Muswelo Umwekejanga Kipwilo Mumweno wa Yehova pa Babipya-Mambo

 1. Le Yehova usakanga bantu bonso balonge bika?

YEHOVA wāpangile bantu na bwanapabo bwa kwitongela. Nobe wingidijanga kino kyabuntu kitatyi kyonso kyokwata butyibi. Butyibi bwa mvubu kutabuka bubwanya kukwata muntu, i bwa kupāna būmi bwandi kudi Yehova ne kutwela mu kisaka kya batōtyi bandi. Yehova usakanga muntu yense alonge namino. Mwanda waka? Mwanda usenswe bantu kadi usakanga bekale na nsangaji. Usakanga bekale nandi mu kipwano kiyampe ne kwikala’ko nyeke.—Kup. 30:​19, 20; Ngt. 6:​7, 8.

 2. Le Yehova usakanga banonga-bibi kebesāshile balonge bika? (1 Yoano 2:1)

² Inoko, Yehova kaningilangapo muntu kumwingidila. Ulekanga muntu ne muntu ekwatyile butyibi pa byasaka kulonga. Le bikekala namani shi mwine Kidishitu mubatyijibwe watyumuna kijila kya Leza na kulonga bubi bukatampe? Shi kesāshilepo, ufwaninwe kufundulwa mu kipwilo. (1 Ko. 5:13) Inoko nansha ke papo pene, Yehova ukulupile bya binebine amba nonga-bibi ukajokela kwadi. Ke-pantu, bubinga bukatampe bwāletēle Yehova kinkūlwa i mwanda wa kulekela babipya-mambo besāsa. (Tanga 1 Yoano 2:1.) Leza wetu wa buswe ukankamika bininge banonga-bibi besāse.—Zek. 1:3; Loma 2:4; Yak. 4:8.

 3. Le i bika byotusa kwisambila’po mu kino kishinte?

³ Yehova usakanga twikale na mumweno wandi pa bubi ne pa banonga-bibi. Mu kino kishinte, tusa kwisambila’mo pa muswelo otukokeja kwikala na mumweno na wandi. Potanga kino kishinte, tala (1) muswelo wāpwijibwe mwanda wa bubi bukatampe mu kipwilo kya mu Kodinda mu myaka katwa kabajinji, (2) bulombodi bwāletele mutumibwa Polo kitatyi kyēsāshile nonga-bibi, ne (3) bitufundija ino nsekununi pa mwiivwaninanga Yehova pa bene Kidishitu balonga bubi bukatampe.

MUSWELO WĀPWIJIBWE MWANDA WA BUBI BUKATAMPE MU MYAKA KATWA KABAJINJI

 4. Le i bika byālongekele mu kipwilo kya mu Kodinda mu myaka katwa kabajinji? (1 Bene Kodinda 5:​1, 2)

⁴ Tanga 1 Bene Kodinda 5:​1, 2. Mu lwendo lwandi lwa busatu lwa bumishonele, Polo wāivwene mwanda mubi wālongekele mu kipwilo kipya kya mu Kodinda. Tutu umo mu kino kipwilo wādi ulonga busekese na mukaja shandi. Kino kilongwa kyādi kibi mpata kadi kekyādipo kitanwa “nansha mu mizo mwine”! Kipwilo kyātadile kilomonyeka mwiendelejo wa uno muntu, padi enka ne kwitendela pa mwanda wandi. Padi bamo mu kipwilo bālangile amba kutala uno mwanda namino kwādi kulombola mubaile lusa lwa Leza pa bantu ba kubulwa kubwaninina. Inoko Yehova ketabijangapo bilongwa bibi mu bantu bandi. Na bubine, mwiendelejo mubi wa uno muntu wālengeje kipwilo kinenenwe bibi. Kadi shi wāshele mu kipwilo, wādi wa kwikala na lupusa lubi pa bene Kidishitu bakwabo bapwana nandi. Le penepo, Polo wāsoñenye kipwilo kilonge’po bika?

 5. Le Polo wāsoñenye kipwilo kilonge bika, ne kino kyādi kishintulula bika? (1 Bene Kodinda 5:13) (Tala ne kifwatulo.)

⁵ Tanga 1 Bene Kodinda 5:13. Kupityila ku bukomo bwa mushipiditu, Polo wālembele mukanda ulombola’mba kipya-mambo wa kubulwa kwisāsa ufwaninwe kufundulwa mu kipwilo. Le bene Kidishitu ba kikōkeji bādi bafwaninwe kwikala nandi namani? Polo wēbasoñenye ‘baleke kupwana’ nandi. Le kino kyādi kishintulula bika? Polo wāshintulwile amba mu uno musoñanya mubadilwa ne kuleka “kudya kwine na muntu wa uno muswelo.” (1 Ko. 5:11) Kushikata ne kudya byakudya pamo na muntu kubwanya kulengeja mwisambile’ko ne myanda mikwabo. O mwanda Polo wālombwele patōkelela’mba kipwilo kekifwaninwepo kupityija kitatyi pamo na uno muntu bya bituputupu. Kino kyādi kya kukinga kipwilo ku lupusa lwandi lubi. (1 Ko. 5:​5-7) Kadi, kuleka kwikala pabwipi na uno muntu kwādi kubwanya kumulengeja ajingulule amba i mulubile Yehova bininge. Ne kadi kwādi kubwanya kumutonona ealakanye ne kwisāsa.

 6. Le kipwilo kyāitabile namani ku mukanda wa Polo ne i bika byālongele’po nonga-bibi?

⁶ Polo pa kupwa kutumina bene Kidishitu ba mu Kodinda mukanda, wāshilwile kwiipangula pa mobādi ba kulongela’po pangala pa uno mukanda. Ku mfulo, Tetusa wāmuletela musapu usangaja. Kipwilo kyāitabile biyampe ku mukanda wa Polo. (2 Ko. 7:​6, 7) Kyālondele bulombodi bwandi. Kadi kitatyi kityetye pa kupita’po na pātumine Polo mukanda, nonga-bibi’wa wēsāsa bubi bwandi! Wāshinta mwiendelejo wandi ne mulangilo wandi, wāshilula kwiendeja mungya misoñanya myoloke ya Yehova. (2 Ko. 7:​8-11) Le pano Polo wāsoñenye kipwilo kilonge’po bika?

MUSWELO WĀDI WA KWIKALA KIPWILO NA KIPYA-MAMBO WĒSĀSHILE

 7. Le kufundula nonga-bibi mu kipwilo kwālupwile bipa’ka biyampe? (2 Bene Kodinda 2:​5-8)

⁷ Tanga 2 Bene Kodinda 2:​5-8. Polo wānenene amba “kufuninwa kwawafuninwa na bantu bavule i kumubwane yao muntu.” Mu muneneno mukwabo, bulemununi bwāfikidije kitungo kyabo pādi. Le i kitungo’ka? Kumufikija ku kwisāsa.—Bah. 12:11.

 8. Lelo Polo wālombwele kipwilo kilonge bika bikwabo?

⁸ Kupwa Polo wālombwele kipwilo amba: ‘Lekelai na mutyima tō ne kusenga’ tutu wadi usāsukile, kadi mwekejai “buswe bomumusenswe.” Musa kumona’mba pano Polo kādipo usaka kipwilo kīmanine’tu enka pa kwaluja uno muntu mu bantu ba Yehova. Polo wādi usaka bakulupije uno muntu mwisāse kupityila ku binenwa byabo ne bilongwa byabo amba i bamulekele bya binebine kadi bamusenswe. Mu uno muswelo, bādi ba kulombola patōka’mba basangedile kujoka kwandi mu kipwilo.

 9. Mwanda waka padi bamo bēkakile kulekela nonga-bibi wēsāshile?

⁹ Le bamo mu kipwilo bēkakile kutundaila mu bukata mwabo kipya-mambo wēsāshile? Nsekununi keinenene’popo kintu, inoko bamo ye bano bēkakile. Ke-pantu bilongwa byandi byālobeje kipwilo kyonso, padi enka ne kufwija bantu bamo bumvu mu kipwilo. Bamo bādi balonga bukomo bwa kushala batōka mu mwikadilo, ye bano bāmwene amba ke byendele’mopo kujokeja mu kipwilo muntu walongele bintu bibi uno muswelo. (Dingakanya na Luka 15:​28-30.) Ino mwanda waka kyādi kya mvubu kipwilo kilombole buswe bwa bine kudi uno tutu wājokejibwe?

10-11. Le i bika byādi bibwanya kulongeka shi bakulumpe bāpelele kulekela kipya-mambo wēsāshile?

¹⁰ Fwatakanya’po shi bakulumpe bāpelele kujokeja mu kipwilo uno muntu wēsāshile nansha shi pa kupwa’ye kujokejibwa, kipwilo kyāpelele kumulombola buswe. Wādi ubwanya kutādilwa na “kufītwa mutyima bipitepite.” Wādi ukokeja kulanga’mba kakibwanyapo monka kwingidila Yehova. Kadi wādi ubwanya enka ne kuleka kulonga bukomo bwa kulongolola kipwano kyandi na Leza.

¹¹ Kadi kibi kutabuka, shi batutu ne bakaka mu kipwilo bāpelele kulekela uno kipya-mambo wēsāshile, bādi ba kutūla kipwano kyabo na Yehova mu kyaka. Mwanda waka? Mwanda pa kyaba kya kumwekeja mumweno wa Yehova pa banonga-bibi besāsa, abo bādi ba kumwekeja mumweno mubi wa Satana wa kubulwa lusa. Bādi ba kwikala bu bingidilwa bya Dyabola mwanda wa konakanya muntu’wa ku mushipiditu.—2 Ko. 2:​10, 11; Ef. 4:27.

12. Le kipwilo kyādi kibwanya kwiula namani Yehova?

¹² Le penepo i muswelo’ka wādi ubwanya kipwilo kya mu Kodinda kwiula Yehova pa kyaba kya kwiula Satana? I na kulekela babipya-mambo besāsa na mwibalekelanga Yehova. Tala byānenene balembi bamo ba Bible padi Yehova. Davida wānenene amba i “muyampe kadi [kejepo] kulekela.” (Ñim. 86:5) Mika wālembele amba: “Lelo i Leza’ka udi pamo bwa abe, ulekela kilubo ne kupita bitupu pa kujilula?” (Mika 7:18) Kadi Isaya wānenene amba: “Mubi aleke dishinda dyandi nonga-bibi nandi milangwe yandi; ajokele kudi Yehova, mwine ukamufwila lusa, kudi Leza wetu, mwanda ukalekela bya binebine.”—Isa. 55:7.

13. Mwanda waka byādi byendele’mo kipya-mambo wēsāshile ajokejibwe mu kipwilo? (Tala kapango “Le I Kitatyi’ka Kyājokejibwe Mwana-Mulume wa mu Kodinda?”)

¹³ Pa kwiula Yehova, kipwilo kya mu Kodinda kyādi kifwaninwe kutundaila muntu wēsāshile ne kumukulupija’mba bamusenswe. Kipwilo byokyālondele bulombodi bwa Polo bwa kutundaila kipya-mambo wēsāshile, kyālombwele “kikōkeji . . . mu bintu byonso.” (2 Ko. 2:9) Bine, nansha byopāpityile’tu myeji mityetye na pāfundwilwe uno muntu mu kipwilo, bulemununi bwāmukweshe afikile ku kwisāsa. O mwanda kekwādipo kyādi kinenwe kwilaijija bakulumpe kumujokeja mu kipwilo.

MUSWELO OTUBWANYA KUMWEKEJA BOLOKE NE LUSA LWA YEHOVA

14-15. Le i bika byotwefunda ku muswelo wāpwijibwe mwanda wa bubi mu Kodinda wa kala? (2 Petelo 3:9) (Tala ne kifwatulo.)

¹⁴ Nsekununi ya muswelo wāpwijibwe mwanda wa bubi mu Kodinda wa kala yālembelwe ne kulamwa “mwanda wa kwitufundija.” (Loma 15:4) Tubefunde kupityila ku ino nsekununi amba Yehova katalengapo kilomonyeka bubi bukatampe mu bantu bandi. Bamo babwanya kulanga’mba Yehova byadi wa lusa, ubwanya kuleka mu kipwilo kipya-mambo wa kubulwa kwisāsa, inoko aye kalombolangapo lusa lwandi mu uno muswelo. Bine Yehova i Leza wa lusa, inoko ke wa kilomonyekapo; kadi kashintangapo misoñanya yandi. (Yude 4) Na bubine, kuleka nonga-bibi mu kipwilo kekwadipo kwa kwikala nansha dimo bu lusa, mwanda kwadi kwa kutūla kipwilo kyonso mu kyaka.—Nki. 13:20; 1 Ko. 15:33.

¹⁵ Inoko, tubefunde amba Yehova kasakengapo muntu nansha umo oneke. Usakanga kupandija bantu ponso pobibwanika. Ulombolanga lusa ku bantu bashinta mulangilo wabo ne kusaka kulongolola kipwano kyabo nandi. (Ezk. 33:11; tanga 2 Petelo 3:9.) O mwanda kitatyi kyēsāshile muntu wa mu Kodinda ne kuleka mwiendelejo wandi mubi, Yehova wāingidije Polo mwanda wa kushintulwila kipwilo amba uno muntu ufwaninwe kulekelwa ne kwitabijibwa mu kipwilo.

16. Le ubeivwana namani pa muswelo wāpwijibwe mwanda wa bubi mu kipwilo kya mu Kodinda?

¹⁶ Muswelo wāpwijibwe mwanda wa bubi mu kipwilo kya mu Kodinda ulombola’mba Yehova i wa buswe ne boloke. (Ñim. 33:5) Le kino kekikulengejepo usakile’ko bininge kutendela Leza? Ke-pantu, batwe bonso twi babipya-mambo kadi tusakilwa lulekelo lwandi. Muntu yense motudi udi na bubinga bwa kufwijija’ko Yehova pa kinkūlwa, kine kilengeje tumone kulekelwa kwa bubi. Bine, bisenga’po kashā kuyuka’mba Yehova usenswe bya binebine bantu bandi kadi wibasakilanga biyampe!

17. Le i bika byotukesambila’po mu bishinte bilonda’ko?

¹⁷ Le penepo, i muswelo’ka ufwaninwe kupwijibwa myanda ya bubi dyalelo? Le i muswelo’ka ubwanya bakulumpe kumwekeja mutyima wa Yehova wa kufikija nonga-bibi ku kwisāsa? Lelo kipwilo kifwaninwe kulonga’po namani shi bakulumpe abakwata butyibi bwa kufundula muntu nansha kumujokeja? Tukesambila pa bino bipangujo mu bishinte bilonda’ko.