Lelo I mu Miswelo’ka Yehova Mwalombolanga Buswe Kotudi?

 1. Le Mutumibwa Yoano witukankamika tulangulukile pa bika ne mwanda waka?

MUTUMIBWA Yoano witukankamika tulanguluke na mushike pa buswe bukatampe bwituswele Yehova. Tutanga mu 1 Yoano 3:1 amba: “Talai mwikadile buswe bwitusenswe Tata!” Kitatyi kyotulangulukila pa muswelo wituswele bininge Yehova ne mwalombwela buswe kotudi, tufwenanga kwadi ne kumusanswa bikatampe.

 2. Mwanda waka i bikomo ku bantu bamo kuyuka’mba Leza wibasenswe?

² Kya bulanda, bantu bamo kebamonangapo muswelo wibaswele Leza. Balañanga’mba Leza katelepo bantu mutyima. Bakulupile’mba Leza uletanga’nka bijila ne kupa mfuto boba kebamukōkelepo. Mwanda wa mfundijo ya bubela, bamo balañanga’mba Leza i tapañani ne kadi i bikomo kumusanswa. Bakwabo nabo balanga’mba Leza uswele bantu bonso pa kubulwa kubanga byobalonga. Inoko, kifundwa kyobe kya Bible kyakukweshe uyuke bubinebine butala padi Yehova. Wayukile’mba buswe ye ngikadilo mikatampe yandi ne kadi wētupele Mwana wandi bu kinkūlwa kotudi. (Yoano 3:16; 1 Yoano 4:8) Ino, pa mwanda wa bintu bikutananga mu būmi, bibwanya kwikala bikomo kodi kumona muswelo ukusenswe bininge Yehova.

 3. Le i bika biketukwasha tuyuke’mba Yehova wituswele?

³ Pa kuyuka buswe bwituswele Yehova, tufwaninwe bidi kuyuka amba Yehova ye wētupangile. I mwitupe būmi. (Tanga Ñimbo 100:3-5.) O mwanda mwine Bible ulombola’mba muntu mubajinji wādi “mwanā Leza.” (Luka 3:38) Kadi Yesu wetufundije kwita Yehova bu “Tata wetu wa mūlu.” (Mateo 6:9) Bine, Yehova i Tata wetu, kadi wituswele monka muswilanga shabana muyampe bana bandi.

 4. (a) Le Yehova i Tata wa muswelo’ka? (b) Le i bika byotusa kubandaula mu kino kishinte ne mu kilonda’ko?

⁴ I bikomo ku bamo kumona amba tata i muntu wa buswe. Ke-pantu, bavulukanga masusu a pa bwanuke ebasuswile bashabo. Yehova kabwanyapo kulonga bino bana. I Tata muyampe ye tudi nandi. (Ñimbo 27:10) Wituswele bininge ne witutele mutyima mu miswelo mivulevule. Kitatyi kyotwiteleka’mba tuswelwe na Yehova, po pene tukamusanswa bininge. (Yakoba 4:8) Mu kino kishinte, tusa kubandaula’mo miswelo iná ilombola’mo Yehova buswe kotudi. Kadi mu kishinte kilonda’ko, tukabandaula’mo miswelo iná yotubwanya kulombola amba tumusenswe.

 5. Le i bika Leza byapele bantu bonso?

⁵ Mutumibwa Polo paādi mu Atene mu Ngidiki, wāmwene’mo bilezaleza bivule kadi ne bantu bādi bakulupile amba bibalezaleza byabo byēbapele būmi. Ebiya wēbasapwila amba “Leza mwine wālongele ino ntanda ne bintu byonso bidi’mo. Wēbanena amba Leza “aye ye upa bantu bonso būmi ne umpuya ne bintu byonso, i pa mwanda wa aye potwikele na būmi, tujina ne kwikala’ko.” (Bilongwa 17:24, 25, 28) Yehova witupanga bintu byonso byotusakilwa mu būmi mwanda wa kwibusangela. Kulangulukila pa bintu kamukaya byaetupele kulombola’mba witusenswe.

 6. Lelo Yehova i mwitupe kifuko kya muswelo’ka? (Tala kifwatulo ku ngalwilo.)

⁶ Kimfwa, Yehova i mwituteakenye’ko kīkalo kiyampe. (Ñimbo 115:15, 16) Kutabukidila, ntanda i mipite imbuo yonso yaāpangile. Befundi ba sianse basokwele kifuko ne kutana’mo imbuo mivule, inoko kebasokwelepo umbuo mukwabo ubwanya kwikala’mo bantu. Yehova ketupelepo’nka bintu byotusakilwa mu būmi kete, ino kadi i mupange ntanda milumbuluke, mikomo kadi kifuko kikunkane pene potukokeja kusangela būmi. (Isaya 45:18) Potulangulukila pa kifuko kitupele Yehova Tata wetu, bine, tumonanga muswelo waetuswele.​—Tanga Yoba 38:4, 7; Ñimbo 8:3-5.

 7. Le muswelo witupangile Yehova ulombola namani amba wituswele binebine?

⁷ Muswelo mukwabo ulombwele Yehova buswe kotudi i kwitupanga kwaetupangile na bukomo bwa kumwiula. (Ngalwilo 1:27) Kino kilombola’mba tubwanya kwimwena buswe bwandi ebiya netu twamuswa. Uyukile amba kino kiketupa nsangaji ya binebine. Bine, bana basangalanga pa kuyuka’mba bambutwile babo bebaswele. Kadi vuluka’mba, Yesu wetufundije amba tukekala na nsangaji shi tupwane bininge na Yehova Tata wetu. (Mateo 5:3) Witupanga “bintu byonso bya ntanda ne miseke byotudi nabyo.” Na bubine, i wa buntu kadi wituswele bininge.​—1 Temote 6:17; Ñimbo 145:16.

 8. Mwanda waka tusakanga kufundijibwa na Yehova?

⁸ Bashabana baswele babo bana kebasakangapo bongolwe. Ino bambutwile bavule dyalelo kebakulupilepo misoñanya ya mu Bible ya kiyampe ne kibi. O mwanda kebabwanyangapo kuludika babo bana, kwine kutambanga divule dine kubulwa nsangaji ne kavutakanya. (Nkindi 14:12) Inoko, Yehova uludikanga bandi bana biyampe mwanda i “Leza wa binebine.” (Ñimbo 31:5) Usangelanga paetufundija bubinebine butala padi. Kadi witufundijanga mwa kumutōtela ne kwitulombola muswelo muyampe wa mwa kwikadila mu būmi. (Tanga Ñimbo 43:3.) Le i bika bine bitufundijanga Yehova bilombola amba witusenswe bininge?

9, 10. (a) Mwanda waka Yehova wilombolanga aye mwine kotudi? (b) Lelo i bika byaetufundijanga bitala pa mpango yandi?

⁹ Dibajinji bidi, Yehova i mwisokole kotudi. Witusakilanga tumuyuke. (Yakoba 4:8) Kadi i mwitusokwele dyandi dijina. Bine, Bible i mutele dyandi dijina misunsa mivule kutabuka majina makwabo. Kadi Yehova witulombolanga bumuntu bwandi. Kitatyi kyotubandila bintu byapangile, tumonanga amba udi na bukomo ne tunangu. (Loma 1:20) Potutanga Bible, tuyukanga buyampe bwandi ne muswelo waetuswele bininge. Twiivwananga bu tudi nandi pabwipi bininge pano potwayuka bumuntu bwandi buyampe.

¹⁰ Kadi Yehova witufundijanga mwikadile mpango yandi. Witutelanga bu ba mu kisaka kyandi. Ne kadi witusapwilanga byasaka kotudi mwanda wa twingile mu bumo na ndoe na muntu yense wa mu kisaka kyandi. Bible ulombola patōkelela amba Leza wetupangile na bwanapabo bwa kuyuka kiyampe ne kibi ino kebwakwiendejapo batwe bene. (Yelemia 10:23) Yehova uyukile biyampe bidi motudi. Shi twitabije’tu lupusa lwandi ne kumukōkela papo tubwanya kwikala mu būmi bwa nsangaji ne maloa. Yehova witufundijanga buno bubinebine bwa kamweno mwanda wituswele.

11. Lelo i bika bitulombolanga Tata wetu wa buswe pa mafuku a kumeso?

¹¹ Tata wa buswe ulangulukilanga bininge pa būmi bwa kumeso bwa bandi bana. Wibasakilanga bekale na būmi buyampe. Kya bulanda, bantu bavule dyalelo baselele mutyima kūlu mwanda wa mafuku āya kumeso, kadi beendejanga bibi mu būmi na kwingidila bintu bivule bya lupito. (Ñimbo 90:10) Bine, tufwijanga’ko bininge Yehova, Tata wetu mwanda ketufundijangapo’nka mwa kwikadila pano na būmi bwa nsangaji ino i mwitulaye būmi bulumbuluke bwa mu mafuku a kumeso!

12. Lelo Yehova wādingile namani Kena ne Baluki?

¹² Kitatyi kyāmwene Yehova amba Kena udi mu kyaka kya kulonga bintu bibi, wāmukweshe na kumwipangula amba: “Kyokaladile i kika le? Kadi kyodi mu meso fututu i kika? Shi ulonga biyampe lelo ubulwepo kutambulwa.” (Ngalwilo 4:6, 7) Kena wāpelele madingi a Yehova kupwa kasusuka. (Ngalwilo 4:11-13) Mu kitatyi kikwabo, Yehova wāmwene ngikadilo imbi ya Baluki mine yādi ibwanya ku mukokeja ne kumutyumuna mutyima. Ebiya Yehova wāsapwila Baluki amba milangwe yandi yadi mifwe kadi wādi ufwaninwe kushinta. Baluki wāivwene madingi a Yehova ebiya wapanda.​—Yelemia 45:2-5.

13. Lelo bengidi ba Yehova ba kikōkeji bēfundile bika ku matompo abo?

¹³ Yehova wituludikanga ne kwitudingila mwanda wituswele. Kakimbangapo’tu’nka kwitulemununa popa potusakilwa madingi, ino kadi witufundijanga. (Bahebelu 12:6) Mu Bible tutañanga’mo myanda ya bengidi ba kikōkeji bene Yehova baāfundije kwikala bu bantu bayampe. Kimfwa, Yosefa, Mosesa ne Davida bātenwe na matompo makatampe. Yehova wādi nabo mu matompo abo. Bintu byobāmwene mu matompo abo byēbakweshe kitatyi kyēbapele Yehova biselwa bikatampe. Kitatyi kyotutanga mu Bible muswelo Yehova wākwatakenye ne kufundija bantu bandi, bine twimonanga amba Yehova wituswele.​—Tanga Nkindi 3:11, 12.

14. Shi tubalonga kintu kampanda kibi, le Yehova witulombolanga namani amba wituswele?

¹⁴ Nansha shi tubalonga bintu bibi, Yehova wendelelanga na kwitulombola buswe. Shi twitabije madingi andi ne kwisāsa, ‘uketulekela byamwiko’tu.” (Isaya 55:7) Le kino kishintulula bika? Binenwa bya Davida bitala pa lulekelo lwa Yehova kotudi bitulombolanga’mba i Tata wa lusa lukatampe otudi nandi: “Wakulekela bubi bobe bonso; wakūndapa mba yobe yonso; wakukūla būmi bobe ku bonakane; wakuvwika kanye ka lusa, ne lusa lwa kikōkeji, bwa kilongo pa mutwe. Monka mulepele kutunduka na kushika, e monka mwatundulwila ne kujilula kwetu ko tudi.” (Ñimbo 103:3, 4, 12) Yehova witudingilanga ne kwituludika mu miswelo mishileshile. Lelo nobe udi na kampeja-bukidi ka kushinta? Vuluka nyeke amba Yehova witudingilanga mwanda wituswele.—Ñimbo 30:5.

15. Le Yehova witulombolanga buswe mu muswelo’ka mukwabo?

¹⁵ Tata wa buswe ukiñanga kisaka kyandi ku kyaka. Mo mulongelanga ne Tata wetu Yehova. Kaimba wa mitōto wāsonekele amba: Yehova “ulelele myuya ya bapandulwemo bandi; wibanyongololanga ku kuboko kwa babi.” (Ñimbo 97:10) Langulukila’po bidi pa kino: pano ubakopa bukidibukidi mwanda wa kukinga meso obe mwanda wiamwene bu a bulēme kodi, ne Yehova nandi ukiñanga bukidibukidi bantu bandi ke-pantu i balēme kwadi.​—Tanga Zekadia 2:8.

16, 17. Le i muswelo’ka Yehova waākingile bantu bandi ba pa kala ne ba dyalelo?

¹⁶ Yehova wādi ukinga bantu bandi ba pa kala ne ba dyalelo kupityila ku ba mwikeulu. (Ñimbo 91:11) Mwikeulu umo wāipaile bashidika bene Ashidia 185 000 mu bufuku bumo ne kupandija bantu ba Leza. (2 Balopwe 19:35) Mu myaka katwa kabajinji, ba mwikeulu bāpandije ba Petelo, Polo ne bakwabo mu kifungo. (Bilongwa 5:18-20; 12:6-11) Panopano ponka, kwadi divita dikatampe mu ntanda imo ya mu Afrika. Ntanda yadi mu musala mwanda bonso badi balwa badi beba, balālañana ku bukomo ne kwipayañana. Nansha byokekwafwilepo mwanetu nansha umo, banabetu bavule bajimije bintu byabo. Inoko, bonso bamwene buswe bwa Yehova ne kuyuka’mba wibatele mutyima. Nansha byobasusukile bininge, ino badi na nsangaji. Kitatyi kyaendele ntunguluji wa ku kité kya ntanda kukebapempula waipangwile’ko batutu ne bakaka mobadi bekadile, banene amba, “Tudi biyampe, bine, Yehova wadi netu!”

¹⁷ Bine, bengidi bamo ba Yehova, pamo bwa mwanā bwanga Shitevani ne bakwabo badi pamo wa aye, bāipailwe mwanda wa kikōkeji kyabo. Yehova kabwanyapo nyeke kukankaja kino kufika. Ino ukiñanga bantu bandi mu kikonge ne kwibadyumuna mu makinga onso a Satana. (Efisesa 6:10-12) Tusokolanga bino bidyumu mu Bible ne mu mabuku aleta bulongolodi bwa Yehova. Kimfwa, twi befunde kyaka kidi pa Entelenete, kusanswa lupeto, busekese, ne mafilime alengeja bukalabale, mabuku, nansha makayo. Na bubine, Yehova witusenswe kadi witukiñanga.

18. Lelo wiivwananga namani pa buswe bukuswele Yehova?

¹⁸ Kitatyi kyālangulukile Mosesa pa myaka yonso yāingidile Yehova, wāmwene amba Yehova umuswele, kanena amba: “Ē! witwikutyije lubanga ne lusa lobe; amba tusepelele ne kusangala mafuku etu onso.” (Ñimbo 90:14) Tudi na dyese ne dyese’po dya kwivwanija ne kuyuka’mba Yehova wituswele. Bine, kino i kintu kya bulēme kashā kuswibwa na Yehova! Twiivwananga pamo bwa mutumibwa Yoano wānene amba: “Talai mwikadile buswe bwitusenswe Tata!”​—1 Yoano 3:1.