Ku Nkula Ya Dijiba Dya Ngadilea

Yesu mu bufuku bwa mfulo na batumibwa bandi, webalombwele amba: “Ponsa kusanguka, nkemubadikilanga mu Ngadilea.” (Mateo 26:32; 28:7, 10) Pano balondi bandi bavule abaenda ku Ngadilea, ino le basa kukalonga’ko bika?

Kitatyi kimo, Petelo wanena batumibwa basamba amba: “Ami kenkapoya.” Nabo bonso basamba abamunena’mba: “Netu twenda nobe.” (Yoano 21:3) Abate bufuku bonso, kebakwete keta. Apo penda patōka, Yesu webamwekela ku kyabu, ino abakomenwa kumuyuka. Yesu webete amba: “A bana, le mudi na ka kudya?” Nabo abalondolola’mba: “Aa!” Yesu webanena’mba: “Tai bukonde dya ku lundyo lwa bwato musa kukwata’ko.” (Yoano 21:5, 6) Abakwata mwita mungi, abakomenwa’nka ne kwabula bukonde.

Yoano wasapwila Petelo amba: “I Mfumwetu!” (Yoano 21:7) Bukidi kala Petelo wekute kivwalwa kya pangala kyawadi uvūdile pa kupoya. Weela pa mema wasumbe kintu kya mametele 90 na ku nkula. Bakwabo badi mu bwato kebamulonda bityebitye, babula bukonde bupye mwita.

Abo pa kufika ku nkula, abamone “mudilo wa makala ne mwita mutenteke’po ne mukate.” Yesu wanena’mba: “Letai’ko mwita umo ku omwakwata’o.” Petelo wakakanda mu bwato wakoke bukonde buyule bā mwita mukatampe 153. Yesu webanena’mba: “Iyai mudye.” I kutupu mwanā bwanga waikele na bukankamane bwa kumwipangula’mba: “Le wi ani?” Mwanda bayukile amba i Yesu. (Yoano 21:10-12) Uno i musunsa wa busatu wamwekela Yesu bana ba bwanga mu kibumbo.

Yesu webape bonso mukate ne mwita badye. Kupwa padi utalanga ku mwita obakwata, waipangula amba: “A Shimona mwanā Yoano, le unsenswe kutabuka bino’bi?” Le Petelo ulamete bininge ku mwingilo wandi wa buluwe kupita’ko owa umusakila Yesu kwingila? Petelo walondola’mba: “Eyo-vidye, Mfumwami, uyukile amba nkusenswe kisanso kikatampe.” Penepa Yesu wamunena’mba: “Disha twami twana twa mikōko.”—Yoano 21:15.

Kadi Yesu waipangula’mba: “A Shimona mwanā Yoano, le unsenswe?” Padi Petelo watulumuka, walondolola na kininga’mba: “Eyo-vidye, Mfumwami, uyukile amba nkusenswe kisanso kikatampe.” Wamunena’mba: “Kumba yami mikōko myana.”—Yoano 21:16.

Yesu waipangula musunsa wa busatu amba: “A Shimona mwanā Yoano, le unsenswe kisanso kikatampe?” Pano Petelo padi weipangula shi Yesu utatananga lulamato lwandi. Petelo wanena na kikulupiji amba: “A Mfumwami, abe uyukile biyampe bintu byonso; uyukile’tu amba nkusenswe kisanso kikatampe.” Yesu wakomeneja monka byobya bifwaninwe kulonga Petelo amba: “Disha yami mikōko myana.” (Yoano 21:17) Bine boba batangidile kumeso bafwaninwe kwingidila boba bakokelwe na Leza mu kipombo.

Yesu wakutyilwe ne kwipaibwa mwanda waingile mwingilo mwine wamutumine Leza kwingila. Wasokwela Petelo amba ne aye mwine ukafula’nka kuno. Yesu wanena’mba: “Powadi ukidi nkasampe, wadi uvwalanga abe mwine kadi wadi wendanga konso kosaka. Ino pokanunupa, ukōlola maboko ino muntu ungi ukakuvwika ne kukuselela kokwa kokusakilepo.” Ino Yesu wamusoñanya’mba: “Nonde nyeke.”—Yoano 21:18, 19.

Petelo watale mutumibwa Yoano ne kwipangula amba: “A Mfumwetu, le uno nandi?” Le i bintu’ka bya kumeso bitengele mutumibwa obasenswe bininge kudi Yesu? Yesu walondolola’mba: “Shi nasake amba ekale’ko kufika ne byongiya, le byabyo bikutala namani?” (Yoano 21:21-23) Petelo ufwaninwe kulonda Yesu pampikwa kubanga bikalonga bakwabo. Pano Yesu walombola’mba Yoano ukeja pa ntanda kupita batumibwa bakwabo, kadi ukapebwa kimonwa kya kwiya kwa Yesu mu lupusa lwa Bulopwe.

Na bubine, kudi bintu bikwabo byalongele Yesu kebibwanapo nansha mu mivungo mivule mwine.