Kwisāshila Bantu Biyampe

MUKULUMPE mwine Kidishitu ufwaninwe kwisāshila bantu “mwakufundijija lufundijo lukomo.” (Tet. 1:9) Kyaba kimo kwisāshila bantu kuloñwanga ne mu ngikadilo mikomo mpata. Nanshi i kipite buya kudingila madingi akwatañene na misoñanya ya mu Bisonekwa. O mwanda bakulumpe bafwaninwe kulonda ano madingi anena’mba: “Utá mutyima ku . . . kwibēsashila.” (1 Tem. 4:13) Eyo, pano tusa kwisambila bidi pa bakulumpe nansha pa boba bafikila pa ano madyese, inoko kyaba kimo bambutwile nabo bafwaninwe kwisāshila babo bana ne boba bendeja bifundwa bya Bible nabo kwisāshila befundi ba Bible. Ino misoñanya imo yonka ilondwanga mu ino myanda yonso.

Ngikadilo Ilomba’ko. Pa kuyuka i kitatyi’ka kifwaninwe kwisāshila bantu, i biyampe kubandaula ngikadilo isonekelwe mu Bible, yobādi besāshila’mo bantu. Mutumibwa Petelo wēsāshile bakulumpe amba bate mutyima ku biselwa byabo bya bu bakumbi ba luombe lwa Leza. (1 Pet. 5:1, 2) Polo wādingile Tetusa ēsāshile bansongwalume bekale “kwilemeka abo bene senene.” (Tet. 2:6) Polo wāsoñenye bakwabo bene Kidishitu besambe “kyakanwa kimo kyonka,” bepuke boba bakimba kuleta nkalañani mu banababo. (1 Kod. 1:10; Loma 16:17; Fid. 4:2) Nansha Polo byaāfwijije’ko kipwilo kya mu Tesalonika pa bintu bilumbuluke byobādi balonga, ino wēbesāshile balonde ne pa mfulo bufundiji bobāfundijibwe. (1 Tes. 4:1, 10) Petelo wāzenzele banababo bene Kidishitu bendelele na “kujila bilokoloko bya bu-ngitu.” (1 Pet. 2:11) Yude nandi wēsāshile banababo amba bekale ‘kulwila nakampata lwitabijo’ kutyina amba lupusa lwa bampikwa bwine Leza balonda mwiendelejo umbi lwākebatādila. (Yude 3, 4) Bene Kidishitu bonso i basoñanibwe kwisāshila abo bene na bene kutyina amba mityima ya bamobamo yakekala myumu pa kongolwa na bukomo bwa bubi. (Bah. 3:13) Petelo wēsāshile Bayuda bādi kebaitabije Kidishitu amba: “Mwipandijei bidi bānwe bene ku luno lukongo lukondame lwa bantu.”​—Bil. 2:40.

Le i ngikadilo’ka ilombwa pa kwisāshila bantu mu bintu bya uno muswelo? Le muntu wisāshila bakwabo ukokeja namani kumwekeja binenwa byandi bu bya kampeja-bukidi inoko pambulwa kasusu nansha kalobolobo?

‘Pa mwanda wa Buswe.’ Shi ketwisāshilapo bantu ‘pa mwanda wa buswe,’ nankyo kukamweka bu difuno. (Fil. 9) Eyo, shi padi mwanda ulomba kulongwa ponka na ponka, muneneno wa muneni ufwaninwe kulombola amba i mwanda wa kupēlakana nao. Ino kunena na kumonga kukamweka bu kwilōngela bantu. Koku nako kadi muneneno wetu ufwaninwe kwikala musumininwe, wa mushike. Muneneno wa buswe o ukakunka bemvwaniki ku mityima. Polo paādi wisambila pa aye mwine ne bapwani nandi, wānene bene Tesalonika amba: “Banwe bene muyūkile kala po twadi nenu bānwe bonso, ku muntu, ku muntu, pamo bwa shamuntu ne bāna bandi, kwimwisashila.” (1 Tes. 2:11) Bano batadi bene Kidishitu bādi bazenza banababo na buswe. I biyampe binenwa byobe bilupuke ku mutyima otele bya binebine bemvwaniki bobe.

Ikala na bunwa. Kokepotomeja na boba bokimba kukunka mutyima wa kulonga kintu. Ino kadi kokekaka kwibalombola “ñeni yonsololo ya Leza.” (Bil. 20:27) Ba mityima ya kufwija’ko kebakafitwapo nansha kukushikwa mwanda’po ubebadingila na kanye kulonga byobya byoloke.​—Mit. 141:5.

Pavule, i biyampe kubadikila na binenwa bya kufwija’ko kutamba ku mutyima penepa kowisāshila bantu. Langa bidi bintu biyampe biloñanga banabenu​—bintu bisangela Yehova: lwitabijo lumweka mu mingilo, buswe bwibatonwena ku kwipāna, ne kūminina kwabo mu matompo. (1 Tes. 1:2-8; 2 Tes. 1:3-5) Kino kikakwasha banabenu bemone amba badi na mvubu, bantu bobemvwanija, ne kikebatūla mu ngikadilo ya kwitabija binenwa bya kwibazenza bilonda’po.

“Ne Mutyima Utūkije Monka.” I biyampe kwisāshila bantu “ne mutyima utūkije monka.” (2 Tem. 4:2) Le kino kilomba bika ne bika? Kutūkija mutyima i kutyumwina bibi nansha lonji mu manwi na kitūkijetyima. Yewa utūkije mutyima ulamanga nyeke kikulupiji amba bemvwaniki bandi bakalonda byobya byanena. Kwisāshila bemvwaniki bobe na uno mushipiditu kekukebapepo milangwe ya kulanga amba wibafwatakenyanga bibi. Kikulupiji kyokulupile amba batutu ne bakaka bobe basakanga kwingidila Yehova pangya bukomo bwabo kikebatenga balonge byobya byoloke.​—Bah. 6:9.

‘Na Kufundija Lufundijo Lukomo.’ Le mukulumpe ukokeja namani kwisāshila bantu ‘na kufundija lufundijo lukomo’? I na “kūminina monka mu mwanda wa binebine, wa monka mwendele lufundijo.” (Tet. 1:9) Kokanena milangwe yolanga, ino leka lupusa lwa Kinenwa kya Leza lukunke bantu ku mityima. Leka Bible asendulule milangwe yobe pa byobya byokanena. Lombola byabuyabuya bimwenwa mu kulonda binena Bible pa mwanda owisamba’wa. Lama ne bipa​—bya dyalelo ne bya mu mafuku a kumeso​—bilupuka ku kupela kulonda Kinenwa kya Leza, ne kulupija nabyo bemvwaniki bobe bayuke amba bafwaninwe kushinta.

Tadija shi ushintulwilanga bemvwaniki bobe patōka byobafwaninwe kulonga ne muswelo obafwaninwe kulonga’byo. Lombola patōka amba mulangilo obe wimanine pa Bisonekwa. Shi Bisonekwa bishidile muntu ne muntu bwanapabo kampanda, lombola pafudile buno bwanapabo. Kupwa, mu mvuyo yobe, kunka dya mfulo mityima ya bemvwaniki basumininwe kulonga byowanena.

Na “Bukankamane Bukatampe.” Pa kwisāshila bakwenu senene, ufwaninwe kwikala na “bukankamane bukatampe bwa mu kwitabija.” (1 Tem. 3:13) Le i bika bikwasha muntu anene na bukankamane? I shi kyandi “kyelekejo kya mīngilo milumbuluke” kikwatañene na bine byakankamika banababo kulonga. (Tet. 2:6, 7; 1 Pet. 5:3) Shi kidi namino, boba bakankamikwa kulonga’po kintu bakamona amba yewa wibesāshila kebalombangapo kulonga kintu kyakalongapo aye mwine. Bakemona amba nabo bakokeja kwiula kimfwa kya lwitabijo lwandi monka mwalongela aye mwine bukomo bwa kwiula Kidishitu.​—1 Kod. 11:1; Fid. 3:17.

Kwisāshila bantu kwimanine pa Kinenwa kya Leza, kulongwa na buswe, kulupulanga bipa biyampe. Boba badi na kiselwa kya kwisāshila bakwabo bafwaninwe abo bene kulonga bukomo bwa kwibesāshila biyampe.​—Loma 12:8.