Muswelo wa Kulombola Buswe ne Lusa ku Babipya-Mambo

 1. Le i bika bibwanya kulongeka shi muntu walonga bubi bukatampe?

MU KISHINTE kibadikile, twamwene muswelo wāpwijije mutumibwa Polo mwanda wa bubi bukatampe mu kipwilo kya mu Kodinda. Kipya-mambo kēsāshilepo kadi wādi ufwaninwe kufundulwa mu kipwilo. Inoko, enka mulombwela’byo kisonekwa kīmanine’po mutwe wetu wa mwanda, bamo balongele bubi bukatampe babwanya kufikijibwa ku kwisāsa. (Loma 2:4) Le i muswelo’ka ubwanya bakulumpe kwibakwasha besāse?

2-3. Le i bika byotufwaninwe kulonga shi tubayuka’mba mwanetu mu lwitabijo i mulonge bubi bukatampe, ne mwanda waka?

² Pa kusaka’mba bakulumpe bakwashe muntu ulongele bubi bukatampe, bafwaninwe kuyuka mwanda’wa. Le penepo, i bika byotufwaninwe kulonga shi tubayuka’mba mwanetu mu lwitabijo i mulonge bubi bukatampe bubwanya kumulengeja afundulwe mu kipwilo? Tufwaninwe kukankamika nonga-bibi akamone bakulumpe bamukwashe.—Isa. 1:18; Bil. 20:28; 1 Pe. 5:2.

³ Ino le bikekala namani shi nonga-bibi wapele kukalombola’mo bakulumpe? Nabya tufwaninwe kukalombola’mo bakulumpe mwanda wa muntu’wa atambule bukwashi bwasakilwa. Kulonga namino i kulombola buswe, mwanda ketusakilepo kujimija tutu nansha kaka. Shi nonga-bibi wendelela na mwiendelejo wandi mubi, ukonena’ko kipwano kyandi na Yehova. Kadi ubwanya kulengeja kipwilo kinenenwe bibi. O mwanda buswe botusenswe Yehova ne nonga-bibi, bwitulengejanga tulonge’po kintu na bukankamane.—Ñim. 27:14.

MUSWELO UKWASHANGA BAKULUMPE BOBA BALONGELE BUBI BUKATAMPE

 4. Le i kitungo’ka kikalanga na bakulumpe pobetana na muntu ulongele bubi bukatampe?

⁴ Shi muntu mu kipwilo walonga bubi bukatampe, kitango kya bakulumpe kitoñanga batutu basatu mobadi mwanda wa kubunda komite.a Bano bana-balume basakilwa kwikala na butūkanye ne kwityepeja. Kitatyi kyobalonga bukomo bwa kukwasha yewa usāsukile amba esāse, bayukanga’mba kebabwanyapo kuningila muntu ashinte. (Kup. 30:19) Bakulumpe bevwanijanga’mba ke banonga-bibipo bonso bakesāsa pamo bwa Mulopwe Davida. (2 Sa. 12:13) Banonga-bibi bamo babwanya kutonga kupela kuteja madingi a Yehova. (Ngo. 4:​6-8) Nansha nankyo, kitungo kya bakulumpe i kukwasha nonga-bibi esāse shi bibwanika. Le i misoñanya’ka ibaludikanga pobetana na nonga-bibi?

 5. Le i ngikadila’ka ikalombola bakulumpe kitatyi kyobetana na nonga-bibi? (2 Temote 2:​24-26) (Tala ne kifwatulo.)

⁵ Bakulumpe bamonanga nonga-bibi bu mukōko mulēme inoko mujimine. (Luka 15:​4, 6) O mwanda pobetana na uno muntu kebesambengapo nandi na bulobo nansha pa kubulwa kanye; kadi kebamonengapo kuno kwitana pamo bwa kulonda’tu mpangiko itūdilwe’ko. Ino bakalombola ngikadila idi mu 2 Temote 2:​24-26. (Tanga.) Bakulumpe bekalanga nyeke na kutalala, buyampe ne kanye pobalonga bukomo bwa kukwasha nonga-bibi ashinte mulangilo wandi.

 6. Le bakulumpe bakateakanya namani mutyima wabo kumeso kwa kwitana na nonga-bibi? (Bene Loma 2:4)

⁶ Bakulumpe bateakanyanga mutyima wabo. Baloñanga bukomo bwa kwiula Yehova mu byonso byobalonga pobakwasha kipya-mambo na kuvuluka binenwa bya Polo bya amba: “Leza, mu kanye kandi, usakanga kukufikija ku kwisāsa.” (Tanga Bene Loma 2:4.) Bakulumpe bafwaninwe kuvuluka’mba dibajinji i bakumbi badi munshi mwa bwendeji bwa Kidishitu. (Isa. 11:​3, 4; Mat. 18:​18-20) Kumeso kwa kwitana na nonga-bibi, komite ulombanga Yehova ebakwashe bafikile pa kitungo kyabo kya kukwasha nonga-bibi esāse. Batutu ba mu komite bakalonga bukimbi mu Bisonekwa ne mu mabuku etu, ne kulomba Yehova ebape bujinguludi. Bakabandaula myanda yobanenwe kuyuka pa kitamina kya muntu’wa ne ngikadilo yadi’mo, bine bimulengeje padi ekale na uno mulangilo, mwikadila, ne mwiendelejo.—Nki. 20:5.

7-8. Le bakulumpe babwanya kwiula namani kitūkijetyima kya Yehova kitatyi kyobetana na nonga-bibi?

⁷ Bakulumpe beulanga kitūkijetyima kya Yehova. Bavulukanga muswelo wālongele Yehova bukomo mwanda wa kukwasha banonga-bibi pa kala. Kimfwa, Yehova wālangulukile na Kaini na kitūkijetyima wāmudyumuna ku bipa bibi byādi bya kumufikila shi alonge bubi, ne kumukulupija’mba ukamwesela shi amukōkele. (Ngo. 4:​6, 7) Yehova wādyumwine Davida kupityila kudi Natana, mwine wāingidije kyelekejo kyātengele mutyima wa Davida. (2 Sa. 12:​1-7) Kadi Yehova ‘wātumine bapolofeto bandi kyaba ne kyaba’ ku muzo wa Isalela wa kubulwa kikōkeji. (Yel. 7:​24, 25) Kāilaijepo bantu bandi besāse bidi ebiya kaebakwasha. Aye wākwete’ko mulangwe wa kwibakankamika besāse.

⁸ Bakulumpe balondanga kimfwa kya Yehova kitatyi kyobalonga bukomo bwa kukwasha boba balongele bubi bukatampe. Bebakwashanga “na kitūkijetyima kyonso” monka mulombwela’kyo 2 Temote 4:2. O mwanda mukulumpe usakilwa kwikala talala ne na kitūkijetyima mwanda wa kukwasha kipya-mambo asake kulonga byoloke. Shi mukulumpe alobe nansha kufītwa, muntu ubwanya kukomenwa kuteja madingi nansha kupela kwisāsa.

9-10. Le bakulumpe babwanya kukwasha namani kipya-mambo alangulukile pa mwiendelejo wandi?

⁹ Bakulumpe bakimbanga kuyuka bintu bifikije muntu ku kulonga bubi. Kimfwa, le mwine Kidishitu washilwile kuzoza bityebitye pa mwanda wa kusūla kifundwa kyandi kya pa kasuku nansha busapudi? Le milombelo yandi yadi ke ya na dimodimo nansha ya kūlukūlu? Le walekele bya kusakasaka byandi bibi bimuludike? Le walongele butongi bwa kubulwa tunangu mu mwanda utala balunda nansha kwipwija mukose? Le buno butongi bwaikele na lupusa’ka pa mulangilo wandi ne bya kusakasaka byandi? Le wivwanije mwiivwanine Yehova pa bintu byalongele?

¹⁰ Bakulumpe babwanya kwipangula muntu bipangujo bimukwasha alangulukile pa bintu bimulengeje ajimije kipwano kyandi na Yehova ne kulonga bubi. Baloñanga kino na kanye, o mwanda kebepangulangapo bipangujo pa myanda itala muntu mine yokebanenwepo kuyuka. (Nki. 20:5) Kadi babwanya kwingidija byelekejo mwanda wa kukwasha muntu alanguluke ne kumona mubipile bilongwa byandi, pamo na mwālongēle’byo Natana kudi Davida. Padi mu kwitana kubajinji, muntu ukashilula kwialakanya pa mwiendelejo wandi. Ubwanya enka ne kwisāsa.

11. Le Yesu wāikele namani na babipya-mambo?

¹¹ Bakulumpe baloñanga bukomo bwa kwiula Yesu. Yesu musanguke wākweshe Solo wa ku Tasusa na kumwipangula kino kipangujo kya tunangu amba: “Solo, Solo, le i kika kyoumpangilapangila?” Mu uno muswelo, Yesu wāmukweshe alangulukile pa bilongwa byandi bibi. (Bil. 9:​3-6) Kadi Yesu wānenene mu mwanda utala “mwana-mukaji Yezebele” amba: “Namupele kyaba kya kwisāsa.”—Kus. 2:​20, 21.

12-13. Le i muswelo’ka ubwanya bakulumpe kupa nonga-bibi kitatyi kya kwisāsa? (Tala ne kifwatulo.)

¹² Bakulumpe beulanga kimfwa kya Yesu, kadi kebeyumbilangapo kulanga’mba nonga-bibi kakesāsapo. Nansha bamo byobabwanya kwisāsa mu kwitana kwabo kubajinji na bakulumpe, bakwabo babwanya kusakilwa kitatyi kivule. O mwanda bakulumpe babwanya kukwata’ko mpangiko ya kwitana na kipya-mambo misunsa mivule. Padi pa kupwa kwitana nandi musunsa mubajinji, mwine Kidishitu usāsukile ubwanya kushilula kulangulukila bininge pa bintu byobesambile nandi. Ubwanya kufwena Yehova mu milombelo na kwityepeja. (Ñim. 32:5; 38:18) Mu uno muswelo, pobaketana nandi musunsa mukwabo, kipya-mambo ubwanya kulombola mushipiditu mwishile na waalombwele dibajinji.

¹³ Pa kufikija kipya-mambo ku kwisāsa, bakulumpe balombolanga lusa ne kanye. Balombanga Yehova esele bukomo bwabo ne kukulupila’mba mwanabo mu lwitabijo ukealuja ne kwisāsa.—2 Tm. 2:​25, 26.

14. Le i ani ufwaninwe kutendelwa kitatyi kīsāsa kipya-mambo, ne mwanda waka?

¹⁴ Shi kipya-mambo wesāsa, kino kiletanga nsangaji mikatampe! (Luka 15:​7, 10) Le i ani ufwaninwe kutendelwa pa kino? Lelo i bakulumpe? Vuluka byālembele mutumibwa Polo pangala pa babipya-mambo amba: “Kepabulwe padi Leza ukebapa kwisāsa.” (2 Tm. 2:25) Nanshi Yehova ye ukwashanga muntu ashinte mulangilo ne mwikadila wandi, ke muntupo. Polo ushintulula bintu biyampe bilupukanga’ko shi muntu wesāsa. Uno muntu ubwanya kwikadila’ko na buyuki bwinebwine bwa bubine, kwaluja milangwe yandi ne kwinyongolola ku makinga a Satana.—2 Tm. 2:26.

15. Le i muswelo’ka ubwanya bakulumpe kwendelela kukwasha nonga-bibi wisāshile?

¹⁵ Shi nonga-bibi wesāsa, komite ukakwata’ko mpangiko ya bupempudi bwa bukumbi mwanda wa kukwasha muntu’wa endelele kutambula bukwashi bwasakilwa pa kulwa na makinga a Satana ne kōlola tushinda twa maulu andi. (Bah. 12:​12, 13) Inoko bakulumpe kebasapwilangapo muntu nansha umo bubi bulongele kipya-mambo. Le penepo i myanda’ka ibwanya kulomba kipwilo kuyuka?

“WIBADINGILE KU MESO A BANTU BONSO”

16. Le kukwatañana na 1 Temote 5:​20, “bantu bonso” batelelwe na Polo bafunkila pa bāni?

¹⁶ Tanga 1 Temote 5:20. Polo wālombwele Temote mukulumpe mukwabo adingile babipya-mambo “ku meso a bantu bonso.” Le i bika byaādi usaka kunena? Kādipo usaka kunena amba kipwilo ‘kyonso’ kinenwe kutanwa’po padingilwa muntu. Inoko wādi wisambila pa bantu batyetye padi bayukile kala bubi’bwa. Babwanya kwikala batumoni ba mwanda’wa nansha boba basapwidilwe’o na nonga-bibi. Bakulumpe babwanya kwibalombola kufula amba mwanda’wa i mupwijibwe ne amba kipya-mambo i mukwashibwe.

17. Shi bubi i buyukane bininge mu kipwilo nansha busa kukayukana mwenda mafuku, le i musapu’ka ukelwa ne mwanda waka?

¹⁷ Kyaba kimo, bubi bubwanya kuyukana bininge mu kipwilo nansha kukayukana mwenda mafuku. Shi bidi namino, mu “bantu bonso” mubadilwa ne kipwilo kyonso. O mwanda mukulumpe ukela musapu wa amba tutu nansha kaka wadingilwa. Mwanda waka? Polo ulondolola’mba: “Amba bakwabo badyumukile’po,” baleke kuponena mu bubi.

18. Le bakulumpe bakalonga bika shi muntu mubatyijibwe wa munshi mwa myaka 18 walonga bubi bukatampe? (Tala ne kifwatulo.)

¹⁸ Le bakulumpe bakalonga’po namani shi muntu mubatyijibwe wa munshi mwa myaka 18 walonga bubi bukatampe? Kitango kya bakulumpe kikatonga’ko bakulumpe babidi ba kwitana nandi pamo ne bambutwile bandi bene Kidishitu.b Bakulumpe bakepangula bambutwile mwanda wa kuyuka byobalongele’po kala mwanda wa kukwasha wabo mwana afikile ku kwisāsa. Shi mwana i muteje madingi a bambutwile kadi uloñanga bukomo bwa kushinta mulangilo wandi ne mwiendelejo wandi, bakulumpe babidi babwanya kukwata butyibi bwa kuleka bambutwile bendelele kumukwasha. Ke-pantu, Leza i mupe bambutwile kiselwa kya kulemununa babo bana na buswe. (Kup. 6:​6, 7; Nki. 6:20; 22:6; Ef. 6:​2-4) Ebiya bakulumpe bakabandaula na dimodimo na bambutwile mwanda wa kumona shi wabo mwana utambulanga bukwashi bwasakilwa. Ino le bakulumpe bakalonga bika shi muntu mubatyijibwe wa munshi mwa myaka 18 wendelela na mwiendelejo wandi mubi? Papo komite wa bakulumpe uketana nandi pamo na bambutwile bandi bene Kidishitu.

“YEHOVA I MUYULE KISANSO KYA KU MUTYIMA KADI I WA LUSA”

19. Le bakulumpe baloñanga namani bukomo bwa kwiula Yehova pobakwasha banonga-bibi?

¹⁹ Bakulumpe bengila mu makomite badi na kiselwa ku meso a Yehova kya kulama butōki bwa kipwilo. (1 Ko. 5:7) Kadi basakanga kufikija banonga-bibi ku kwisāsa shi bibwanika. O mwanda pobakwasha nonga-bibi, balamanga mu ñeni amba ukashinta. Mwanda waka? Mwanda basakanga kwiula Yehova. Aye “i muyule kisanso kya ku mutyima kadi i wa lusa.” (Yak. 5:11) Tala mwālombwedile Yoano mutumibwa mununu uno mushipiditu. Wālembele amba: “Twanwe twami twana tutyetye, nemulembela bino bintu kutyina’mba mwakalonga bubi. Inoko shi muntu walonga bubi, tudi na mukwashi udi kudi Tata, Yesu Kidishitu, muntu moloke.”—1 Yo. 2:1.

20. Le i bika byotukabandaula mu kishinte kya mfulo kya mu bino bishinte?

²⁰ Kya bulanda, kyaba kimo mwine Kidishitu ubwanya kupela kwisāsa. Shi wapele kwisāsa, ukafundulwa mu kipwilo. Le bakulumpe bavuijanga namani ino myanda mikatampe? Tukabandaula uno mwanda mu kishinte kya mfulo kya mu bino bishinte.