Madyese Makatampe Kupityila Ku Kipwano Kipya

“Yesu . . . i nsenga wa kipwano kitabukile kunengela.”​—BAHEBELU 8:⁠6, MB.

BA ADAMA ne Eva pa kupwa kuluba, Yehova wātyibīle Satana wāongwele Eva nsambu, amba: “Nkatūla mushikwa pa bukata bwa abe ne mwana-mukaji ne pa bukata bwa lukunwa lobe ne lukunwa lwandi. Ukakusonsakanya mu mutwe, nobe ukamusonsakanya mu kapondo.” (Ngalwilo 3:​15, NW) Luno lukunwa lwālailwe mu Edena lwāmwekele difuku dyābatyijibwe Yesu mu Munonga wa Yodano mu 29 K.K. Kipindi kya buno bupolofeto bwa kala kyāfikidile pāfwile Yesu ku mutyi wa masusu mu 33 K.K. Satana ‘wāsonsakanya kapondo’ ka Lukunwa.

² Dyese i dino amba, kino kilonda, nansha byokyādi kisansa byamwiko, kekyādipo kyalonso. Yesu wāsangwilwe mu bafwe ke mushipiditu keufu, wākanda mūlu mudi Shandi, mwaākafikije mvubu ya mashi andi aāmwangile bu “kikūlwa kya bavule bene.” Enka namino, bino binenwa byandi byāfikidila: “Mwanā muntu unenwe kutundulwa, amba muntu yense waketabija mudi aye ekale na būmi bwanyeke. Leza wāswele ntanda mpata, o mwanda wāpene wandi Mwana wa bunka, amba muntu yense uloeja lwitabijo mudi aye kakonakanibwapo, ehe, ino ukekala na būmi bwanyeke.” (Mateo 20:28; Yoano 3:​14-​16, NW; Bahebelu 9:​12-​14) Kipwano kipya lo lupopo lwine pemanine kufikidila kwa buno bupolofeto bwa Yesu.

Kipwano Kipya

³ Yesu wālombwele balondi bandi kitatyi kityetye kumeso kwa lufu lwandi amba, ano mashi asa kumwangwa o “mashi ami a kipwano [kipya].” (Mateo 26:​28, MB; Luka 22:​20, MB) Mafuku dikumi kupwa kukanda’ye mūlu, kipwano kipya kyāshilula kwingila difuku dyāpungulwidilwe mushipiditu sandu pa bana-babwanga kubwipi kwa 120 bādi bebungile mu Yelusalema mu kyumba kya peulu. (Bilongwa 1:​15; 2:​1-4) Kutwejibwa kwa bano bana-babwanga 120 mu kipwano kipya kulombola’mba kyokya kipwano “kya kala,” kipwano kya Bijila, kyāpwididile’mo pwē.​—Bahebelu 8:​13.

⁴ Lelo kipwano kikulu kyādi kibi? Mhm, kekyādipo kibi. Kyāpingakanibwe’ko kupingakanibwa, ne kalungi ka bwana ka Isalela wa kungitu ka bu bantu ba Leza bapandulwe’mo kene kāpwididila’mo. (Mateo 23:38) Byēbafikile pa mwanda wa kubulwa kobābudilwe kikōkeji, kadi bāpela ne Mushingwe-māni wa Yehova. (Divilu 19:5; Bilongwa 2:​22, 23) Inoko, Bijila byāvuije bintu bivule kumeso kwa kupingakanibwa’byo. Tamba kalāa ne kala kene, abyo byo byādi bilombola muswelo wa kufwena kudi Leza ne mwa kwilamina ku mutōtelo wabubela. Byādi na bilomboji bivule bya kipwano kipya, byādi bilombola na bitapwa byabyo bya kitatyi ne kitatyi amba muntu yense ubinzanga, kumusakila kukūlwa ku bubi ne ku lufu. Kyabine, bino Bijila ye wādi ‘muledi utwala kudi Kidishitu.’ (Ngalatea 3:​19, 24; Loma 3:​20; 4:​15; 5:​12; Bahebelu 10:​1, 2) Madyese mene ālailwe Abalahama ādi a kufikidila ao onso kupityila ku kipwano kipya.

Mizo Ibaeselwa ku Lukunwa lwa Abalahama

⁵ Yehova wālaile Abalahama amba: “Mu lukunwa lobe e mo ike[esela]nga dyese mizo yonso ya panopanshi.” (Ngalwilo 22:18) Mu myaka ya kipwano kikulu, beni bavule ba mityima mitūke bāeselwe madyese pa kwilunga’bo ku Isalela, muzo wa lukunwa lwa Abalahama. Inoko, mu kufikidila kwinekwine kwa kumushipiditu, luno Lukunwa lwa Abalahama lwāikele muntu umo mubwaninine. Polo wēkishintulwile paānene amba: “Myanda-yamilao yanenenwe kudi Abalahama, ne ku lukunwa lwandi lwine kumo. Kanenangapo’mba: I ku nkunwa na īdi mulwi; mhm; nanshi i ku lumo lonka bitupu unena’mba: Ne ku lukunwa lobe; nalo i Kidishitu.”​—Ngalatea 3:​16.

⁶ I amo, Yesu ye Lukunwa lwa Abalahama, kadi kudi Aye ko kweselwanga mizo dyese ditabukile madyese o-onso āeselwe Isalela wa kungitu. Bine, muzo mubajinji wāeselwe dino dyese i Isalela yenka. Mwanda kinondanonda na Pentekosa 33 K.K., mutumibwa Petelo wānene ku kisumpi kya Bayuda amba: “Bānwe mwi bāna ba boba bapolofeto, ne ba mu kipwano kyāsambile Leza kudi bakulutuba benu, pānenene Abalahama’mba: Ku lukunwa lobe bisaka byonso bya panopantanda bikeselwa dyese. Ino Leza wabadikila konka ko mudi bānwe pa kusangula mwingidi wandi, wemutumina’ye kwimwesela dyese dya kwimuvundamija bānwe bonso ku bya bubi bwenu.”​—Bilongwa 3:​25, 26.

⁷ Bukidi bonka dyese dyātandabukila ku bene Samadia ne ku Bajentaila. (Bilongwa 8:​14-​17; 10:34-​48) Kitatyi kimo, pa bukata bwa 50 ne 52 K.K., Polo wātumine mukanda kudi bene Kidishitu ba mu Ngalatea mu Asha Minele amba: “Kilembwa nakyo, byo kyabadikile kumona’mba, Leza ukabingijanga baJentaila ponka pa kwitabija, kyapwile kala kusapula myanda-miyampe kudi Abalahama’mba: Monka mudi abe mizo yonsololo īkeselwa dyese. Nanshi boba badi bakwitabija baeselwe dyese pamo na Abalahama wabinebine.” (Ngalatea 3:​8, 9; Ngalwilo 12:⁠3) Nansha bene Kidishitu bavule mu Ngalatea byobādi ‘bantu ba mizo’ ingi, ino bāeselwe kupityila kudi Yesu mwanda wa lwitabijo lwabo. Mu muswelo’ka?

⁸ Polo wālombwele bene Kidishitu bene Ngalatea bo-bonso amba: “Nanshi byo mudi bā Kidishitu mudi ba lukunwa lwa Abalahama, ne bupyani nabo, monka mupityile mwanda-wamulao.” (Ngalatea 3:​29) Ku bano bene Ngalatea, kweselwa kupityila ku Lukunwa lwa Abalahama kwādi kwibalomba bidi bekale ba mu kipwano kipya; ne pa kwikala bampyana pamo na Yesu, belungile kudi Yesu mu lukunwa lwa Abalahama napo mo monka. Ketuyukilepo buvule bwādi bantu ba Isalela wa kala. Ino tuyukile’ko amba bādi pamo “bwa musenga udi pa kalunga-kamema bungi.” (1 Balopwe 4:​20) Kyotwayuka i kibalwa kya mfulo kya bantu belungile na Yesu mu lukunwa lwa kumushipiditu​—badi 144000. (Kusokwelwa 7:4; 14:1) Bano bonso 144000 batambile mu “bisaka byonso, ne ba mu ndimi yonso, ne ba ku bantu bonso, ne ba ku mizo yonso” ya bantu, bapungulwilanga madyese a kipwano kya Abalahama ku bantu bakwabo.​—Kusokwelwa 5:⁠9.

Bupolofeto Bubafikidila

⁹ Yelemia wābadikile kunenena pa kino kipwano kipya, amba: “Kino’ki kyo kipwano kyo nkasamba ne njibo ya Isalela, ao mafuku pa kupwa; i Yehova unena, amba: nkatūla mukanda-wabijila wami munda mwabo, kabidi nkalemba’o umutyima wabo.” (Yelemia 31:33) Kiyukeno kya bano badi mu kipwano kipya i mingilo yobengidilanga Yehova ku buswe bwabo. (Yoano 13:35; Bahebelu 1:9) Bijila bya Yehova i bilembwe mu mityima yabo, kadi i bēpane na mutyima mwapuke mu kulonga kiswamutyima kyandi. Bine, mu Isalela wa kala mwādi bantu bamo bakikōkeji bādi baswele mpata bijila bya Yehova. (Mitōto 119:97) Ino bavule kebakōkelepo. Ino bashele nyeke bantu ba mu muzo’wa. Kebibwanikapo muntu nansha umo kwikala’ye mu kipwano kipya pampikwa mukanda-wabijila wa Leza kulembwa’o mu mutyima wandi.

¹⁰ Yehova wānenene monka pa bano ba mu kipwano kipya’mba: “Nkekalanga Leza wabo, nabo bakekalanga bami bantu.” (Yelemia 31:33) Mu Isalela wa kala, bavule bādi batōta bileza bya mizo ingi, ino abo koku bene Isalela nyeke. Ponka pa kino kipwano kipya, Yehova wābunda muzo wa kumushipiditu, “Isalela wa Leza,” upingakenine pa Isalela wa kungitu. (Ngalatea 6:​16, MB; Mateo 21:43; Loma 9:​6-8) Ino kebibwanikapo muntu nansha umo kwikala’ye nyeke mu muzo mupya wa kumushipiditu aye muleke kutōta Yehova, kasuku kandi.

¹¹ Yehova wānene kadi amba: “Bonso bakandyuka, kushilwila ku mupite butyetye kutūla ne ku mupite bukatampe ko badi.” (Yelemia 31:34) Mu Isalela, bavule bādi bapumpunya byādi bibanena Yehova, amba: “Yehova kakalongapo biyampe, ehe, nansha kulongapo bibi kwine.” (Zefenia 1:​12) Muntu upumpunya binena Yehova nansha usubija mutōtelo wandi utōka, kabadilwapo nansha dimo mu Isalela wa Leza. (Mateo 6:​24; Kolose 3:5) Bene Isalela wa kumushipiditu i “bantu bayukile Leza wabo.” (Danyele 11:32) Baloelelwe ‘kwikala na buyuki bwa kuyuka Leza umo kete wabine ne Yesu Kidishitu.’ (Yoano 17:3) Kuyuka Yesu ko kwibatamijijanga buyuki bwabo bwa kuyuka Leza, mwanda Yesu “e yenka aye wamulumbulula [Leza],” mwinemwine mwaikadile.​—Yoano 1:​18; 14:​9-​11.

¹² Ku mfulo, Yehova wālaile amba: “Nkalekela bukondame bwabo, ne bubi bwabo ami nkikavuluka’bopo nyeke, ne nyeke nansha patyetye.” (Yelemia 31:34b) Bijila bya Mosesa byādi na tutwa twa misoñanya misonekwe yādi inenwe bene Isalela kukōkela’ko. (Kupituluka 28:​1, 2, 15) Bonso bādi bajilula Bijila bādi bela bitapwa bya kulekelwa bubi bwabo. (Levi 4:​1-7; 16:​1-​31) Bayuda bavule bādi balanga’mba kubingijibwa kulondanga mungya mingilo yabo ya mwendele Bijila. Ino bene Kidishitu abo i bayuke amba kebabwanyapo kupota bubinga ku mingilo ya abo bene. Mwanda kebadipo mwa kwepukila bupya-mambo. (Loma 5:​12) Muno mu kipwano kipya, kwikala na mwimanino moloke ku meso a Leza kubwanika enka kupityila ku kitapwa kya Yesu. Kino kyo kine kinenenwa’mba, kuno kubingijibwa i kyabuntu kya Leza, bine i buntu bwandi. (Loma 3:​20, 23, 24) Yehova ukisaka ne pano bengidi bandi bamukōkele. Mo mwānenene ne Polo, amba bano badi mu kipwano kipya badi “monka umukanda-wabijila [wa] Kidishitu.”​—1 Kodinda 9:​21.

¹³ Nanshi ne ku bene Kidishitu nako kudi kitapwa kya kufundula bubi, ino i kitapwa kya mvubu mikatampe kupita bitapwa byādi byelwa mu kipwano kya Bijila. Polo wāsonekele amba: “[Babitobo] bonso [badi mu kipwano kya Bijila] i binebine bēmananga nyeke, mo bukila, mo bukila, kwingila ne kwela dingidingi bitapwa bimo byonka, byampikwa kuyūka kufundula mambo, nansha patyetye pene. Ino aye uno [Yesu], byāelele kitapwa kimo kyonka kya nyeke kya pa mambo, washikete ku lundyo lwa Leza.” (Bahebelu 10:​11, 12) Bene Kidishitu abo badi mu kipwano kipya, baloeja lwitabijo mu kitapwa kya Yesu, o mwanda Yehova nandi wibatelanga bu boloke, bampikwa bubi, bapebwe kyepelo kya kushingwa māni ke bana bandi ba kumushipiditu. (Loma 5:⁠1; 8:​33, 34; Bahebelu 10:14-​18) Pobaloñanga bubi pa mwanda wa kubulwa kubwaninina kwa bu muntu, balombanga Yehova ebalekele, ebiya Yehova nandi webalekela ponka pa kitapwa kya Yesu. (1 Yoano 2:​1, 2) Ino boba baloñanga bubi ku kusaka, bajimijanga kyepelo kyabo kya kumonwa bu boloke, bajimija ne madyese mene a kubadilwa’bo mu ba mu kipwano kipya.​—Bahebelu 2:​2, 3; 6:​4-8; 10:26-​31.

Kipwano Kikulu ne Kipwano Kipya

¹⁴ Mu kipwano kikulu, bana-balume bādi batwejibwa kwisao bu kiyukeno kilombola’mba badi munshi mwa Bijila. (Levi 12:​2, 3; Ngalatea 5:3) Pāshilwile kipwilo kya bwine Kidishitu, bamobamo bādi balanga’mba bene Kidishitu bakubulwa kwikala Bayuda bafwaninwe nabo kutwejibwa kwisao. Ino batumibwa ne bakulumpe bāikele kukumankena pamo mu Yelusalema, bāludikwa na Kinenwa kya Leza ne na mushipiditu sandu, bāmona’mba kino kekyendele’mopo. (Bilongwa 15:​1, 5, 28, 29) Myaka mityetye pa kupita’po, Polo wānena’mba: ‘Yewa Muyuda ku yonka ngitu bitupu ke Muyudapo, ne disao dya ku yonka ngitu nadyo mo monka, ke disaopo. Ino Muyuda mwinemwine i yewa udi’bo mu mutyima; ne disao nadyo i dya mutyima [dya kutwejibwa] na mushipiditu, ke na mukanda onkapo, mhm.’ (Loma 2:​28, 29) Disao dyonkadyonka, nansha ke ku Bayuda ba kungitu, kedyākidipo kadi na mvubu ya kumushipiditu ku meso a Yehova. Ku bano badi mu kipwano kipya, i mityima yabo yo ifwaninwe kutwejibwa kwisao, ke ngitupo, ehe. Bintu byonso bibi, bilokoloko byabo, ne byobakanina munda mwa mityima yabo, bishikilwe Yehova nansha byadisubi ku meso andi, bifwaninwe kufundulwa mu milangwe yabo.a Bavule dyalelo badi na būmi bulombola bukamoni bwa bukomo budi na mushipiditu sandu bwa kwalamuna milangilo ya bantu mu uno muswelo.​—1 Kodinda 6:​9-​11; Ngalatea 5:​22-​24; Efisesa 4:​22-​24.

¹⁵ Mu kipwano kya Bijila, Yehova wādi Mulopwe wa Isalela, ino mwenda myaka, wāikala kwendeja bubikadi bwandi kupityila ku balopwe bābikele mu Yelusalema. (Isaya 33:22) Kadi Yehova i Mulopwe wa Isalela wa Leza, Isalela wa kumushipiditu, tamba mu 33 K.K., i mubikale kupityila kudi Yesu Kidishitu upelwe “lupusa lonsololo . . . lwa mūlu ne panopantanda.” (Mateo 28:18; Efisesa 1:​19-​23; Kolose 1:​13, 14) Dyalelo Isalela wa Leza i mwitabije Yesu amba ye Mulopwe wa Bulopwe bwa mūlu bwa Leza, bwābikikilwe mu 1914. Yesu i Mulopwe mulumbuluke mpata kupita Hezekia ne Yoshia, kupita ne balopwe bakwabo bakikōkeji bene ba Isalela wa kala.​—Bahebelu 1:​8, 9; Kusokwelwa 11:15.

¹⁶ Isalela kādipo’tu enka bulopwe bitupu, ino wādi kadi bulopwe bwa babitobo. Mu 33 K.K., Isalela wa Leza wa kumushipiditu wāpingakenine Isalela wa kungitu, wāikala ke “mwingidi” wa Yehova, “batumoni” bandi. (Isaya 43:10) Tamba penepa, binenwa bya Yehova kudi Isalela bisonekelwe mu Isaya 43:21 ne mu Divilu 19:​5, 6 bitalanga pa Isalela wa Leza. Muzo mupya wa kumushipiditu wa Leza wāikala papo ke “lukongo lutongibwe, [kisaka kya babitobo ba] bulopwe, muzo wa bu-ujila, bantu bakumunwa na Leza enka,” batwikilwe kiselwa kya ‘kusapula byabuya bya Yehova bitabukile’mo kunengela.’ (1 Petelo 2:9) Bonso badi mu Isalela wa Leza, bana-balume ne bana-bakaji, i babunde kisaka kya babitobo. (Ngalatea 3:​28, 29) Byobadi kipindi kyabubidi kya lukunwa lwa Abalahama, pano belanga lubila’mba: “Sepelelai myanwe mizo pamo na bantu bandi.” (Kupituluka 32:43) Bano ba mu Isalela wa kumushipiditu bakidi pano pantanda bo abo babundile “umpika wabinebine ne wamanwa.” (Mateo 24:​45-​47, NW) Pa kwingidila Leza mwingilo ukola waitabija, bilomba’nka kwilunga kobadi.

 Bulopwe bwa Leza ​—Kufikidila kwa Mfulo

¹⁷ Bene Isalela bābutwilwe kunyuma kwa 1513 K.K.K. bābutwidilwe kala mu kipwano kya Bijila. Ne bano batwejibwe na Yehova mu kipwano kipya nabo babutulwanga​—ino kuno kubutulwa kwabo i kwa kumushipiditu. Kino kyo kyānene Yesu kudi Mufadiseo Nikodema amba: “I binebine byo nakunena’mba: Shi muntu kabutwilwepo ne kokwa kūlu, nankyo kakebumonepo bulopwe bwa Leza.” (Yoano 3:​3) Bana-babwanga 120 bo bantu babajinji bakubulwa kubwaninina bābutwilwe luno lubutulo lupya mu dya Pentekosa 33 K.K. Bātambwile mushipiditu sandu pamo bwa “kyeya” kya kupyana kwabo kwa bulopwe, bābingijibwa ponka pa kipwano kipya. (Efisesa 1:​14) Kokwa nabya i “kubut[u]lwa ku mushipiditu” kobābutwilwe, ke bana babulelwa ba Leza, banababo na Kidishitu; enka namino, bāikadidila “bakupyana pamo na Yesu.” (Yoano 3:6; Loma 8:​16, 17) Kwabo “kubutulwa monka” kwēbashitwidile dishinda ku madyese a kutendelwa.

¹⁸ Yesu mu bunsenga bwandi bwa kipwano kipya, wālongele kadi kipwano kikwabo na balondi bandi, wēbanena’mba: ‘Nalonga nenu kipwano, monka mulongele Tata kipwano na ami, kya pa bulopwe.’ (Luka 22:29) Kino kipwano kya Bulopwe i kiteakanye kufikidila kwa kimonwa kikatampe, kisonekelwe mu Danyele 7:​13, 14, 22, 27. Danyele wāmwene yewa “wifwene’nka na mwana muntu” upebwa lupusa lwa bulopwe na “Kafulamoba,” Yehova Leza. Kupwa Danyele wāmona “bapandulwemo bamune bu-kishi bulopwe’bwa.” Uno “wifwene’nka na mwana muntu” i Yesu, wābikikilwe Bulopwe bwa mūlu kudi Yehova Leza mu 1914. Bandi bana-babwanga bashingwe-māni bo “bapandulwemo” bakabikala nandi Bulopwe. (1 Tesalonika 2:​12) Muswelo’ka?

¹⁹ Bashingwe-māni shi abafu, basangulwanga mu bafwe, pamo bwa mwāsangwidilwe Yesu, ke bipangwa bya kumushipiditu kebifu, bikengila nandi pamo bu balopwe ne bu babitobo. (1 Kodinda 15:50-​53; Kusokwelwa 20:​4, 6) Bine luno i lukulupilo lwa ntumbo! “Bakabikala panopanshi” ponso, ke’nkapo ntanda ya Kenani kete. (Kusokwelwa 5:​10, MB) Lelo ‘bakayata bu-kishi bibelo bya balwana nabo’? (Ngalwilo 22:17) Eyo, bakayata’byo yatē pobakemwena konakanibwa kwa Babiloni Mukatakata, wa bwitwa bwa mutōtelo mwine wanshikani, ne pakekala bano bashingwe-māni basangulwe kebakumbe mizo na “mukombo wa kilonda” pamo na Yesu, ne pobakapondakanya nandi mutwe wa Satana. Nanshi nabo bakalunga kuboko ku mwingilo wa kukonkeja bupolofeto budi mu Ngalwilo 3:​15.​—Kusokwelwa 2:​26, 27; 17:14; 18:​20, 21; Loma 16:20.

²⁰ Kepabulwe padi bamobamo bakiipangulanga’mba, lelo kipwano kya Abalahama ne kipwano kipya bitala nanshi’nka myuya 144 000 yakikōkeji kete? Mhm, kudi bantu bakwabo ke benēpo bino bipwano ino abo bakeselwa kupityila ku abyo, monka motusa kwikimwena mu kishinte kilonda’po.

[Kunshi kwa dyani]

[Bipangujo]

1. I ani wēlombwele bu ‘lukunwa lwa mwana-mukaji’ lwālailwe mu Edena, ne i muswelo’ka waāikele ‘kusonsakanibwa mu kapondo’?

2. Mwendele binenwa bya Yesu aye mwine, lufu lwandi lwāikele lwa kamweno ku muzo wa muntu muswelo’ka?

3. Kipwano kipya kyāshilwile kwingila dibajinji kitatyi’ka?

4. Lelo kipwano kikulu kyādi kibi? Shintulula.

5, 6. Lukunwa lwa Abalahama, mu kufikidila kwinekwine kwa kumushipiditu kwa kipwano kya Abalahama, i ani, ne i muzo’ka wābadikile kweselwa dyese kupityila kudi aye?

7. Lelo i mizo’ka yāeselwe kupityila kudi Yesu, Lukunwa lwa Abalahama?

8. Ku bene Kidishitu ba mu mafuku a Polo, kweselwa kupityila ku Lukunwa lwa Abalahama kwādi kwimanine pa bika, ne ku mfulo i bantu banga bāpelwe dino dyese?

9. Bano badi mu kipwano kipya badi na kijila kya Yehova mu mityima yabo mu buluji’ka?

10, 11. Ku bano badi mu kipwano kipya, Yehova ‘waikala ke Leza wabo’ mu muswelo’ka, ne abo bonso bamuyukanga namani?

12, 13. (a) Yehova ulekelanga bubi bwa bano badi mu kipwano kipya pa kika? (b) Pa mwanda utala kulekelwa kwa bubi, kipwano kipya i kitabuke muswelo’ka kipwano kikulu?

14. I disao’ka dyādi dilombwa ku boba bādi mu kipwano kya Bijila? ku bano badi mu kipwano kipya?

15. Isalela wa kungitu ne Isalela wa Leza i badingakane namani mu myanda itala umbikadilo wa bulopwe?

16. Le i kisaka kya babitobo’ka kibundilwe na Isalela wa Leza?

17. Lelo i lubutulo’ka lubutwilwe bano badi mu kipwano kipya?

18. Kubutulwa dikwabo i kushitwile bano badi mu kipwano kipya madyese’ka a kutendelwa?

19, 20. (a) Ku bano badi mu kipwano kipya, i kufikidila’ka kwa mfulo ne kwa ntumbo kukafikidila mulao wa Yehova waālaile kudi Abalahama? (b) I kipangujo’ka kikwabo kifwaninwe kubandaulwa?

Lelo Ukivulukile’byo?

◻ Kipwano kipya kyāshilwile kwingila dibajinji kitatyi’ka?

◻ Le i bika byāvuijibwe kupityila ku kipwano kikulu?

◻ I ani Lukunwa lwinelwine lwa Abalahama, ne i mu buluji’ka mwāeselwe mizo yonso kupityila ku lwine Lukunwa’lo?

◻ Ku ba 144000, i kufikidila’ka kwa mfulo kwa milao ya kipwano kya Abalahama ne kwa kipwano kipya?