Bālongele Kiswamutyima Kya Yehova

Fidipa Ubatyija Mwingidi Mwine Efiopya

KITATYI kyādi mu lwendo, ushikete mu dikalo dyandi, mwine Efiopya wāingidije kitatyi kyandi na tunangu. Wādi wenda utanga na diwi dikatampe​—ye mwādi mwikadile kibidiji kya bañenda ba mu myaka katwa imbajinji. Uno mukelenge wādi mwingidi “mupebwe lupusa lukatampe kudi Kandase, mulopwe mwana-mukaji wa bene Efiopya.”a Wādi “kalama wa lupeto lwandi lonso.” Nabubine, wādi pa kitenta kibajinji mu mwingilo utala bulami bwa lupeto. Uno mwingidi wādi utanga Kinenwa kya Leza mwanda wa kutambula buyuki.​—Bilongwa 8:​27, 28.

Kubwipi nandi kwādi musapudi wa myanda miyampe, Fidipa. Mwikeulu wāmuludikile ku kino kifuko ne kumunena’mba: “Fwena ukalamate kokwa ku dikalo dyandi.” (Bilongwa 8:​26, 29) Fwatakanya bidi, padi Fidipa wādi wiipangula’mba: ‘Uno muntu i ani? I bika byatanga? I bika byobauntumina kwadi?’

Kitatyi kyāfwenene ku dikalo, Fidipa wāmwivwene utanga’mba: “Watwalwa kutapibwa’nka bwa mukōko. Monka mutalelanga kāna-ka-mukōko ku bekatenda moya, aye mo monka kāsaminepo mu kyakanwa, mhm. Monka mu kufwalamijibwa kwandi wasompolwa ne nsambu yandi mīne. Ino kadi le, ukalombola ku musuku kwandi i ani le, ke-muntu muya wandi ubafundulwa pano panshi.”​—Bilongwa 8:​32, 33.

Lubilo lonka, Fidipa wājingulula kisonekwa’kya. Kidi mu Isaya. (Isaya 53:​7, 8) Mwine Efiopya kādipo upotolwele byādi utanga. Fidipa wāshilula misambo na kumwipangula’mba: “Le uyūkile biyampe mwendele kyōtanga’kyo?” Mwine Efiopya’mba: “Le nekiyūka namani poso ne wakunombola biyampe.” Penepa wāmwita Fidipa elunge nandi mu dikalo.​—Bilongwa 8:​30, 31.

‘Kinkankaja Kubatyijibwa i Kika?’

Mwine Efiopya wāipangula Fidipa amba: ‘Nakwisashilapo, le uno mupolofeto uno wisambilanga’byo ani? Le i kudi aye mwine’ni i ku mukwabo?’ (Bilongwa 8:​34) Kekyākutulumukapo shi uno mwine Efiopya kādipo wivwanije buluji bwa “mukōko” nansha bwa “mwingidi” bisambilwe’po mu bupolofeto bwa Isaya, mwanda tamba kala kyādi kifibwe. (Isaya 53:11) Wēkivwanije enka pa musapwidile Fidipa amba i ‘myanda miyampe itala padi Yesu’! Ponkapo mwine Efiopya’mba: “Talapo mema ano, le kadi kinkankaja kubatyijibwa kadi i kika le?” Fidipa wamubatyija’nka penepa ne kwija mpikila.​—Bilongwa 8:​35-​38.

Lelo kamubatyije’po bukidi bukidi? Mhm, ke amopo! Mwine Efiopya wādi ngiya wa lwitabijo lwa Buyuda.b Bine wādi kala mutōtyi wa Yehova ne wādi na buyuki bwa pa Bisonekwa ne bwa padi Meshiasa. Inoko buyuki bwandi kebwādipo bufikile. Pakupwa kutambula musapu wa būmi utala pa mwingilo wa Yesu Kristu, uno mwine Efiopya wāivwanije kyadi kimusakila Leza ne wāsepelela kwikilonga. Lubatyijo lwandi nanshi lwādi lufwaninwe.​—Mateo 28:18-​20; 1 Petelo 3:​21.

Kupwa “mushipiditu wa Yehova wāmutekwine Fidipa.” Wāenda ku mingilo mikwabo. Mwine Efiopya “kaenda dyandi, wenda usepelela.”​—Bilongwa 8:​39, 40.

Bufundiji Kotudi

Batwe bonso bengidi ba Yehova tufwaninwe kukwasha bantu ba mityima ya kusaka kuyampe befunde Kinenwa kya Leza. Bavule kebapwe kwikilonga mu muswelo mulumbuluke na kusapwila bakwabo myanda miyampe mu lwendo nansha na kupāna musapu wa kiponka na ponka. Bipa bilupuka ku uno mwingilo i tutwa twa tununu twa bantu bepāna kudi Yehova Leza ne kubatyijibwa ku mwaka ne mwaka.

Eyo, kekifwaninwepo kwiyumba lubilo-lubilo mwanda wa kufikija bapya ku lubatyijo. Dibajinji bafwaninwe kwifunda kuyuka Yehova Leza ne wandi Mwana, Yesu Kristu. (Yoano 17:3) Kupwa bafwaninwe kwisāsa na kuleka mwiendelejo wabo onso mubi, ne kwalamuka mwanda wa kukwatañana na masakila a Leza. (Bilongwa 3:​19) Bino byonso bilombanga kitatyi, nakampata shi milangwe ne mwiendelejo mubi byadi ke byāle miji bininge mu mutyima. Bapya bafwaninwe kulanguluka na kusumininwa kukatampe ku būmi bwa masusu bobafwaninwe kwitabija pa kwikala bu mwanā-bwanga mukristu, ne kino kikebaletela madyese makatampe a kwikala mu kipwano kilumbuluke na Yehova Leza na kwipāna kudi aye. (Enzankanya na Luka 9:​23; 14:25-​33.) Ba Tumoni twa Yehova bonso basepelelanga kuludikila bano bapya ku bulongolodi bwingidija Leza mwanda wa kuvuija kiswamutyima kyandi. (Mateo 24:45-​47) Pamo’nka na bwa uno mwine Efiopya, bapya nabo bakasepelela na kwifunda ne kukwatañanya būmi bwabo na byobya bibasakila Leza.

[Kunshi kwa dyani]

[Box on page 8]

Mwanda’ka Wāityilwe bu Ntungu?

Umbula bwa mānga yonso idi mu Bilongwa shapita 8, uno mwine Efiopya imutelwe’mo bu “ntungu.” Inoko kadipo ntungu mu buluji bwine-bwine, mwanda Bijila bya Mosesa kebyādipo bitabija mwine-mbala mutungulwe kutwela mu kipwilo. (Kupituluka 23:1) Kishima kya Kingidiki “ntungu” kikokeja kufunkila pa muntu upelwe mingilo ya peūlu. Shi kepano, uno mwine Efiopya wādi mwingidi wa pa kitenta kikande bininge mu kipango kya mulopwe-mukaji mu Efiopya.