Wakapingaja mukalenge mu njila

‘MMUNYI mudi muntu muimpe nunku mua kufika ku dienza malu mabi mushindu eu?’ Alu ndukonko luvua muprofete Natana mua kuikala mudiele pavuaye uya mu dibalasa dia mulunda wende mukalenge Davidi. Yehowa ukavua mumutume kudi Davidi bua kumuambila ne: Masiya uvua ne bua kupatukila mu ndelanganyi yende. (2 Sam. 7:4, 12, 13) Kadi mpindieu Davidi uvua muenze mpekatu mibi mitambe ne Yehowa uvua musue bua Natana amupingaje mu njila.

Yehowa uvua mumone mpekatu ivua Davidi muenze mu musokoko. Nzambi uvua ne bua kuikala muyitanduile Natana. Dilolo kampanda Davidi uvua wendakana kuulu kua nzubu wende, kumonaye ‘mukaji muimpe kumona’ wowa mâyi. Wakalua kutuma muntu bua alue nende kudiye. Mukaji au uvua Beta-sheba. Davidi uvua mumanye ne: uvua mukaji wa musalayi wende wa lulamatu Uliya muena Hiti. Nansha nanku, wakenda nende masandi. Beta-sheba wakalua kuambila Davidi ne: uvua ne difu diende. Davidi wakakeba kusokoka mpekatu wende au. Wakatumina Uliya mukenji bua umbuke ku mvita kuvuaye apingane kuende, ne meji a yeye kulala ne mukajende. (Fuanyikija ne 1 Samuele 21:5) Kadi Uliya wakabenga bua kushiya tshiluilu tshia Yehowa ku mvita aku. Ke Davidi kukebaye lungenyi lua tshia kuenza bua bateke Uliya muaba uvuabu mua kumushipa bipepele mu mvita. Lungenyi luende alu luakakumbana. Pakashipabu Uliya, Davidi wakateka Beta-sheba kumbelu kuende.

Bible udi wamba ne: “Bualu buvua Davidi muenze buvua bunyingalaje Yehowa bikole.” Ke Nzambi mulelela kutuminaye muprofete Natana dîyi bua aye kupingaja Davidi mu njila ne amuleje mpekatu wende patoke. Pavua Natana mu njila mutangile kua mukalenge Davidi, uvua mua kuikala mudiebeje tshivua Davidi mua kumuenzela. Mu kuamba kuimpe, uvua mumanye ne: Davidi uvua mushipe Uliya, nunku uvua pamuapa udiebeja tshivuaye mua kumuenzela yeye muele mpekatu wende patoke ne mumupeshe mibelu. Natana uvua musue bua mubelu uvuaye upesha Davidi umulenge ku muoyo bua ajadike bunene bua mpekatu uvuaye muenze. Kakuyi mpata, Natana wakasambila bua malu ende bimpe.

Natana wakaya kudi mukalenge Davidi ne tshilejilu tshia kumueleshisha natshi meji. Wakamuambila ne: kuvua bantu babidi mu tshimenga tshikuabu, umue uvua mubanji muikale ne mikoko ne ngombe bia bungi. Mukuabu uvua mupele muikale ne kana ka mukoko kamue, uvua mukanange bikole, mukateke ne mu nzubu muvuaye ulala ne uvua ukatabalela bikole. Dituku dikuabu, muenyi wakakuata muntu mubanji au ne uvua dijinga ne mukoko wa kumushipela. Kadi kakangata mukoko wa mu mikoko yende to. “Wakangata kana ka mukoko ka muntu mupele” au, kukashipelaye muenyi wende au. Pakajikija Natana kulondela Davidi bualu abu, Davidi wakumvua tshiji tshikole! Kuambaye ne: “Bushuwa, anu bu mudi Yehowa ne muoyo, muntu udi muenze bualu bua nunku mmukumbanyine lufu!” Uvua mufiike munda bikole bualu muntu mubanji au uvua muenze ‘bualu abu kayi luse’ to.

Natana uvua musungule tshilejilu tshimpe tshitambe. Bidi nanku bualu Davidi uvua mulami wa mikoko ne kavua musue dienzelangana malu mabi to. Ke Natana kumuambila ne dikima dionso ne: “Muntu au nguewe!” Bualu abu buakabungamija Davidi bikole. Natana wakamuleja malu mabi onso avuaye muenze, kumulejaye kabidi ne: Yehowa uvua muamone onso. Ke yeye kumuambila dipangadika dia Yehowa dia ne: yeye ne dîku diende bavua ne bua kukenga bikole munkatshi mua bidimu bia bungi. Davidi wakamba tshinyi?

Wakamba ne: “Ndi muenzele Yehowa mpekatu.” Wakumvua bibi, kunyingalalaye ne muoyo mujima bua mpekatu wende au. Natana uvua bushuwa mumvue bimpe pavuaye muambile Davidi ne: “Yehowa pende udi ukufuila luse bua mpekatu webe. Kuakufua to.” Nansha nanku, Davidi wakakenga bikole bua mpekatu wende ne Beta-sheba. Muana uvuaye mulele nende wakafua. Davidi ne dîku diende bakatata bikole munkatshi mua bidimu bia bungi.

Nansha muvua Davidi mutate bikole nanku, wakashala ne lulamatu kudi Yehowa. Wakafunda misambu mimpe idi ileja mudi Yehowa ufuila bantu badi banyingalala bua mpekatu yabu luse. (Misambu 32 ne 51) Mukalenge Davidi wakapetulula bulunda buvuaye mudie ne Yehowa; kutungunukaye ne kutumikila mibelu ya Natana too ne pakafuaye. Pakafua Davidi, Yehowa uvua umumona anu bu muntu wa lulamatu. (1 Bak. 9:4) Natana uvua bushuwa musanke bua muvuaye mubele mukalenge Davidi ne dikima pavuaye musesuke mu njila.

Bala bualu ebu mu:

• 2 Samuele 11:1–12:18

Lukonko lua kuelela meji:

Mmushindu kayi uvua Natana muenze malu ne dikima?

Buela mu buondoke

1. 1. Natana uvua mufundi wa Bible, kadi kavua mufunde bualu nansha bumue budi butangila bankambua bende anyi nsombelu wende to. Bualu abu budi buleja ngikadilu kayi uvuaye nende? (w12 15/2 25 §2-3)

   Andamuna

2. 2. Uliya uvua muena Hiti, kadi bua tshinyi uvua mubuele mu tshiluilu tshia Davidi? (w24.04 31)

   Andamuna

3. 3. Natana uvua mumanyishe ne: diakabi divua ne bua kukuata bantu ba mu nzubu wa Davidi. Mmunyi muakakumbana mêyi a buprofete au? (w93 15/3 8 §5)

   Andamuna

4. 4. Mmunyi muakenza Natana malu ne dikima mu bidimu bia ndekelu bia bukokeshi bua Davidi? (w12 15/2 25 §1) A

   Andamuna

   

Keba malongesha

• Ntshinyi tshidi tshilejilu tshia Natana tshitulongesha bua mutudi mua kubela muena Kristo netu udi muenze tshilema tshinene?

  Andamuna

• Mmunyi mutudi mua kuidikija tshivua Natana muenze tuetu basue bua mibelu itudi tupesha muntu imulenge ku muoyo? B

  Andamuna

  

• Mmushindu kayi mukuabu uudi mua kuidikija dikima dia Natana?

  Andamuna

Lepesha meji

• Ntshinyi tshidi bualu ebu bundongesha bua Yehowa?

  Andamuna

• Mmunyi mudi bualu ebu bupetangana ne disua dia Yehowa?

  Andamuna

• Mbualu kayi bungebeja Natana pabishibuaye ku lufu?

  Andamuna

Bia kutangila kabidi

Ntshinyi tshivua mpekatu wa Davidi mumuenzele yeye, balunda bende ne dîku diende, ne Yehowa Nzambi?

Wavuluka mudi dinanga​—Kadiena didikebela anu masanka adi (1:14)

Mona tshivua tshienze bua mibelu ya Natana ifikishe Davidi ku dinyingalala bua mpekatu yende.

“Ikala udipuekesha, witaba mibelu” (Biena-bualu bia mu jw.org “Midimu ya mu dilonga dia Bible-wcgr”)