka, tufwaninwe kuvuluka’mba i kutupu muntu uyukile bintu byonso. Nansha ke Yesu wāitabije amba kudi bintu byākadipo uyukile. (Mat. 24:36) Kadi wādi uta mutyima ku bintu byadi biyukile bandi bana ba bwanga bampikwa kubwaninina ne ku byobādi balanga. (Mat. 16:13-16) O mwanda bantu baādi wingila nabo bādi beivwana biyampe shi badi nandi! Netu shi tuvuluke na kwityepeja’mba ketuyukilepo bintu byonso, ne kwivwana milangwe ya bakwetu, tukekala nabo mu ndoe kadi ‘kukekala kufikidila.’

I biyampe bakulumpe beule kwityepeja kwa Yesu kitatyi kyobengidila pamo. Bafwaninwe kuvuluka’mba mushipiditu ujila ubwanya kuludika muntu e-ense mu kitango kya bakulumpe. Kitatyi kyobadi mu lenyo, bakulumpe bafwaninwe kulengeja mukulumpe ense emone bu udi na bwanapabo, nabya abo bonso bakakwata butyibi bukamwena’mo kipwilo kyonso.

Muntu wingila biyampe na bakwabo wikalanga na mutyima unekena mu muswelo waikele nabo. Kadipo na kasumalomo kadi witabijanga milangwe ya bakwabo. Yesu wāikele na mikenga mivule ya kumona mwādi mulombwela Shandi mutyima unekena. Kimfwa Yehova wāmutumine kukūla bantu ku lufu lobādi bafwaninwe kufwa.​—Yoa. 3:16.

Yesu wādi wivwana milangwe ya bakwabo ponso pobyādi bibwanika. Vuluka mwaākwashishe mwana-mukaji umo mwine Fenisea, nansha Yesu byaātuminwe ku njibo ya Isalela. (Mat. 15:22-28) Kadi wālombwele mutyima unekena pa byaādi usakila bandi bana ba bwanga balonge. Mulunda nandi Petelo pa kupwa kumutuna ku meso a bantu, Yesu wāmulekēle. Kupwa mwenda mafuku wāpa Petelo mingilo mikatampe. (Luka 22:32; Yoa. 21:17; Bil. 2:14; 8:14-17; 10:44, 45) Kimfwa kya Yesu kitulombola patōka’mba ‘mutyima wetu unekena ufwaninwe kuyukana ku bantu bonso’ na kwivwana milangwe yabo.​—Fid. 4:5.

Kadi mutyima unekena uketulengeja twilemunune mwanda wa kwingidila pamo biyampe na bantu ba miswelo yonso. Yesu wādi wikele biyampe na bantu baādi nabo, byalengeja ne balwana nandi ba mukao bamutopeke amba i “mulunda na basonkeji ba musonko ne babipya-mambo,” bene bādi bevwana musapu wandi. (Mat. 11:19) Le netu tubulwepo kwingila biyampe na bakwetu pamo bwa Yesu? Louis, tutu waingile kitatyi kilampe na banabetu ba bibidiji bishileshile mu mwingilo wa kwendakana ne ku Betele unena’mba: “Kwingila pamo na bantu bampikwa kubwaninina kudi pamo bwa kūbaka lubumbu na mabwe a bukata bwishileshile. Mabwe byoadi na bukata bwishile, bilomba kulonga bukomo pa kōlola lubumbu, inoko lubumbu lubwanya koloka swā. Kadi nadi nonga bukomo bwa kushinta ami mwine mwanda wa kwingila mu ndoe na bakwetu amba tuvuye mwingilo.” Bine, uno i mumweno muyampe!

Le i mikenga’ka yotudi nayo ya kulombola mutyima unekena mu kyetu kipwilo? Tudi na mukenga wa kulombola mutyima unekena kitatyi kyotudi mu kisumpi kyetu kya busapudi. Tukokeja kusapula na basapudi badi na mingilo mishileshile mu kisaka, nansha ba myaka mishileshile. Tubulwepo kulombola mutyima unekena na kulonda musapwilo wabo mwanda wa kwibakwasha basapule bininge?

Muntu wingila biyampe na bakwabo wikalanga na “mutyima wa kupāna.” (1 Tm. 6:18) Yesu paādi wingila na Shandi, wāmwene amba Yehova kāmufilepo kintu nansha kimo. Yehova “paālongolwele madiulu,” Yesu ‘wādi’po’ kadi wāboile ñeni kwadi. (Nki. 8:27) Mwenda mafuku, Yesu wālombwele na nsangaji bandi bana ba bwanga ‘bintu byonso byawāivwene’ kudi Shandi. (Yoa. 15:15) Kukwatañana na kino kimfwa, netu tufwaninwe kulombola bakwetu botwingila nabo byobya byotuyukile ne bwino bwetu. Muntu wingila biyampe na bakwabo, kakebafindapo myanda ya kamweno mwanda’tu wa kwibatādila. Ino ukasangela kwibalombola bintu biyampe byaefundile.

Kadi tubwanya kulombola mutyima wa kupāna na kukankamika botwingila nabo. Shi muntu wamone bukomo botulonga ne kwitufwija’ko na mutyima umo, le ketwiivwanangapo biyampe ku mutyima? Yesu wētūdile’ko kitatyi kya kulombola baādi wingila nabo bintu biyampe byaāmwene mobadi. (Dingakanya na Mateo 25:19-23; Luka 10:17-20.) Wēbasapwidile’nka ne kwibasapwila’mba, ‘bakalonga mingilo mikatampe’ kumutabuka. (Yoa. 14:12) Mu bufuku bukya ke lufu lwandi, Yesu wāfwijije’ko batumibwa bandi ba kikōkeji amba: “Banwe e bandamete mu matompo ami.” (Luka 22:28) Fwatakanya’po mwēbakankamikīle bino binenwa ne kwibalengeja balonge’po kintu! Netu shi twitūdile’ko kitatyi kya kutendela botwingila nabo, bakasangala bininge ne kwingila bininge.

Tutu Kayode unena’mba, “pa kwingila biyampe na bakwetu, kebilombepo kwikala mubwaninine, bilomba’tu kwibalengeja bekale na nsangaji ne kuleka kwibalēmejeja mingilo.” Lelo wingilanga na bakwenu uno muswelo? Ubulwepo kwipangula banabenu bene Kidishitu bomwingila nabo, uyuke mobakumwena mu uno mwanda? Shi basangelanga kwingila nobe, enka na mwādi musangela bana ba bwanga ba Yesu kwingila nandi, nabya ubwanya kunena na mwānenene mutumibwa Polo amba: “Twi bengidi nenu pa mwanda wa nsangaji yenu.”​—2 Ko. 1:24.