‘Bubinebine Bukemukūlanga’

‘Banwe mukayukanga bubinebine, ebiya bubinebine bukemukūlanga kemudi banapabo.’ Mo mwānenene Yesu paādi ufundija bibumbo bya bantu mu tempelo mu Yelusalema. (Yoano 8:​32) Batumibwa ba Yesu bāyukile lubilo lonka bufundiji bwa Yesu amba bo bubinebine. Bāmwene bukamoni buvule bulombola’mba mufundiji wabo wātambile kudi Leza.

INO dyalelo, bantu bamo bamonanga’mba kupotolola bubinebine bwēsambile’po Yesu i bikomo. Mwanda dyalelo bidi pamo’nka na mu mafuku a mupolofeto Isaya, kudi bantu bavule “batēla kibi amba i kiyampe, ne kiyampe amba i kibi; boba bapingakanya mfindi amba i mwinya, ne mwinya amba i mfindi; bapingakanya bilula amba i bitobala, ne bitobala nabyo amba i bilula.” (Isaya 5:​20) Mu ano mafuku bantu bavule badi na milangwe, na mafilozofi, ne na mikadila keibadika, bamwene amba bintu byonso bidi’nka musakila muntu mwine, ne bubinebine bwine i kutupu’bo.

Pānene Yesu bemvwaniki bandi amba bubinebine bukebakūlanga, bāmutentulwile amba: “Tudi nkunwa ya Abalahama ketwamuninwepo na muntu nansha umo. Le bika byōnena abe’mba: Mukakūlwangapo ke mudī bāna-pabo?” (Yoano 8:​33) Kebādipo bamwene amba basakilwa muntu nansha kintu kya kwibakūla. Penepo Yesu wēbashintulwila’mba: “I binebine byo nemunena’mba: Bantu bonso bakulonga bubi i bapika bamunwe ku bubi.” (Yoano 8:​34) Bubinebine bwādi bwisambila’po Yesu bushitwilanga bantu dishinda ditwala ku kukūlwa ku bubi. O mwanda wānene’mba: “Shi Mwana wemukūla ke mudi bāna-pabo, nabya nankyo umbamone bu-bwāna-pabo bwa binebine.” (Yoano 8:​36) Nanshi bubinebine bukūla bantu i bubinebine butala padi Yesu Kidishitu, Mwanā Leza. Muntu pa kumona kukūlwa ku bubi ne lufu, poso’nka ekale na lwitabijo mu kitapwa kya būmi bwa bu muntu mubwaninine bwa Yesu.

Kyaba kikwabo Yesu wānene amba: ‘Wibapandule na bubinebine; kinenwa kyobe bo bubinebine.’ (Yoano 17:​17) Kinenwa kya Leza monka mokinenenwe mu Bible bo bubinebine bukokeja kukūla bantu ku kabutyibutyi ne ku mutōtelo wabubela. Bible udi na bubinebine butala padi Yesu Kidishitu, butwala bantu ku kwikala na lwitabijo mudi aye ne ku kwibapa lukulupilo lulumbuluke lwa būmi bwa kumeso. Bine, kufikila pa kuyuka bubinebine budi mu Kinenwa kya Leza i kintu kya nsangaji mpata!

Mwanda waka kuyuka bubinebine kudi na mvubu mpata? Mwanda mitōtelo mivule dyalelo, nansha byoītela’mba ilondanga Bible, ino i misobakane bininge na bisela ne na mafilozofi a bantu. Pavule, bendeji bayo bakimbanga kwisweja ku bantu, pa kyaba kya kupāna musapu wabinebine. Bakwabo nabo balanga’mba Leza uloelelwanga butōtyi bo-bonso, shi boba bamutōta bamutōtanga ne mutyima umo. Ino Yesu Kidishitu wāshintulwile amba: “Mwaka wiyako, ne pano ubapu kufika, bakutōta balumbuluke bakatōtanga Tata [na m]ushipiditu ne [bu]binebine ponka, ke-muntu Tata usakanga bonka’ba kumutōta.”​—Yoano 4:​23.

Shi tusaka kutōta Leza mwasakila, kitulomba bidi kuyuka bubinebine. Uno o mwanda mukatampe wimanine’po ne būmi bwine bwa nsangaji yanyeke botutengele. Nanshi muntu yense ufwaninwe kwiipangula’mba: ‘Muswelo wami ontōtanga le i mwitabijibwe na Leza? Le ngabilanga na mutyima umo kufunda bubinebine budi mu Kinenwa kya Leza’ni? Nansha ngikalanga na moyo wa byobya bikokeja kunsokwela bubandaudi bwakyo?’