Lamai Bumo mu Kipwilo

Kitatyi kyotwitana pamo na banabetu mu lwitabijo, twiivwananga pamo bwa Mulopwe Davida wānenene amba: “Talai! Mobikadile biyampe kadi bisangaja bana na bana kwikala pamo mu bumo!” (Ñimbo ya Mitōto 133:1) Bumo bwetu ke kintupo kiidile’ko mu kitulumukila. Muntu ne muntu wingilanga mwanda wa kulama’bo.

1. I mwanda’ka utulumukwa udi mu bantu ba Leza?

Shi ubakatanwa ku kupwila mu ntanda mikwabo, padi kukevwanapo biyampe ludimi lobanena, inoko ukeivwana mu miswelo mivule amba ubafika kwenu. Mwanda waka? Mwanda twifundanga Bible na kwingidija mabuku amo onka konso. Kadi twielelanga’ko kulombola buswe mu bukata mwetu. Nansha shi twikale kwepi, batwe bonso ‘twitanga dijina dya Yehova ne kumutōta mu bumo.’​—Zefenia 3:9, kunshi kwa dyani.

2. I muswelo’ka obwanya kushinsakanya bumo?

“Mwisanswei banwe bene na bene bininge ne mutyima umo.” (1 Petelo 1:22) Ubwanya kulonda namani ano madingi? Pa kyaba kya kuta mutyima ku kubulwa kubwaninina kwa bakwabo, tala ngikadila yabo miyampe. Pa kyaba kya kupwana enka na boba bomusenswe nabo bintu bimo, tompa kuyuka batutu ne bakaka batamba mu bibidiji palapala. Tubwanya kadi ne kwielela’ko kujula miji ya mfwatakani yotubwanya kwikala nayo mu mityima yetu.​—Tangai 1 Petelo 2:17.a

3. Le ukalonga bika shi mubepotomeja na mwanenu mwine Kidishitu?

Tudi mu bumo, inoko kadi twi ba kubulwa kubwaninina. Kyaba kimo tubwanya kutyumuna bakwetu mutyima enka ne kwibasanshija. Kinenwa kya Leza kitunena’mba: “Endelelai . . . kwilekela na mutyima umo,” kadi kibweja’ko amba: “Monka mwemulekēle Yehova na mutyima umo, nenu mufwaninwe kulongela monka.” (Tangai Bene Kolose 3:13.) Ke tudi basanshije Yehova misunsa mivule, ino nansha nankyo witulekelanga. O mwanda nandi ukimba tulekele banabetu. Shi ubayuka’mba wi musanshije muntu, kwata’ko mulangwe wa kwenda kukapwija mwanda’wa.​—Tangai Mateo 5:23, 24.b

LANGULUKA BININGE

4. Talula mfwatakani

Tusakanga kusanswa banabetu bonso. Inoko padi tubwanya kulwa pa kwitabija motudi boba bamweka bu beshile netu. Le i bika bibwanya kwitukwasha? Tangai Bilongwa 10:34, 35, ne kwisambila pa bino bipangujo:

• Yehova i mwitabije bantu ba miswelo yonso bekale Batumoni bandi. Le kino kifwaninwe kwikala na lupusa’ka pa muswelo omona bantu batamba ku bibidiji bishile na byobe?

• I mfwatakani ya muswelo’ka ivudile koshikete yofwaninwe kulwa nayo?

Tangai 2 Bene Kodinda 6:11-13, ne kwisambila pa kino kipangujo:

• Molangila, i muswelo’ka obwanya kusanswa bininge batutu ne bakaka ba koku ne koku?

5. Lekela na mutyima umo kadi pwana na mwanenu

Yehova witulekelanga na mutyima umo nansha byakasakilwapo batwe kumulekela. Tangai Ñimbo ya Mitōto 86:5, ne kwisambila pa bino bipangujo:

• Lelo lulekelo lwa Yehova i lukatampe namani?

• Mwanda waka ufwijanga’ko pa muswelo ulekela Yehova bantu?

• I ngikadilo’ka ikokeja kulengeja bikale bikomo kupwana na bakwabo?

I muswelo’ka otubwanya kwiula Yehova ne kushala umbumo na batutu ne bakaka? Tangai Nkindi 19:11, ne kwisambila pa kino kipangujo:

• Shi muntu wetulubila ne kwitusanshija, i bika bikokeja kulengeja myanda ipwe?

Kyaba kimo tulubilanga bakwetu. Ino shi uno mwanda ubetufikila, i bika byotufwaninwe kulonga? Talai VIDEO, ne kwisambila pa kipangujo kilonda’kya.

VIDEO: Kulonga Ndoe Kuletanga Madyese (6:01)

• Mu ino video, i bika byalongele uno kaka mwanda wa kwikale ndoe?

6. Kimba biyampe bidi mu batutu ne bakaka

Shi tubefwena bininge na batutu ne bakaka, tuyukanga myanda yobakomene’mo ne yobazozele’mo. I muswelo’ka otubwanya kwimanina pa bintu byobakomene’mo? Talai VIDEO, ne kwisambila pa kipangujo kilonda’kya.

VIDEO: Ikala Muyampe Bininge! (5:10)

• Le i bika bikakukwasha umone ngikadila miyampe idi mu batutu ne bakaka?

Yehova utanga mutyima ku ngikadila miyampe. Tangai 2 Bilongwa bya Mafuku 16:9a, ne kwisambila pa kino kipangujo:

• Le ubeivwana namani pa kuyuka’mba Yehova utanga mutyima ku ngikadila yobe miyampe?

MU KĪPI

Tubwanya kulama bumo mu kipwilo na kulekela batutu ne bakaka ne na kwibalombola buswe pampikwa kusañuna.

Pitulukai’mo

• I muswelo’ka obwanya kutalula mfwatakani?

• I bika byokalonga shi mubepotomeja na mwanenu mwine Kidishitu?

• Mwanda waka ukimba kwiula kimfwa kya Yehova kya kulekela bantu?

KIMBA

Tala kyelekejo kimo kya Yesu kitukwasha tuleke kutyibila bakwetu mambo.

Talula Mulamba (6:56)

Le bitulomba’nka kulomba lusa ne potumwene amba ketudipo na kilubo?

“Kulomba Lusa​—Lufungulo Lutwala ku Ndoe” (Kiteba kya Mulami, 1 Kweji 11, 2002)

Tala bana-balume babidi batamine mu muzo wa nkalañani mobaikadile umbumo.

Johny ne Gideon: Badi Balwana, Pano Ke Bana na Bana (6:42)

Tala miswelo yobwanya kupwija kwisusa kwa na mwanenu pokekwavutakenye ndoe mu kipwilo.

“Pwijai Kwisusa na Mushipiditu wa Buswe” (Kiteba kya Mulami, Kweji 5, 2016)