Lelo Wi Mwiteakanye “Kupyana Ntanda”?

Yehova paāsoñenye bantu ‘bayuje ntanda ne kwiinekenya,’ wālombwele amba ntanda yonso ikekalanga ke paladisa. (Ngo. 1:28) Boba pakapyana ntanda banenwe kukōkela uno musoñanya mubajinjibajinji. Ku ngalwilongalwilo ntanda keikekalapo paladisa—mwanda budimi bwa Edena kebukidi’kopo. Kukekala mingilo mivule ya kwingila mwanda wa kutōkeja bifuko byonenwe pano. Bine, bikalomba kwingila bininge!

Kino kituvuluja mingilo yāingile bene Isalela pobātambile mu Babiloni. Ntanda yabo yālongele myaka 70 pampikwa muntu kushikata’mo. Inoko Isaya wālaile amba na bukwashi bwa Yehova, bakabwanya kwiyalamuna ikale monka milumbuluke. Bupolofeto bwādi bunena’mba: “Ukalamuna mu ntanda mwandi mutuputupu pamo bwa Edena ne dilungu dyandi didi zolē pamo bwa budimi bwa Yehova.” (Isa. 51:3) Bene Isalela bābwenye kwingila uno mwingilo. Muswelo umo onka, na bukwashi bwa Yehova boba bakapyana ntanda bakabwanya kwiinekenya. Kadi ubwanya kulombola tamba’nka pano amba usakanga kukengila uno mwingilo.

Muswelo umo bidi i na kulonga byonso byobwanya mwanda wa kulama njibo yobe ne lubanza lobe lutōka, ne kutūla bintu mu ndudi. Ubwanya kulonga namino nansha shi balondakani nobe kebebiloñangapo. Kadi ubwanya ne kukwasha’ko ku kukundula ne kulama yenu Njibo ya Bulopwe ne Njibo ya Bitango. Shi bibwanika mungya ngikadilo yodi’mo, nabya ubwanya ne kudinga fomu wa kwingila bu mwingidi wa kwilanga ku mwingilo wa kuleta bukwashi mu bitatyi bya bimpengele. Shi ulonge namino, ukalombola’mba wi mwiteakanye kukwasha banabenu kitatyi kyobasakilwa bukwashi. Ubwanya kwiipangula’mba, ‘Le kudi bwino kampanda bombwanya kufunda bonkokeja kukengidija shi napebwa dyese dya kupyana ntanda?’

Yesu paāsangwile’tu mwana Yelusa mwana-mukaji, wānenene amba mwana’u udi na nzala, mupei byakudya. (Mako 5:42, 43) Kukwatakanya uno mwana mwana-mukaji wa myaka 12, kekyādipo kiselwa kikomo. Ino tompa kufwatakanya mwingilo ukalombwa kwingila kitatyi kikafikidija Yesu mulao wandi wa amba, “boba bonso badi mu bibundu bakevwana diwi dyandi ne kutamba bakatamba’mo.” (Yoa. 5:28, 29) Nansha Bible byakanenene’popo kanda ne kanda, tubwanya kufwatakanya’mba boba bakasangulwa bakasakilwa kukwashibwa pa kusokola byakudya, mwa kwikala, ne bivwalwa. Lelo ubwanya kulombola tamba’nka pano amba usakanga kwiteakanya mwanda wa kukebakwasha? Tala bino bipangujo bityetye byobwanya kulangulukila’po.

Shi abaela musapu mu kipwilo amba basa kwimupempula kudi mutadi wa kipindi, lelo wilembejanga mwanda wa kumwita mudye nandi byakudya? Shi bengidi ba kitatyi kyonso ba ku Betele abatumwe mu mwaba nansha mwingilo wa kwendakana wa mutadi wa kipidi ubaimana, lelo ukebakwasha basokole njibo mwa kushikata? Shi kitango kya ntanda nansha kya pa bula kisa kulongelwa mu kyenu kibundi, lelo ukepāna mwanda wa kwingila bu mwingidi wa kwilanga kumeso kwa kitango ne pa kupwa kwa kitango, nansha ukepāna mwanda wa kutundaila beni bāya?

Kukwatañana na Bilongwa 24:15, tutengēle kusangulwa kwa bantu midiyala ne midiyala. Bavule i boba kebāikelepo na mukenga wa kuyuka Yehova. Inoko bakekala na uno mukenga pobakasangulwa.a Bengidi ba Yehova ba kikōkeji kadi ba bwino bakakwasha’ko ku kwibafundija. (Isa. 11:9) Kaka Charlotte mwine ke musapule mu Bulaya, mu Amerika wa Kunshi, ne mu Afrika, utengēle uno mwanda na kipyupyu. Unenanga na nsangaji amba: “Ntengēle kukafundija boba bakasangulwa. Pontanga myanda ya muntu wāikele’ko pa kala, divule nenanga’mba: ‘Shi uno muntu wāyukile’tu Yehova, būmi bwandi bwādi bwa kwikala muswelo mukwabo.’ Ntengēle kukasapwila boba bakasangulwa myanda ya Yehova ne kwibalombola’mba būmi bwabo bukekala biyampe shi bamwingidile.”

Nansha ke bengidi ba Yehova ba kikōkeji bāikele’ko kumeso kwa Yesu kwiya pano pa ntanda, nabo bakekala na bivule bya kufundijibwa. Langa’po bidi nsangaji ne dyese dyotukekala nadyo dya kushintulwila Danyele kufikidila kwa bupolofeto bwaālembele inoko kwibwivwanija mpika. (Dan. 12:8) Nansha kukwasha ba Luta ne Naomi bayuke amba kisaka kyabo kibadilwa ku musuku kwātambile Meshiasa. Bine tukasangala bininge kwingila mu ino mpangiko ya ntanda yonso ya kufundija bantu, pampikwa kuningilwa ne bilabi bidi mu ino ntanda mibi ya dyalelo!

Le i muswelo’ka obwanya kulombola tamba’nka pano amba usakanga kwikala mwiteakanye kukafundija boba bakasangulwa? Muswelo umo bidi wa patōkelela, i na kulonga dyalelo bukomo bwa kulumbulula bwino bwetu bwa kufundija ne kusapula kitatyi ne kitatyi. (Mat. 24:14) Ekale i bununu nansha ngikadilo yodi’mo bikulengeja utunye kulonga bivule pano, bukomo bolonga bubwanya kulombola’mba wi mwiteakanye kukafundija boba bakasangulwa.

Bine, i biyampe mpata kulangulukila pa bino bipangujo bya mvubu: Lelo bine utengēle na kipyupyu kupyana ntanda? Lelo usangedile mulangwe wa kunekenya ntanda, kukwatakanya boba bakasangulwa ne kwibafundija? Ubwanya kulombola’mba wi mwiteakanye, na kukwatakanya dyalelo mikenga yonso ya kwingila mingilo iifwene na yoya ikutengēle pokapyana ntanda!