Langulukila pa Buswe bwa Yehova bwa Endaenda

1, 2. (a) Mwanda waka bantu bamo bakulupile amba Yehova usenswe bantu bandi? (b) Lelo bantu bāpangilwe na kisakibwa’ka?

MWANDA waka ukulupile amba Yehova usenswe bantu bandi? Kumeso kwa abe kulondolola ku kino kipangujo, langulukila pa bino bimfwa: Mu bula bwa myaka mivule, batutu ne bakaka badi bakankamika na kanye kaka Taylene. Badi bamulombola aleke kwilomba kulonga bintu bivule. Uno kaka unena amba: “Shi Yehova kadipo unsenswe, longa kandingilangapo kyaba ne kyaba.” Brigitte, walelele bana babidi bunka bwandi pa kupwa kwa wandi mulume kufwa, unena amba: “Kulela bana mu ino ngikadilo mibi ya Satana ke mitembwepo, kupityidila ku mbutwile ulelele bana bunka. Inoko nkulupile amba Yehova unsenswe mwanda undudikanga mu byamalwa, kadi kakandekapo nansha dimo ntanwe na byamalwa bitabukile bukomo bwami.” (1 Kodinda 10:13) Sandra udi na misongo ya zenzeka. Ku kitango, kaka umo watele Sandra mutyima bininge. Mulumya Sandra unena amba, “Nansha byoketwadipo tumuyukile senene, kuta kwaetutele mutyima bininge kwetuletele nsangaji mikatampe ku mutyima. Nansha’tu kilongwa kityetye kya buswe kilonga batutu ne bakaka potudi kinombola amba Yehova witusenswe bikatampe.”

² Yehova wāpangile bantu na mutyima wa kusaka kusanswa ne kusanshibwa. Inoko, i kipēla kutyumukwa mutyima pangala pa misongo, misokwe nansha shi mwingilo wetu wa busapudi keupepo bipa. Shi tubashilula kumona amba Yehova kakitusenswepo, tufwaninwe kuvuluka amba tudi na bulēme kwadi ne amba udi’ko, ukwete kuboko kwetu kwa lundyo mwanda wa kwitukwasha. Shi tushale bakōkele kwadi, kaketwilwapo nansha dimo.​—Isaya 41:13; 49:15.

 3. Le i bika bikokeja kuningija kikulupiji kyetu kya amba buswe bwa Yehova kotudi i bwa endaenda?

³ Batumoni batelwa’ba badi bakulupile amba Leza wadi nabo mu bitatyi bya makambakano. Netu tubwanya kwikala na kikulupiji pamo bwa kino kya amba Leza udi netu. (Ñimbo 118:6, 7) Mu kino kishinte tusa kwisambila’mo byabuntu biná bilombola amba Yehova witusenswe. Kudi (1) bupangi bwandi, (2) Bible, (3) milombelo, ne (4) kinkūlwa. Kulangulukila pa bintu biyampe bilongele Yehova kuketukwasha twikale na mutyima wa kufwija’ko pa buswe bwandi bwa endaenda.​—Tanga Ñimbo 77:11, 12.

 4. Lelo i bika byotwifunda ku bupangi bwa Yehova?

⁴ Kitatyi kyotubandila bupangi bwa Yehova, tumonanga mwaetusanshilwe bininge. (Loma 1:20) Kimfwa, Yehova wāpangile ino ntanda mwanda wa twikale’po ne kulonga bintu bikwabo bivule. I mwitupe bintu byonso byotusakilwa pa kusangela būmi. Tusakilwanga kudya, ino Yehova i mwitupe miswelo palapala ya bidibwa biyampe kudya! (Musapudi 9:7) Kaka witwa bu Catherine usangelanga bintu byamona mu bupangi, kupityidila mu bushipo, mu Kanada. Unena amba: “Na bubine, i kitulumukwa kumona kintu kyonso mokipangilwe​—mushipukila malubaluba mu biloba, mulubukila toni tuviluka, kubadila’mo ne kasoji koni katyetyetyetye kāya kadya mu kidilo kya toni panja pa didisha dya mpishi yami. Yehova wituswele pa kwitupa bino bintu byonso bisangaja.” Tata wetu usenswe bupangi bwandi, kadi witusakilanga netu twibusangele.​—Bilongwa 14:16, 17.

 5. Lelo buswe bwa Yehova i bumweke namani mu muswelo waāpangile bantu?

⁵ Yehova i mwitupange na bukomo bwa kwingila mingilo ya kamweno ne kwiisangela. (Musapudi 2:24) Wāpele bantu mwingilo wa kuyuja ntanda, kwiidima, kulama mwita wa lui, byoni, ne bintu bikwabo byūmi bidi’po. (Ngalwilo 1:26-28) Kadi i mwitupange na ngikadila milumbuluke itukwasha tumwiule!​—Efisesa 5:1.

 6. Mwanda waka tufwaninwe kufwija’ko bininge pangala pa Kinenwa kya Leza?

⁶ Yehova i mwitupe Bible mwanda witusenswe bininge. Bible witulombolanga byotufwaninwe kuyuka pādi ne muswelo wamonanga bantu. Kimfwa, Bible witulombola muswelo wādi umona Yehova bene Isalela, bene bālombwele divule dine kubulwa kikōkeji kwadi. Ñimbo 78:38 inena amba: “Pa kuyūla kanye, webalekele bubi bwabo, ne kwibonakanya mpika; eyo, i binebine wāluja kufuna bulobo bwandi dingi dingi, ne kusontomona bukalabale bwandi bonso mpika.” Kulangulukila pa uno vese kubwanya kwitukwasha tumone muswelo witulombola Yehova buswe ne kwituta mutyima. Tubwanya kukulupila amba Yehova witutele mutyima bya binebine.​—Tanga 1 Petelo 5:6, 7.

 7. Mwanda waka Bible ufwaninwe kwikala na bulēme kotudi?

⁷ Bible ufwaninwe kwikala na bulēme kotudi. Mwanda waka? Mwanda Yehova wisambanga netu kupityila ku Kinenwa kyandi. Shi ba mbutwile ne mwana besamba pampikwa kafinda, baningishanga buswe bwabo ne kwikulupila umo ku mukwabo. Yehova i Tata wetu wa buswe. Kadi nansha shi ketwamumwene kashā nansha kwivwana diwi dyandi, ino wisambanga netu nenki kupityila ku Bible. Tufwaninwe kumuteja nyeke! (Isaya 30:20, 21) Kitatyi kyotutanga Kinenwa kya Leza, tuyukanga Yehova ne kumukulupila, mwine wituludika ne kwitukinga.​—Tanga Ñimbo 19:7-11; Nkindi 1:33.

8, 9. Yehova usaka tuyuke bika pādi? Leta kimfwa kya mu Bible.

⁸ Yehova usakanga tuyuke amba witusenswe. Kamonengapo’nka kubulwa kubwaninina kwetu, mwanda ukimbanga biyampe bidi motudi. (2 Bilongwa 16:9) Tutalei muswelo wāmwene Yehova biyampe byādi mudi Yehoshafata Mulopwe wa Yuda. Yehoshafata wākwete butyibi butyani bwa kukūkila Ahaba Mulopwe wa Isalela bakalwe na bene Shidea ku Lamote-ngileade. Nansha shi bapolofeto ba bubela 400 bālombwele Ahaba mulopwe mubi amba ukanekenya divita, ino Mikaya mupolofeto wa bine wa Yehova wāsapwidile Yehoshafata amba shi akalwe, ukajimina. Ne ye mokyāikadile. Ahaba wafwa ku divita, ino Yehoshafata wāpanda. Pa kupwa kwa divita, Yehova wātuma Yehu kukadingila Yehoshafata pa mwanda wa kilubo kyandi. Kadi Yehu wāmusapwila amba: “Mudi bintu bilumbuluke byatenwe mōdi.”​—2 Bilongwa 18:4, 5, 18-22, 33, 34; 19:1-3.

⁹ Myaka mivule kunyuma, Yehoshafata wāsapwidile bana ba balopwe, bene Levi ne babitobo kwenda mu bibundi byonso bya Yuda mwanda wa kukafundija bantu Mukanda wa Bijila wa Yehova. Babwenye mwingilo wabo mwanda enka ne bantu ba mizo ingi bāyukile Yehova. (2 Bilongwa 17:3-10) Nansha byākwete Yehoshafata butyibi butyani, Yehova kāidilwepo bintu biyampe byaālongele mafuku kunyuma mu būmi bwandi. Kino kimfwa kitusenga’po kashā mwanda kyaba kimo netu tuloñanga bilubo. Inoko, shi tulonge byonso byotubwanya mwanda wa kwingidila Yehova, nabya ukendelela kwitusanswa kadi kakelwapo bintu biyampe byotwalongele.

10, 11. (a) Lelo i muswelo’ka otufwaninwe kumona milombelo? (b) Lelo Leza ulondololanga milombelo yetu namani?

¹⁰ Shabana wa buswe utejanga bandi bana kitatyi kyobasaka kwisamba nandi. Usakanga kuyuka muswelo obeivwana mwanda wibatele mutyima bininge. Yehova Tata wetu wa buswe, nandi udi namino. Witwivwananga kitatyi kyotumulomba. Bine, kwisamba na Tata wetu i dyese dikatampe!

¹¹ Tubwanya kulomba Yehova kitatyi kyonso. Imulunda netu, kadi udi’ko nyeke mwanda wa kuteja milombelo yetu. Taylene, utelelwe ku ngalwilo, unena amba: “Ubwanya kunena kintu kyo-kyonso pakubulwa kukutyampa pa ludimi.” Shi tulombola Yehova milangwe yetu ya mu nkulwe, ubwanya kwitulondolola kupityila ku bisonekwa, ku kishinte kya mu mabuku etu nansha ku kukankamikwa na batutu ne bakaka. Yehova wivwananga kulomba kwetu kutamba ku mutyima, kadi witwivwananga kutabuka muntu ye-yense. Malondololo andi ku milombelo yetu alombolanga amba udi na buswe bwa endaenda kotudi.

12. Mwanda waka tufwaninwe kwifunda milombelo idi mu Bible?

¹² Tubwanya kuboila ñeni mikatampe ku milombelo idi mu Bible. Kyaba kimo, i biyampe kwifunda’ko milombelo imo mu butōtyi bwa kisaka. Milombelo yetu ikalumbulukila’ko shi tulangulukila pa milombelo itamba ku mutyima ya bengidi ba Leza ba pa kala. Kimfwa, tubwanya kwifunda milombelo ya kwityepeja ya Yona paādi munda mwa nyema wa lui mukatakata. (Yona 1:17–2:10) Bandaula milombelo yampikwa budimbidimbi ya Solomone kitatyi kyāpenwe Tempelo kudi Yehova. (1 Balopwe 8:22-53) Kadi langulukila pa lulombelo lwa kimfwa lwa Yesu. (Mateo 6:9-13) Kya mvubu kutabuka, kyaba kyonso “yukijai Leza byomulomba.” Nabya, “ndoe ya Leza itabukile milangwe yonso ikalama mityima yenu ne ñeni yenu.” Mutyima wetu wa kufwija’ko pa buswe bwa Yehova bwa endaenda ukatamina’ko.​—Fidipai 4:6, 7.

13. Le i mukenga’ka otudi nao pa mwanda wa kinkūlwa?

¹³ Yehova i mwitupe kyabuntu kya kinkūlwa amba “tumwene būmi ponka.” (1 Yoano 4:9) Mutumibwa Polo pa kwisambila pa kino kilomboji kya kutendelwa kya buswe bwa Leza, wāsonekele amba: “Kidishitu wafwidile bantu ba kubulwa bwine Leza pa kitatyi kitungwe. Mwanda ke divulepo muntu kufwila moloke; ino na bubine, pa mwanda wa muntu muyampe, muntu ubwanya padi kusomonwa kumufwila. Ino Leza wetulombola buswe bwandi mu uno muswelo amba, potwadi tukidi babipya-mambo, Kidishitu wetufwidile.” (Loma 5:6-8) Kinkūlwa i kilomboji kikatampe kya buswe bwa Leza, kadi i kipe bantu mukenga wa kupwana nandi.

14, 15. Le kinkūlwa kidi na kamweno’ka ku (a) bene Kidishitu bashingwe māni? (b) boba badi na lukulupilo lwa kwikala pano pa ntanda?

¹⁴ Kupityila pa kinkūlwa, kakisumpi katyetye ka bene Kidishitu i bemwene buswe bwa Yehova bwa endaenda mu muswelo wa pa bula. (Yoano 1:12, 13; 3:5-7) Leza i mushinge bano bantu māni a mushipiditu ujila, o mwanda pano i bana bandi. (Loma 8:15, 16) Bamo byobakidi pano panshi, mwanda waka Polo wānene amba bashikete “pamo mu bifuko bya mūlu umbumo na Kidishitu Yesu”? (Efisesa 2:6) Yehova i mwibape lukulupilo lwa kwikala na būmi bwa nyeke momwa mūlu.​—Efisesa 1:13, 14; Kolose 1:5.

¹⁵ Boba bonso kebashingwe mānipo nabo babwanya kwikala balunda na Leza shi balombole lwitabijo mu kinkūlwa. Badi na mukenga wa kwikala bu bana ba Leza ne kwikala na būmi bwa yayaya mu paladisa pano pa ntanda. Kinkūlwa i kilomboji kya buswe bwa Yehova ku bantu bonso. (Yoano 3:16) Bine kisangaja’po kashā kuyuka amba shi twingidile Leza na kikōkeji, uketupa būmi bulumbuluke mu ntanda mipya! Nanshi tulombolei amba tukwete na bulēme kinkūlwa, kilomboji kikatampe kya buswe bwa Leza bwa endaenda kotudi.

16. Lelo i bika byotukalonga pa kupwa kulangulukila pa buswe bwa Leza?

¹⁶ I bikomo kubala miswelo itulombola’mo Yehova buswe bwandi. Mulopwe Davida wāimbile amba: “Ē! keyo! mifwatakanyo yobe kulema’yo buleme kudi ami abe Leza! Ē! keyo bukata mbadi yayo! Shi mbale’yo, nankyo ītabukile mu kubala kwa musenga.” (Ñimbo 139:17, 18) Kulangulukila pa miswelo mivule itulombola’mo Yehova buswe, kuketutonona tumusanswe ne kumwingidila na mutyima umo.

17, 18. Lelo i mu miswelo’ka imo motubwanya kulombola buswe bwetu kudi Leza?

¹⁷ Kudi miswelo mivule ya kulombola’mo Yehova amba tumusenswe. Kimfwa, tukokeja kulombola buswe bwetu kudi Yehova na kusapwila bantu bakwabo na bupyasakane myanda miyampe ya Bulopwe. (Mateo 24:14; 28:19, 20) Kadi tubwanya kulombola buswe kudi Leza na kūminina na kikōkeji matompo etutana mu lwitabijo. (Tanga Ñimbo 84:11; Yakoba 1:2-5.) Nansha shi matompo etu i makomo namani, tufwaninwe kukulupila amba Yehova umwene masusu etu ne kadi uketukwasha, ke pantu twi balēme kwadi.​—Ñimbo 56:8.

¹⁸ Buswe botuswele Yehova buketutonona tulangulukile pa bintu byonso bya kutendelwa byapangile. Tulombolanga Yehova amba tumusenswe aye ne Kinenwa kyandi na kwikala befundi ba binebine ba Bible. Tulombelanga kitatyi ne kitatyi kudi Yehova mwanda tumusenswe ne tusakanga kuningisha kipwano kyetu nandi. Kadi kitatyi kyotulangulukilanga pa kyabuntu kyandi kilēme kya kinkūlwa, buswe botumuswele butaminanga’ko. (1 Yoano 2:1, 2) Ino i miswelo’tu imo yotulombolanga’mo Yehova amba tukwete na bulēme buswe bwandi bwa endaenda kotudi.