8. I myanda’ka itukankamika Polo kubandaula?

⁸ Mutumibwa Polo wipangula kipangujo mu mukanda waātumīne bene Loma amba: “Tunene’mba, Leza i mukondame, a?” Ebiya ulondolola na kukomeneja’mba: “Mhm, leka! leka! leka!” Kupwa unena ukoma pa lusa lwa Leza ne pa kine kyāikele Yehova kulekela Felo ekale mūmi kitatyi kilampe’ko. Kadi Polo ulombola amba bantu badi pamo bwa dilongo mu makasa a mumba. Penepa unena’mba: “Ino shi Leza wadi ne mutyima wa kulombola bukalabale bwandi, ne kuyūkanya bukomo bwandi, aye wēfudile, utūkije ne mutyima monka pa byobya bintu bya bukalabale, bilongwe bya kukonakanya. Kadi amba, ayūkanye bungi bwa ntumbo yandi, pa byobya bintu bya lusa, byālongolwele kala ke bya ntumbo; ke bo bātwe bano kadi bāityile, nako ke kwa mu bonka [Bayuda], mhm, nanshi ne mu baJentaila bene kumo.”—Loma 9:14-24.

10. Mwanda waka Yehova walekele’ko babi mu myaka 1900 yapityile’i?

¹⁰ Mu bula bwa myaka 1 900 ne kupita tamba Yesu usangulwa, Yehova i muleke’ko bidi “bintu bya bukalabale,” na kwikaka kwibyonakanya. Mwanda waka? Dibajinji bidi, mwanda wa kuteakanya boba bakabikala pamo na Yesu Kidishitu mu Bulopwe bwa mūlu. Bano i bantu 144000 kadi byo abyo “bintu bya lusa” byādi bisambila’po mutumibwa Polo. Bantu babajinji kwitwa na Leza mu kano kabumbo ka ba kwenda mūlu i Bayuda. Kupwa ke bantu ba mu mizo ya Bajentaila. Mu bano bonso, Yehova kadipo waningidile amba enka amwingidile. Ino mu boba baitabije mpangiko yandi ya buswe na mutyima wa kufwija’ko mo mwaikele kupa bamo madyese a kukabikala pamo na wandi Mwana mu Bulopwe bwa mūlu. Panenwa pano, kuteakanibwa kwa kabumbo ka ba kwenda mūlu kekudi ku mfulo.—Luka 22:29; Kusokwelwa 14:1-4.