Bashikete Pamo mu “Ntanda” Milongololwe

“Ino pano banwe mukenikwa bu [ba bitobo, NW] ba Yehova; bantu bakemutēla amba: I bengidi ba Leza wetu.”​—ISAYA 61:6.

1, 2. (a) Beni bādi mu Isalela bāitabije bādi na ngikadilo’ka? (b) Dyalelo, bantu ba mu kibumbo kikatampe balombolanga mushipiditu wa muswelo’ka?

MU KITATYI kyakala, Isalela pākidi na kikokeji wādi wingila bu kamoni ka ntumbo ya Yehova pano pantanda. (Isaya 41:8, 9; 43:​10.) Beni bavule bālondolwele ne bāile kutōta Yehova mu kinsense pamo na bantu Bandi batongibwe. Nabubine, bāsapwidile Isalela myanda yānene Luta kudi Naomi amba: “Bobe bantu bakekalanga bami bantu, ne obe Leza ye wami Leza.” (Luta 1:16) Bāitabije myanda yādi mu Mukanda wa kipwanino, bana-balume bādi batwejibwa kwisao. (Divilu 12:43-48) Bana-bakaji bamo-bamo bāsongelwe na bene Isalela. Lehaba wa mu Yediko ne Luta mwine Moabu bāikele ke bankambo wandya Yesu Kristu. (Mateo 1:5) Bano beni bāitabije bāikele ke kipindi kya kipwilo kya Isalela.​—Kupituluka 23:7, 8.

² Pamo na mwādi mwikadile beni bāitabije mu Isalela, dyalelo “kibumbo kikatampe” basapwila basheleko ba mu bashingwe māni amba: “Batwe tukenda nenu, mwanda tubaivwana’mba Leza udi nenu pamo.” (Kusokwelwa 7:9; Zekadia 8:23) Betabije’mba bano Bakristu bashingwe māni ye “umpika wabinebine ne wamanwa” wa Yehova, ne bengidila pabwipi nabo, mwanda bashingwe māni pamo ne “mikōko mikwabo” bonso badi mu ‘luombe lumo, ne baludikwa na mukumbi umo.’ (Mateo 24:45-47, NW; Yoano 10:16) I kika kikafikila kibumbo kikatampe shi bana babo bashingwe māni bonso abapalwa mpalo yabo ya kwenda mūlu? Kebafwaninwepo kutyina. Umbula bwa ano “mafuku a kumfulo” Yehova wāikele kuteakenya mpangiko ikekalako mu kine kitatyi’kya.​—2 Temote 3:1.

“Ntanda” Yakumushipiditu

3. ‘Ntanda impya’ yātobele Petelo i ntanda’ka, ne yāshimikilwe kitatyi’ka?

³ Mpangiko ya umbikalo wamūlu mukekala Bakristu 144 000 bashingwe māni yālombwelwe mu butobo na mutumibwa Petelo. Pānene’mba: “Monka mwendele mwanda-wamulao wandi, tutengele madiulu mapya, ne ntanda īngi mipya mo mwikalanga boloke.” (2 Petelo 3:13) Ano “madiulu mapya” ātudilweko mu 1914, pābikikilwe Kristu bu Mulopwe mu Bulopwe bwamūlu. Ino lelo ‘ntanda mipya’ nayo?

4. (a) I mwanda’ka mukatampe wakubulwa kulangila wālongekele mu 1919? (b) I ‘muzo’ka wābutwilwe ponka na ponka,’ ne i ‘ntanda’ka yābutwilwe mu difuku dimo dyonka’?

⁴ Mu 1919, Yehova wālupwile basheleko ba mu bashingwe māni mu bupika mu Babiloni Mukatakata. (Kusokwelwa 18:4) Ku bakulumpe ba Bipwilo-bya-Kikristu, uno mwanda mukatampe wa mu kyelekejo kebādipo beulangila. Pa kino, Bible unena’mba: “Lelo i ani waivwene kino kintu kidipo namino’ki, a? Lelo wamwene bino bintu bino’bi bidi namino’bi i ani? Lelo ntanda ikabutulwe mu difuku dimo dyonka, a? Lelo muzo ukabutulwe panopano ponka, a?” (Isaya 66:8) Pāsokokele kipwilo kya bashingwe māni mukitulumukila kumeso kwa mizo bu bantu banyongololwe, kyabine wādi ‘muzo wābutwilwe ponka na ponka.’ Ino lelo “ntanda” nayo yādi i kika? Mu buluji kampanda, yādi yakumushipiditu myenzakane na ntanda ya Isalela wakala. Kyādi kipindi mwādi muvuijibwa mwingilo wa bulopwe wāpelwe ku “muzo” umpya wābutwilwe, kifuko mufikidila bupolofeto bwa Paladisa wakumushipiditu budi mu mukanda wa Isaya mu kino kyetu kitatyi. (Isaya 32:16-20; 35:​1-7; enzakanya na Bahebelu 12:12-14.) Mukristu, nansha shi ushikete ku kifuko’ka, udi mu ine ‘ntanda’ya.’

5. I kisumpi’ka kyāmwekele mu 1919? Shintulula.

⁵ Lelo kino kikwatañene muswelo’ka na ‘ntanda impya’ yātobele Petelo? Eyo, uno “muzo” umpya, wābutwilwe mu 1919 mu “ntanda” yālongolwelwe, wādi ufwaninwe kutandabuka mu bulongolodi kujokoloka ntanda yonso mudi bantu bashingwe māni ne bakubulwa kushingwa māni batendela Yehova. Buno bulongolodi bukapanda ku Amakedona ne kutwela mu ntanda impya ya Leza. Mu uno muswelo uno muzo wāikele kumonwa bu kitako kya kisaka kya bantu boloke, ntanda impya, ikekalako kupwa kwa konakanibwa kwa ntanda ya Satana.a Umbukata bwa myaka ya 1930, bashingwe māni, mu kisumpi, bāikele kubungakanibwa mu ntanda milongololwe. Tamba nka penepa, bāningile pa kubungakanya kibumbo kikatampe kya mikōko mikwabo, mudi kubwipi kwa miliyo itano ya bantu dyalelo. (Kusokwelwa 14:​15, 16) Lelo mu ino “ntanda” mudi bantu bavule kupita? Mhm, mikalo yayo ikokeja kubaijibwa mu miswelo yonso isakibwa. (Isaya 26:15) Bine, kileta nsangaji mikatampe kumona mwenda mwilundilako kibalwa kya bantu badimo byenda biyula “ntanda” na “bipa” bilupula basheleko mu bashingwe māni​—bidibwa bya kumushipiditu binune, bileta bukomo mu ngitu. (Isaya 27:6) Ino lelo ino mikōko mikwabo idi pa kifuko’ka mu “ntanda” milongololwe ya bantu ba Leza?

Beni Bengila mu “Ntanda”

6. Beni bāingile mu “ntanda” ya bantu ba Leza muswelo’ka?

⁶ Pamo na mwādi mwikadile beni bāitabije mu ntanda ya Isalela bākokele ku Bijila bya Mosesa, kibumbo kikatampe dyalelo mu “ntanda” milongololwe kikokelanga ku mbila ya Yehova. Byobafundijibwa na bana babo bashingwe māni, bapelele mutōtelo wabubela mu miswelo yao yonso ne balemekanga bu-ujila bwa mashi. (Bilongwa 15:19, 20; Galatea 5:19, 20; Kolose 3:5) Basenswe Yehova na mutyima wabo onso, ñeni, muya, ne bukomo bwabo ne kadi basenswe bakwabo pamo bwa abo bene. (Mateo 22:37; Yakoba 2:8) Mu Isalela wakala beni bāitabije bākweshe ku lubako lwa tempelo wa Solomone ne bakwatakenye kujokejibwa kwa mutōtelo wabine. (1 Bilongwa 22:2; 2 Bilongwa 15:8-14; 30:25) Dyalelo, kibumbo kikatampe nakyo kikwashanga mu mingilo ya lubako. Kimfwa, bakwashanga mu kutamija bipwilo ne bipindi bishileshile, pakubulwa kwilwako mpangiko ya ngubako, kimfwa kubaka Mobo a Bulopwe, Mobo a Bitango, ne mabilo a misambo.

7. I kika kyāfikidile mu Yelusalema pājokele bene Isalela bāselelwe bu misungi mu Babiloni pokwābudilwe bene Levi bavule mwanda wa kuvuija mingilo ya mu tempelo?

⁷ Mu 537 K.K.K., pājokele Isalela kutamba mu Babiloni mobāselelwe bu misungi, bāshilwile kuteakanya mwingilo wa kubakulula tempelo. Inoko, bene Levi bājokele kebādipo bavule. Omwanda nanshi, ba Netini​—bekadi bobāsambile nabo kipwano bātwejibwe kwisao bādi bakwasha bene Levi​—bāpelwe madyese mavule mu mwingilo wa mu tempelo. Inoko, kebādipo benzakene na bitobo bashingwe māni ba mu kisaka kya Alone.b​—Ezela 7:24; 8:15-20; Nehemia 3:22-26.

8, 9. Mikōko mikwabo yāpelwe mingilo mivule ya kuvuija mwingilo ukola umbula bwa mafuku amfulo muswelo’ka?

⁸ Dyalelo, bakristu bashingwe māni balondanga kino kimfwa. Byenda bifwena ‘kitatyi kya kumfulo,’ kibalwa kya basheleko ba mu bashingwe māni kibatyepa nakampata mu “ntanda” ya bantu ba Leza. (Danyele 12:9; Kusokwelwa 12:17) Omwanda nanshi, kibumbo kikatampe pano kidi na mingilo mivule ya kuvuija “mwingilo ukola.” (Kusokwelwa 7:​15, NW) Na kulonda buludiki bwa banababo bashingwe māni, bela “kitapwa kya kutōtelapo Leza nyeke ne nyeke, kushintulula kokunena’mba, i bipa bya milomo [itumbija] . . . kwitabija ku dijina dyandi.” ‘Kebavulaminwangapo kulonga biyampe ne kupāna byakupana’ mwanda bayukile’mba “aye Leza uloelelwe bitapwa bidi namino.”​—Bahebelu 13:15, 16.

⁹ Pakwabo kadi, byenda bilundilako kibumbo kikatampe mu kibalwa kya tutwa twa tununu mwaka ne mwaka, kusakilwa buledi bukatampe bininge. Mu kitatyi kimo, uno mwingilo wādi uvuijibwa enka na bakristu bashingwe māni kete. Pamwanda wa buvule bwa mingilo, mwingilo wa buledi pa bipwilo bivule, pamo ne wa baledi bendakana, ba distrike ne baledi ba misambo, wāikele kupebwa ku mikōko mikwabo. Mu 1992 kibalwa kityetye umbukata mwabo bāpelwe madyese a kutanwa ku kupwila kwa ma komite adi ku Kitango Kyendeji bu bakwashi, ino kebatanwangapo ku mbila yamfulo ityibwanga na Kitango Kyendeji. Ne pano pene, mikōko mikwabo idi na katyino ka kulemeka bijila bibalombola balunda nabo bakristu bashingwe māni ne bamwene’mba bapelwe madyese a kwibakwashako abo bemanine umpika wabinebine ne wamanwa wa Yehova.​—Mateo 25:34-40, NW.

‘Pamo’nka bwa Muledi’

10, 11. Na kulonda Kimfwa kya bene Fidishitia bamo-bamo, bantu bapakala bādi balwa na bantu ba Leza bāalamukile pa mutyima muswelo’ka? Kwālupukile bipa’ka?

¹⁰ Muswelo wingidija umpika wabinebine ne wamanwa mikōko mikwabo na kwibapa biselwa, wātobelwe mu Zekadia 9:6, 7. Tutangamo amba: “Nkatyibila kwitatula kwa bene Fidishitia. Penepo nkafundula mashi andi mu kyakanwa kyandi, ne byamunyanji byandi umbukata mwa meno andi; kabidi aye nandi ye ukekala ke wa bashalashala ba Leza wetu; ino penepo ukekala’nka bwa muledi mu Yuda, ne Ekalone’nka bwa mwine Yebushi.”c Bene Fidishitia bādi balwana bakatampe ba bantu ba Yehova, pamo na mwikadile ntanda ya Satana dyalelo. (1 Yoano 5:19) Pamo’nka na mwāonakanibwe muzo onso wa bene Fidishitia, mo monka ne ino ntanda nayo, pamo ne bakulumpe bayo ba mitōtelo, ba kipolitike, ne bansunga, pano pano ponka bakamona kufikidila kwa bukalabale bwa Yehova.​—Kusokwelwa 18:​21; 19:​19-21.

¹¹ Inoko, kukwatañana na Binenwa bya Zekadia, bene Fidishitia bamo-bamo bāalamwine milangwe ne mwiuvwanino wabo, ne kino kyelekejo kyādi kilombola’mba bantu bamo-bamo bepēne ku ino ntanda kebakashalapo nyeke mu lwana na Yehova. Bakalekanga mutōtelo wa bileza-leza pamo ne bibidiji byao bibi ne bitapwa byamunyanji ne bakatokejibwa ku meso a Yehova. Mu kino kyetu kitatyi, bano “Bafidishitia” bāalamukile batanwa mu kibumbo kikatampe.

12. Mu kino kyetu kitatyi, “Ekalone” wāikele ‘bu mwine Yebushi’ muswelo’ka?

¹² Kukwatañana na bupolofeto, Ekalone, kibundi kikatampe kya bene Fidishitia kikekala ‘pamo’nka bwa Yebushi.’ Kitatyi kimo, bene Yebushi nabo bādi balwana na Isalela. Yelusalema wādi mu makasa abo kufika ne pebānekenye Davida. Inoko, i kimweke patōka’mba bamo-bamo ba mu boba bāpandile ku mavita ādi alwa Isalela bāikele ke beni bāitabije. Bāingile mu ntanda ya Isalela bu bapika ne bāpelwe madyese a kukwasha mu mwingilo wa lubako lwa tempelo. (2 Samwele 5:4-9; 2 Bilongwa 8:1-18) Dyalelo, “bene Ekalone” baalamukile mwanda wa kutōta Yehova, nabo badi na biselwa bya kwingila mu “ntanda” munshi mwa buledi bwa umpika wabinebine ne wamanwa.

13. Baledi mu ntanda yakala bādi ba ani?

¹³ Zekadia unena’mba mwine Fidishitia ukekala pamo’nka bwa muledi mu Yuda. Kishima kya mu Kihebelu ʼal·luphʹ, shi kyalamwinwe bu “muledi” kishintulula “muludiki wa tununu” (nansha,“chiliarch”). Kyādi kifuko kya peūlu bininge. Kimweka bu muzo umbajinji wa Edoma wādi enka na baledi 13. (Ngalwilo 36:15-19) Kishima “muledi” pavule kekingidijinbwangapo mwanda wa kwisambila pa Isalela, ino kishima “mutwe (nansha, bamfumu) ba tununu” kyo kingidijibwe nakampata. Pāityile Mosesa boba bonso bādi bemanine muzo wa Isalela, wāityile “mitwe ya batununu ba Isalela.”d Bādimo 12, i kimweke patōka’mba bādi balondakena enka Mosesa. (Umbadilo 1:4-16) Muswelo umo onka, mu bulongolodi bwa bashidika, bamfumu ba batununu bādi balondakena enka mudyavita nansha mulopwe.​—2 Samwele 18:1, 2; 2 Bilongwa 25:5.

14. Dyalelo “Bafidishitia” abaikala bu baledi muswelo’ka?

¹⁴ Zekadia kātobelepo butobo amba mwine Fidishitia ukalamuka pa mutyima ukekala muledi wabinebine mu Isalela, mhm. Kino longa kekyāendelemopo, mwanda kādipo mwine Isalela wakibutwila. Ino wādi wakwikala pamo’nka bwa muledi, ukapebwa kifuko kya lupusa kyenzakene na kya muledi. Ne mokyāfwaninwe kwikadila. Byenda bityepa kibalwa kya bakristu basheleko mu bashingwe māni ne bavule mu boba bakidi bōmi kebakokekoke pamwanda wa buvule bwa myaka, mikōko mikwabo iteakanibwe biyampe ikwashanga mu mingilo isakilwa bukwashi, nka na mokyādi kilongibwa. Kebasakepo kwitula pa kifuko kya banababo bashingwe māni kubukomo, mhm. Ino umpika wabinebine ne wamanwa wibapa lupusa mungya bisakibwa bya mu “ntanda” mwanda wa bulongolodi bwa Leza bwendelele kumeso mu muswelo ufwaninwe. Kwendelela kwa uno mulongelo wa myanda umweka kadi mu bupolofeto bukwabo.

Bitobo ne Babidimye

15. (a) Mu kufikidila kwa Isaya 61:​5, 6, ‘ba bitobo ba Yehova’ i ba ani, ne i kitatyi’ka kyobāingile mu uno mwingilo mu buluji bubwaninine? (b) “Beni” bāingile mu madimi a bene Isalela i ba ani, ne​—mu buluji bwa kumushipiditu​—uno mwingilo wādi wa kulonga’ka?

¹⁵ Mu Isaya 61:5, 6 tutangamo amba: “Beni bakemanako kudisha ñombe yobe, ne bāna ba beni bana-balume bakekala [ba bidimye, NW] benu ne bakutalatala mañanza enu. Ino pano banwe mukenikwa bu [ba bitobo, NW] ba Yehova; bantu bakemutēla amba: I bengidi ba Leza wetu; mukadya bupeta bwa mizo’ya, kadi mu ntumbo yabo muketumbija banwe bene.” Dyalelo, ‘ba bitobo ba Yehova’ i bakristu bashingwe māni. Mu buluji bwamfulo ne bubwaninine, bākengilanga bu ‘ba bitobo ba Yehova; . . . bengidi ba Leza wetu,’ mu Bulopwe bwamūlu. (Kusokwelwa 4:9-11) Lelo “beni” bemanine mingilo ya madimi i ba ani? Ino i mikōko mikwabo, bashikete mu “ntanda” ya bene Isalela ba Leza. Lelo bakadisha ba ñombe, ne babidimye, ne mwingilo wa kutalatala mañanza obapelwe kulama i ba ani? Mu buluji bwamvubu bwakumushipiditu, ino mingilo ifwaninwe kuvuijibwa na bantu bapāna bukwashi, badisha, ne bangula bantu.​—Isaya 5:7; Mateo 9:37, 38; 1 Kodinda 3:9; 1 Petelo 5:2.

16. Kimweka bu i ba ani bakavuijanga mingilo yonso mu “ntanda” ya bantu ba Leza?

¹⁶ Mu kino kitatyi, kibalwa kityetye kya basheleko ba mu Isalela wakumushipiditu pano pantanda bavuijanga mwingilo wa bu bakumbi bakumushipiditu, wa bu babidimye, ne wa kutalatala mañanza. Kitatyi kikelunga kipwilo kyonso kya bashingwe māni umbumo pamo na Kristu, ino mingilo yonso ikashilwanga mikōko mikwabo. Nansha ke buledi bwa “ntanda” ya bantu bukapebwa mu makasa a mikōko mikwabo ibwenye bisakibwa, bitelwa mu mukanda wa Ezekyele bu kabumbo ka bamfumu.​—Ezekyele, shapita 45, 46.e

“Ntanda” Yuminina

17. I myanda’ka iteakanya Yehova umbula bwa ano mafuku amfulo?

¹⁷ Eyo, kibumbo kikatampe kekifwaninwepo kwikala na moyo! Yehova uteakenye mpangiko mivule pamwanda wabo. Kutandabuka kukatampe pano pantanda umbula bwa ano mafuku amfulo i mwingilo wa kubungakanya ne kutula kayukeno ku bashingwe māni. (Kusokwelwa 7:3) Inoko, umbula bwa kitatyi kyenda kifikidila bino byonso, Yehova utwejeje mikōko mikwabo mu kinsense pamo nabo mu ntanda yakumushipiditu milongololwe. Mwinemwa badishibwanga kumushipiditu ne bapebwa bufundiji muswelo wa kwikadila na būmi bwa bwine-kristu. Kupityidila, bafundijibwe biyampe mu mwingilo ukola, kutentekelapo ne mwingilo wa buledi. Pamwanda wa kino, bafwijangako Yehova bikatampe pamo ne banababo bashingwe māni.

18. I kupityila ku kizumba’ka kikatampe kikapa mikōko mikwabo muswelo wa kukashikata mu “ntanda” ya Isalela wakumushipiditu?

¹⁸ Pakalwa Koka wa ku Makoka bulwi bwandi bwamfulo na bantu ba Leza, mikōko mikwabo ikalamanga kikokeji kyabo pamo ne basheleko mu bashingwe māni “kuntanda ya bibundi byampikwa masakwa.” Mikōko mikwabo ikekalanga nyeke mu ino “ntanda” kitatyi kyobakapandijibwa ku konakanibwa kwa mizo ne kukatwela mu ntanda impya ya Leza. (Ezekyele 38:11; 39:​12, 13; Danyele 12:1; Kusokwelwa 7:9, 14) Shi bakendelela nyeke na kukōkela, kebakatalukapo nansha dimo mu kino kifuko mudi nsangaji mikatampe.​—Isaya 11:9.

19, 20. (a) Mu ntanda impya, bekadi ba mu “ntanda” bākasangelanga buledi’ka bukatampe? (b) I kika kyotwelaijanga na kipyupyu kyonso?

¹⁹ Isalela wakala wāludikilwe na balopwe bantu ne wādi na ba bitobo ba mu kisaka kya Levi. Mu ntanda impya, Bakristu bakekalanga na buledi bukatampe bwine: Munshi mwa lupusa lwa Yehova Leza, bakaludikwanga na Kitobo Mukatampe kadi Mulopwe, Yesu Kristu, ne na ba bitobo kadi balopwe 144 000 belungile​—bamo-bamo bakekala boba bobādi bayukile kala bu bakristu batutu ne bakaka babo pano pantanda. (Kusokwelwa 21:1) Bekadi bakikokeji ba mu ntanda yamushipiditu bākekalanga na būmi mu ntanda ikalongololwa ke paladisa yabinebine, bakasangela madyese a kubelulwa misongo yabo akatamba mu Yelusalema Umpya.​—Isaya 32:1; Kusokwelwa 21:2; 22:1, 2.

²⁰ Mwendela dikalo dikatampe dyamūlu dya Yehova pakubulwa kwimana mwanda wa kuvuija mpango yandi, batwe bonso twelaijanga na kipyupyu kyonso kukavuija kipindi kya mingilo yotupelwe. (Ezekyele 1:1-28) Kumfulo, pakafikidilanga ino mpango, langapo bidi kukekala nsangaji mikatampe kashāa mwanda wa kutumbija bubinga bwa Yehova! Lwimbo lusekunwinwe mu Kusokwelwa 5:13 lukembwa na bukomo bonso na bipangwa byonso amba: “Katōkwe, ne buleme, ne ntumbo, ne bulopwe, bīkale kudi yewa ushikete pa lupona ne ku Kāna-ka-mukōko kwa nyeke na nyeke.” Konso kukekala kifuko kyetu shi mūlu nansha shi pano panshi, lelo ketwikalangapo twabila kukatanwako, kulunga mawi etu ku luno lwimbo luyampe lwa mitendelo?

[Kunshi kwa dyani]

‘Mwine Fidishitia wa mu kino kyetu kitatyi ukekalanga ‘pamo’nka bwa muledi wa mu Yuda’

Bashingwe māni ne mikōko mikwabo bengidila pamo mu ntanda yakumushipiditu

Ukalondolola Namani?

◻ “Ntanda” yālongolwelwe mu 1919 i ntanda’ka, ne yāyudilemo bekadi muswelo’ka?

◻ I muswelo’ka wāpelwe mikōko mikwabo biselwa bivule mu “ntanda” milongololwe ya bantu ba Leza?

◻ Bantu ba mu kibumbo kikatampe badi pamo bwa ‘bene Yebushi’ ne ‘pamo’nka bwa baledi mu Yuda’ muswelo’ka?

◻ Mikōko mikwabo yakikokeji ikashikata mu “ntanda” umbula bwa kitatyi kinga?