Lelo Ulondalondanga Bulumbuluke?

“Byonsololo bilumbuluke ku meso a bantu bonso, shi kadi namo mudi buleme, ne kutendelwa kwabyo, mufwatakanyei bino bintu bino’bi.”​—FIDIPAI 4:⁠8.

BYABUBI i koneka mu mwikadilo nansha kukobakana. Pano i bisambakane mu ino ntanda yotudi’mo. (Efisesa 2:​1-3) Inoko Yehova Leza kakalekapo mutōtelo wandi utōka usubijibwe nansha patyetye. Mabuku a bwine Kidishitu, kupwila, kubungakana, ne bitango, bitupanga bidyumu pa kitatyi kifwaninwe, amba twikale kwilama ku mwiendelejo mukondame. Tutambulanga bukwashi bulumbuluke bwa Bisonekwa bwitupanga bukomo bwa ‘kulamatyidila byobya bilumbuluke’ ku meso a Leza. (Loma 12:9) Batumoni ba Yehova, mu bulongolodi bwabo bonso butuntulu, baloñanga buninge bwa kwikala batōka, bantu balumbuluke. Ino le bidi namani ku umo ne umo umbukata mwetu? Lelo binebine, nobe ulondalondanga bulumbuluke?

² Bulumbuluke i buya bwa mu mwikadilo, buyampe, bilongwa byoloke ne milangwe myoloke. Ke ngikadilapo bitupu yampikwa kyoilonga, mhm, ino i ngikadilo ilupula bipa, miyampe senene. Bulumbuluke buselele bintu bivule kutabuka kwepuka bubi bitupu; kishintulula kulondalonda byobya biyampe. (1 Temote 6:​11) Mutumibwa Petelo wāsoñenye balunda nandi bene Kidishitu amba: ‘Bwanyai ku lwitabijo lwetu bulumbuluke.’ Namani? Na ‘kwelela’ko [ku milao milēme ya Leza] kininga kisumininwe.’ (2 Petelo 1:​5) Pa kusaka amba twikale nyeke balumbuluke, kitulomba kulonga bukomo bwabinebine, mwanda tudi na kibutwila kya kulēmenena ku kulonga bubi. Ino bantu bādi bakaminwe Leza ba mu myaka ya kala bādi balamine bulumbuluke bwabo, nansha byobādi batana bijika bikomokomo.

Wālondelelondele Bulumbuluke

³ Mu Bisonekwa mudi nsekununi mivule ya boba bālondelelondele bulumbuluke. Kimfwa, Hezekia muntu mulumbuluke. Shandi Ahaza, Mulopwe wa Yuda, wādi utōta Moloka. “Kabidi Ahaza wadi myaka makumi abidi pa kwalula kubikala; ino wabikala myaka dikumi ne isamba mu Yelusalema; ino nandi kalongelepo kyokya kyoloke mu meso a Yehova Leza wandi, pamo bwa shandi Davida, mhm. Ino nanshi wādi unanga mu dishinda dya balopwe ba Isalela, eyo kadi, wapityija wandi mwana mu mudilo mungya byamunyanji bya bamizo boba bapingilwe na Yehova ku meso a bāna ba Isalela. Byobiya watapa bitapwa ne kusōka ensense mu mitenta, ne pa tulūlu, ne munshi mwa mityi mibishi yonsololo.” (2 Balopwe 16:​2-4) Bamo banena amba ‘kupita mu mudilo’ i kisela kampanda kya kwisubula, ke kunenapo amba kishintulula kwela kitapwa kya bantu. Ino dibuku Moloka​—Leza wa Bitapwa bya Bantu mu Kipwanino kya Kala (Angele), dyālembelwe na John Day, dinena amba: “Bukamoni budi mu bilembwa bya pa kala bya bene Fenisha [bene Kartaje] wa kala, pamo ne bukamoni bwa bintu bya kishiye-kulu bisokolwa, bulombola amba kudi bantu bādi belwa bu bitapwa . . . mu ntanda ya bene Kenani, nanshi kepadipo buluji bwa kwalakena binenwa [bya bitapwa bya bantu] bitelelwe mu Kipwanino kya Kala.” Kadi, 2 Bilongwa 28:3 unena patōka amba, Ahaza wāshilwile “kusōka bāna bandi mu mudilo.” (Enzankanya na Kupituluka 12:31; Mitōto 106:​37, 38.) Bine byādi bilongwa bibi kashāa!

⁴ Lelo Hezekia wāikele namani mu yoya ngikadilo yādi miyule byabubi nabya? Mitōto 119 itukwasha pa kino, bamo balañanga amba Hezekia ye wēinene, kadi amba wēinene kitatyi kyaādi ukidi mpyana impolo wa mulopwe. (Mitōto 119:46, 99, 100) Omwanda bimweka amba ngikadilo yaādi’mo i ino ilombwelwe mu bino bishima: “Bāna ba balopwe nabo bashikete banena bibi bibi, ino umpika obe wafwatakenye mu bijila byobe. Muya wami usubanga mwanda wa kulemenenwa.” (Mitōto 119:​23, 28) Byādi Hezekia ujokolokelwe na batōtyi ba mutōtelo wabubela, padi wādi ufutululwa bininge na bantu ba mu kipango kya mulopwe, tufutululo twabinebine tukoma ne kulāla tulo. Ino wālondelelondele bulumbuluke, wāfika ne ku kubikala ke mulopwe, “walonga kyokya kyoloke mu meso a Yehova . . . Ye aye wakulupile mudi Yehova, Leza wa Isalela.”​—2 Balopwe 18:​1-5.

Bāikele Nyeke Balumbuluke

⁵ Bantu bakwabo bāshile kimfwa kya bulumbuluke i Danyele ne balunda nandi basatu Bahebelu, Hanania, Mishaele, ne Azadia. Bāselelwe ku bukomo, kutamba nabo mu yabo ntanda, bāselwa bu misungi mu Babiloni. Bano bansongwalume baná bāinikilwe majina a bwine Babiloni​—Beleteshazale, Shadelake, Meshake, ne Abedenengo. Bāpelwe “kyepelo kya bidībwa bya mulopwe,” bisobakane na bidibwa bijidikwe na Mukanda-wabijila wa Leza. Kadi bāningilwa kulonda bufundiji bwa myaka isatu butala pa “bulombodi ne mu ludimi lwa bene Kaladea.” Buno bufundiji bwādi bwa bintu bivule, kebwādipo’nka bwa kwifunda ludimi lukwabo kete, ehe, mwanda mobimwekela, kino kishima “Kaladea” o mwityilo wādi witwa bantu bafunde. Enka namino, bano bansongwalume Bahebelu bātūlwa ku masomo a bufundiji boneke bwa bene Babiloni.​—Danyele 1:​1-7.

⁶ Nansha Danyele ne balunda nandi basatu byobādi baningilwa kulonga byabubi, ino abo bātongele bulumbuluke pa kyaba kya byabubi. Danyele 1:​21 unena’mba: “Danyele waikeleikele kufika ne ku mwaka umbajinji wa mulopwe Shilusa.” Bine, Danyele “waikeleikele” mwingidi mulumbuluke wa Yehova mu bula bwa myaka 80 ne kupita​—mu kubikala ne mu kubikuka kwa balopwe bakomokomo bavule. Nansha byobādi bamukutyila nkuku ne bitumba kudi bamfumu, nansha byokwādi busekese bwādi bwenda muongo pa ntanda mu mutōtelo wa bene Babiloni, ino aye wāshele nyeke mukōkele kudi Leza. Danyele wāendelele na kulonda bulumbuluke.

⁷ Tukokeja kuboila ñeni mivule pa bano bantu bādi bakaminwe Leza, Danyele ne balunda nandi. Bālondele bulumbuluke, ino bāpela kwikuja mu bibidiji bya kishi bya bene Babiloni. Nansha byobāinikilwe majina a bwine Babiloni, ino abo kebājimijepo nansha dimo kiyukeno kyabo kya bu bengidi ba Yehova. Omwanda, kubwipi kwa myaka 70 pa kupita’po, mulopwe wa Babiloni wāityile Danyele pa dyandi dijina dya bu Muhebelu! (Danyele 5:​13) Mu myaka yonso yālele Danyele mu būmi bwandi, wāpelele kujilula bijila nansha ke mu tumyanda tutyetutye. Tamba’nka paākidi nkasampe, wādi musumininwe “umutyima wandi kutyina’mba nakesubija ami mwine ne bidībwa bya mulopwe’bya.” (Danyele 1:8) Uno mwimanino wa kupela kujilula bijila wādi na Danyele ne balunda nandi basatu wēbakankamikile binebine, ne kupanda bāpanda mu kyakanwa kya lufu, mu matompo ēbatene mwenda mafuku.​—Danyele, shapita 3 ne 6.

Londalondai Bulumbuluke Dyalelo

⁸ Dyalelo bantu ba Leza bapelanga kwikuja mu ntanda imbi ya Satana, pamo’nka na mwāpelele Danyele ne balunda nandi basatu. (1 Yoano 5:​19) Shi mwi bankasampe bene Kidishitu, bakwenu bomwendanga nabo kisense bakokeja kwimuningila, bemusakila mwiule bisela byabo bya mivwadilo, mitendelo, mibandilo, nansha minjiki. Pa kyaba kya kulonda kilondelonde mondele ne mondele ulupuka, kisela ne kisela kipupwa, banwe ikalai bemanije pototo, lekai “kudingakanibwa na [ino ngikadilo ya bintu.]” (Loma 12:2) “[Pelai] bumpikwa bwine-Leza, ne bya kilokoloko kya panopantanda, ne kwikala bakwilemeka senene, ne bakoloka ne ba bwine-Leza.” (Tetusa 2:​11, 12) Kintu kitabukile bulēme i kwitabijibwa na Yehova, ke na bakwenupo bomwendanga nabo kisense, mhm.​—Nkindi 12:⁠2.

⁹ Bene Kidishitu batame nabo batompibwanga, nabo bafwaninwe kwikala balumbuluke. Bene Kidishitu bansunga bakokeja padi kutompibwa na kukimba kulonda musungilo wa budimbidimbi, nansha kwanza kwepa bijila bimo bya Leta ne kufuta bitanshi. Ino nansha shi bantu botusunga nabo nansha botwingila nabo abaikala babi, ino batwe “tusumininwe twa’mba, tudi ne mutyima wa mundamunda mulumbuluke wakusaka kulumbuluka biyampe, senene, shē, umbintu byonso.” (Bahebelu 13:18) Bisonekwa bitusoñanya twikale bantu bambulwa budimbidimbi nansha kakoba na bantu bonso, batupita betu, boba botupulwile kwitwingidila kaji, bampotyi, ne bambikavu ba ino ntanda. (Kupituluka 25:​13-​16; Mateo 5:​37; Loma 13:1; 1 Temote 5:​18; Tetusa 2:​9, 10) Bine, tulongei buninge bwa kubwanya byonso mu busunga. Tukokeja kwepuka lupotopoto shi tusoneka senene myanda yonso ya kumvwañana kwetu.

Dyumukai!

¹⁰ Mitōto 119:9 ulombola kintu kikwabo kyotufwaninwe kwikala’mo balumbuluke ku meso a Leza. Mulembi wa mitōto wāimbile’mba: “Lelo kukatōkeja mulumyana dishinda dyandi i kwepi? Ponka pa kutámo mutyima mwendele mwanda obe.” Umo wa mu miketo ya bulembe ya Satana i minjiki, mwanda idi na bukomo bulangula masenda mu ngitu. I kya bulanda, bene Kidishitu bamobamo i bakomenwe ‘kudyumuka’ ku minjiki, bafwila’nka muneñenya wayo’wa, wibakoka kufika ne ku ñimbo mine mipwe bunwa, ya bitēle ne mikwabo itelwa bu kilonda ulēma. Bamo bekañanika amba kekudipo kibi kibalonga ino minjiki, nansha amba kebatangapo mutyima ku binenwa bibi bidi’mo. Bakwabo nabo amba bibasangajanga i bitūkatūka bya byombanwa nansha muvumino wa nzenze upona nzabangi mu matwi. Ino ku bene Kidishitu, kikatampe kidi’po ke kufwilapo kintu kampanda kibasangajanga abo, mhm. Kikatampe kobadi i kutala shi kintu’kya i “kya kusangaja Mfumwetu.” (Efisesa 5:​10) Tunena tujokela’po, minjiki ya kilonda ulēma ne ya bitēle i bintu bitumbija byabubi, mutonko, busekese, ne mushipiditu wa bu Satana​—i bintu kebifwaninwepo kutanwa umbukata mwa bantu ba Leza.a (Efisesa 5:3) Uno mwanda keudipo amba yeu i mukulumpe au ye nkasampe, batwe bonso tufwaninwe kulanguluka pa kino kipangujo, Lelo kyononda mu butongi bwami bwa minjiki, i bulumbuluke’ni nansha’ko i byabubi?

¹¹ Bintu bivule bilombolwa ku matelevijo, ku mavideo, ne ku masinema i byonka bitumbija byabubi. Kukwatañana na muñanga umo mukatampe wa bantu babēla tunzumbidi, ‘kusaka kwisangaja, busekese, bukalabale, makomwa-meso, ne mwino’ i biyule bā mu masinema mavule atalwa dyalelo. Nanshi, kwikala mudyumuke i ne kuyuka kutonga bintu biyampe byotusaka kutala. Mulembi wa mitōto wālombele amba: “Fundula meso ami ku kubandila bya bitupubitupu.” (Mitōto 119:37) Nkasampe umo mwine Kidishitu, utelwa dya bu Joseph, wāingidije uno musoñanya. Kitatyi kyobālombwele filime ya bantu badi mutaka ne betapa, wātambile mu njibo’ya waenda. Lelo wākwetwe bumvu amba mwanda bakansepa? Joseph mwine unena’mba: “Mhm, nkyākwetwepo bumvu. Mwanda nālangulukile dibajinji padi Yehova ne pa kumusangaja.”

Mvubu ya Kwifunda ne Kulanguluka

¹² Kulondalonda bulumbuluke ke enkapo kwepuka bintu bibi kete. I ne kwifunda ne kulanguluka pa bintu bilumbuluke bisonekelwe mu Kinenwa kya Leza, mwanda wa twingidije misoñanya yakyo myoloke mu būmi bwetu. Mulembi wa mitōto wāelele’mo kabobo amba: “Ē! mo nswelele mukanda-obe-wa-bijila! I kufwatakanya kwami dyuba dyonso.” (Mitōto 119:97) Lelo mu mpangiko yobe ya ku yenga ne yenga mudi ne kifundwa kya Bible ne kya mikanda ya bwine Kidishitu kya pa kasuku? I bine, kwitūdila kitatyi kya kwifunda na kininga Kinenwa kya Leza ne kulanguluka’po mu milombelo kilomba kwielela’ko. Omwanda i kiyampe pavule kutyepeja’ko kitatyi mu mingilo mikwabo. (Efisesa 5:​15, 16) Padi nsaa ya lubanga ikakwikadila mifwaninwe mwanda wa kulombela, kwifunda, ne kulanguluka.​—Enzankanya na Mitōto 119:147.

¹³ Kulanguluka kudi na mvubu mikatampe, mwanda kwitukwashanga tulame byotwifunda. Nakampata, kwitushitulanga ñeni ya kuyuka mumweno wa Leza. Tulete kimfwa: Kuyuka amba Leza i mupeleje busekese i kintu pa bula, ino ‘kujila pakatampe pene byobya bibibibi; ne kulamatyidila byobya bilumbuluke’ nao i mwanda wa pala. (Loma 12:9) Bine, tukokeja kufikila pa kumona busekese pamo na mwibumwenanga Yehova, shi tulanguluka pa bisonekwa bikatampe bya Bible, kimfwa, Kolose 3:5, usoñanya’mba: “Ipayai byakungitu byo mudi nabyo pano panshi; busekese, ne kujilula kwa bijila, ne kilokoloko kibikibi, ne mutyima wa kusaka byabubi, ne kwabila nako i konka kutōta bakishi konka.” Wiipangule bidi amba: ‘Lelo i kilokoloko’ka kya busekese kyomfwaninwe kwipaya? Le i bika bikokeja kulangula kilokoloko kibikibi byomfwaninwe kwepuka? Lelo kinombanga kwalamuna muswelo oñenda kisense na bantu ba ngitu ingi?’​—Enzankanya na 1 Temote 5:​1, 2.

¹⁴ Polo usoñanya bene Kidishitu belame ku busekese, ino bayuke kwifula mwanda “ke kukakolwa, nansha umo, kutabukila kudi mwanabo kumupya mambo.” (1 Tesalonika 4:​3-7) Wiipangule bidi amba: ‘Mwanda waka i bibi kulonga busekese? Shi nonge buno bubi, le i kibi’ka kyonkelonga ami mwine nansha kyonkalonga mukwetu? Lelo kikantenga muswelo’ka mu būmi bwa kumushipiditu, mu milangwe, nansha kungitu? Lelo bidi namani ku boba ba mu kipwilo bajilulanga bijila bya Leza baleka kwisāsa? Lelo bibafikijanga ku bika?’ Kuta mutyima na katentekeji ku bintu binena Bisonekwa pangala pa uno mwiendelejo, kufwaninwe kuningisha mushikwa otushikilwe bintu byonso bibi ku meso a Leza. (Divilu 20:14; 1 Kodinda 5:​11-​13; 6:​9, 10; Ngalatea 5:​19-​21; Kusokwelwa 21:8) Polo unena amba yewa wabusekese “kapelelepo muntu, mhm, wapele Leza.” (1 Tesalonika 4:8) Shi bene Kidishitu babine balonge kino kintu, lelo babulwe kupela Leza?

Bulumbuluke ne Kisense

¹⁵ Bukwashi bukwabo bwitwikadija nyeke balumbuluke i kisense kiyampe. Mulembi wa mitōto wāimbile amba: “Ne umpwani wa boba bonso bakwakaminwe [abe Yehova], kadi ne wa boba balaminine bitongwe byobe.” (Mitōto 119:63) Tudi na mvubu na kisense kilumbuluke kikalanga ku kupwila kwa pa kipwilo. (Bahebelu 10:​24, 25) Shi twitolwele pa kasuku, tukokeja kulanga’nka bya batwe bene, ne byabubi nabyo enka nabya. (Nkindi 18:1) Ino kisense kya ndoe kya bwine Kidishitu kikokeja kuningisha kusumininwa kwetu kwa kwikala nyeke balumbuluke. I bine, tufwaninwe ne kwilama ku kisense kibi. Eyo, tufwaninwe kwikala biyampe na balondakani netu, bengidi netu, ne balunda netu ba ku masomo. Ino shi binebine tunañanga na tunangu, nankyo tukepuka kulamata bininge boba kebalonda bulumbuluke bwa bwine Kidishitu.​—Enzankanya na Kolose 4:5.

¹⁶ Polo wāsonekele amba: “Kwinangila kubi kuboleja miswelo milumbuluke.” Pānene Polo bino binenwa, wādi udyumuna bantu betabije amba, babwanya kujimija lwitabijo lwabo shi bapwane na bantu betela bu bene Kidishitu bapela bufundiji bwa Bisonekwa butala pa lusangukilo. Musoñanya udi mu kino kidyumu kya Polo i wa kwingidija mu kisense kyetu panja ne munda mwa kipwilo mwine. (1 Kodinda 15:​12, 33) Eyo, kyotusaka ke kunyemapo batutu ne bakaka ba kumushipiditu amba mwandapo kebetabijepo milangwe yotulamete’ko ne itumwekela batwe bene bu itōka. (Mateo 7:​4, 5; Loma 14:​1-​12) Inoko, i kiyampe kwikala na budyumuku shi mu kipwilo mubaikala bantu bamo bekuja mu mwiendelejo walakanwa nansha boba belombola bu ba mutyima umbi, basenswe bya kwiuningauninga. (2 Temote 2:​20-​22) I kya tunangu kulamata boba botukokeja kuloelelwa nabo mu “kwikankamika kwa bātwe bonso.” (Loma 1:​11, 12) Kino kiketupa bukomo bwa kulondalonda mwiendelejo wa bulumbuluke ne kwikala nyeke mu “dishinda dya būmi.”​—Mitōto 16:11.

Endelelai Kulondalonda Bulumbuluke

¹⁷ Kitatyi kityetye kupwa kwa bene Isalela kukwata Ntanda ya Mulao, bavule umbukata mwabo bātongele kulonda byabubi​—ino bāfikilwa na kyamalwa. (Umbadilo, shapita 25) Dyalelo, bantu ba Yehova badi pa kibelo kya ntanda impya ya boloke. Kutwela’mo i dyese dya boba bendelela na kupaluka ku byabubi bya ino ntanda. Byotudi bantu bakubulwa kubwaninina, tukokeja kwikala na kukanina kubi kwa mutyima, ino Leza ukokeja kwitukwasha mwanda wa tulonde buludiki boloke bwitupa mushipiditu sandu wandi. (Ngalatea 5:​16; 1 Tesalonika 4:​3, 4) Shi kepano, tutei mutyima ku musoñanya wāletele Yoshua kudi bene Isalela amba: “Akamwai Yehova, ne kumwingidila aye mu boloke ne binebinepo.” (Yoshua 24:14) Kwakamwa Yehova na bulēme bwa kutyina kumufityija mutyima kyo kintu kikatampe kiketukwasha twendelele nyeke na kulondalonda mwiendelejo wa bulumbuluke.

¹⁸ Wivwane mutyima obe usakanga kusangaja Leza, nankyo sumininwa ute mutyima ku uno musoñanya wa Polo: “Byonsololo, shi bika, shi bika, bya binebine; byonso bilemekwa buleme, shi bika, shi bika; byonso bya boloke, shi bika, shi bika; byonso bitoka tō, shi bika, shi bika; byonso bya buyabuya, shi bika, shi bika; kadi byobya byonsololo bilumbuluke ku meso a bantu bonso, shi kadi namo mudi buleme, ne kutendelwa kwabyo, mufwatakanyei bino bintu bino’bi.” Shi ulonge uno muswelo, lelo kukalupuka bika? Polo wānene amba: “Longai’byo bino’bi; ne Leza wa ndoe nandi ukēkalanga nenu.” (Fidipai 4:​8, 9) Bine, na bukwashi bwa Yehova, ukokeja kwepuka byabubi kadi ukalonda bulumbuluke senene shē.

[Kunshi kwa dyani]

Myanda ya Kupituluka’mo

◻ Lelo i bika byotufwaninwe kulonga shi tusaka kulondalonda bulumbuluke?

◻ Hezekia, Danyele, ne Bahebelu basatu bāikele nyeke bantu balumbuluke mu ngikadilo ya muswelo’ka?

◻ Mu myanda itala kwepuka makinga a Satana, le i muswelo’ka otukokeja kwikala pamo bwa Danyele?

◻ Mwanda waka bene Kidishitu bafwaninwe kudyumuka mu myanda itala byamazua?

◻ Lelo kwifunda, kulanguluka, ne kisense, bidi na mvubu’ka mu kulondalonda bulumbuluke?

[Bipangujo bya Kifundwa]

 1. Lelo byabubi i kika, ne mwanda waka kebyonakenyepo mutōtelo wa Yehova?

 2. Le bulumbuluke i kika, ne mwanda waka kifwaninwe kulonga bukomo mwanda wa kwikala nyeke mulumbuluke?

 3. Lelo Mulopwe Ahaza wāpile mambo a bilongwa’ka bibi?

 4. Le Hezekia wādi wiendeja namani mu ngikadilo miyule byabubi yaādi’mo?

 5. I matompo’ka āfikile Danyele ne balunda nandi basatu?

 6. Mwanda waka tunena amba Danyele wālondelelondele bulumbuluke?

 7. Le i ñeni’ka yotukokeja kuboila pa mwiendelejo wālondele Danyele ne balunda nandi basatu?

8. Bankasampe bene Kidishitu le bakokeja kupela namani kwikuja mu ntanda ya Satana?

 9. Lelo i matompo’ka akokeja kutana bene Kidishitu mu byabusunga bya ino ntanda, ne i muswelo’ka obafwaninwe kwiendeja?

10. Mwanda waka kifwaninwe ‘kudyumuka’ shi ketulonga butongi bwa minjiki?

11. Mwine Kidishitu ukokeja kudyumuka ku bintu bilombolwa ku matelevijo, ku mavideo, ne ku masinema muswelo’ka?

12. I kika kinenenwa amba kwifunda kwa pa kasuku ne kulanguluka bidi na mvubu mikatampe ku boba basaka kulondalonda bulumbuluke?

13, 14. (a) Mwanda waka kulanguluka i kwamvubu mikatampe? (b) Lelo i kulanguluka pa bisonekwa’ka kukokeja kwitupa bukomo bwa kwepuka busekese?

15. Lelo kisense kidi na mvubu’ka mu kulondalonda kwetu kwa bulumbuluke?

16. Kwingidija 1 Kodinda 15:33 kukokeja kwitukwasha dyalelo muswelo’ka mu myanda itala kulondalonda bulumbuluke?

17. Kukwatañana na Umbadilo shapita 25, lelo i kyamalwa’ka kyāponene bene Isalela, ne kino kitufundija kika?

18. Pa byabubi ne bulumbuluke, lelo bene Kidishitu bonso bafwaninwe kusumininwa kulondalonda’po byepi?

[Kifwatulo pa paje 15]

Nkasampe Hezekia wālondelelondele bulumbuluke nansha byaādi ujokolokelwe na batōtyi ba Moloka

[Kifwatulo pa paje 16]

Bene Kidishitu bafwaninwe kudyumuka mu myanda itala byamazua