Uloñanga Bingelengele na Bukomo Bwa Ani?

Kinondanonda na kupwa kwisamba mwanda utala kulekelwa ku njibo ya Shimona Mufadiseo, Yesu washilula lwendo lukwabo lwa busapudi mu Ngadilea. Uno i mwaka wa bubidi wa mwingilo wandi, kadi kadipo bunka. Udi na batumibwa 12 ne bana-bakaji bamo “babelwilwe mishipiditu mibi ne misongo.” (Luka 8:2) Mu bano mudi ne Madia mwine Makadala, Suzana, ne Njoana, wandi mulume i mukata wa basola wa Mulopwe Heloda Antipese.

Bantu pa kwenda bayukila’ko Yesu, lupata pa mwingilo wandi nalo lwenda luvudila’ko. Lubamweka patōka paletwa kudi Yesu muntu umo mukwatwe na ndemona, wadi mpofu kadi kabwanyapo kwisamba ino wabelulwa. Pano uno muntu wanyongololwa mu lupusa lwa bandemona kamone kadi kaesambe. Bantu pa kutulumuka kebanena’mba: “Le uno’u abulwe kwikala Mwanā Davida?”​—Mateo 12:23.

Bibumbo i bikatampe byebungila kudi Yesu kadi bandi bana ba bwanga abakomenwa ne kudya bidibwa. Ino ke bonsopo balanga’mba Yesu i “Mwanā Davida” wālailwe. Basonekeji bamo ne Bafadiseo i bāye kutamba ku Yelusalema​—kebaidilepo kufundijibwa na Yesu nansha kumukwasha’ko. Basapwilanga bantu amba: “Udi na Belezebuba,” ko kunena’mba wingilanga na “mulopwe wa bandemona.” (Mako 3:22) Babutule ba Yesu pa kwivwana luno lupotopoto, abaiya kukwata Yesu. Mwanda waka?

Kufika ne pano, banababo na Yesu kebaitabije amba i Mwanā Leza. (Yoano 7:5) Uno Yesu umweka bu wakolomona kibumbo, kakidipo Yesu obadi batama nandi mu Nazala. Abo pa kufwatakanya’mba padi mu mutwe mwandi kemukidipo biyampe, abanena’mba: “Ñeni ibamujina.”​—Mako 3:21.

Ino le byobanena’bya i bya bine? Yesu watambe mu kubelula muntu wadi mukwatwe na ndemona, pano wamone ne kwisamba kaesambe. I kutupu ubwanya kutuna uno mwanda. Basonekeji ne Bafadiseo abakimbe kona ntumbo ya Yesu na kumubepela bya bubela. Abanena’mba: “Uno mukwetu’u kapañangapo bandemona bitupu, i na bukomo bwa Belezebuba, mulopwe wa bandemona.”​—Mateo 12:24.

Yesu pa kuyuka bilanga basonekeji ne Bafadiseo wanena’mba: “Bulopwe bo-bonso bwa kwilalulula abo bwine busadikanga, kadi kibundi nansha njibo yo-yonso ya kwilalulula ayo mine keikemanapo. Mo monka, shi Satana upanga Satana, nankyo welalulula aye mwine; le penepo bulopwe bwandi bukemana namani?”​—Mateo 12:25, 26.

Bine uno mulangilo i muluji’po kashā! Bafadiseo bayukile amba Bayuda bamo bapañanga bandemona. (Bilongwa 19:13) O mwanda Yesu waipangula’mba: “Shi mpañanga bandemona na bukomo bwa Belezebuba, le penepo benu bana abo bebapañanga na bukomo bwa ani?” Mu muneneno mukwabo, byobamunena nanshi bibatala’nka abo bene. Yesu wabweja’ko milangwe amba: “Shi mpañanga bandemona na mushipiditu wa Leza, nankyo bine Bulopwe bwa Leza bubemupeta.”​—Mateo 12:27, 28.

Yesu pa kulombola’mba bukomo bwapanga nabo bandemona i bupite bwa Satana, wanena’mba: “Le muntu ubwanya namani kutwela mu njibo ya nkomokomo ne kusela bintu byandi? Poso abadikile bidi kukuta nkomokomo’wa, penepo katūta bidi mu yandi njibo. Yewa kadipo ku wami mutamba i walwana nami, kadi yewa kakongakanyapo pamo nami usalakanyanga.” (Mateo 12:29, 30) Na bubine basonekeji ne Bafadiseo balwanga na Yesu, kadi bibamweka patōka’mba i bengidi ba Satana. Basonsololanga bantu kudi Mwanā Leza, mwine wingila na bukwashi bwa Yehova.

Yesu wadyumuna bano balwana bengidijibwa na Satana amba: “Bintu byonso bikalekelwa bana ba bantu, nansha shi abalonga bubi’ka nansha shi abatukana mitonko’ka. Inoko, yewa ense utuka mushipiditu ujila kakalekelwapo, mhm, nyeke ne nyeke, ino wapi mambo a bubi bwa nyeke.” (Mako 3:28, 29) Languluka’po mobikekadila ku boba batelela Satana bintu bilongwa na mushipiditu wa Leza!