Wadisha Tununu Twa Bantu Na Mikate Mityetye Ne Twita

Batumibwa 12 abasangela lwendo lwa busapudi lobalonga mu Ngadilea monso, kebasapwila Yesu “bintu byonso byobalongele ne byobafundije.” Kunena na bubine, i bakōke na mingilo. Kebadipo ne na kyaba kya kudya kine, mwanda bantu bavule badi’nka benda bāya. O mwanda Yesu wanena’mba: “Iyai kufula kwa bunka bwenu mukōkolokwe’ko bidi.”​—Mako 6:30, 31.

Abakanda mu bwato, padi i kubwipi na Kapanama, abaenda kufula mpata dya kutunduka kwa Munonga wa Yodano kupita Betesaida. Inoko bantu bavule abebamone pobataluka, bakwabo nabo abebalombola’o. Bonso abaenda lubilo lwa ntala ne kufika’ko bwato bukīya.

Yesu pa kwabuka mu bwato wamone kibumbo wekikwatyilwa lusa, mwanda badi pamo bwa mikōko yampikwa mukumbi. Nandi washilula “kwibafundija bintu bingi” bitala pa Bulopwe. (Mako 6:34) Kadi “wakomeja ne boba badi basakilwa kubelulwa.” (Luka 9:11) Dyuba pa kwenda, bana ba bwanga abamunena’mba: “Kuno i kufula kadi nsá ke myende bininge; talula bibumbo bya bantu, bende mu bibundi bakepotele byakudya.”​—Mateo 14:15.

Yesu walondolola amba: “Kebakitaluka; mwibapei byakudya.” (Mateo 14:16) Nansha Yesu byayukile byasaka kulonga, watompa Fidipa na kumwipangula’mba: “Le i kwepi kotusa kupota mikate ya kudya bano bantu?” I kyendele’mo kwipangula Fidipa, mwanda ye wikalanga kubwipi na Betesaida. Kadi kupota mikate kekubwanyapo kupwija mwanda. Padi kintu kya bana-balume 5 000. Shi tubadile’mo bana-bakaji ne bana, buvule bwabo bubwanya kuvudijibwa misunsa ibidi! Fidipa walondolola’mba: “Mikate ya ndenadi 200 [ndenadi imo i mfutwa ya difuku dimo dya mingilo] keibwanapo pa kusaka’mba muntu ne muntu atambule nansha’tu wa katye katye.”​—Yoano 6:5-7.

Andele, pa kusaka kulombola’mba kebabwanyapo kwibadisha bonso, wanena’mba: “Kudi mwanuke umo kuno udi na mikate itano ya mebele a buluba ne twita twa lui tubidi. Ino le bino’bi bisa kulonga bika mu bantu bavudile nenki?”​—Yoano 6:9.

Tudi kubwipi na Kweji 4, kumeso’tu kwa Pashika wa mu 32 Yesu ke mwiye, pa ngulu pakidi biyombo bibishi. Yesu wanena bandi bana ba bwanga basapwile bantu bashikate pa biyombo bantu makumi atano atano ne bantu katwa katwa. Wayata mikate itano ne twita tubidi wafwija’ko Leza. Kupwa watyumuna mikate’ya ne twita bipindi bipindi. Yesu wape’byo bana ba bwanga babile’byo bantu. Na kya kutulumuka, bantu bonso badya baikuta ne kwikuta!

Ebiya Yesu wasapwila bandi bana ba bwanga amba: “Kongakanyai bipindi byashala’ko, kutyina’mba kwakasupakanibwa nansha kimo.” (Yoano 6:12) Bipindi byashala’ko bibayula bilala 12!