Mukumbi Muyampe Ne Bipombo

Yesu paenda ufundija mu Yudea, wanena mwanda umo wivwanwa biyampe na bevwaniki bandi​—wa mikōko ne bipombo. Ino webinena mu kyelekejo. Bayuda ye bano abavuluka binenwa bya Davida bya amba: “Yehova i mukumbi wami. Nkikabulwangapo kintu nansha kimo. Undādikanga mu madyo a lumenya.” (Ñimbo ya Mitōto 23:1, 2) Mu mutōto mukwabo, Davida wita muzo amba: “Tutapei manwi panshi ku meso a Yehova Mwine wetulongele. Mwanda aye i Leza wetu, Batwe netu twi bantu ba mu madyo andi.” (Ñimbo ya Mitōto 95:6, 7) Bine bene Isalela mu Bijila i badingakanibwe na luombe lwa mikōko.

Ino “mikōko” yādi mu “kipombo” mu buluji bwa amba bābutwidilwe mu kipwano kya Bijila bya Mosesa. Bijila byādi bibakinga, bibasansanya ku bilongwa bya disubi bya bantu bampikwa kwikala mu kino kipwano. Bene Isalela bamo bāsuswile luombe lwa Leza. Yesu unena’mba: “I binebine nemulombola’mba, yewa katwelelapo pa kibelo mu kipombo kya mikōko ino ukandila’ko pangi, yao i ngivi, kadi i muntu utūtañana. Ino yewa utwelela pa kibelo i mukumbi wa mikōko.”​—Yoano 10:1, 2.

Padi bantu ye bano abavuluka bantu badi betela bu Meshiasa, nansha Kidishitu. Badi pamo bwa bangivi ne ba kutūta. Bantu kebafwaninwepo kulonda bano banzazangi. Ino bafwaninwe kulonda “mukumbi wa mikōko,” mwine wesambila’po Yesu amba:

“Kalama wa pa kibelo umushitwilanga, kadi mikōko nayo ivwananga diwi dyandi. Nandi witanga mikōko yandi pa dijina ne kwiitambija panja. Shi watambija mikōko yandi yonso panja, wiitangidilanga kumeso, nayo keimulonda, mwanda iyukile diwi dyandi. Keikalondapo mweni nansha dimo ino ikamunyema, mwanda keiyukilepo diwi dya beni.”​—Yoano 10:3-5.

Mafuku kunyuma, Yoano Mubatyiji, pamo bwa mulami wa pa kibelo, watelele Yesu bu yewa ufwaninwe kulondwa na boba belekejibwe bu mikōko mu Bijila. Kadi mikōko imo, ya mu Ngadilea ne muno mu Yudea bayukile diwi dya Yesu. Le wadi wa ‘kwibatwala kwepi’? I bika bikalupuka’ko shi abamulonda? Bantu bamo baivwana kino kyelekejo ye bano abatulumuka, mwanda ‘kebevwanijepo byaebanena.’​—Yoano 10:6.

Yesu washintulula’mba: “I binebine nemulombola’mba, ami ne kibelo kya mikōko. Boba bonso baile pa kyami kyaba i bangivi kadi i bantu batūtañana; ino mikōko keyebevwenepo. Ami ne kibelo; yewa ense utwelela pondi ukapanda, kadi aye ukatwela utamba ne kutana madyo.”​—Yoano 10:7-9.

Bine, Yesu wafundija kintu kipya. Bevwaniki bayukile amba aye ke kibelopo kya kipwano kya Bijila, kyāikele’ko mu tutwa twa myaka. Nanshi unenanga’mba mikōko ‘yatambija’ i ya kutwela mu kipombo kikwabo. Penepa bikale namani?

Yesu washintulula mwingilo wandi amba: “Ami naiya’mba imone būmi kadi kwibumona bwa ntanda ne miseke. Ami ne mukumbi mulumbuluke; mukumbi mulumbuluke upānanga būmi bwandi pa mwanda wa mikōko.” (Yoano 10:10, 11) Mafuku kunyuma Yesu wasengele bandi bana ba bwanga amba: “A kaluombe katyetye, kemwakikwatwai moyo, mwanda Shenu waloelelwa kwimupa Bulopwe.” (Luka 12:32) Na bubine, mikōko ibundile “kaluombe katyetye” yo ayo ikatwejibwa na Yesu mu kipombo kipya, mwanda wa “imone būmi kadi kwibumona bwa ntanda ne miseke.” Bine luno luombe ludi na dyese’po kashā!

Yesu kemaninepo’nka papo. Wanena’mba: “Ngidi na mikōko mikwabo, ke ya mu kino kipombopo; nayo mfwaninwe kwiileta, ikevwananga diwi dyami, kadi ikekalanga luombe lumo, mukumbi nandi umo.” (Yoano 10:16) Ino “mikōko mikwabo ke ya mu kino kipombopo.” Nanshi, ifwaninwe kwikala ya mu luombe lukwabo, i mishile na ya mu “kaluombe katyetye” kakapyana Bulopwe. Bino bipombo bibidi, nansha mpango ya mikōko, kebyendangapo kuntu kumo. Kadi, ino mikōko ya mu bipombo bibidi ikamwena mu mwingilo wa Yesu. Wanena’mba: “O mwanda Tata unsenswe, mwanda mpānanga būmi bwami.”​—Yoano 10:17.

Bavule mu kibumbo abalondolola’mba: “Udi na ndemona kadi ñeni i mimujine.” Ino bakwabo abalombola’mba batejanga na katentekeji, betabije kulonda Mukumbi Muyampe. Abanena’mba: “Bino ke binenwapo bya muntu mukwatwe na ndemona. Lelo ndemona ukokeja kupūtula meso a bampofu?” (Yoano 10:20, 21) Mobimwekela abavuluka Yesu wabelwile mpofu mafuku kunyuma.