Ntumbo Mikatampe Ya Njibo Ya Yehova

“Nkayuja ino njibo ino’i ne ntumbo; i Yehova wa bibumbo unena.”​—HAKAI 2:7.

KAMONI ka Yehova umo wādi usapula ku njibo ne njibo, wātana nkasampe mwana-mukaji mwine Mishoni, uno nkasampe wāmunena’mba: ‘Batwe tudi na mushipiditu sandu, ino banwe ye bengilanga mwingilo.’ Uno Kamoni wāmushintulwila na manwa’mba, mungya buluji, muntu udi na mushipiditu sandu unenwe kukunkwa ku mutyima engile mwingilo wa Leza. Yakoba 2:​17 unena’mba: “Ne kwitabija nako mo monka, shi kekudipo ne mīngilo, nankyo i kufwe ako kwine.” Ba Tumoni twa Yehova bakomejanga lwitabijo lwabo na bukwashi bwa mushipiditu wandi, ne kadi Yehova i ‘muyuje njibo yandi na ntumbo’ na kwibapa lupusa lwa kwingila mingilo myoloke​—⁠nakampata ya ‘kusapula myanda miyampe ya Bulopwe pano pantanda ponso mwanda wa kuleta bukamoni ku mizo yonso.’ Popa pakavuijibwa uno mwingilo senene mungya muswidile Yehova mwine, “po pakafikidila ne pamfulo pene.”​—Mateo 24:14.

² Mungya bino binenwa bya Yesu, twi bajingulule amba mwingilo wetu ufwaninwe kwimanina pa kusapwila bakwabo “myanda-miyampe ya ntumbo ya Leza wa dyese” yotulobekelwe. (1 Temote 1:​11) Shi tutakamane byabinebine na nsangaji mu mwingilo wa Yehova, nankyo ne mfulo nayo ikafika bukidi bonka. Tutanga binenwa bya Yehova mu Habakuka 2:​2, 3 amba: “Lemba kimonwa, utape ntapo pa tubipapo, amba yewa unyema lubilo atange’kyo. Mwanda kimonwa kikidi kya kitatyi kitūngwe, kadi kipelakana ne kumfulo ne kukabepapo mpika; nansha kīja, kunga’kyo; ke-kintu kikāya binebine, kekikejepo, mhm.” Eyo, “kimonwa” kikafikidila “nansha kīja.” Pano poketudi mu mwaka wa 83 wa buludiki bwa Bulopwe bwa Yesu, bangi ye bano kebamone’mba, tubaije bininge, tamba ponso pāa, kufika ne pano. Mwene tufwaninwe kusangala pamwanda wa mfulo keyafikile? Umbula bwa ino myaka dikumi ya 1990, kukankajibwa kwa kusapula myanda miyampe kwaikele kupwa mu Bulaya bwa Kutunduka, mu bipindi bivule bya mu Afrika ne mu matanda makwabo, kimweka pamo’nka bwa kilotwa. Kino kitatyi kimona bantu bu ‘kwija’ i kipe “mikōko” mivule bininge mukenga wa kubungakanibwa mu ino myaba yashilwilwe’mo mwingilo pano-pano.​—Yoano 10:⁠16.

³ “Kekikejepo, mhm,” ye mwānenene umpolofeto. Yesu wānene’mba luno lukongo lubi lwa mu kino kitatyi kelukapitepo “poso byonso bino’bi bikafike.” (Mateo 24:34) Lelo mwivwanino wetu wa dyalelo wa bino binenwa bya Yesu ushintulula’mba mwingilo wetu wa busapudi keukidipo wa kampeja-bukidi?a Bintu bilongeka bilombola’mba, ke amopo! Luno lukongo lotudi’mo i lwiele mu bubi ne mu mikadilo myoneke mu muswelo umo kashāa kewamwekele. (Enzankanya na Bilongwa 2:​40.) Tufwaninwe kupelakanya na mwingilo wetu. (2 Temote 4:2) Bupolofeto bonso butala pa kitatyi kine kikafika kyamalwa kibūke bulombola’mba kisa kufika pano-pano ponka, pamo na mu kupapamukilwa, mu kitulumukila​—pamo bwa ngivi. (1 Tesalonika 5:​1-4; Kusokwelwa 3:3; 16:15) “Po pa mwanda ne mwanda bānwe mwiadijei kala kutengela, mwanda mu difuku dya kubulwa nansha kutáko mutyima aye Mwanā muntu wafika kala.” (Mateo 24:44) Luno lukongo lwa bantu bampikwa bwine-Leza byolunangila ku nenekelo ya konakanibwa’lo, ketufwaninwepo kujimija lukulupilo lwetu lulēme lwa būmi bwanyeke na kujokela kadi mu ‘kwilamba umbitoto’ bya bintu bya kilabi bya ino ntanda!​—2 Petelo 2:​22; 3:​10; Luka 21:32-​36.

⁴ Bupolofeto bwa Yesu i bunene kyabine, 1914 ye yādi ‘ngalwilo ya misongo,’ ye mwaka wātwelele muzo wa muntu mu “kuvuika kwa ngikadilo ya bintu.” Bulanda, kujilula kwa bijila, ne binkumenkume bilengeja moyo, byenda bivudila’ko kufika ne ku dyalelo. (Mateo 24:​3-8, 12, NW) Mu kitatyi kimo kyonka, Yehova i mupe kabumbo ka umpika wabinebine ne wamanwa kashingwe-māni mwingilo wa kupāna ‘bidibwa bya kumushipiditu mu kitatyi kifwaninwe’ ku kipango kya Mfumwandi, Kristu. (Mateo 24:45-​47) Uno Meshiasa Mulopwe uludikanga mpangiko ya bidibwa bilumbuluke bya kumushipiditu kujokoloka ntanda yonso, tamba ku lupona lwandi lwa Bulopwe momwa mūlu.

“Kwabanya Bidibwa” Bivule

⁵ Ivwana mulongolwelwanga mwingilo wa “kwabanya bidibwa.” (Luka 12:42) Nsulo mine kutambanga bidibwa bishileshile bya bwine-kristu i Kinenwa kya Leza, Bible. Pa kusaka’mba tufundije Bible mokifwaninwe, kilomba dibajinji kwikale bwalamuni bwabinebine, bupēla kutanga. Kino kisakibwa kyāikele kuvuijibwa bityebitye umbula bwa myaka mivule, nakampata kushilwila mu 1950, pālupukile Bwalamuni bwa Ntanda Impya bwa Bisonekwa bya Bwine-kristu bya Kingidiki mu Angele. Mu 1961, Bwalamuni bwa Ntanda Impya bwa Bible yense mutuntulu bwālupuka, kupwa kwa kitatyi kityetye, bwālupulwa ne mu ndimi mikwabo mikatampe. Ndimi 3 yalupwilwe’mo Bible mu mwaka wa mingilo wa 1996 iyafikija pa ndimi 27, umbukata mwayo, mudi 14 yalamwinwe’mo Bible yense mutuntulu. Pano kudi kubwipi kwa bakristu bepāne 1174, bengila kitatyi kyonso mwingilo wa bwalamuni mu matanda 77, mwanda wa kwendeja kumeso uno mwingilo wa bwalamuni bwa Bible ne mabuku makwabo a kwifundila’mo Bible.

⁶ Misambo 24 ya Sosiete Watch Tower, imanine pa mwingilo wa kino kibumbo kya balamuni, itampanga mabuku ne kulupula’o mu ndimi mishileshile. Pa kino, bakyendelela na kutweja mu misambo mikatampe bitampilo bikwabo bilupula mabuku lubilo lubilo. Kibalwa kya mapepala alupulwa, Kiteba kya Mulami ne Amkeni!, kyenda kilundila’ko ku mweji ne mweji, pano abyo byonso pamo bilupulwanga buvule bwa 943892500, kudi kwilundilako kwa bipindi 13,4 pa katwa ku mwaka ne mwaka. Buvule bwa ma Bible ne mabuku onso adi na bukata bwa marelié alupwilwe mu Amerika (Etats-Unis), Brezile, Finlande, Alemanye, Itali, Japon, Korée ne mu Mexike kete, adi 76760098 mu 1996, kuno i kwilundilako kwa bipindi 40 pa katwa tamba 1995. Misambo mikwabo nayo yaingile bininge, mwanda wa kubweja’ko kibalwa kya mabuku alupulwa.

⁷ Kyalengeja nakampata kuno kwilundilako i kupwa kwa kukankajibwa kwa mwingilo wa ba Tumoni twa Yehova mu Bulaya bwa Kutunduka ne mu Afrika umbula bwa ino myaka ya 1990. Nzala ya bidibwa bya kumushipiditu i mikatampe mu bino bifuko. Omwanda kilomba kwitaba na kampeja-bukidi kabinebine ku luno lwito lukatampe: “Baija pantu pa dipema dyobe, kabidi batamune byakukinga bya bīkalo byobe; kokashiako; lēpeja myonji yobe, ne kukomeja bikomo byobe.”​—⁠Isaya 54:2.

⁸ Omwanda nanshi kilomba kubaija mobo a misambo mivule umbukata mwa misambo 104 ya Sosiete. Lupeto byoludi lukomo mu myaba mivule ishitwilwe pano-pano, kipindi kikatampe kya lupeto lwingidijibwanga mwanda wa kusambakanya’mo busapudi kilupukanga ku byabuntu bitambanga mu matanda meshileshile ebakūkila, bitumwanga mwanda wa kukwatakanya uno mwingilo uvuijibwa kujokoloka ntanda yonso. I kya dyese, bipwilo bingibingi ne bantu bavule betabanga ku luno lwito na mutyima umo, kukwatañana na munenena Divilu 35:21 amba: “Kabidi baiya ense mutununwe ku mutyima, ne ense muswejibwe ku mushipiditu wandi, baleta milambu ya Yehova, ya mingilo.” Pa kino, tubafwijako pakatampe boba bonso batūlanga byabuntu byabo na mityima yabo ya kyaba bulāle.​—⁠2 Kodinda 9:​11.

⁹ I bine, umbula bwa 1996, mabuku a Sosiete Watch Tower atumbije dijina dya Yehova ne mpango yandi kufika ne kumfulo kwa ntanda. Kidi pamo’nka na mwātobele’kyo mutumibwa Polo. Wātelele binenwa bidi mu Yoela ne mu Mitōto 19, pāsonekele’mba: “Ke-bantu bonso bakwita pa dijina dya Yehova bakapandanga. . . . Ino nene na’mba: Lelo kebēvwenepo’ni? Baivwene’tu binebine; diwi dyabo dyakasambakana konsokonso panopantanda, ne myanda yabo kumfulo kwine kwa ntanda.” (Loma 10:​13, 18) Kupityila ku kuno kutumbija dino dijina Yehova dilēme, bantu bandi bavuijanga kipindi kikatampe kya mwingilo na kuyuja njibo yandi ya mutōtelo na ntumbo. Lelo i muswelo’ka waingilwe mwingilo wa busapudi senene umbula bwa 1996? Tala tabulo ulonda’po, tamba pa paje 28 kufika pa paje 31.

Twangulei Kujokoloka Ntanda Yonso

¹⁰ I kyabine, binenwa bya Yesu bidi mu Luka 10:2 bidi na bukomo bukatampe mpata, binena’mba: “Budimi bwa kwangula i bukata, nanshi bakwangula bo batyetye, ino nanshi mwikale kwisashilapo mwine wakwangwilwa atalule bakwangula bāye kwangula budimi bwandi.” Lelo nobe kodi mwitabe ku luno lwito? Midiyo mivule ya bantu pano pantanda ke betabe. Kino i kilombolwe patōka na kibalwa kikatampe kya basapudi ba Bulopwe 5413769 baletele malapolo a mwingilo wa budimi umbula bwa mwaka wa 1996. Kadi kwabatyijibwe batutu ne bakaka bapya 366579. Bine twi basanswe pakatampe bino “bintu bisaka mityima bya mizo yonso” bipēne mu ‘kuyuja njibo ya mutōtelo wa Yehova na ntumbo’!​—Hakai 2:⁠7.

¹¹ Malapolo atamba mu ano madimi ashitwilwe pano-pano alombola kwilundilako kukatampe. Lelo kudi bamo-bamo umbukata mwetu bakwatwa na kīji pangala pa boba basangela kuno kwilundilako? Mhm, batwe bonso tusepelelanga nabo. Matanda onso ashilulanga bityebitye. Zekadia, umpolofeto wa mu mafuku a Hakai wāsonekele’mba: “Wafutulula dyuba dya bintu bityutyu i ani le, a?” (Zekadia 4:​10) Tudi na nsangaji mikatampe kutabuka, mwanda pano, mu matanda mwimanije senene mwingilo wa kusapula bukamoni kemudi midiyo mivule ya basapudi ba Bulopwe, ne kadi myaba idi’mo isambakanibwanga pavule na busapudi ku yenga ne yenga, nansha ke mu bibundi bikatakata bivule. Byendelela Yehova na kuvudija mikenga ya lupandilo mu matanda mwādi mukankajibwe uno wetu mwingilo, lelo tudi na buluji bwa kwingidila na mulēle? Mhm, nansha dimo! Yesu wānene’mba: “Budimi nabo i panopantanda.” (Mateo 13:38) Bukamoni pano bwendelela na kupānwa pi na pi, pamo’nka na mwāpānine’bo bana-babwanga babajinji pobādi kebalumba ku kuvuika kwa ngikadilo ya bintu ya Bayuda.​—Bilongwa 2:​40; 10:42; 20:24; 28:⁠23.

Twendelelei Nyeke Kumeso

¹² Eyo, twendelelei na kutapula lubilo, twendelelei “bolokele kumeso” pamo na dikalo dya Yehova ditantanibwa na bamwikeulu ba mūlu. (Ezekyele 1:12) Koku tulamine mu ñeni binenwa bya Petelo wānene’mba: “Aye Mfumwetu kējengapo pa mwanda-wamulao wandi, monka mufwatakenya bamobamo pa mwanda wa kwija, mhm; ino utūkijije mutyima pa bānwe, kasakilepo’mba, nansha umo ōneke, mhm, poso’mba, bonsololo bafikile pa kwalamuka pa mutyima.” (2 Petelo 3:⁠9) Kimfwa kilumbuluke kya bupyasakane bwa banabetu badi mu matanda musakene lupeto kifwaninwe kwitutonona twendelele kumeso. Kitatyi kyonso kimona bantu amba Amakedona ibaije, kipanga tutwa ne tutwa twa tununu twa bantu mukenga wa kukongakanibwa mu ano matanda ne mu myaba mikwabo mivule isapulwanga’mo senene. Kokedimbai pa kino: “Difuku dikatakata dya Yehova didi pabwipi, didi pabwipi ponka, ne kupeja’dyo nakampata.” (Zefenia 1:​14) Kino kifwaninwe netu kwitutonona twipāne mu kusapula na bupyasakane bukamoni bwa kamfula-nkonko!

¹³ Nansha tabulo byakalombola kamo ne kamo pa bintu byonso byalongelwe mu mwingilo, ino tuyukei’mba kwadi kwilundilako kwabinebine ku kibalwa kya ma Bible, mabuku ne mapepala aponejibwe umbusapudi mu mwaka wapityile’u. Kimfwa, mapepala aponejibwe kujokoloka ntanda yonso alombola’mba kudi kwilundilako kwa bipindi 19 pa katwa, ko kunena’mba, mapepala onso aponejibwe adi 543667923. Mapepala etu apēlejanga mwingilo wa busapudi​—mu bipito, mu biwanza mwiolola bantu, mu bifikilo bya myotoka, mu bikwe bya busunga. Malapolo alombola amba, ne mu myaba imo-imo yasapulwasapulwa Bulopwe, mudi bantu bavule badi pa twaji batendelanga būya bwa mapepala etu, kadi betabijanga kwifunda nabo Bible.

¹⁴ Mwaka ne mwaka mu kweji wabuná, bipwilo biteakanyanga’ko difuku dya pabula dya kulonga kampanye ka busapudi bwa kashinde-dyuba bwa kuponeja mapepala ku njibo ne njibo ne mu bifuko mwikongelanga bantu. Lelo kipwilo kyenu kikatambila mu kano kampanye ka mu kweji wabuná, 1997? Pano i kuteakanibwe kibalwa kikatampe kya mapepala, Kiteba kya Mulami ne Amkeni! a kweji wabuná, kadi bidi na būya bwa dyangi bukoka bantu! Mu kisanga kya Saipusa, bipwilo byepēle lubila’mba “fikilai bantu bonsololo na musapu wa Bulopwe shi kudi muswelo,” baendelele na ino mpangiko na kampanye ka kwabanya mapepala, baponeja mapepala 275359 mu mwaka umo, kuno i kwilundilako kwa bipindi 54 pa katwa.

Misapu Yamfulo ya Hakai

¹⁵ Mafuku 63 kupwa kwa kwela lubila lwabubidi, Yehova wātumine monka Hakai na musapu wabusatu otufwaninwe kuta’ko mutyima dyalelo. Hakai wāsapwidile’o Bayuda kitatyi kyobādi bashimika kyalwilo kya tempelo yobālekele kūbaka tamba myaka 17 kunyuma. Kadi Yehova wāmwene’mba bādi bafwaninwe kusubulwa. Mwanda babitobo ne bantu bene bāikele kuzobolola mingilo yabo; bāikala badisubi kumeso a Yehova. Lelo kikokejika bamo-bamo umbukata mwa bantu ba Yehova dyalelo nabo bekale na mukose ku mwingilo wandi, nansha kutweja mutwe mu mashinda a bwine-ntanda a kutala bintu kilomo-nyeka ne kukimbakimba byabupeta? Batwe bonso tufwaninwe kulanga “kushilwila ku dyalelo dino’di ne kumeso kwine’kwa” kutumbija dijina dya Yehova ne kukulupila mu mulao wandi unena’mba: “Kushilwila ku dyalelo dino’di nkakwesela dyese.”​—Hakai 2:​10-​19; Bahebelu 6:​11, 12.

¹⁶ Mu dyonka difuku’dya, kinenwa kya “Yehova wa bibumbo” kyāile kudi Hakai musunsa wabuná kadi wamfulo. Wāmuyukija buluji bwa byānene’mba “nkatenkenya madiulu, ne panshi,” wāmusapwila’mba: “Nkafulamika kipona kya malopwe, nkōnakanya bukomo bwa malopwe a mizo’ya; penepo nkafulamika makalo, ne boba batentaminemo bene; ino tubalwe ne betutentamine bāto bakapona, enselele ku kipete kya mwanabo, enselele ku kipete kya mwanabo.” (Hakai 2:​6, 21, 22) Kuno ‘kutenkenya’ kukanana kitatyi kikakomba Yehova ntanda yonsololo tōo ku Amakedona. Penepa “bintu bisaka mityima bya mizo yonso” bikayanga kubunda kitako kya kisaka kya muntu kikekala mu ntanda impya. Ke bo buluji botufwaninwe kusangela buno ne kutendelela Yehova kadi!​—Hakai 2:7; Kusokwelwa 19:​6, 7; 21:​1-4.

¹⁷ Hakai wāfudije bupolofeto bwandi na kusoneka’mba: “Mu dyodya difuku’dya; i Yehova wa bibumbo unena; nkakuyata, a Zelububele . . . nkakulengeja’nka bwa kiyukeno kifīkidilwe; mwanda nakutonge; i Yehova wa bibumbo unena.” (Hakai 2:​23) Yesu Kristu, pano i Mulopwe wa Bulopwe bwa bu Meshiasa mubikikwe na Yehova, kadi i Kitobo Mukatampe, mukumankanye pamo mingilo yonso momwa mūlu, yādi ingila ba Zelububele, Mbikavu, ne Yoshua, Kitobo Mukatampe pala pala mu Yelusalema wa pano pantanda. Yesu udi pamo bwa kiyukeno kifikidilwe kya wa lupusa kidi ku kuboko kwa lundyo kwa Yehova, mwanda ye aye waikala ke “Eyo,” kingidilwa kingidija Yehova mu mwingilo wandi wa kufikidija “myanda-ya-mulao ya Leza” mivule. (2 Kodinda 1:​20; Efisesa 3:​10, 11; Kusokwelwa 19:10) Misapu yonso ya bupolofeto idi mu Bible i mimanine pa mpango ya Yehova ya kupāna Kristu bu Mulopwe kadi Kitobo Mukūdi.​—Yoano 18:37; 1 Petelo 1:​18, 19.

¹⁸ Bine, mu ino yetu myaka, kwikala mu tempelo yeñenya ya kumushipiditu ya Yehova yo ntumbo itabukile yonso! Kadi pano-pano ponka, pakapwa Yehova kukombeleja ngikadilo ya Satana yonsololo ne katye, bupolofeto budi mu Hakai 2:9 bunena’mba: “Muno muntu muno’mu nkapana ndoe; i Yehova wa bibumbo unena,” bukafikidila na nsangaji mikatampe. Po pakekala ke ndoe yonka yonka!​—ndoe yakulādila nyeke, mūlu ne pano panshi, yotwakulupijibwa na “kiyukeno kifikidilwe” kya Yehova, ke Yesu Kristu kadi, “Mwana-mulopwe wa ndoe,” wāsonekelwe’po amba: “Ntundubuko ya bubikadi bwandi ne ya ndoe mine, kekukekalapo mfulo nansha patyetye . . . mukao wa Yehova wa bibumbo ukafikija kine kino’ki.” (Isaya 9:​6, 7) Ntumbo ya njibo ya Yehova ya mutōtelo wandi ikeñenyanga ndoe mu kifuko kya bubikadi bwandi, mūlu ne pano panshi, nyeke ne nyeke-ke. Nanshi netu twikadidilei’tu nyeke’nka mu ino njibo!​—Mitōto 27:4; 65:4; 84:⁠10.

[Kunshi kwa dyani]

Ukalondolola Namani?

◻ Njibo ya Yehova lelo ‘iyujibwanga na ntumbo’ dyalelo muswelo’ka?

◻ Mwanda waka tufwaninwe kusapula myanda miyampe na bupyasakane bwabinebine?

◻ I kintu’ka kyetukankamika mu Lapolo wa Mwaka wa Mwingilo wa 1996 twikale kukasapula na bupyasakane?

◻ I muswelo’ka wingilanga Kristu pamo bwa “kiyukeno kifīkidilwe” kya Yehova?

[Bipangujo bya Kifundwa]

 1. I muswelo’ka ukwatañene mushipiditu sandu na lwitabijo ne mingilo?

 2. (a) Kutakamana kwetu mu mwingilo wa Yehova kuketuletela madyese’ka? (b) Mwanda waka tufwaninwe kusangela kino kitatyi kyonso kimona bantu bu ‘kwija’?

 3. Mwanda waka mumweno wetu mwendelemo utala pa “luno lukongo” ufwaninwe kwitukunka ku mityima twingile mwingilo wa Leza na kampeja-bukidi?

 4. I ngikadilo’ka yalengeje kwikale kupānwa ‘bidibwa mu kitatyi kifwaninwe,’ ne kino kyaikele kubwanika muswelo’ka?

 5.Nsulo kutambanga bino “bidibwa” itēlwe mutyima muswelo’ka?

 6. I muswelo’ka ubwanyanga Sosiete kulondolola ku kyaka kya bantu mu myanda itala mabuku emanine pa Bible?

 7. I muswelo’ka otukokeja kulondolola pano-pano na kampeja-bukidi ku bupolofeto budi mu Isaya 54:⁠2?

 8. I kwitaba kwa muswelo’ka kwitabanga bantu ba mutyima wa kyaba bulāle na bukwashi bwa lupeto?

 9. I muswelo’ka wenda ufikidila binenwa bidi mu Loma 10:​13, 18 dyalelo?

10. I bintu’ka byowamona mu mwingilo wa bantu ba Yehova, bilombwelwe mu tabulo udi tamba pa paje 18 kutūla ku 21?

11. Mwanda waka batwe bonso tudi na buluji bwa kusepelela bininge?

12. I kimfwa’ka kifwaninwe kwitutonona “twendelele kumeso”? (Tala kapango, “Kwangula Kufika ne ‘Kumfulo kwa Ntanda.’ ”)

13, 14. (a) I kika kyotukokeja kunena pa mwanda utala kwabanya kwa mabuku umbula bwa 1996? (b) I mpangiko’ka ya pabula ifwaninwe kukwata kipwilo ne kipwilo ku mwaka ne mwaka, ne i muswelo’ka nobe owiteakanya pano mwanda wa kukatanwa mu ino mpangiko?

15. (a) Mwanda waka Yehova wātumine misapu mikwabo kupityila kudi Hakai? (b) I bufundiji’ka botukokeja kuboila pa musapu wabusatu wa Hakai?

16. I ‘kutenkenya’ka’ kudi pabwipi, ne i bika bikalupuka’ko?

17. Mwanda waka Yesu i mudingakanibwe na “kiyukeno kifīkidilwe”?

18. Mwanda waka tunena’mba kufikidila kwa ‘binenwa bya Yehova wa bibumbo’ kukatalaja mityima ya bantu?

Kwangula Kufika Ne “Kumfulo Kwa Ntanda”

TUTANGA musoñanya wa Yehova udi mu Isaya 43:6 amba: “Kokakwata’bo. Leta bāna bami bana-balume kulampe, ne bāna bami bana-bakaji kumfulo kwa ntanda.” Dyalelo kino kisonekwa kifikidilanga mu muswelo wa pabula mu Bulaya bwa Kutunduka. Tulete kimfwa kya ntanda ya Moldova yādi ibikele’mo Kikoministe pakala. Mudi bibundi bimo mutanwa ba Tumoni kubwipi kwa kansa ka bekadi bonso bashikete’mo. Kibalombanga kwenda lwendo lulampe mwanda wa kutana myaba ya kusapula’mo, bine baloñanga bukomo! Basapudi bavule mu bino bipwilo i lutundu lwa bambutwile bāselelwe bu misungi mu Siberia ku ngalwilo kwa myaka ya 1950. Pano bisaka byabo bitame ye bipēne mu mwingilo wa mwangulo. Mu basapudi 12565, mwabatyijibwe 1917 mu mwaka wapityile’u. Mu bipwilo bidi’mo, makumi aná ne bisatu umbukata mwabyo bidi na basapudi kubwipi kwa 150 ku kimo ne kimo, ne bipindi byadi biná kete, pano ke 8, tamba mu uno mwaka mupya wa mwingilo.

Kintu kyakutendela kikwabo i kutundubuka kwa mu Albania. Mwādi ba Tumoni bakikōkeji babala-banga kete, bāūminine umbula bwa kubwipi kwa myaka 50 mu buludiki bwa kasusu kabi kutabuka. Bavule umbukata mwabo bāipailwe. Kino kituvuluja kyālaile Yesu amba: “Kokikwatwa moyo wa byobya byamalwa byōsaka kumona, mhm; monapo bidi, dyabola ukidi mukwimwela bānwe bamobamo mu kifungo’mba, mutompibwe; . . . Ikala wabinebine byonka ne ku lufu kwine, nabya nami nkakupanga kilukwa kya būmi.” (Kusokwelwa 2:​10; tala ne Yoano 5:​28, 29; 11:​24, 25.) Ino pano i bika byotumona mu Albania? Bine, mudi kufikidila kutulumukwa kwa mulao wa Yehova utanwa mu Isaya 60:​22, wālaile’mba: “Katyetye kakālamuka kanunu”! Mu mwaka wa 1990, mwādi musapudi umo kete wātūdile lapolo wa mwingilo mu Albania. Ino, “bakwangula” bavule batambile mu Itali ne mu matanda makwabo baitabile ku lwito lwa Yesu lunena’mba: “Endai nanshi mukafundijei . . . bantu nabo ke bāna-babwanga, kwibabatyija.” (Mateo 28:19; Luka 10:2) Pa Kivulukilo kya lufu lwa Yesu kya mu 1996, kwadi basapudi 773 bakankamane mu mwingilo wa budimi, bakongele bantu 6523 ku kupwila kwabo kwa Kivulukilo, kino kibalwa i kipite kibalwa kya basapudi, misunsa 8 ne kupita! Kudi malapolo mavule atulumukwa a bungi bwa bantu batenwe ku Kivulukilo atambile mu myaba ya kufula. Kimfwa mu bino bibundi bibidi, Kukës ne Divjakë, nansha byokemwadi basapudi bashikatanga’mo, bantu batenwe ku Kivulukilo badi 192 mu kibajinji, 230 mu kyabubidi. Mu Krujë, mudi musapudi umo kete, mwatenwe bantu 212 ku Kivulukilo. Basapudi 30 ba mu Korçë, bafutyile mobo abwana’mo bantu 300 ne kupita. Kutentekela ku kino kibalwa kya boba badi bayudile mu kyumba mulongelwanga bitango, kwadi bantu bakwabo 200 bajokele pamwanda wa kubulwa kyaba kya kushikata. Bine, buno i budimi budi tōo bukimba ba kwangula’bo!

Mu Rumani namo mwatambile uno lapolo’mba: “Twadi mu busapudi bwa ku njibo ne njibo, twatana muntu umo wetela amba i Kamoni ka Yehova, wikalanga mu kakibundi katyetye motwadi tufwatakenya’mba kemukokejapo kwikala Kamoni nansha umo. Wētulombola’mba, kudi kadi bantu bakwabo 15 batanwanga ku kupwila kwa mu Dyabuná ne kwa mu Dyayenga tamba myaka mivule, ke bashilule kala ne kusapula ku njibo ne njibo. Bwakya lubanga, twaenda ku kene kakibundi’ko. Twatana bantu 15, bana-balume, bana-bakaji ne bana badi betwilaija mu byumba bibidi, baitabija mabuku 20 ne mapepala 20 alupukile pano-pano. Penepo twebalombola muswelo wendejibwanga bifundwa bya Bible. Kupwa twaimba nabo imbē ne kulondolola ku bipangujo byabo bivule. Umo wadi wimanine kisumpi’kya wetusapwila’mba: ‘Mafuku matyetye kunyuma, nalombele kudi Yehova, koku ndila impolo, na’mba etutumine mukumbi, bine pano milombelo yami ibalondololwa.’ Twasangele mpata, mu lwendo lwetu, kyadi pamo bwa mwanā-nshiye watene shandi, kumfulo wetulaya’mba: ‘Bine, kemwaketwilwai. Mwiyai mwetutalapo dikwabo!’ Netu twalongela monka, pano mu kino kibundi mwendejibwanga bifundwa bya Bible bisamba-bibidi. Mu myaba mipya mivule mwashilwilwe mwingilo mu muswelo utulumukwa na mabuku emanine pa Bible atendelwa bininge, bine, kino kilombola’mba nsulo ya uno mwingilo i Leza.”

[Tabulo pa paje 18-21]

LAPOLO YA BATUMONI BA YEHOVA YA MWAKA WA MINGILO WA 1996

(Tala dipepala)

[Bifwatulo pa paje 16, 17]

“Bintu bisaka mityima bya mizo yonso” bikongakanibwanga mu Bisanga bya Kalunga-kamema (1), mu Amerika wa Kunshi (2), mu Afrika (3), mu Azia (4), mu Amerika wa Kungala (5), ne mu Bulaya (6)