Mpalo yāpadilwe yoba—I nsulo ya kikulupiji
“Yehova waesela kumfulo kwa Yoba kutabuka ne ku ngalwilo yandi.”—YOBA 42:12.
YEHOVA “upala mpalo boba bamukimba ne mikeketo.” (Bahebelu 11:6) Kadi utakikanga bengidi bandi bepēne kwadi bapāne bukamoni na bukankamane, nansha shi matompo abebanekenya ngitu ne kwibapungija pamo bwa bafwe. (Yoba 26:5; Kusokwelwa 11:3, 7, 11) Kino kyājingulwilwe na Yoba wādi mu masusu. Nansha byātopekelwe pakubulwa buluji na basengi babubela basatu, kātalelepo pamwanda wa moyo wa bantu. Ino, wāpēne bukamoni na kininga.
2 Ba Tumoni twa Yehova bavule ba mu kino kyetu kitatyi, bāsuswilwe pamwanda wa kupangwapangwa kukatampe ne matompo kufika enka ne kubwipi na lufu. (2 Kodinda 11:23) Inoko, pamo’nka bwa Yoba, bālombwele buswe kudi Leza ne bāingidije boloke. (Ezekyele 14:14, 20) Kadi, bakomenanga matompo abo, i basūmininwe mwanda wa kusangaja Yehova, bāpelwe bukomo bwa kupāna bukamoni na kininga ne i bayule kikulupiji kyabinebine.
Yoba Upāna Bukamoni na Kininga
3 Mu misambo yandi yamfulo, Yoba wāpēne bukamoni bukatampe kupita mwādi wikilongela pakala. Wāubije byakanwa bya basengi bandi babubela. Na kwibasepa kukatampe wānene’mba: “I-i! byo wamukwasha yewa wampikwa bukomo!” (Yoba 26:2) Yoba wātendele Yehova pakatampe, wa bukomo buyejeje umbuo wetu wa ntanda patuputupu ne ujikila mema mu makumbi pangala pa ntanda. (Yoba 26:7-9) Ino, Yoba wānene’mba bino bintu bitulumukwa uno muswelo i ‘milomo ya mashinda a Yehova.’—Yoba 26:14.
4 Byādi uyukile’mba kādipo na mwanda nansha umo, Yoba wānena’mba: “Kadi poso’nka ne byo nkafwa nkikafundulapo bu-binebine bwami ko ndi.” (Yoba 27:5) Kwishila na matope abubela obāmutopekele, aye kālongelepo bubi mwanda wa kuponenwa na byāmufikile. Yoba wādi uyukile’mba Yehova ketabijangapo milombelo ya tupondo ino upalanga mpalo bantu bendelela na kukwatakanya kikokeji. Kino padi kiketuvuluja’mba kyamalwa kya Amakedona kikashilula panopano ponka, kikatalulanga banongabibi bonso pa bitenta byabo bya lupusa ne kebakokejapo kusomboloka mu dikasa dikomokomo dya Leza. Penepo, bengidi ba Yehova bakendelelanga na kikokeji kyabo.—Yoba 27:11-23.
5 Jingulula bidi, bano bantu basatu bādi bafwatakanya’mba badi na tunangu tukatampe twa ino ntanda, bādi bateja pādi panena Yoba’mba muntu wāingidije manwa andi mwanda wa kusokola nsahabu, ne ndalama, ne byabupeta bikwabo bidi munshi mwa biloba ne munshi mwa kalunga kamema. Kadi wābwejako’mba inoko “lupoto lwa ñeni ludi pangala pa mabwe a lubi.” (Yoba 28:18) Basengi ba Yoba babubela kebādipo bakokeja kupota tunangu twabinebine. Nsulo yato i Umpangi wa luvula, mvula, mikejima ne nzaji. Kyabine, ‘kwakamwa Yehova kwabinebine—to tunangu, ne kufunduka ku bibibibi ko kwivwanija.’—Yoba 28:28.
6 Nansha byādi mu masusu, Yoba kālekelepo kwingidila Yehova. Kyaba kya kuvundamina Mfumu Mukatakata, uno muntu wakikokeji wādi wabila “bulunda bwandi na Leza.” (Yoba 29:4, NW) Yoba kādipo wianya pādi usekununa muswelo wādi ‘unyongolola balanda bādi bamwabija, mwēvwikile boloke, ne mwādi wikadile bu shandya bafudilwe.’ (Yoba 29:12-16) Ino, wādi utēla myanda yālongele mu būmi bwandi bu mwingidi wa Yehova wakikokeji. Lelo ukankamikilwe na ino nsekununi milumbuluke? Kyabine, Yoba wādi uyukija monka bubela bwa matope ātopekelwe na bene-Leza basatu babubela.
7 Yoba wādi ubengwa kibengo na banuke ba ‘bashabo bādi ukwatwa munyanji kwibatūla pamo na bambwa ba kukumba luombe lwandi.’ Bādi bamukenya ne kumusaninya mata. Nansha byādi mu masusu makomo kebādipo bamuta mutyima. (Yoba 30:1, 10, 30) Byādi mwipāne aye yense kudi Yehova, kādipo witopeka ne wākokeje kunena’mba: “Ntompekejibwe mu kitompekejo kyoloke, amba Leza ayuke bu-binebine bwami.” (Yoba 31:6) Yoba kādipo mpongoloki nansha wabudimbidimbi, ne kālekelepo kukwasha bādi basakilwa bukwashi. Nansha byādi mpeta, kādipo ukulupile mu bintu bya bupeta. Pakwabo kadi, Yoba kepēnepo mu kutōta bintu byakubulwa būmi kimfwa, kweji. (Yoba 31:26-28) Byādi ukulupile mudi Leza, wāshile kimfwa kilumbuluke kya muntu wādi ukwatakanya kikokeji kyandi. Mu masusu andi onso ne kumeso a basengi babubela, Yoba wālondolwele na manwa ne wāpēne bukamoni bulumbuluke. Pāfudile binenwa byandi, wādi utala kudi Leza amba ye Mutyibi wandi ne Mupadi wa mpalo.—Yoba 31:35-40.
Edihu Kēsambe
8 Pabwipi nabo pādi nsongwalume Edihu, wa ku lukunwa lwa Buza mwana Nahola, ino wa kumusuku wa Abalahama mulunda na Yehova. (Isaya 41:8) Edihu wādi na kalemo ku bana-balume banunu omwanda wālondele misambo ya ku mitamba yonso ibidi. Ino, wēsambile na bukankamane pāmwene’mba bānene myanda yakubulwa kwendelamo. Kimfwa, bukalabale bwandi bwāakijibwe padi Yoba mwanda “webingije aye mwine pakatampe, Leza patyetye.” Nakampata bukalabale bwa Edihu bwāakijibwe pa basengi babubela. Misambo yabo yāmwekele bu yādi itumbija Leza ino nabubinebine yādi imutopeka ne kulemenena ku mutamba wa Satana mu luno lupata. “Muyule binenwa” ne byādi utakikwa na mushipiditu sandu, Edihu wādi kamoni ka Yehova wakubulwa mboloji.—Yoba 32:2, 18, 21.
9 Yoba wādi utele mutyima bininge ku kusaka kwibingija aye mwine kupitako kubingija Leza. Kyabine, wādi upatana na Leza. Muya wandi wādi keufwena ku lufu, ino kwādi kayukeno kādi kalombola’mba usa kupanda. Kyādi muswelo’ka? Eyo, Edihu wātakikilwe alombole’mba Yehova wādi ukwatakenye Yoba, wānene’mba: “Munyongolole kutyina’mba wakatūkila mu lubao’mwa; natana kikūlwa. Umbidi wandi ukafufuma kutabuka wa bwanuke, witolela ku mafuku a busongwalume bwandi.”—Yoba 33:24, 25.
10 Edihu wālemumwine Yoba wādi unena’mba kwikala nyeke na kikokeji ne kutūla kikulupiji mudi Yehova kebidipo na kamweno. Edihu wāmunena’mba: “Leka! Leka! Leka! kulampe kwine, Leza kalongapo bibi; kadi ku Mwinebukomobonso alonge bukondame. Mwanda ukalubula mwingilo wa muntu kwadi.” Yoba wēsambile pakubulwa kulanguluka senene, wādi wimanine enka pa boloke bwandi, ino wēkilongele pamwanda wa kubulwa kuyukidija ne na kinene-nene. Edihu wābwejejeko’mba: “Yoba atompibwe ne kumfulo kwine, mwanda wa milondololo yandi i pamo’nka bwa ya bantu babi.” (Yoba 34:10, 11, 35, 36) Muswelo umo onka, lwitabijo lwetu ne kikokeji kyetu bikokeja kumweka patoka enka shi ‘tubatompibwa ne kumfulo kwine’ mu miswelo imo-imo. Inoko, Tata wetu wa mūlu wa buswe kaketulekapo tutompibwe na bitutabukile bukomo.—1 Kodinda 10:13.
11 Pakwedeleja misambo yandi, Edihu wālombwele kadi amba Yoba wādi wisambila enka pa boloke bwandi. Tufwaninwe kukokela milangwe padi Umpangi wetu Mukatakata. (Yoba 35:2, 6, 10) Edihu wānene’mba: Leza “kalekapo mubi kwikala mūmi, ehe; ino nanshi upana ku babimona malwa buluji bwabo.” (Yoba 36:6) Kekudipo muntu ukokeja kwalamuna milangwe ya Leza ne kunena’mba walonga bukondame. I mukatampe bininge ketukokejapo kumuyuka, ne buvule bwa myaka yandi kebusokolwangapo. (Yoba 36:22-26) Potutompibwanga bininge, ketukilwaiko amba Leza wetu wakuladila nyeke ne nyeke i moloke ne uketupalanga mpalo pamwanda wa mingilo yetu ya kikokeji yotumutendela nayo.
12 Pādi pesamba Edihu, kwādi kupukuma kimpumpu kya luvula lukomo. Byokyādi kyenda kifwena kwādi, mutyima wandi wāshilula kutetema ne kuzakala. Wēsambile pa bintu bikatampe byālongele Yehova amba: “A Yoba, teja bidi kine kino’ki; imana talala, ulange mingilo ya kwana ya Leza.” Pamo’nka bwa Yoba, tufwaninwe kubandaula mingilo ya Leza itulumukwa bininge ne bukatampe bwandi bulengeja luzakalo. Edihu wānene’mba: “Ino mwendele Mwinebukomobonso, ketukōkejapo kumusokola; i mutabuke mu bukomokomo byamwiko’tu; kadi ne mu kuludika ne mu boloke bwa ntanda ne ntanda; kakasusulapo. Po pamwanda’o, bantu bamwakaminwe.” (Yoba 37:1, 14, 23, 24) Binenwa byamfulo bya Edihu bituvuluja’mba panopano ponka, pakafikidija Leza butyibi pa bantu babi, kakalekapo kwingidija boloke ne ukakinganga boba bamwakaminwe, batōtyi bandi bamulemekele nakampata. I dyese dikatampe kashaa kwikala umbukata mwa bano bantu bendelela na kukwatakanya kikokeji kyabo, betabije Yehova bu Mfumu Mulopwe wa umbuo onso wa diūlu ne ntanda! Uminina mwēkilongele Yoba, ne kokikaleka Dyabola akusonsolwele kulampe na kifuko kyobe kyeselwe dyese umbukata mwa kino kibumbo kya bantu badi na nsangaji.
Yehova Kalondolola Yoba
13 Yoba wātulumukile bininge pādi pamulondolola Yehova mu kimpumpu kya luvula kinyenga! Kino kimpumpu kyādi kilongwa kya Leza, kishile na luvula lukatampe lwāingidije Satana mwanda wa kuponeja njibo ne kwipaya bāna ba Yoba. Yoba wābudilwe kyakunena pāmwipangwile Leza amba: “Lelo po naalwile byalwilo bya ntanda abe wadi kwepi, le? . . . I ani weditūdile? Paimbile ñenyenye ya lubanga pamo, kadi ne bāna ba Leza bonso baela nsadi ya tusepo?” (Yoba 38:4, 6, 7) Yehova wāipangwile Yoba kipangujo kimo pa kikwabo pamwanda utala kalunga kamema, dikumbi ne mutwelo wadyo, misanya, bibelo bya lufu, mwinya ne mfindi, ne kitwika. Yoba kākokejepo kunena kintu nansha kimo pobāmwipangwile’mba: “Lelo uyukile bitūngo bya madiulu?”—Yoba 38:33.
14 Bipangujo bikwabo byālombwele’mba dibajinji dya kupangwa kwa muntu ne kupebwaye lupusa lwa kubikala pa mishipa, byoni, banyema ne bipangwa bilandala, Leza wēbateakaninyebyo—pakubulwa bukwashi bwa muntu nansha kupebwa madingi. Bipangujo byamfulo bya Yehova byātelele bipangwa bu mbó, dikolongo, ne kabalwe. Leza wāipangwilwe Yoba amba: “Lelo mukebo ukanda pa kyakanwa kyobe, ne kwala butala bwao kūlu, a?” (Yoba 39:27) Kyabine, keamopo! Jingulula bidi mwēivwanine Yoba pāmwipangwile Leza amba: “Lelo [kukekala] yewa ukanena kinenenene ukapatanya ne Mwinebukomobonso’ni?” Kekyakutulumukwapo shi Yoba wānene’mba: “Talapo bidi, ne wabitupubitupu; kyo nkakulondolola i kika? Nkātula dikasa dyami pa kyakanwa kyami.” (Yoba 40:2, 4) Tamba nyeke ne nyekeke i moloke, shi tubatompibwa nansha patyetye mwanda wa tumutopeke, tufwaninwe ‘kutula dikasa dyetu pa kyakanwa kyetu.’ Bipangujo bya Leza byālombwele monka bukatampe bwandi, bulēme, ne bukomo mwēbilombwedile kitatyi kya bupangi.
Behemoth ne Leviathan
15 Kumfulo, Yehova wēsambile pa Behemoth, mungya buluji ye utelwanga bu kyovwe. (Yoba 40:15-24) Mwanda utulumukwa bininge i būla bwakyo, bulēmi, ne kikoba kyakyo, uno nyema ndya-byani, “udyanga biyombo.” Nsulo ya bukomo ne bulobo bwakyo idi mu muongo wakyo ne mu mijilo ya difu dyakyo. Bikupa bya maulu akyo i bikomo pamo bwa “bibese bikomo bya mikuba.” Behemoth komvwanangapo mōyo wa mema a mukwi, ino usumbanga pakubulwa makambakano mungala mwiya dilondo.
16 Leza wāipangwile monka Yoba amba: “Lelo ukōkeja kukoka [Leviathan] ñwena na bulobo, nansha kukutyija ludimi lwandi ne monji, a?” Muswelo ulombolwa Leviathan kimweka bu i ñwena. (Yoba 41:1-34) Kakokejapo kusamba kipwano kya ndoe na muntu, ne kekudipo muntu nansha umo wa tunangu ne wa mutyima mukomo ukokeja kulangula uno nyema wa lubinzo. Miketo keikokejapo kumunyemeja, ne “usepanga dipuma dya mukobe.” Panyemanga uvutulanga mema a palampe pamo bwa kisuku. Kuyuka’mba Leviathan ne Behemoth bādi na bukomo bukatampe kupita bwa Yoba kyāmukweshe etyepeje. Batwe netu tufwaninwe kuyuka na kwityepeja konso amba bukomo kebutambangapo kotudi batwe. Tusakilwanga tunangu ne bukomo bipāna Leza mwanda wa kwepuka makinga a Satana, Nyoka, ne kuvuija biselwa byetu mu mwingilo wa Yehova.—Fidipai 4:13; Kusokwelwa 12:9.
17 Byātyepejibwe mu miswelo yonso, Yoba wāitabije milangwe yandi yakubulwa kwendelamo ne wājingulwile’mba wādi unenakanya bitupu. Ino, wālombwele lwitabijo amba ukokeja ‘kumona Leza.’ (Yoba 19:25-27) Kyādi kikokejika muswelo’ka, mwanda kekudipo muntu ukokeja kumona Leza ne kushala mūmi? (Divilu 33:20) Nabubinebine, Yoba wāmwene kilomboji kya bukomo bwa Leza, wāuvwene kinenwa kya Leza ne meso andi a kumvwanija āputukile mwanda wa kumona bubinebine butala padi Yehova. Inoko Yoba ‘wākwetwe mukenye ne wāalamukile pa mutyima kwituta luvumbi ne buto.’ (Yoba 42:1-6) Bipangujo bivule byākankelwe kulondolola byālombwele bukatakata bwa Leza ne butyetye bwa muntu, nansha ke muntu ka wipēne kudi Yehova pamo na mwādi mwikadile Yoba. Kino kitukwasha tuyuke’mba kamweno ketu kekadipo na mvubu mikatampe kupita kutendela dijina dya Yehova ne kubingija bu-Mfumu bwandi. (Mateo 6:9, 10) Mwanda wetu umbajinji i kulama kikokeji kyetu kudi Yehova ne kulēmeka dijina dyandi.
18 Ino lelo basengi babubela, abo nabo, bādi bakulupile mu boloke bwabo abo bene? Yehova wādi ukokeja kwipaya Edifaza, Biledade, ne Zofala mwanda kebēsambilepo bubinebine butala padi aye, na mwēkilongele Yoba. Leza wānene’mba: “Ino penepo yatai komudi bañombe-balume basamba-babidi, ne mikōko-milume isambaibidi, mwendei kudi mwingidi wami Yoba, ne kwela kyakwela kisōkwe kya banwe bene; ino wami mwingidi Yoba ukemulombelela.” Bano bantu basatu bādi bafwaninwe kwityepeja ne kulemeka ino mbila. Yoba muntu wakikokeji wādi ufwaninwe kwibalombelela, ne Yehova wāmwene’mba milombelo yandi iketabijibwa. (Yoba 42:7-9) Ino lelo mukaja Yoba nandi, wāmusoñenye atuke Leza ne afwe? Kimweka bu wājokele Yoba ku lusa lwa Leza.
Mpalo Itulailwe Itupa Kikulupiji
19 Kitatyi kyālekele Yoba kutompola pamwanda wa masusu andi ne pa kupwa’tu kujokela mu mwingilo wa Leza, ponkapo Yehova wāalamuna ngikadilo yandi mwanda wa kamweno kandi. Kupwa kwa Yoba kulombelela boba bantu basatu, Leza “wālwija Yoba monka mwādi wikadile kalā” ne wāmupele ‘byonso byādi nabyo pakala misunsa ibidi.’ Yehova wālombwele bukatampe bwandi padi Dyabola na kwimika kuboko kwa Satana kwādi kuleta misongo ne wāpandije Yoba mu kingelengele. Kadi Leza wāpangile bandemona wēbafundwila kulampe, wākinga Yoba mu nsakwa ya bamwikeulu Bandi.—Yoba 42:10; Mitoto 34:7.
20 Banababo na Yoba bana-balume ne bana-bakaji, ne boba bādi bamuyukile pakalā, bashilula kwiya kudya pamo nandi, kumushikatyijako, ne kumusenga pamwanda wa byamalwa byāitabije Yehova amba bimufikile. Umo ne umo umbukata mwabo wāpele Yoba lupeto ne kaningamunwe ka nsahabu. Yehova wāesele mfulo ya Yoba kupita kuñanjilo, penepo wādi ne mikōko tununu 14, bangamedia tununu 6, bañombe ba lupungu kanunu 1, ne bimbulu bikaji kanunu 1. Yoba wābutwile monka bāna, bana-balume basamba-babidi ne bana-bakaji basatu enka kibalwa kyādi nakyo dibajinji. Bandi bāna bana-bakaji—Yemima, Kezia, ne Kelene-hapuke—bādi bana-bakaji bapopoke bya mwiko mu ntanda yonso, ne Yoba wēbapele byabupyane umbukata mwa banababo bana-balume. (Yoba 42:11-15) Pakwabo kadi, Yoba wālele mūmi myaka mikwabo 140 ne wāmwene nkongo iná ya lwandi lukunwa. Nsekununi ifudija’mba: “Enka namino’u Yoba wafwa, mununu mufikijije mafuku.” (Yoba 42:16, 17) Buvule bwa myaka ya būmi bwandi, wādi mwingilo wa kingelengele kyālongele Yehova.
21 Nsekununi ya Bisonekwa isambila padi Yoba ituyukija biyampe makinga a Satana ne itukwasha tuyuke amba bu-mfumu bwa umbikalo onso wa diūlu ne ntanda bwimanine pa kikokeji kya bantu. Pamo bwa Yoba, bonso basenswe Leza bakatompibwanga. Ino tukokeja kūminina mwāūminine Yoba. Wākomēne matompo andi na lwitabijo ne kikulupiji, ne wāpadilwe mpalo mivule. Byotudi bengidi ba Yehova mu kino kyetu kitatyi, tudi na lwitabijo ne kikulupiji kyabinebine. Mupadi wa Mpalo Mukatakata witutudile kikulupiji kikatampe kine ku mafuku akaya kumeso! Kulama muñeni yetu mpalo ya kukekala na būmi momwa mūlu kukokeja kukwasha bashingwe-māni bengidile Leza na katyino mu mafuku a būmi bwabo ebashadileko pano pantanda. Bavule badi na kikulupiji kya kukekala na būmi pano pantanda kebakafwididilapo lonso, ino bākapalwanga mpalo ya lusangukilo mu Paladisa pano pantanda, pamo ne Yoba mwine. Shi kepano, byotulamine kino kikulupiji kyabinebine mu mutyima ne muñeni yetu, batwe bonso basenswe Leza, tulombolei amba Satana i mbepai na kwimanija pototo ku mutamba wa Yehova bu bantu bakikokeji ne balwila bubikadi bwandi bwabikele umbuo onso wa diūlu ne ntanda.
1. I kika kilonganga Yehova ku bantu bandi, nansha shi matompo imebanekenye ngitu nakampata?
2. Nansha byobāsuswilwe pamwanda wa kupangwapangwa ne matompo, ba Tumoni twa Yehova bakomenanga matompo abo muswelo’ka?
3. Mu misambo yandi yamfulo, Yoba wāletele bukamoni’ka?
4. I kika kyānene Yoba kitala pa kikokeji, ne mwanda’ka wānene namino?
5. Yoba wālombwele amba tunangu twabine i kika?
6. Mwanda’ka Yoba wēsambīle pa būmi bwandi bwapakala?
7. Yoba wādi muntu wa muswelo’ka?
8. Edihu wādi ani, ne i muswelo’ka wālombwele kalemo ne bukankamane?
9. Edihu wēsambile pa kupandijibwa kwa Yoba muswelo’ka?
10. Yoba wādi ufwaninwe kutompibwa kufika ne kwepi, ino i kika kyotufwaninwe kuyuka kukwatañana na 1 Kodinda 10:13?
11. Potutanwanga na matompo makomo i kika kyotufwaniwne kuvuluka?
12. Misambo yamfulo ya Edihu yālombwele kika pa mwanda utala kufikidila kwa butyibi bwa Yehova pa bantu babi?
13, 14. (a) Yehova wāshilwile kwipangula Yoba pa bintu’ka? (b) I myanda’ka yotukokeja kwifunda mu bipangujo bikwabo bya Leza byāipangwile Yoba?
15. Mungya buluji, Behemoth wenzakanibwanga na nyema’ka, ne i ngikadila’ka yandi imo-imo itelelwe?
16. (a) Muswelo ulombwelwe Leviathan kimweka bu i kipangwa’ka, ne i myanda’ka yabinebine itala kino kipangwa yotuyukile? (b) Bukomo bwa Behemoth ne Leviathan padi bukokeja kwitupa milangwe’ka itala pa muswelo wa kuvuija biselwa byetu mu mwingilo wa Yehova?
17. (a) Yoba ‘wāmwene Leza’ muswelo’ka? (b) Bipangujo byākankelwe kulondolola Yoba byālombwele kika, ne kino kikokeja kwitukwasha muswelo’ka?
18. Basengi ba Yoba babubela bādi bafwaninwe kulonga kika?
19. Kukwatañana na byālongele Yoba, Leza wālombwele muswelo’ka bukatampe Bwandi bupityile bwa Dyabola?
20. Yehova wāpadile Yoba mpalo ne kumwesela muswelo’ka?
21. Ino nsekununi ya Bisonekwa isambila padi Yoba itupa bukwashi’ka, ne tufwaninwe kwikala basūmininwe mwanda wa kulonga kika?
[Bilembwa bya pa Bifwatulo]
Binenwa bya Yehova bitala padi Behemoth ne Leviathan byākweshe Yoba ekale kwityepeja
Ukalondolola Namani?
◻ I myanda’ka imo-imo yānene Yoba mu misambo yandi yamfulo pādi ulondolola basengi bandi babubela?
◻ Edihu wālombwele muswelo’ka amba wādi kamoni ka Yehova wakubulwa mboloji?
◻ I bipangujo’ka bimo-bimo byāipangwilwe Yoba na Yehova, ne byālupwile bipa’ka?
◻ I muswelo’ka ukakukwasha nsekununi ya Bisonekwa itala padi Yoba?