Bipangujo Bya Batangi

Belekeja bipangwa bya mūlu bya bukomo byākweshe’ko pa konakanya Yelusalema kadi bikakwasha ne ku konakanibwa kwa ino ntanda imbi ya Satana pa Amakedona. Kuno i kujadikwa kwa mwimvwanino wetu. Mwanda waka kudi na mvubu?

Kumeso kwa 607 Yesu Kaile, Yehova wālombwele Ezekyele mu kimonwa byobya byādi bya kufikila Yelusalema kumeso kwa konakanibwa’ye. Mu kino kimonwa, Ezekyele wāmwene’mo bintu bivule bibi byādi bilongeka. Kupwa wāmwene bantu basamba, “muntu ense ne kilonda kyandi kya butapani mu dikasa dyandi.” Kadi kwādi muntu mukwabo umbukata mwabo uvwele “kisandi kya bukonge” kadi wādi na “kibiko kya mwino wa mulembi.” (Ezekyele 8:6-12; 9:2, 3) Uno muntu bāmusoñenye kwenda mu kibundi atūle “kiyukeno pa mapala a bantu babinza ne badila mwanda wa byamunyanji byonso byalongwa umbukata mwakyo.” Kupwa bāsoñanya bantu basamba’ba kwipaya bonso ba mu kibundi bampikwa kiyukeno pa mapala abo. (Ezekyele 9:4-7) I bika byotwifunda ku kino kimonwa, ne muntu wādi na kibiko kya mwino wa mulembi i ani?

Ezekyele wāmwene kino kimonwa mu 612 Y.K. Buno bupolofeto bwāfikidile dibajinji myaka itano pa kupita’po kitatyi Yehova kyaālekele kibumbo kya bashidika bene Babiloni bonakanye Yelusalema. Mu uno muswelo, Yehova wāingidije bene Babiloni mwanda wa kupa bantu bandi bampikwa kikōkeji mfuto. (Yelemia 25:9, 15-18) Ino le Bayuda boloke, kēbadipo balonga bintu bibi byādi bilongwa mu kibundi nabo le? Yehova wēbapandije.

Mu kimonwa, Ezekyele kātudilepo kiyukeno pa mpala ya muntu nansha umo, nansha kubadilwa mu boba bāonakenye kibundi. Inoko bonakani bwa Yelusalema bwadi bwimaninwe na bamwikeulu. O mwanda buno bupolofeto bwitupa mukenga wa kuyuka byobya bilongeka mūlu. Yehova wāsapwidile bamwikeulu bandi bakonakanye babi ne kupandija boloke.a

Kadi buno bupolofeto bukafikidila ne mu mafuku a kumeso. Pa kala twadi tunena amba muntu udi na kibiko kya mwino welekeja bashingwe māni bakidi bōmi pano pa ntanda. Kadi twadi tunena amba bantu batulwanga kiyukeno kya kupanda pobemvwana ne kwitabija myanda miyampe yo twibasapwila. Nanshi pano, kibamweka patōka’mba tufwaninwe kujadika nshintulwilo ya buno bupolofeto. Twibefunde mu Mateo 25:31-33 amba Yesu ye aye wa kutyibila bantu mambo. Ukalonga kino mu kitatyi kya kyamalwa kikatampe. Mu kine kitatyi’kya, boba bakatyibilwa bu mikōko bakapanda, ino boba bakatyibilwa bu bambuji bakonakanibwa.

Penepa, le i bika byotwifunda ku kimonwa kya Ezekyele? Tala myanda itano yotwifunda’ko:

1.  Kumeso kwa Yelusalema konakanibwa, ba Ezekyele, Yelemia ne Isaya bādyumwine bantu ku byobya byādi byākulongeka mu kibundi. Bādi pamo bwa batulama. Dyalelo, Yehova wingidijanga kabumbo katyetye ka bashingwe māni mwanda wa kufundija bantu bandi ne kudyumuna bantu bakwabo kumeso kwa kyamalwa kikatampe kushilula. Inoko, bantu bonso ba Leza ko kunena’mba, bengedi ba mu njibo ba Kidishitu, bengilanga uno mwingilo wa kudyumuna bantu.​—Mateo 24:45-47.

2.  Ezekyele kātūdilepo biyukeno pa bantu ba kupanda. Bantu ba Yehova nabo dyalelo kebatūlanga’byopo. Ino basapwilanga’tu bakwabo ne kwibadyumuna pa bintu bikalongeka mu mafuku a kumeso. Uno mwingilo wa busapudi wa ntanda yonso wingilwanga na bukwashi bwa bamwikeulu.​—Kusokwelwa 14:6.

3.  Boba bāpandile mu mafuku a Ezekyele, kebādipo na kiyukeno kimwekelele pa mapala abo. Dyalelo nadyo boba bakapanda kebadipo na kiyukeno kimwekelele. Le bantu bafwaninwe kulonga bika pa kupanda ku kyamalwa kikatampe? Pobemvwana kidyumu bafwaninwe kwifunda kwiula Yesu, kwipāna abo bene kudi Leza ne kukwatakanya banababo na Kidishitu na kusapula myanda miyampe. (Mateo 25:35-40) Bano’ba bo bakatūlwa kiyukeno pa kyamalwa kikatampe, ko kunena’mba bo bakatongwa mwanda wa kupandijibwa.

4.  Muntu udi na kibiko kya mwino welekeja Yesu. Pa kyamalwa kikatampe, Yesu ukatūla kiyukeno ku kibumbo kikatampe kitatyi kyakebatyibila bu bamikōko. Papo ye pobakekala na kyepelo kya kwikala’ko nyeke pano pa ntanda.​—Mateo 25:34, 46.b

5.  Dyalelo bantu basamba badi na bilonda bya butapani, belekeja bibumbo bya mūlu byendejibwa na Yesu. Panopano ponka basa konakanya mizo ne kutalula’ko bibi byonso.​—Ezekyele 10:2, 6, 7; Kusokwelwa 19:11-21.

Myanda yotwefunda mu kino kimonwa itukulupija’mba Yehova kakonakanyapo babi ne boloke pamo. (2 Petelo 2:9; 3:9) Kadi ino myanda yotwefunda ituvuluja amba mwingilo wa busapudi udi na mvubu mpata mu kino kyetu kitatyi. Nanshi muntu yense ufwaninwe kuteja kidyumu kumeso kwa mfulo kufika!​—Mateo 24:14.