Yelemia

52 Zedekia+ wadi na myaka 21 paabikele, wabikele myaka 11 mu Yelusalema. Dijina dya inandi i Hamutale+ mwanā Yelemia wa ku Dibena. 2 Wadi ulonga nyeke bibi ku meso a Yehova, mungya byonso byalongele Yehoyakimi.+ 3 Bino bintu byafikīle Yelusalema ne Yuda pa mwanda wa bulobo bwa Yehova, enka ne byaebafundwile ku meso andi.+ Kadi Zedekia watombokēle mulopwe wa Babiloni.+ 4 Mu mwaka wa kitema wa bulopwe bwa Zedekia, mu kweji wa dikumi, mu difuku dya dikumi dya kweji, Nebukaneza* mulopwe wa Babiloni waiya kutamba Yelusalema bulwi na kibumbo kyandi kyonso kya divita. Bamutūdila nkambi kupwa bamūbakila ne lubumbu lwa kasāla kufulakufula.+ 5 Kadi kibundi kyatēkelwa kasāla kufika ne mu mwaka wa 11 wa Mulopwe Zedekia.

6 Mu kweji wa buná, mu difuku dya kitema dya kweji,+ kipupo kya nzala kyanana mu kibundi, kadi bantu ba ntanda’ya kebadipo na byakudya.+ 7 Ku mfulo lubumbu lwa kibundi lwatubulwa kipunzu, kadi basola bonso batambila pa kibelo pa bukata bwa mumbu ibidi kubwipi na budimi bwa mulopwe, banyema bufuku, papo bene Kaladea bajokolokele kibundi; baenda mu dishinda dya ku Alaba.+ 8 Ino kibumbo kya divita kya bene Kaladea kyalonda mulopwe, kyapeta Zedekia+ mu malungu a Yediko mudi zolē, penepo bibumbo byandi byonso bya basola byamupalakana. 9 Kupwa bakwata mulopwe bakamutwala kwa mulopwe wa Babiloni ku Dibēla mu ntanda ya Hamata, ebiya wamutyibila nsambu. 10 Mulopwe wa Babiloni watapa bana ba Zedekia mu meso andi, watapa ne bamfumu bonso ba Yuda ku Dibēla. 11 Kupwa mulopwe wa Babiloni wasaba Zedekia meso,+ wamukuta nkano ya mukuba waenda nandi ku Babiloni, wamukuta mu kifungo kufika ne difuku dyaafwile.

12 Mu kweji wa butano, mu difuku dya dikumi dya kweji, ko kunena’mba mu mwaka wa 19 wa Mulopwe Nebukaneza* mulopwe wa Babiloni, Nebuzaladana mukata wa basola balami, mwingidi wa mulopwe wa Babiloni, waiya mu Yelusalema.+ 13 Wasōka njibo ya Yehova,+ ne njibo* ya mulopwe, ne mobo onso a mu Yelusalema; wasōka ne mobo onso makatampe. 14 Mumbu yadi ijokolokele Yelusalema nayo yabundulwa na kibumbo kyonso kya divita kya bene Kaladea kyadi na mukata wa basola balami.+

15 Nebuzaladana mukata wa basola balami wasela bantu bamo bapēlulwe ne bantu bakwabo bashele mu kibundi bu misungi. Wasela ne boba banyemene baketūla kwa mulopwe wa Babiloni, ne basendwe bakwabo bakatampe.+ 16 Ino Nebuzaladana mukata wa basola balami washiya’ko bantu bamo balanda bininge ba ntanda’ya ke ba kwingila bu bengidi ba mu madimi a mañanza ne bu bengidi ba mingilo ya kuningilwa.+

17 Penepo bene Kaladea balala bibesebibese bikomo bya mukuba+ bya njibo ya Yehova ne matempa+ ne Dijiba+ dya mukuba dyadi mu njibo ya Yehova, kupwa baselela mikuba yonso ku Babiloni.+ 18 Basela ne bininga bya buto, ne bipawa, ne mikashi ya kubula nayo mudilo, ne ngeso,+ ne bitomeno,+ ne bipungwa byonso bya mukuba byadi bingidijibwa ku mingilo ya ku tempelo. 19 Mukata wa basola balami wasela byoilo,+ ne bininga bya mudilo, ne ngeso, ne bininga bya buto, ne bitūlwa-binanu,+ ne bitomeno, ne ngeso ya olo ne ndalama ya binebine.+ 20 Ino bikomo bibidi’bya, ne Dijiba, ne bañombe 12 ba mukuba+ badi munshi mwa Dijiba’dya, ne matempa byalongele Mulopwe Solomone mwanda wa njibo ya Yehova, mukuba wa bino bintu byonso wadi mukomo’nka ne kupima bulēmi.

21 Bikomo nabyo, kikomo ne kikomo kyadi na maboko* 18 mu bwimwa, monji wa kupima nao wa maboko 12 mwikijokoloke;+ mutyika wakyo wadi na bula bwa bunkimbwa bwa minwe* iná, kadi kyadi na mpunge. 22 Kadi mutwe wakyo wadi wa mukuba; mutwe wa kikomo kimo wadi na maboko atano mu bwimwa;+ kadi bukonde ne bipa bya mangelenade byadi bijokoloke mutwe wa kikomo, byonso byadi bya mukuba. Kikomo kya bubidi nakyo kyadi muswelo umo onka, ne na bipa bya mangelenade. 23 Kwadi bipa bya mangelenade 96 ku mitamba yonso; bipa bya mangelenade byonso byadi bijokolokele bukonde byadi 100.+

24 Mukata wa basola balami wasela ne Selaya+ kitobo mukulu, ne Zefenia+ kitobo wa bubidi, ne batulama basatu ba pa kibelo.+ 25 Kadi wasela mu kibundi mwingidi umo wa bulēme wa mu kipango wadi mukwashi wa lupusa pa basola, ne bapwani basamba-babidi ba mulopwe ba pa mutyima batenwe mu kibundi, pamo ne mulembi wa mukata wa kibumbo kya divita, mwine wadi ukongakanya bantu ba ntanda’ya, ne bana-balume 60 ba mu bantu bitupu ba ntanda’ya batenwe mu kibundi. 26 Nebuzaladana mukata wa basola balami webasela waenda nabo kudi mulopwe wa Babiloni ku Dibēla. 27 Mulopwe wa Babiloni webatapa ne kwibepaila ku Dibēla+ mu ntanda ya Hamata. Enka nenki Yuda waenda bu musungi kutamba ku yandi ntanda.+

28 Bano’ba bo bantu bobaselele kudi Nebukaneza* bu misungi: mu mwaka wa busamba-bubidi, Bayuda 3 023.+

29 Mu mwaka wa 18 wa Nebukaneza,*+ bantu* 832 baselelwe ku Yelusalema.

30 Mu mwaka wa 23 wa Nebukaneza,* Nebuzaladana mukata wa basola balami wasela Bayuda bu misungi, bantu 745.+

Abo bonso, i bantu* 4 600 baselelwe bu misungi.

31 Penepo mu mwaka wa 37 tamba Yehoyakini+ mulopwe wa Yuda uselwa bu musungi, mu kweji wa 12, mu difuku dya 25 dya kweji, Evile-Melodake mulopwe wa Babiloni, mu mwaka waabikele, wakutulula* Yehoyakini mulopwe wa Yuda, wamutambija mu kifungo.+ 32 Wesamba nandi biyampe kadi wazunzula lupona lwandi pangala pa mpona ya balopwe bakwabo baadi nabo mu Babiloni. 33 Ponkapo Yehoyakini wavūla bivwalwa byandi bya mu kifungo, kadi wadi udya nyeke ku meso andi mafuku onso a būmi bwandi. 34 Badi bamupa kyaba kyonso mposo ya byakudya kwa mulopwe wa Babiloni, difuku ne difuku, kufika ne difuku dyaafwile, mafuku onso a būmi bwandi.