Kifundwa 4

Lelo Dyabola I Ani?

Satana Dyabola​—lelo wātambile kwepi? (1, 2)

Satana ulubijanga bantu muswelo’ka? (3-7)

Mwanda waka ufwaninwe kukomena Dyabola? (7)

1. Kishima “dyabola” kishintulula amba muntu ulamakenya muntu mukwabo bubela bwa nshikani. Kishima “Satana” kishintulula amba wa lwana, kinkwa. Ano ye majina apelwe wa lwana mwine mukatampe na Leza. Ku ngalwilo, wādi mwikeulu mubwaninine momwa mūlu, wikele pamo na Leza. Inoko mwenda mafuku, wēlangila bintu bikatakata, kakimbe kutōtwa, ako kuntu kufwaninwe enka Leza kete.​—Mateo 4:8-10.

2. Uno mwikeulu, Satana, wēsamba na Eva kupityila mudi nyoka. Pa kumusapwila bya bubela, wāmubombola mwanda wa atombokele Leza. Enka namino, Satana wālwa na buno butelwa bu “bubikadi” bwa Leza, na kitenta kyandi kya bu Mwine Mukatakata Mwine. Satana wāalakene Leza amba kaludikangapo mu muswelo mwendele’mo ukokeja kumwena’mo babikalwa Bandi tumweno tutabuke kuneñena. Kadi Satana wāalakene amba i kutupu muntu nansha umo ukokeja kwikala nyeke wa dikōkeji kudi Leza. Enka nabya, Satana wēlonga aye mwine ke wa lwana na Leza. O mwanda wāfudile ku kutelwa bu Satana Dyabola.​—Ngalwilo 3:1-5; Yoba 1:8-11; Kusokwelwa 12:9.

3. Satana uloñanga buninge bwa kongola bantu bamutōte. (2 Kodinda 11:3, 14) Muswelo umo walubijanga bantu i mutōtelo wa bubela. Shi mutōtelo kampanda ufundijanga bya bubela pa myanda itala Leza, nankyo bine wingidilanga mpango ya Satana. (Yoano 8:44) Bantu badi mu mitōtelo ya bubela bakokeja kukulupila na kusumininwa konso amba batōtanga Leza wabine. Abo nanshi bengidila Satana. Mwanda ye ‘leza wa ino ntanda.’​—2 Kodinda 4:4.

4. Majende nao i muswelo mukwabo utwejanga Satana bantu mu lupusa lwandi. Bakokeja kwita mishipiditu amba ibakinge, ilonge bakwabo bibi, ibalombole bikāya kumeso, nansha kulonga bingelengele. Satana ye mushipiditu umbi ulengeja bino yonso. Shi tusaka kusangaja Leza, ketufwaninwepo kutenga ku kakintu nansha kamo ka majende.​—Kupituluka 18:10-12; Bilongwa 19:18, 19.

5. Kadi Satana ulubijanga bantu na mitatulo mipitepite ya kwitatwila musaka ne na butōtyi bwa kutōta malongolodi a kipolitike. Bamo bafwatakanyanga amba muzo wabo nansha musaka wabo o muyampe kupita wa bakwabo. Ino kino ke kyabinepo. (Bilongwa 10:34, 35) Bantu bakwabo batengele malongolodi a kipolitike kupwija makambakano a bantu. Kuno kulonga kobalonga uno muswelo i kupela kobapela Bulopwe bwa Leza. Abo nabo bo bumo kete bukapwija makambakano etu.​—Danyele 2:44.

6. Muswelo mukwabo ulubijanga Satana bantu i kwibatompa na bilokoloko bya bubi. Yehova witudyumunanga kwiepeja ku milongelo ya bubi, mwanda uyukile amba ikokeja kwituletela tusua. (Ngalatea 6:7, 8) Bantu bamo bakokeja kusaka kukukokela mu milongelo ya uno muswelo. Ino vuluka amba, na bubine, i Satana ukusakila ulonge bino bintu.​—1 Kodinda 6:9, 10; 15:33.

7. Satana ukokeja kwingidija kupangwapangwa nansha kukankajibwa mwanda wa kukupalula kudi Yehova. Bamo umbukata mwa baswe bobe bakokeja kukukalabela amba mwanda wifundanga Bible. Bakwabo bakusepa. Ino lelo i ani wākupele būmi? Satana usakanga kukuzakaja uleke kwifunda kuyuka Yehova. Kokolwa kuleka Satana akunekenye! (Mateo 10:34-39; 1 Petelo 5:8, 9) Shi ukomene Dyabola, nankyo ubasangaja Yehova, kadi ubalombola amba wi mukwatakanye bubikadi Bwandi.​—Nkindi 27:11.

[Bifwatulo pa paje 9]

Mutōtelo wa bubela, majende, ne mushipiditu wa kufwila yabo ntanda, bilubijanga bantu

[Kifwatulo pa paje 9]

Komena Satana na kwendelela na kwifunda kuyuka Yehova