Kwashai Benu Bana Bansongwanzele Batame Biyampe

1, 2. Shi mwana wasongola, ukokeja kuletela bambutwile makambakano’ka ne nsangaji’ka?

KWIKALA na mwana nsongwanzele mu njibo i kishīle bininge na kwikala na mwana wa myaka itano nansha wa myaka dikumi. Mwana shi wasongola, wikalanga uletela bambutwile myanda mivule ne makambakano, inoko kadi ukokeja kwibaletela nsangaji ne mpalo. Bimfwa bya ba Yosefa, Davida, Yoshia ne Temote, bilombola’mba bankasampe bakokeja kwiendeja na ñeni ne kusamba kipwano kilumbuluke na Yehova. (Ngalwilo 37:2-11; 1 Samwele 16:11-13; 2 Balopwe 22:3-7; Bilongwa 16:1, 2) Ye mwikadile ne bansongwanzele bavule mu ano etu mafuku. Padi nobe uyukile’mo bamo-bamo.

² Inoko ku bakwabo, busongwanzele kyo kitatyi kya impupa. Bekalanga, pamo bakōkele, pakwabo na manye. Bansongwanzele bana-balume ne bana-bakaji basakanga kwikala na bwanapabo, omwanda bafitwanga pa kumona mikalo ibakadilanga bambutwile babo. Bambutwile bafwaninwe kukwasha na mutyima mutūke ne buswe bankasampe ba uno muswelo, mwanda ke bayukile bintu bivule. Eyo, busongwanzele bukokeja kwikala kitatyi kya nsangaji, pakwabo kadi kikokeja kwikala kya masusu​—ku bambutwile ne ku banuke bene. I muswelo’ka otukokeja kukwasha bankasampe umbula bwa kine kitatyi’kya?

 3. I muswelo’ka ukokeja bambutwile kulongolwela babo bana bansongwanzele dishinda dya būmi bwa nsangaji?

³ Bambutwile balonda madingi a mu Bible bafundijanga lutundu lwabo muswelo wa kunekenya makambakano a mu kitatyi kya bunkasampe, bakekale bu bantu batame bayukile kwiludika abo bene senene. Mu matanda onso ne mu bitatyi byonso, bambutwile ne bansongwanzele bengidija misoñanya ya mu Bible beselwanga madyese ne kutūbuluka.​—Mitōto 119:1.

 4. Mwanda waka mīsambo ya pafula idi na mvubu mikatampe mu kitatyi kisongola bana?

⁴ Bible unena’mba: ‘Mpangiko iponanga kokwa kwakubulwa mīsambo ya pafula.’ (Nkindi 15:22) Mīsambo ya pafula, nansha byoyādi na mvubu pākidi bana bakidi banuke bininge, ino idi na mvubu kutabuka pa kusongola kwabo​—mwanda umbula bwa kino kitatyi bapityijanga kyaba kilampe panja pa njibo na balunda nabo ba ku masomo ne na banuke bakwabo ba mu kisense kyabo. Shi pabukata bwa bambutwile ne bana kepadipo mīsambo ya pafula​—yakubulwa kafinda ne ya patōkelela—nankyo bana bakekala pamo bwa beni mu njibo. Shi kepano, i muswelo’ka ufwaninwe kuteakanya mīsambo?

 5. Bansongwanzele bafwaninwe kumona muswelo’ka mīsambo yabo na bambutwile?

⁵ Pa kino, bansongwanzele ne bambutwile babo bafwaninwe kuvuija bipindi byabo. Bana shi abafikila pa busongwanzele, bamonanga bu kwisamba na babo bambutwile bidi bumvu. Ino vulukai’mba: ‘Shi i patupu bulombodi bwa ñeni, ponkapo bantu bapona; ino mu bungi bwa banēni mudi lupandilo.’ (Nkindi 11:14) Bino binenwa bitalanga banuke ne bakulumpe bene. Bansongwanzele bajingulwile kino bayukile’mba bine bafwaninwe kupebwa bulombodi bwa ñeni, mwanda bafikilwanga na myanda mikutakane bininge kutabuka pobākidi banuke. Bafwaninwe kuyuka’mba babo bambutwile betabije i badingidi bamanwa, bapotolwele bintu bivule bya umbūmi, ne bebalelele na buswe umbula bwa myaka mivule. Omwanda, bansongwanzele batunangu, shi abafikila pa kino kipimo umbūmi bwabo, banyemenanga kudi babo bambutwile.

 6. I mutyima wa muswelo’ka ufwaninwe kulombola bambutwile batunangu ne babuswe kitatyi kyobesamba na babo bana bansongwanzele?

⁶ Mīsambo yakubulwa kafinda ilombanga mbutwile alonge bukomo bwa kwikala na kyaba pasaka wandi mwana nsongwanzele kwisamba nandi. Shi wi mbutwile, yuka’mba mīsambo ifwaninwe kwikala yakubulwa kafinda nakampata ku obe mutamba. Uno ke mwandapo upēla. Bible unena’mba kudi “kitatyi kya kwikala talala nyā, ne kitatyi kya kwisamba.” (Musapudi 3:7) Obe mwana nsongwanzele ukokeja kumona’mba kino ye kitatyi kifwaninwe kwisamba nobe, akyo nanshi ye kyosaka kwikala talala. Padi wi mwitūngile’kyo kala bu kya kulonga kifundwa kya pa kasuku, kya kukokolokwa, nansha kya kwingila mingilo ya pa lubanza. Ino, shi obe mwana usaka kwisamba nobe, tompa kusendulula mpangiko yobe, umutēleke. Kutyina’mba wakakomenwa kukufwena dikwabo. Vuluka kimfwa kya Yesu. Difuku dimo, wētūdile’ko kitatyi kya kukokolokwa. Ino pa kumona bantu bamungwila mwanda wa kumwivwana, wālekele ne kukokolokwa kwine, wāshilula kwibafundija. (Mako 6:30-34) Bansongwanzele bavule bayukile amba bambutwile babo i bavudilwe mingilo, ino basakanga bambutwile babo bebetabe kitatyi kyobebabija. Shi kepano, mwibetabei ne kwibevwana.

 7. I bika bifwaninwe kwepuka bambutwile?

⁷ Tompa kuvuluka nobe mobyādi bikusanshila powākidi nsongwanzele, kadi kokilwa kutula’po ne tumizaulo! Bambutwile bafwaninwe kusangela kwikala pamo na babo bana. Pabulwanga bambutwile kintu kya kulonga, bapityijanga namani kine kitatyi’kya? Shi basakanga nyeke kupityija’kyo na kulonga bintu kasuku pampikwa kisaka, babo bana bansongwanzele bakajingulula’kyo bukidi bonka. Shi bankasampe bajingulule’mba balunda nabo ba ku masomo bebatele mutyima bininge kutabuka bambutwile babo, kikokeja kukebaletela makambakano.

 8. I muswelo’ka ukokeja kukuna bambutwile mu mityima ya babo bana mushipiditu wakubulwa budimbidimbi, kusanswa mingilo mikomokomo ne mwiendelejo wa bu-ujila?

⁸ Shi bambutwile kebaikele kukomeneja babo bana kuyuka mvubu ya kuleka budimbidimbi ne ya kwingila mingilo mikomo, bafwaninwe kuyuka’mba ye kintu kyobafwaninwe kufundija babo bana umbula bwa busongwanzele bwabo. (1 Tesalonika 4:11; 2 Tesalonika 3:10) Ne kujingulula shi babo bana i betabije na mutyima umo buluji bwibasakilwa bekale na mwikadilo wa bu-ujila, wakubulwa kiko mu būmi bwabo. (Nkindi 20:11) Mbutwile ufwaninwe kwisamba bivule mu uno mwanda na kulombola aye mwine kimfwa. Bansongwanzele bakokeja kwifunda misoñanya myoloke kupityila ku mwiendelejo wa babo bambutwile, pamo’nka bwa munekenibwanga balume “kwampikwa kwisambilwa mwanda, ponka pa mwikadilo wa bakaji babo.” (1 Petelo 3:1) Ino kimfwa bitupu kekibwenepo, mwanda bana bamonanga kadi bimfwa bibi bivule panja pa kyabo kisaka ne milwi na milwi ya bisela bya kyongo. Omwanda bambutwile bakilelo bafwaninwe kuyuka mumweno udi na babo bana bansongwanzele pa bintu byobatalanga ne byobatelekanga, kino kilomba mīsambo mishikate.​—Nkindi 20:5.

9, 10. Mwanda waka bambutwile bafwaninwe kufundija babo bana myanda itala mutaka, ne bakekilonga namani?

⁹ I kyabine, nakampata mu myanda itala bulādi. Banwe bambutwile, le mwivwananga bumvu bwa kwisambila pa myanda itala mutaka na benu bana? Shi ekale mwivwananga bumvu, nankyo mwielelei’ko mwisambile’po, shi bitupu, benu bana bakasapwilwa’byo na muntu ungi. Shi banwe muleke kwibasapwila’byo, le i ani uyukile muswelo umbi obakalombolwa’byo na bantu bangi? Mu Bible, Yehova kafindilepo myanda itala mutaka, ne bambutwile nabo mo monka, kebafwaninwepo kufinda’yo.​—Nkindi 4:1-4; 5:1-21.

¹⁰ Bible upānanga buludiki bwakubulwa kafinda mu myanda itala bulādi, kadi Sosiete Watchtower nandi ulupulanga mabuku mavule a bukwashi alombola’mba buno bulombodi bwitutalanga ne batwe dyalelo. I kika kyokemulondela ano madingi? Kimfwa, mwene i kiyampe kupituluka na obe mwana mu mashapita amutala adi mu mabuku Les jeunes s’interrogent — Réponses pratiques, volime 1 ne 2. Bine, bipa bikalupuka’ko bikakusangaja bininge.

11. I mufundijijo’ka utabukile yonso ufwaninwe kwiula bambutwile mwanda wa kufundija babo bana bengidile Yehova?

¹¹ I mwanda’ka mukatampe ufwaninwe kwisambila’po bambutwile na babo bana? Mutumibwa Polo wātelele’o kitatyi kyāsonekele’mba: “Mwibatamijei [bana] biyampe monka mu madingi, ne mu lufundijo lwa [Yehova].” (Efisesa 6:4) Bana bafwaninwe kufundijibwa myanda itala padi Yehova. Nakampata bafwaninwe kufundijibwa kumusanswa ne kusepelela kumwingidila. Ne mu uno mwanda namo, kimfwa ye kikebafundija bivule. Shi bansongwanzele bamwene bambutwile babo amba basenswe Leza ‘na mutyima wabo onso, na muya wabo onso ne na ñeni yabo yonso,’ ne kujingulula bipa bilumbuluke byokilupula mu būmi bwa bambutwile babo, nabo bakokeja kutononwa kulongela monka. (Mateo 22:37) I pamo ponka, shi bankasampe bamwene’mba bambutwile babo kebatēlepo mutyima bininge ku byabupeta bya kungitu, ino batūdile Bulopwe bwa Leza pa kifuko kibajinji, kikokeja kukebakwasha bakatamije mushipiditu wa muswelo umo onka.​—Musapudi 7:12; Mateo 6:31-33.

12, 13. I myanda’ka ifwaninwe kulama mu mutyima shi tusaka kifundwa kya kisaka kikale kilumbuluke?

¹² Kulonda kifundwa kya Bible kya ku yenga ne yenga mu kisaka, kufundijanga bankasampe bintu bivule bya kumushipiditu. (Mitōto 119:33, 34; Nkindi 4:20-23) Kulonga kino kifundwa kitatyi ne kitatyi kudi na mvubu mikatampe. (Mitōto 1:1-3) Bambutwile ne babo bana bafwaninwe kuyuka’mba kifundwa kya mu kisaka kyo kya kwikala pa kifuko kibajinji mu mpangiko yabo kupita’ko bintu bikwabo, pakubulwa kwibishintakanya. Kadi kifundwa kya kisaka kikekala na bukwashi bukatampe shi kikale kupityijibwa na mutyima mutūke. Shabana umo wānene’mba: “Mwendeji wa kifundwa ye udi na lufungulo, ye wa kutūkija bantu mityima ne kukankamika mushipiditu wa bulēme umbula bwa kifundwa kya kisaka​—pamo bwa makayo ino abyo bisumininwe. Kwikala na ndiñamano ke mwandapo upēla kufikila’po, mwanda bankasampe basakilwanga kulemununwa mu mwikadilo wabo kyaba ne kyaba. Nansha shi kebipityilepo biyampe musunsa umbajinji nansha wabubidi, abe kulupila mu musunsa mukwabo.” Uno shabana wānene kadi’mba mu milombelo yandi yonso kumeso kwa kushilula kifundwa ne kifundwa, ulombanga nakampata Yehova ebape abo bonso mutyima mutūke ne milangwe ya tunangu.​—Mitōto 119:66.

¹³ Kwendeja kifundwa kya kisaka i kiselwa kidi pa mitwe ya bambutwile betabije. I bine, ku bambutwile bamo-bamo bakubulwa kyabuntu kya kufundija senene, kusokola bwino bwa kuloeja kifundwa kya kisaka kikale kisangaja kukebekadila bu kintu kikomo bininge. Inoko shi uswele bobe bana mu ‘bilongwa ne na bubinebine,’ ukābila kwibakwasha na kwityepeja ne na mutyima umo bamone kwendelela kumeso kumushipiditu. (1 Yoano 3:18) Dimo-dimo bakokeja kutompola, ino kumfulo’kwa, bakayuka’mba wibakimbilanga biyampe.

14. I muswelo’ka otukokeja kwingidija Kupituluka 11:18, 19 kitatyi kya kufundija bansongwanzele bintu bya kumushipiditu?

¹⁴ Kekifwaninwepo kwisambila pa myanda ya kumushipiditu ya mvubu enka mu kifundwa kya kisaka kete. Lelo ubavuluka mbila yāpelwe bambutwile na Yehova? Wānene’mba: “Po pa mwanda o mukabikila ino myanda yami umutyima wenu ne mu muya wenu; kabidi mukeikuta ke ya kiyukeno pa kuboko kwenu, kadi ikekala bwa tuzaza pa nsambakeno ya makiki. Penepo kadi mukalombolanga’yo bāna benu kwisamba’yo poshikete mu njibo yobe, ne ponanga mwishinda, kadi polāla ne polanguka pene.” (Kupituluka 11:18, 19; tala ne Kupituluka 6:6, 7.) Kino kekishintululapo’mba bambutwile bafwaninwe kusapwila babo bana kitatyi kyonso. Inoko mutwe wa kisaka udi na buswe ufwaninwe nyeke kuta mutyima ku mikenga yonso yamona mwanda wa kūbaka kyandi kisaka kumushipiditu.

15, 16. (a) Kulemununa mwana i kika? (b) I ani ufwaninwe kulemununa mwana, ne i ani ufwaninwe kumutala shi ulondanga madingi amupebwa?

¹⁵ Kulemununa mwana i kumufundija mwanda wa kumōlola, kilombanga ne kwisambila pamo. Kulemununa kwimanine nakampata pa kōlola kupita’ko pa kupāna mfuto​—nansha mfuto byoikokeja kwingidijibwa. Bobe bana bafwaninwe kupebwa lufundijo pobakidi banuke, ino shi abafikila pa busongwanzele, bafwaninwe kupebwa’lo monka, pakwabo kupita ne pabajinji. Bansongwanzele batunangu bayukile amba kino i kyabine.

¹⁶ Bible unena’mba: “Kivila kifutululanga madingi a shandi: Ino yewa ubanga matope umona budyumuku.” (Nkindi 15:5) Kino kisonekwa kitufundija bintu bivule. Kilombola’mba mwana ufwaninwe kulemununwa. Mwana kakokejapo ‘kubanga matope’ akatopekelwe. Yehova i mupe bambutwile, kupityidila bashabana, kiselwa kya kupa bana lufundijo. Inoko, kiselwa kya kuteja luno lufundijo kidi pa mutwe wa nsongwanzele. Shi alame lufundijo lwa tunangu lumupa ba shandi ne inandi, nankyo ukayuka bintu bivule, ne bilubo byakalonga bikekala bityetye. (Nkindi 1:8) Bible unena’mba: “Bulanda ne bumvu bwine byo bya yewa upela [lufundijo]: Ino yewa ubanga matope ukalēmekwa.”​—Nkindi 13:18.

17. I ndiñamano’ka ifwaninwe kwikala na bambutwile kitatyi kyobalemununa babo bana?

¹⁷ Bambutwile bafwaninwe kwikala na ndiñamano pa kulemununa bansongwanzele. Kebafwaninwepo kwikala na kaninga-mpo, kutyina’mba lwabo lutundu lwakanyoñama pa mutyima, nansha kujimijija babo bana kikulupiji mobadi abo bene. (Kolose 3:21) Kadi bambutwile kebafwaninwepo kutala babo bana banuke kilomo-nyeka, kutyina’mba bakaleka kwibapa bufundiji bwamvubu. Kutala bana kilomo-nyeka kukokeja kukalupula musala. Nkindi 29:17 unena’mba: “Dingila obe mwana mwana-mulume, nankyo ukakupa mwakololokwa; eyo ukapa mūya obe kuloelelwa.” Kadi vese 21 unena’mba: ‘Yewa utala mwingidi wandi kilomo-nyeka tamba ku bwanuke, ukamwalamukila kumfulo ke muntu wakubulwa kufwijako.’ Nansha uno vese byaesambila pa mwingidi, kadi ufunkilanga ne pa mwanuke yense udi mu njibo.

18. Kupa bana lufundijo kilombola kika, ne i bika bifwaninwe kwepuka bambutwile kitatyi kyobapa babo bana lufundijo?

¹⁸ Nabubine, shi bambutwile balemununanga wabo mwana mu muswelo mufwaninwe, kilombola’mba bamusenswe. (Bahebelu 12:6, 11) Shi wi mbutwile, nankyo uyukile mokikadile kikomo kulama nyeke mulemunwino mwendelemo. Mwanda wa kusaka kushikata ku matwi talala, pamo ukasaka kuleka nkasampe wa mutwe mūmu alonge monso mwasakila pakubulwa kumudingila. Ino mbutwile utala uno mwiendelejo mubi na meso bitupu, mwenda mafuku, ukekala na kipango kekileleka.​—Nkindi 29:15; Ngalatea 6:9.

19, 20. I muswelo’ka ukokeja bambutwile kōlola babo bana bansongwanzele na tunangu mu myanda itala kwipwija mukose?

¹⁹ Mu myaka yakala, bana bādi bakwasha’ko babo bambutwile ku mingilo ya mu njibo ne ya ku madimi. Dyalelo bansongwanzele bavule badi na bintu bivule bya kwipwija nabyo mukose pakubulwa kulamwa. Pa kino, bansunga i balupule bintu bivule bya kwipwija nabyo mukose. Yuka kadi amba ntanda keikwetepo na bulēme bukatampe misoñanya idi mu Bible itala pa mwikadilo wa bu-ujila, kadi abe mwine uyukile bintu bikwabo bikokeja kuleta musala.

²⁰ Omwanda mbutwile wabwino ukalama lupusa lwa kutyiba mbila yamfulo itala pa makayo ne kwipwija mukose kwa bandi bana. Ino vuluka’mba nsongwanzele wendanga utama. Mwaka ne mwaka, wimonanga bu wafikila pa ludingo lwa kumonwa bu muntu mutame. Omwanda, penda patama nsongwanzele, i kyatunangu kudi mbutwile kumupa bwanapabo kapanda mu butongi butala kwipwija mukose​—nakampata shi butongi bwandi bulombolanga kwendelela kwandi kwa kutama kumushipiditu. Kitatyi kimo-kimo nsongwanzele ukokeja kutonga minjiki, kisense ne bikwabo pakubulwa tunangu. Shi kidi namino, i kiyampe mubandaule’byo nandi pamo, amone kukatonga bintu bilumbuluke mu mafuku akāya kumeso.

21. Kwikala na milangwe mijalale mu myanda itala nsaa ifwaninwe kupityija bansongwanzele mu kwipwija mukose, kukokeja kwibakinga muswelo’ka?

²¹ Mwana ufwaninwe kwipwija mukose umbula bwa nsaa inga? Mu matanda amo-amo bansongwanzele batamanga na milangwe yakubulwa kwendelamo, amba badi na bwanapabo bwa kwipwija mukose monso mobasakila. Pa kino, nsongwanzele ukokeja kwitungila mpangiko ya “makayo” malondakane, wataluka koku kaenda koku. Bambutwile bo bafwaninwe kufundija bana’mba i kiyampe kupityija ne kitatyi na kulonga bintu bingi, kimfwa kifundwa kya kisaka, kifundwa kya pa kasuku, kwinangila na bantu bapye kumushipiditu, kutanwa ku kupwila kwa bwine-kristu ne kwingila mingilo ya mu njibo. Kino kikakankaja ‘nsangaji ya ino ntanda’ ileke kupita Kinenwa kya Leza kumeso.​—Luka 8:​11-15.

22. Ku bansongwanzele, kwipwija mukose kifwaninwe kwikushintakanya ne na bika?

²² Mulopwe Solomone wānene’mba: “Ndyukile amba: kekudipo kitabukilepo ko badi, na kusepelela, ne kulonga biyampe mafuku onso a būmi bwabo. Ino kadi muntu ense adye ne kutoma, ne kusanswa biyampe bya mwingilo wandi, i kyabuntu kya Leza.” (Musapudi 3:​12, 13) Eyo, muntu udi na būmi bwa ndiñamano, ufwaninwe ne kwisangaja. Kifwaninwe kadi ne kwingila mingilo mikomokomo. Bansongwanzele bavule dyalelo kebayukilepo nsangaji itambanga ku mingilo mikomokomo nansha bulēmantu butambanga ku kunekenya mwanda mukomo abe mwine ne kwiupwija. Bamo kebapebwangapo muswelo wa kwifunda kuyuka bwino nansha busendwe bukebakwasha umbūmi mu mafuku a kumeso. Kino i kiselwa kikatampe kidi pa mutwe wa bambutwile. Lelo upēle obe mwana kino kyaba? Shi ubwanye kufundija obe mwana nsongwanzele, ayuke mvubu ya mingilo mikomokomo ne kwingila’yo, nabya ukekala na bukankamane bukamuletela byabuyabuya bivule umbūmi bwandi.

23. I muswelo’ka ufwaninwe bambutwile kukankamika babo bana bansongwanzele?

²³ Nansha shi wikondanga na obe mwana, ino yuka’mba kino kisonekwa kinenanga bubinebine: ‘Buswe kebukankalwangapo nansha dimo.’ (1 Kodinda 13:8) Kokaleka kulombola obe mwana buswe boivwanika ku mutyima. Wiipangule amba: ‘Mfwijangako mwana ne mwana kitatyi kyanekenyanga makambakano nansha bikambija? Le nkwatakanyanga bitatyi byonso byomonanga mukenga mwanda wa kulombola bami bana buswe ne kwibānya, enka mu kine kitatyi’kya?’ Nansha shi kemumvwañanangapo kitatyi kimo-kimo, ino shi bansongwanzele bayukile bu wibasenswe, nabo bakakusanswa.

24. I musoñanya’ka wa mu Bisonekwa umwekanga pavule bu wabine mu myanda itala kutamija bana, ino i kika kifwaninwe kuvulukwa nyeke?

²⁴ Eyo, bana pa kwenda batama bakokeja abo bene kushilula kwityibila mbila mu myanda mikatampe. Pakwabo ino mbila keikokejapo padi kusangaja bambutwile. Ino lelo kikekala namani shi mwana watyibe mbila ya kuleka kwingidila Yehova Leza? Kilongekanga pavule. Nansha ke bana ba Yehova bamo-bamo ba kumushipiditu bāpelele kulonda madingi andi, bamutombokela. (Ngalwilo 6:2; Yude 6) Bana ke makompyutapo okokeja kupanza monso mosakila. I bipangwa bidi na bwanapabo bwa kutonga kyobasaka, badi na kiselwa kumeso a Yehova pangala pa mbila yobatyiba. Inoko bino binenwa bya Nkindi 22:6 bimwekanga pavule bu byabinebine: “Tamija mwana mu dishinda dimufwaninwe, kadi nansha mu bununu kakasasukamopo, ehe.”

25. I muswelo’ka utabukile buya ufwaninwe bambutwile kufwijako Yehova pangala pa madyese a bumbutwile aebapele?

²⁵ Omwanda nanshi, lombola bobe bana buswe bobe bonsololo. Wielele’ko, ulonde misoñanya ya mu Bible ya mwa kwibatamijija. Ikala kimfwa kilumbuluke mu mwiendelejo wa bwine-Leza. Nabya ukapa bobe bana muswelo wa kwikala bantu batame bayukile kuvuija biselwa byabo, bakaminwe Leza. Uno o muswelo utabukile’ko miswelo yonso ipelwe bambutwile ya kufwijako Yehova pangala pa madyese abo a bumbutwile.