Milombelo

5 Le Kifuko ne Kitatyi Bidi na Mwanda?

NE KUTATANA kwine mpika, kodi mujingulule amba bipwilo bivule i bitūle’ko mobo mayampe a milombelo ne kutela mansaa kampanda afwaninwe kulombela ku difuku. Lelo Bible unena’mba tufwaninwe kulombela enka pa bifuko ne bitatyi bimo kete?

Bible ulombola amba kudi mikenga kampanda myendele’mo kulombela. Kimfwa, kumeso kwa kudya na balondi bandi, Yesu wāfwijije’ko Leza mu milombelo. (Luka 22:17) Kadi bana ba bwanga pa kwibunga mwanda wa kutōta, bālombele pamo. O mwanda bāendelele na kibidiji kyādi’ko tamba kala mu mashinakoka a Bayuda ne mu tempelo ya Yelusalema. Leza wāsakile tempelo ikale “njibo ya kulombelelamo mizo yonso.”—Mako 11:17.

Kitatyi kibungakana bengidi ba Leza ne kulombelela pamo, milombelo yabo ikokeja kwikala na kamweno. Shi kisumpi i kikute mu mushipiditu umo, milombelo ilombelelwa nayo ikwatañene na misoñanya ya mu Bisonekwa, Leza usangalanga. Milombelo ikokeja ne kumutonona alonge ne byakadipo wa kulonga. (Bahebelu 13:18, 19) Batumoni ba Yehova balombelanga kyaba ne kyaba ku kupwila. Tubakwite na nsangaji wiye ku Njibo ya Bulopwe idi kubwipi na kwenu wiivwanine abe mwine ino milombelo.

Inoko, Bible katelelepo amba milombelo ifwaninwe enka mu kitatyi ne kifuko kampanda kya pa bula. Mu Bible, tutana’mo nsekununi ya bengidi ba Leza bādi balombela pa kitatyi ne kifuko kyo-kyonso. Yesu wānene amba: “Abe pa kulombela nobe utwela monka mu kadimbwa ka njibo yobe, ushiteko ne kinjilo kyobe, ebiya kolombela kudi Shobe wakumwena konka kufula, nandi ukakupadila mpalo mu kitango kya bonso.”—Mateo 6:6.

Mwene kino i kyepelo kiyampe’po kashā? Pano ukokeja kufwena Mubikadi wa diulu ne ntanda pa kitatyi kyo-kyonso, pa bunka, koku ukulupile amba ukakuta mutyima. Nanshi, ke kya kutulumukapo shi Yesu wādi witolwela divule pa bunka mwanda wa kulombela! Kyaba kimo, wākesheshe bufuku bonso ulombela kudi Leza, ukimba buludiki pa kukwata butyibi bwa mvubu kutabuka.—Luka 6:12, 13.

Mu Bible mudi nsekununi ya bana-balume ne bana-bakaji bakwabo bālombele kitatyi kya kukwata butyibi bukatampe nansha mu makambakano makomo. Kyaba kimo bālombele na diwi ditunduke kyaba kikwabo mundamunda; bālombele mu kitango ne kitatyi kyobādi pa bunka. Kintu kya mvubu i amba bālombele. Leza wita ne bengidi bandi amba: “Lombelai ne kuleka mpika.” (1 Tesalonika 5:17) Usakanga kwivwana nyeke boba balonga kiswa-mutyima kyandi. Mwene luno i lwito lwa buswe?

Shako, mu ino ntanda ya kafutululo, bantu bavule batatananga mvubu ya milombelo. Padi ukeipangula amba, ‘Le bine ikankwasha?’

[Bushintuludi pa paje 9]

Tukokeja kulombela pa kitatyi ne kifuko kyo-kyonso