Fundijai Benu Bana Tamba ku Bwanuke

1, 2. Bambutwile bafwaninwe kunyemena kudi ani pa kutamija babo bana?

‘BANA i bipyanwa bya Yehova,’ ye mwānenene mbutwile umo wakanye kubwipi kwa myaka 3 000 kunyuma. (Mitōto 127:3) Bine, nsangaji ya bumbutwile i mpalo mikatampe itudile Leza kumeso a bantu bavule besongele. Inoko boba badi na bana, kebejengapo kujingulula’mba nsangaji ya bumbutwile iyanga pamo na biselwa.

² Nakampata dyalelo, kulela bana i kiselwa kikomo. Inoko bavule batamijanga babo bana enka senene. Mulembi wa mitōto wānene na bukomo bwa mushipiditu’mba: ‘Poso Yehova ashimike njibo, shi bitupu, bashimiki bakaputumina’mo bitupu.’ (Mitōto 127:1) Shi ulonde misoñanya ya Yehova pa ditabula ne ditabula, ukekala mbutwile mulumbuluke. Bible unena’mba: “Kulupila mudi Yehova ne mutyima obe onsololo, kadi kokalemēnenapo pa kwivwanija kwa abe mwine.” (Nkindi 3:5) Lelo witabije kwivwana madingi a Yehova umbula bwa myaka yonso 20 ya kulela mwana?

 3. Bashabana badi na kiselwa’ka mu mwingilo wa kutamija bana?

³ Mu bisaka bivule kujokoloka ntanda yonso, bana-balume bamonanga bu kufundija bana i enka mwingilo wa bana-bakaji kete. Eyo, mungya Kinenwa kya Leza, shabana ye aye udi na kiselwa kibajinji kya kusāsaketa ba mu kyandi kisaka. Inoko kadi kinenanga’mba udi kadi ne na biselwa bikwabo mu kisaka. Bible unena’mba: “Longolola mwingilo obe panja, kadi longa’o mu budimi; penepa kulonda ubaka njibo yobe.” (Nkindi 24:27) Ku meso a Leza, shabana ne inabana bafwaninwe kwingidila abo bonso pamo mu kufundija babo bana.​—Nkindi 1:8, 9.

 4. Mwanda waka ketufwaninwepo kumona bana bana-balume bu batabukile’ko bana bana-bakaji?

⁴ Umonanga bobe bana namani? Malapolo alombola’mba mu Azia “bana bana-bakaji basangelwanga bityetye pa kubutulwa.” Mu Amerike Latine, kufikija ne dyalelo, bana bana-bakaji kebatalwengapo senene nansha ke mu “bisaka bya bantu bafunde bininge” mwine. Ino nabubine, bana bana-bakaji ke banapo ba kupēlula. Yakoba, shabana wādi mutumbe pakala, wātelele bandi bana bonso, kubadila’mo ne bana bana-bakaji bonso bābutwile mu kine kitatyi’kya, amba i ‘bāna bampele Leza ku lusa lwandi.’ (Ngalwilo 33:1-5; 37:35) Ne Yesu nandi, wāesele “twana” tonso (twana-tulume ne twana-tukaji) tobāmuletēle. (Mateo 19:13-15) Pa kino, wālombwele mwibamwenine Yehova.​—Kupituluka 16:14.

 5. I milangwe’ka ifwaninwe kuludika ba mulume ne mukaji pa kutyiba mbila ya buvule bwa bana bobakabutula?

⁵ Mungya kibidiji kya yenu ntanda, le bantu basakilanga mwana-mukaji kubutula bana bavule? Mungya buluji, buvule bwa bana bafwaninwe kubutula ba mulume ne mukaji i mwanda wibatala abo bene bubidi. Ino lelo kikekala namani shi bambutwile kebadipo na misokwe ya kudisha bana bavule, kwibavwika ne kwibafutyila masomo? Eyo, ba mulume ne mukaji bafwaninwe kubandaula uno mwanda pa kutyiba mbila itala pa buvule bwa bana bobakabutula. Bakwabo bakomenwanga kwibalela, bashilula kutuma’ko bamo-bamo kukebaleleja ku banababo. Lelo kino i kibidiji kiyampe? Ke kiyampepo. Bambutwile kebafwaninwepo kwitentula kiselwa kya kulela babo bana. Bible unena’mba: “Shi kadi muntu kamwenepo bintu bya bandi, ne bya ba mu kipango kyandi nabo bo bēne, nankyo wavutakanya lwitabijo.” (1 Temote 5:8) Ba mulume ne mukaji batunangu, babadikilanga kutunga buvule bwa bana bobakabutula mu kyabo “kipango,” mwanda wa kuyuka ‘mwa kwibalelela’ senene. Lelo kebakokejapo kusonsolola bininge kwilondakana kwa bana? Uno nao i mwanda wibatala abo bene. Nansha shi kadi abatyibe mbila ya kusaka kukala lubutulo, nao kadi i mwanda wibatala abo bene. “Bonsololo bakaselanga byakwibalemena, wa kyandi, wa kyandi.” (Ngalatea 6:5) Inoko, kusonsolola kwilonda kwa bana na kupulumuna memi, kekukwatañenepo nansha dimo na misoñanya ya mu Bible. Yehova Leza ye “nsulo ya būmi.” (Mitōto 36:9) Omwanda kwipaya būmi kupwa kwa kwimitwa’bo nansha shi kakidi kadiī katyetye, i butomboki bukatampe kumeso a Yehova kadi kekishidilepo na kwipaya muntu.​—Divilu 21:22, 23; Mitōto 139:16; Yelemia 1:5.

 6. Kufundija mwana kufwaninwe kushilula kitatyi’ka?

⁶ Nkindi 22:6 unena’mba: “Tamija mwana mu dishinda dimufwaninwe.” Kufundija bana i kiselwa kikwabo kikatampe kidi pa mutwe wa bambutwile. Kufwaninwe kushilula kitatyi’ka? Tamba’nka pa bwanuke. Mutumibwa Polo wānene’mba Temote wāshilwile kufundijibwa tamba “pa bwanuke.” (2 Temote 3:15) Kishima kya Kingidiki kingidijibwe pano kifunkila pa mwana walukeke, nansha pa mwana ukidi munda. (Luka 1:41, 44; Bilongwa 7:18-20) Kino kilombola’mba Temote wāshilwile kufundijibwa ukidi mwanuke​—kadi ye mokifwaninwe. Pa bwanuke ye pafwaninwe kushilula kufundija mwana. Nansha ke mwana walukeke, udi na lūku lwa kusaka kuyuka bintu.

 7. (a) Mwanda waka bambutwile bonso bafwaninwe kuningisha kipwano na wabo mwana walukeke? (b) I kipwano’ka kyādi pabukata bwa Yehova ne wandi Mwana wabunka?

⁷ Inabana umo wānene’mba: “Pa kumona’tu wami mwana walukeke, nāmusenswe bininge.” Ye mulongelanga bainabana bavule. Kino kipwano kya ba mwana ne inandi kiniñanga pa kwendelela na kwilamata nyeke tamba pa kubutulwa kwandi. Kumudisha ne kumwamusha, nabyo biningishanga kino kipwano. (Enzankanya na 1 Tesalonika 2:7.) Pekalanga inandi umunyunya koku kadi umuneneja, mwana wimonanga bu bine inandi umusenswe. (Enzankanya na Isaya 66:12.) Ino le shandi nandi? Nandi ufwaninwe kusamba kipwano kyapabwipi na wandi mwana umpya. Yehova ye kimfwa kilumbuluke mu uno mwanda. Mukanda wa Nkindi witulombola kipwano kya Yehova na wandi Mwana wabunka amba: ‘Yehova wāndupwile bu ngalwilo ya mashinda andi . . . Nāikala yewa yādi usenswe byamwiko difuku ne difuku.’ (Nkindi 8:22, 30; Yoano 1:14) Shabana muyampe nandi ufwaninwe kutamija kipwano kya kyanga ne kya buswe na wandi mwana tamba ukibutulwa ñaa. Mbutwile umo wānene’mba: “Mulombole kisanso kikatampe. Kekudipo mwana ufwanga kwelwa mu kyadi ne kumufifya ku kanwa.”

 8. Bambutwile bafwaninwe kulangula mutyima’ka mu babo bana tamba bakibutulwa ñaa?

⁸ Ino bana balukeke basakilwanga bipite pano. Tamba pa kubutulwa kwabo, bongolo bwabo butengele’nka kuyuka myanda, bambutwile yo nsulo imbajinji kwa kutamba ino myanda. Tulete kimfwa kya kuyuka kunena. Bakimbi bañeni balombola’mba kuyuka kunena ne kutanga kwa mwana “kimweka bu kutambanga ku muswelo wiabilanga bambutwile milangwe na wabo mwana tamba pa bwanuke bwandi.” Nena ne tanga kumeso a obe mwana pakidi walukeke. Pakashilula kukwiula, nobe ye pokashilula kumufundija kutanga. Ukayuka kutanga kumeso kwa kutwela ku masomo. Kino kikemukwasha mpata shi mudi mu ntanda mudi badimu batyetye ne tulasa tuyule bana ba masomo.

 9. I kitungo’ka kikatampe kifwaninwe kuta’ko bambutwile mutyima?

⁹ Kintu kikatampe kifwaninwe kuta’ko bambutwile bakristu mityima i kuvuija bisakibwa bya kumushipiditu bya babo bana. (Tala Kupituluka 8:3.) Na kitungo’ka? Kukwasha wabo mwana atamije bumuntu bwa bwine-kristu, avwale “bumuntu bupya.” (Efisesa 4:24, MB) Pa kino, bafwaninwe kumukimbila bintu bya kumūbaka senene ne manwa a mwa kumufundijija.

10. I ngikadilo’ka milumbuluke ifwaninwe kutamija bana?

¹⁰ Bukomo bwa njibo bulondanga mungya bukomo bwa bingidilwa byobāingidije pa lūbako. Mutumibwa Polo wānene’mba bingidilwa bilumbuluke bya kūbaka nabyo bumuntu bwa bwine-kristu i “nsahabu, nansha ndalama, nansha mabwe a buleme.” (1 Kodinda 3:10-12) Bino bifunkila pa ngikadilo milumbuluke, kimfwa, lwitabijo, tunangu, kusansanya, dikōkeji, bulēme ne kusanswa Yehova ne bijila byandi. (Mitōto 19:7-11; Nkindi 2:1-6; 3:13, 14) I muswelo’ka ukokeja bambutwile kukwasha babo bana batamije ino ngikadilo tamba pa bwanuke? Na kulonda dishinda dyāsebelwe tamba pa kala.

11. Bambutwile bene Isalela bādi bakwasha babo bana namani bekale kutamija ngikadilo ya bwine-Leza?

¹¹ Kitatyi kityetye kumeso kwa muzo wa Isalela kutwela mu Ntanda ya Mulao, Yehova wāsapwidile bambutwile bene Isalela’mba: “Bino binenwa bino’bi byo nakusoñanya dyalelo dino’di, bikekala pa mutyima obe; kadi ukebikomeneja kudi bobe bāna, ne kwibisambijana pa kushikata mobe mu njibo, kadi poenda mwishinda, ne polāla, ne pobūka pene.” (Kupituluka 6:6, 7) Eyo, bambutwile bafwaninwe kwikala bimfwa, balunda, bantu ba kwisamba nabo, ne bafundiji.

12. Mwanda waka kidi na mvubu bambutwile bekale bimfwa bilumbuluke?

¹² Ikala kimfwa kilumbuluke. Dibajinji Yehova wānene’mba: “Bino binenwa . . . bikekala pa mutyima obe.” Kupwa wābweja’ko amba: “Ukebikomeneja kudi bobe bāna.” Nanshi ngikadilo ya bwine-Leza ifwaninwe kwikala dibajinji mu mityima ya bambutwile. Mbutwile ufwaninwe kusanswa bubinebine ne kwibwingidija umbūmi bwandi. Nabya ukabwanya kutenga mutyima wa wandi mwana. (Nkindi 20:7) Mwanda waka? Mwanda bana balondanga nakampata bintu byobamona kupita byobevwana.​—Luka 6:40; 1 Kodinda 11:1.

13. Bambutwile bakristu bakokeja kwiula kimfwa kya Yesu muswelo’ka mu myanda itala kuta mutyima ku babo bana?

¹³ Ikala mulunda nandi. Yehova wāsapwidile bambutwile bene Isalela’mba: ‘Wisambe na bobe bana kitatyi kyoshikata mu yobe njibo ne kyoenda mu dishinda.’ Kino kilomba kupityija kitatyi kilampe na bana, nansha shi bambutwile badi na mingilo mivule namani. Yesu wādi uyukile’mba bana bafwaninwe kwelelwa kitatyi. Mu mafuku a mfulo ya mwingilo wandi, bantu “badi bamuletela twana amba: Etutengepo.” Lelo Yesu wālongele’po kika? “Wetutenteka maboko andi kētwesela dyese.” (Mako 10:13, 16) Langa’po bidi, Yesu wādi kadi kubwipi na lufu. Ino wētūdile’ko kitatyi kya kwikala na twana ne kwituta mutyima. Bine, tuboilei’po ñeni!

14. Mwanda waka kupityija kitatyi pamo na bana i kyakamweno kudi bambutwile?

¹⁴ Mwisambilei nandi pamo. Kupityija kitatyi na obe mwana kukakupa muswelo wa kwisamba nandi. Mu kwendelela na kwisamba nandi ye mokajingulula senene mwenda mutamina bumuntu bwandi. Ino vuluka’mba, kwisambila pamo kutabukile kubanga bitupu. Inamwana umo mwine Brezile wānene’mba: “Nādi mfwaninwe kutamija bwino bwa kwivwana, kwivwana na wami mutyima.” Kitūkijetyima kyandi kyālupwile bipa bilumbuluke, pāshilwile wandi mwana kulonda ino milangwe ya inandi.

15. I kika kifwaninwe kuta’ko mutyima mu kitatyi kya kwipwija mukose?

¹⁵ Bana bafwaninwe kutūdilwa’ko “kitatyi kya kusepa . . . ne kitatyi kya kuja,” nansha kya kwipwija mukose. (Musapudi 3:1, 4; Zekadia 8:5) Kwipwija mukose kudi na bukwashi shi bambutwile bekale kupityija kino kitatyi pamo na babo bana. I kyabulanda, mu bisaka bivule kwipwija mukose i kutala televijo. Nansha mpangiko imo-imo ipita ku televijo byoikokeja kupwija mukose, ino mivule yonakanyanga mikadilo milumbuluke, kadi kutala televijo konakanyanga mīsambo ya mu kisaka. Byokidi uno muswelo, lelo kubwanyapo kulonga kintu kikokeja binebine kwimupwija mukose na benu bana? Kimfwa kwimba, kukaya makayo, kukanangila balunda, kukananga mu bifuko bisangaja kubandila. Bintu bya uno muswelo biningishanga kwisambila pamo.

16. I myanda’ka itala padi Yehova ifwaninwe bambutwile kufundija babo bana, ne i muswelo’ka obafwaninwe kwikilonga?

¹⁶ Ikala mufundiji. Yehova wānene’mba: “Bino binenwa bino’bi . . . ukebikomeneja kudi bobe bāna.” Ngikadilo yo ikakulombola kintu kyofwaninwe kufundija ne mwa kwikifundijija. Dibajinji, “Ukasanswa Yehova Leza obe ne mutyima obe onso, ne muya obe onso, ne bukomokomo bobe bonso.” (Kupituluka 6:5) Kupwa, “bino binenwa . . . ukebikomeneja.” Fundija na kitungo kya kutamija buswe bwa kusanswa Yehova ne bijila byandi na mūya wabo onso. (Enzankanya na Bahebelu 8:10.) Kishima “kukomeneja” kishintulula kufundija na kupitulukapituluka’mo. Shi kepano, Yehova ukusapwila’mba muswelo umbajinji ufwaninwe kukwasha bana batamije bumuntu bwa bwine-Leza i kwimanina pa kwibalombola myanda itala padi aye. Kino kilomba kwifunda nabo Bible kitatyi ne kitatyi.

17. I ngikadilo’ka ifwaninwe kutamija bambutwile mu mityima ya babo bana? Mwanda waka?

¹⁷ Bambutwile bavule bayukile’mba kutweja myanda mu mityima ya bana ke mwandapo upēla. Mutumibwa Petelo wāsoñenye balunda nandi bakristu’mba: “Bwa twana-twalukeke tupya tukidi tutyila, mwikale kwabila mabele malumbuluke a [kinenwa] ampikwa kyongo.” (1 Petelo 2:2) Kishima “mwikale kwabila” kilombola’mba bantu bavule kebevwanangapo kyaka kya kudya bidibwa bya kumushipiditu. Omwanda bambutwile bafwaninwe kusokola miswelo ya kuningija kino kyaka mu babo bana.

18. I mifundijijo’ka ya Yesu ifwaninwe kwiula bambutwile?

¹⁸ Yesu wādi utenga mityima na kuleta bimfwa. (Mako 13:34; Luka 10:29-37) Uno mufundijijo ulupulanga bipa bilumbuluke ku banuke. Fundija misoñanya ya mu Bible na kwingidija nsekununi miyampe, isangaja, kimfwa pamo na idi mu Dibuku Dyami dya Mānga ya mu Bible.a Nena bana nabo balondolole’po. Wibakwashe bayuke kwingidija manwa abo mu kufwatakanya muswelo wādi ulongeka myanda idi mu Bible. Yesu wādi wingidija ne bipangujo. (Mateo 17:24-27) Iulai mufundijijo wandi mu kifundwa kyenu kya kisaka. Pa kyaba kya kwibasapwila kijila kya Leza bitupu, i kiyampe kwibepangula kimfwa’mba: Mwanda waka Yehova wētupele kino kijila? I kika kyotukamwena’mo na kwikilonda? I kika kiketufikila shi ketwikilondelepo? Bipangujo bya uno muswelo bikokeja kukwasha mwana alanguluke ne kumona’mba bine, bijila bya Leza i bifwaninwe kadi i biyampe.​—Kupituluka 10:13.

19. Shi bambutwile balonde misoñanya ya mu Bible pa kufundija babo bana, i kika kikamwena’mo babo bana?

¹⁹ Shi wikale kimfwa kilumbuluke kudi obe mwana, mulunda nandi, mwisambi nandi, mufundiji wandi, ukamukwasha pakidi mwanuke ekale kusamba kipwano kya pabwipi na Yehova Leza. Kino kipwano kikakankamika obe mwana ekale mukristu udi na būmi bwansangaji. Nabya mwana ukalonga bukomo bwa kukwatañanya būmi bwandi na lwitabijo lwandi, nansha shi wafikilwa na masusu nansha na matompo a muswelo’ka. Mukwashe kitatyi kyonso ekale kusangela kino kipwano kilēme.​—Nkindi 27:11.

20. Kulemununa ne kudingila bimanine pa kika, ne i muswelo’ka obifwaninwe kwingidijibwa?

²⁰ Kulemununa ne kudingila bimanine pa kōlola ñeni ne mutyima. Bana bafwaninwe’byo nyeke. Polo udingila bashabana’mba: “Mwibatamijei [benu bana] biyampe monka mu madingi, ne mu lufundijo lwa Mfumwetu.” (Efisesa 6:4) Bambutwile bafwaninwe kulemununa babo bana na buswe, pamo na mulongela Yehova. (Bahebelu 12:4-11) Kulemununa muntu na buswe, kuloñwanga na kulanguluka nandi pamo. Omwanda witudingila twikale ‘kuteja pa kulemununwa.’ (Nkindi 8:​33, NW) I muswelo’ka ufwaninwe kulemununa mwana?

21. I misoñanya’ka ifwaninwe kuta’ko bambutwile mityima kitatyi kyobalemununa babo bana?

²¹ Bambutwile bamo-bamo balañanga’mba bana bakokeja kulemununwa na kwibafunina bitupu, na kwibakalabela nansha na kwibatuka. Ino Polo usoñanya pa uno mwanda onka’mba: “Bānwe bashabo nenu, kemukibasomba bāna benu ku bukalabale.” (Efisesa 6:4) Bakristu bonso i bapebwe musoñanya wa kwikala ba “kikōkeji ku bonso . . . ne kukōkelela pa kudingila bakwabo madingi bakwifutulula abo bene.” (2 Temote 2:24, 25) Bambutwile bakristu bafwaninwe kuta mutyima ku bino binenwa kitatyi kyobalemununa babo bana na kusumininwa konso. Inoko, kitatyi kimo-kimo kulanguluka na mwana kekwikalangapo kupwija mwanda, kikalomba padi kumupa ne mfuto na kanye.​—Nkindi 22:15.

22. I kika kifwaninwe kujingulula mwana kumeso kwa kupebwa’ye mfuto?

²² Bana i beshile, omwanda bafwaninwe kulemununwa mu muswelo mwishileshile. Bamo i bakomo kunekenibwa na “binenwa” bitupu. Dimo-dimo, kwibapa mfuto pamwanda wa kubulwa kikōkeji kwabo, kukokeja kwibakwasha. (Nkindi 17:10; 23:13, 14; 29:19) Inoko mwana ufwaninwe kuyuka i kika kyapelwa mfuto. “Kamama ne madingi bipana ñeni.” (Nkindi 29:15; Yoba 6:24) Kadi mfuto nayo idi na mikalo. Yehova wāsapwidile bantu bandi’mba: ‘Nkakupa mfuto pa mpēlo.’ (Yelemia 46:28b) Bible ketusoñanyangapo kusanshija mwana na nsungu, na bikupilwa bya kasumalomo, bimupeneja bidyoma nansha kumutapa bilonda.​—Nkindi 16:32.

23. I milangwe’ka keifwaninwe kushala na mwana kitatyi kimupa bambutwile mfuto?

²³ Pādyumwine Yehova bantu bandi amba pano nkemulemununa, wābadikile kwibasapwila’mba: “Kokakwatwapo moyo . . . mwanda ami ngidi nobe.” (Yelemia 46:28a) Muswelo umo onka, bambutwile pa kulemununa babo bana, mwana kafwaninwepo kushala na milangwe’mba i banshikwe. (Kolose 3:21) Ino ufwaninwe kuyuka’mba mbutwile waundemununa mwanda ‘udi nami,’ unsakilanga biyampe.

24, 25. I kintu’ka kibi kiloñwanga bana mu ano mafuku kyobafwaninwe kukingwa’ko?

²⁴ Bantu bavule batame bavulukanga kitatyi kya pa bwanuke bwabo, amba kyādi kitatyi kya nsangaji. Bavulukanga mobādi balelelwa ne kukingwa na babo bambutwile. Bambutwile basakanga babo bana beivwane uno muswelo, ino mu ino ntanda myoneke, i kikomo kulela bana senene pamo bwa mobādi balelelwa pakala.

²⁵ Kyaka kikwabo kyenda kīlundila’ko mu ino myaka i kino kya konakanya bana batyetye. Mu Malezi, malapolo a bana bonakanibwa alombola’mba kibalwa kyabo kibakanda misunsa iná kupita mokyādi kikadile myaka dikumi kunyuma. Mu Alemanye, monakanibwanga kubwipi kwa bana 300 000 ku mwaka ne mwaka; ino bwifundi bumo bulombola’mba mu Amerika wa Kunshi kino kibalwa kikokeja kufika ku bana 9 000 000 bonakanibwa ku mwaka ne mwaka! I kyabulanda, bana bavule bonakanibwanga na bantu ba mu kyabo kisaka, bobayukile biyampe ne bobakulupile. Bana bafwaninwe kukingwa senene na babo bambutwile. Bambutwile bakokeja kwibakinga namani?

26. I miswelo’ka imo-imo ikokeja kukingwa bana, ne buyuki bukokeja kukinga mwana muswelo’ka?

²⁶ Pavule, bana bonakanibwanga i boba kebayukile kintu nansha kimo kitala pa bulādi, omwanda kilomba dibajinji kufundija mwana, nansha ukidi mwanuke. Buyuki bukokeja kumukinga “ku dishinda dibi, ne kudi bantu besamba bipupakane.” (Nkindi 2:10-12) Buyuki’ka? Buyuki bwa misoñanya idi mu Bible, bwa kuyuka kusansanya kiyampe ne kibi. I buyuki bwa kufundija banuke’mba, kemufwaninwepo kwitabija kulonga bintu bibi bimulombola batame, nansha abo balonga’byo. (Enzankanya na Danyele 1:4, 8; 3:16-18.) Kebufwaninwepo kwikala bufundiji bwa na dimo-dimo kete. Banuke bavule bakokeja kuvuluka kifundwa biyampe poso’nka bebapitulukile’mo misunsa mivule. Shi bana ke batame, shabana ufwaninwe kwishisa mu myanda yabumvu itala wandi mwana mwana-mukaji, inabana nandi mu itala wandi mwana mwana-mulume​—kuno ye kufundija bana kuyuka kiyampe. Nakampata, banwe bambutwile ye bafwaninwe kukinga benu bana ku konakanibwa na kwibakengelela bininge.

27, 28. I Nsulo’ka mikatakata ifwaninwe kunyemena’ko bambutwile kitatyi kyobatanwa na makambakano mu myanda itala kutamija bana?

²⁷ Nabubine, kufundija mwana tamba pa bwanuke i kiselwa, ino bambutwile betabije kebaselelepo kino kiselwa kasuku kabo. Mu myaka yakala, mu mafuku a Batyibi, pāyukile Manoa amba usa kukabutula mwana, wālombele Yehova bulombodi bwa mwa kukataminija wandi mwana. Yehova wālondolwele milombelo yandi.​—Batyibi 13:8, 12, 24.

²⁸ Ne bambutwile betabije dyalelo nabo mo monka, bafwaninwe kusapwila’kyo Yehova mu milombelo. Kwikala mbutwile i mwingilo mukomo, inoko udi na mpalo mikatampe. Ba mulume ne mukaji bakristu ba mu Hawai bānene’mba: “Badikila kulongolola byonso umbula bwa myaka 12, kumeso kwa myaka dikumi ya makambakano keyafikile. Ino shi wingile bininge na kulonda misoñanya ya mu Bible, pobakatyiba mbila ya kusaka kwingidila Yehova na mutyima umo, bine ukasepelela bininge.” (Nkindi 23:15, 16) Pakatyiba obe mwana ino mbila, bine nobe ukela nsadi’mba: ‘Bāna i bipyanwa bya Yehova.’