Madingi Mayampe a Mwa Kulelela Bana

RUTH unena namino paadi na dimi dibedi amba: “Nadi na myaka 19, nshikete kulampe kwampikwa nansha umo wa mu kisaka kyetu, ne kufundijibwa kwine mpika.” Byaadi mwanuke bunka, kapelwepo ñeni ya mwa kwikadila mbutwile. Lelo wadi wa kwenda kwepi mwanda wa kutana’ko madingi?

Jan nandi, pano udi kala na bana babidi ke batame, uvuluka’mba: “Nadi na kikulupiji dibajinji. Ino kepaijijepo namona’mba nadi mubulwe buyuki bufwaninwe.” Shi bambutwile abaanza nansha mwenda mafuku kumona’mba abajimija muswelo obadi balelela’mo bana, i kwepi kobakatana bukwashi?

Bavule dyalelo banyemenanga ku Entelenete. Ino shi utale biyampe, ukatatana lubilo lonka ne madingi atanwa’po shi bine abwanya kukulupilwa. I biyampe kutadija. Lelo uyukile i ani ukupa madingi pa bisambwa bya luvula? Le aye mwine ukupa’o kemamukwashe na bandi bana? I amo, ufwaninwe kudyumuka mu myanda itala kyobe kisaka. Kyaba kimo, monka mulombwela kishinte kibadikile, madingi a bashayuka ekalanga akalaja bantu. Penepo nanshi i kwepi kokanyemena?

Mwine’tu Nsulo ya madingi a mwa kulelela bana i Yehova Leza, Mushiludi wa kisaka. (Efisesa 3:15) Ye shayuka umo kete wa bine. Uletanga madingi akulupilwa mu Kinenwa kyandi Bible, ne bufundiji bwa binebine bulupula bipa. (Mitōto 32:8; Isaya 48:17, 18) Kyetu’tu, i enka kulonda’o kubapu.

Balume ne bakaji palapala baipangwilwe balombole byobafundile pobadi batamija bana amba bekale biyampe kadi bantu ba kwakamwa Leza. Nabo balondolwele amba, kintu’tu kyebakweshe babwanye i kwingidija kobaingidije misoñanya ya mu Bible. Bamwene amba madingi a mu Bible o afwaninwe kukulupilwa dyalelo monka moādi akulupilwe pāsonekelwe Bible.

Kupityija Nabo Kitatyi Pamo

Paipangwilwe Catherine, lolo wa bana babidi, alombole i madingi’ka amukweshe, aye bukidibukidi kala watela Kupituluka 6:7. Uno vese unena’mba: “Ukebikomeneja kudi bobe bāna, ne kwibisambijana pa kushikata mobe mu njibo, kadi poenda mwishinda, ne polāla, ne pobūka pene.” Catherine wamwene amba pa kulonda ano madingi, bilomba kupityija kitatyi pamo na bana.

Padi ukalanga’mba ‘kino kipēla kunena ino i kikomo kulonga.’ Mu bisaka mudi bisakibwa bivule bilomba enka bantu babidi bavuije’byo, penepo i muswelo’ka ukabwanya bambutwile kupityija kitatyi na babo bana? Torlief, wa mwana kadi kala pano nandi na kisaka, unena’mba kintu kya mvubu i kulonda madingi atanwa mu Kupituluka mu Bijila. Shi kokanange shi kwepi, shi kwepi, sela mwana, ne mukenga wa kwinangija ne mwana ukanza kumweka’tu ao mwine. Torlief ushotolola’mba: “Ami ne mwanami twadi tunañanga kufulakufula kwa lupango lwetu. Twādi twenda lwendo kisaka kituntulu. Ne kudya twādi tudya pamo.” Ebiya pa mwanda wa byalupukile’mo ubweja’ko amba, “kyaba kyonso wetu mwana wādi ulombola milangwe yandi na bwanapabo.”

Lelo tukalonga namani shi kekukidipo kwisambila pamo, ne kwineneja ke kukomo? Kino kimwekanga dimodimo kitatyi kyenda kitama bana. Napo, kupityija kitatyi pamo nabo kukokeja kukwasha. Ken, mulumya Catherine, uvuluka’mba paikele mwana wabo mwana-mukaji kadi na myaka dikumi ne musubu, mwana wadi katompola’mba tata kantejangapo. Bana bavule ba myaka dikumi ne musubu batompolanga uno muswelo. Lelo kya kulonga’po i kika? Ken uvuluka’mba: “Nashilwile kupityija kitatyi pamo nandi, bubidi bwetu, twisambila pa mwalangila, pa mweimvwanina, ne pa bimukoleja. Ne kino kyetukweshe.” (Nkindi 20:5) Ken unena’mba shi ano manwa ebakweshe i ne pa mwanda kwisambila pamo kwadi bu kibidiji kyabo. Wanene ne kunena’mba: “Mwana ne ami twadi bapwane, o mwanda wadi na bwanapabo bwa kwisamba nami.”

Kikankamika i kino, lapolo wa bukimbi bwalongelwe panopano ulombola’mba bibudye bya bana byo bimona misunsa isatu kupita’ko ne bambutwile amba bambutwile ne bana kebapityijangapo kitatyi kifwaninwe pamo. Lelo kyokebalondelapo madingi a mu Bible i kika? Pityijai’po kitatyi pamo na benu bana—pa kutūja nansha ku mingilo, pomwikele kwinjibo nansha pomwenda mwishinda, pomubūka lubanga nansha bufuku kumeso kwa kulāla. Shi bikokejika, mwibaselei konso komwenda. Kupituluka 6:7 uleta kadi mulangwe wa’mba i kutupu kingi kipityile kupityija kitatyi pamo na benu bana.

Wibafundije Mwikadilo Muyampe

Mario, mbutwile wa bana babidi, wasoñenye amba: “Sanswa bana bininge ne kwibatangila bilembwa.” Inoko ke’nkapo akyo kikakunka bana bobe mu ñeni. Ufwaninwe ne kwibafundija muswelo wa kusansanya kiyampe ne kibi. Mario ubweja’ko amba: “Wibendeje bu bifundwa bya Bible.”

Pa kufikila pa kino kitungo, Bible udyumuna bambutwile amba: “Kemukibasomba bāna benu ku bukalabale; mwibatamijei biyampe monka mu madingi, ne mu lufundijo lwa Mfumwetu.” (Efisesa 6:4) Kukomeneja lufundijo lwa mwikadilo mulumbuluke kekukidi’ko mu bisaka bivule dyalelo. Bamo bakulupile amba penda patama bana bakabwanya kwitongela mwikadilo wa kulonda. Lelo nobe ulanga’mba ino yo ñeni? Monka musakila kaitu kana kudishibwa amba katame ne kukoma, mo monka ne mityima ne ñeni myana nayo isakilwa kufundijibwa. Shi bobe bana kebafundilepo mwikadilo muyampe kwabo, nankyo bakafunda mumweno wa bakwabo ku masomo ne wa badimu babo nansha owa wa mishipiditu imbi.

Bible ubwanya kufundija bambutwile mwa kufundijija bana kusansanya kiya ne kibi. (2 Temote 3:16, 17) Jeff, mukulumpe Mwine Kidishitu wa bwino walelele bana babidi, usomanya kwingidija Bible pa kufundija bana ngikadila milumbuluke. Unena’mba: “Kwingidija Bible kukwashanga bana kunañuna mimweno ya Umpangi pa myanda kampanda, ke mimwenopo ya batata ne lolo, mhm. Twamwene muswelo wa pa bula wingila Bible mu ñeni ne mu mutyima. Twadi twilamija kitatyi kya kukimba bisonekwa bifike’po, mwanda wa kulwa na ngikadilo ne milangwe imbi. Kupwa, potudi pa bunka nabo, twadi tupa bana abo bene batange mavese. Pavule twadi tumona’tu impolo keibatambe mu meso. Twatulumukile. Bible udi na lupusa lukatampe kutabuka byonso byotukokeja kunena ne kulonga.”

Bahebelu 4:12 ushintulula’mba: “Mwanda wa Leza i wa būmi ne bukomo . . . kadi i wa kampeja bukidi kakuyūkidila kufwatakanya ne kukanina kwa mutyima.” Nanshi musapu wa mu Bible ke milangwepo nansha mānga ya bintu byēmwenine bantu bāingidije Leza bu balembi, mhm. Ino, ayo i milangwe ya Leza ya mu mwikadilo. Ano madingi i meshile na madingi makwabo. Pofundija bana na kwingidija Bible, wibakwashanga bekale na mumweno wa Leza mu myanda kabidye. Kwibafundija kowibafundija kudi na mvubu mikatampe, kadi yuka’mba udi na dyese dya kutenga mityima ya bana.

Catherine, utelelwe kūlu, witabija namino amba: “Pādi penda petukolela myanda, netu twādi twenda tukimbila’ko buludiki mu Kinenwa kya Leza—nakyo kyanekenya!” Lelo usa kwingidija bininge Bible mu kufundija bobe bana mwa kusansenya kiya ne kibi?

Ikala na Bujalale

Mutumibwa Polo wāletele’ko musoñanya mukwabo ukwasha mu kulela bana. Wādyumwine banababo Bene Kidishitu amba: “Kikōkeji [“bujalale,” New World Translation] kyenu kiyūkibwe ku bantu bonso.” (Fidipai 4:5) Bine, ne bana bafwaninwe kuyuka bujalale bwetu. Kadi vuluka’mba bujalale to “tunangu tutūke mūlu.”—Yakoba 3:17, NW.

Lelo bujalale nabo i bukwatañane namani na kufundija bana? Potwibakwasha mu miswelo yonso ketwibasokotolangapo konso kobalonga, kamo ne kamo. Kimfwa Mario, utelelwe kungala, nandi i enka Kamoni wa Yehova, uvuluka’mba: “Twadi tukankamika betu bana betungile bitungo bya kubatyijibwa, ne mwingilo wa kitatyi kyonso, ne bitungo bikwabo bya ku mushipiditu. Twadi twibashintulwila’mba buno bo butongi bobafwaninwe kutonga shi abatama.” Le i bika byālupukile’ko? Bana babo bonso babidi pano i basapudi ba kitatyi kyonso.

Bible udyumuna bashabana mu Kolose 3:21 amba: “Kemukisomba bāna benu, mwanda wa kunena’mba, bakanyoñama pa mutyima.” Catherine wādi uswile uno vese. Shi butūkanye bwa bambutwile butyepe, nankyo bakekala ba kukalabala ne kufwija kwine mpika. Ino, wanene kadi amba, “ke biyampepo kuningila bana bengile bivule bwa mosakila abe mwine.” Catherine, enka Kamoni wa Yehova, ubweja’ko amba: “Longa kutōta Yehova kwikale ke nsangaji yobe.”

Jeff, utelelwe kungala, nandi unena uno mulangwe wa bine amba: “Padi penda patama bana, mulunda muyampe wetunene amba mwamwena tupelanga divule kwitabija bilomba bana. Kino kyadi kibakalajanga ne kwibanyoñamija pa mutyima. Pa kwepuka kino, wetusoñenye tukimbe muswelo wa kwitabija byobalomba.”

Jeff unena kadi amba, “twamwene amba ano madingi adi mayampe. Twakimbile mikenga ya kuleka bana bakaye na bakwabo mu bitatyi byotwitabije. Byadi bitusakila kwibeta ne kwibashintulwila kimfwa’mba: ‘Muyukile’mba kulonga kintu kampanda i pamo bwa kulonga kintu kabidye? Mwanda waka nenu kemwendele’kopo?’ Shi mwana wetulombe twende nandi kotwenda, twadi tutyiba mbila ya kumusela nansha shi twi bakōke. Twadi tulonga namino mwanda’tu wa kuleka kwibapelela.” Kuno ko kwikala na bujalale—boloke, bulēmantu, ne kwikala na mutyima unekena pampikwa kujilula misoñanya ya mu Bible.

Mwena mu Madingi Akulupilwa

Bavule mu bano balume ne bakaji botwaimvwana pano ke bankambwa bantu. Badi na nsangaji pa kumona misoñanya ya mu Bible imo yonka ikwasha ne babo bana babwanye mwingilo wa bumbutwile. Ubulwe’po nobe kumwena mu ano madingi a mu Bible?

Ruth utelelwe ku ñanjilo pa kwikala ke mbutwile, aye ne mulumyandi bemwene bu badi bunka. Ino, ke amopo. Badi na madingi a peulu a Bible, Kinenwa kya Leza. Batumoni ba Yehova ke balupule mabuku mavule malumbuluke esambila pa Bible abwanya kukwasha bambutwile. Kimfwa, Écoute le grand Enseignant, Dibuku Dyami dya Mānga ya mu Bible, Les jeunes s’interrogent — Réponses pratiques, ne Muntu Mukatakata wa Kasha ne Kashele. Torlief, mulumya Ruth unena’mba: “Dyalelo, madingi atūdīlwe’ko bambutwile mu Bible, bungi i sōka. Shi’tu bamwene’mo, nankyo akebakwasha mu myaka yonso yenda itama bana.”

[Kapango/Kifwatulo pa paje 5]

Byobya Binena BASHAYUKA . . . Byobya Binena BIBLE

pa Lusa lwa Bubutule:

Mufundi John Broadus Watson usoñanya bambutwile mu dibuku dyandi Kulama Bana Batyetye ne Balukeke mu Ñeni (1928, Angele) amba: “Kemwakapamba bīpa nansha kufifya kwine” benu bana. “Kadi kemwakibaselai pa maulu enu.” Ino panopano ponka bafundi bana-bakaji ba Vera Lane ne Dorothy Molyneaux banene mu dibuku Betu Bana (dya Kweji 3, 1999, Angele) amba: “Bukimbi bulombola’mba bana batyetye bobapela kutenga ne kwibalombola kisanso kwine mpika divule dine bekalanga babela.”

Ino kwishila na bino, Isaya 66:12 unena amba Leza ulombolanga buswe ku bantu bandi pamo bwa buswe bwa bumbutwile. Mo monka ne kitatyi kyātompele bana ba bwanga ba Yesu kupeleja bana bāye kwadi, Yesu wēbanene amba: “Mwitulekei bidi twana twiye kwami kemukitukandai.” Ebiya “pa kwitutekuna mu maboko andi kētulelele, kadi wetutenteka maboko andi kētwesela dyese.”—Mako 10:14, 16.

Pa Kufundija Ngikadilo Miyampe:

Mufundi Bruno Bettelheim, wanene mu dipepala New York Times Magazine, 1969 pa bitala bana amba badi na “kyepelo kya kulombola kukanina ne milangwe yabo, pampikwa kutononwa nansha kulombolwa na bambutwile, ino poso na byobemwena abo bene mu būmi.” Kintu kya myaka 30 pa kupita’po, Mufundi Robert Coles, mwine dibuku The Moral Intelligence of Children (1997), wanene amba: “Bana batyetye bafwaninwe kuludikwa ne kulombolwa bitungo bya umbūmi, bya mu mwikadilo muyampe” bitabijibwe na bambutwile babo ne na batame bakwabo.

Nkindi 22:6 unena bambutwile amba: “Tamija mwana mu dishinda dimufwaninwe, kadi nansha mu bununu kakasasukamopo, ehe.” Kishima kya Kihebelu kyalamwinwe bu “tamija” kidi ne na mulangwe wa “kufundija” ne kufundija nako i kwalwila’ko kwibidija mwana bufundiji bubajinji bwasakilwa. O mwanda bambutwile i bakankamikwe kushilula kufundija babo bana mwikadilo muyampe pobakidi bankasampe bininge. (2 Temote 3:14, 15) Byobya byobefunda pobakidi banuke e byobakashadidila nabyo.

Pa Kudingila Madingi:

Mufundi James Dobson wasonekele mu dibuku dyandi The Strong-Willed Child (1978) amba: “Kalusonde mu dikasa dya mbutwile wa buswe i kakingidilwa kakokeja kufundula mwikadilo umbi.” Ku mutamba mukwabo, Mufundi Benjamin Spock wanene mu mutwe wa mwanda mulupulwe mu dibuku dya busamba-bubidi diyukene bu Baby and Child Care (1998) amba: “Kukupila kukokeja kufundija mwana amba muntu mutame, nkanka, udi na bukomo bwa kulonga byonso byasaka bikale byendele’mo nansha byampikwa kwendela’mo.”

Pa mwanda utala madingi, Bible unena’mba: “Kamama ne madingi bipana ñeni.” (Nkindi 29:15) Inoko, ke banapo bonso basakilwa kalusonde. Nkindi 17:10 witusoñanya kadi amba: “Madingi atabukile kutwela palampe munda mwa muntu wa kwivwanija, bikupilo katwa mu kivila i pabwipi.”

[Kifwatulo]

Ingidija Bible mwanda wa kutenga mutyima

[Kifwatulo pa paje 7]

Bambutwile badi na bujinguludi balongololanga kwipwija mukose kwa bana