32 ELISHA
“Yehowa, bulula koku mêsu ende”
MUPROFETE Elisha ne muambuluishi wende bavua mu Dotana. Tshimenga etshi tshivua tshiashila pa tshikunakuna mu tshibandabanda. Bavua base bimanu bitshinyunguluke bua kutshikuba. Dituku dikuabu mu dinda menemene pakapatuka muambuluishi wende pambelu, wakamona bualu buakamuenza buôwa bua bungi. Tshiluilu tshia basalayi tshivua ne tubalu ne matempu a mvita tshivua tshilue butuku, tshinyunguluke tshimenga. Tshivua tshilue kukeba muprofete Elisha. Bu muvua muambuluishi au ne buôwa bua bungi, wakaya lubilu kuambilaye Elisha bua muvuaye mu njiwu.
Katshivua musangu wa kumpala uvua Elisha mu njiwu to. Wakatuadija kutuilangana nayi bidimu bia bungi kumpala, tshikondo tshivua Yehowa mutume muprofete Eliya bua kumulongesha mudimu bua alue kuangata muaba wende. Katshia anu ku tshikondo atshi, bavua bajinga kubashipa kudi mukalenge Ahaba ne mukajende Yezabele ne muanabu Ahazaya. Kadi panyima pa bidimu, kabatshivua kabidi benza mudimu pamue to, bualu dituku dikuabu divuabu baya mu njila, ditempu dia mvita ne tubalu bivua bu kapia biakamueneka mu diulu, kubakosololabi; Eliya kuambuibuaye mu tshipepele tshikole. Pamuapa Elisha kakamumona kabidi to; kadi bu mukavuaye muprofete, wakatungunuka ne mudimu uvua Eliya mutuadije wa dilombola “bana ba baprofete” mu mvita ya Yehowa ivuaye wela ntendelelu wa Bâla.—2 Bak. 2:15.
Elisha wakenza bishima bia bungi ne bukole buvua Yehowa umupesha. Mu bishima abi muvua tshia kuondopa Nâmana mfumu wa tshiluilu tshia Bene-hadada mukalenge wa Sulia. Kadi pamutu pa mukalenge au kuleja dianyisha, wakatungunuka ne kuela Isalele mvita. Kadi Yehowa uvua wambila Elisha musangu onso uvua Bene-hadada ulua kubela mvita. Pashishe Elisha uvua anu udimuija mukalenge wa Isalele, yeye biende umupangisha bua kubela mvita. Bene-hadada wakumvua tshiji tshia bungi, kuebejaye basalayi bende bua bamuambile nganyi wa kudibu uvua udimuija bena Isalele. Umue wa kudibu wakamuambila ne: Elisha muprofete wa Yehowa “ke udi wambila mukalenge wa Isalele malu audi wamba mu nzubu webe wa bulalu.” Pakamanya Bene-hadada ne: Elisha uvua mu Dotana, wakatuma bantu bua baye kumukuata.
Nansha muvua Elisha ne muambuluishi wende bamueneka kabayi ne tshivuabu mua kuenza kumpala kua tshiluilu tshinene tshivua tshilue kubela mvita, muprofete Elisha uvua yeye mumanye ne: kabavua nkayabu to
Muambuluishi wa Elisha ke wa kumpala wakamona tshiluilu tshia bena Sulia tshinyunguluke tshimenga. Wakaya lubilu kudi muprofete Elisha kumuambilaye ne: “Aka, mfumuanyi! Tuenze tshinyi?” Elisha wakamona ne: uvua ne buôwa, kumuambilaye ne: “Kutshinyi to!” Pashishe kumujadikilaye mêyi atudi katuyi mua kupua muoyo aa: “Bualu badi netu mba bungi kupita badi nabu.” Pamuapa muambuluishi au wakashala mutangile Elisha welakana bua tshivuaye mumuambile. Mmunyi muvua bantu betu babidi aba mua kupita tshiluilu tshijima tshia basalayi ku bungi? Ke Elisha kutuadija kusambila ne: “Yehowa, bulula koku mêsu ende bua amone.”
Yehowa wakandamuna disambila diende musangu umue. Wakakangula mêsu a muambuluishi wende kumonaye tshiluilu tshia banjelu ba Yehowa tshibanyunguluke. Tshiluilu atshi tshivua tshinene kupita tshiluilu kayi tshionso tshia bana ba bantu. Bible udi wamba ne: “Buloba bua mikuna buvua buwule ntete ne tubalu ne matempu a mvita bia kapia, binyunguluke Elisha.”
Basalayi bena Sulia kabavua bamone tshiluilu tshia banjelu ba Yehowa to. Bakaya batangile mu tshimenga bua kukuata Elisha. Kadi Elisha wakalomba Yehowa bua abafofomije mêsu. Yehowa kakapangisha mêsu abu bua kumona to, kadi wakabafofomija mu lungenyi bua kabamanyi muaba uvuabu to. Elisha wakabambila bua bamulonde bua aye nabu kudi muntu uvuabu bakeba. Kadi wakaya nabu mu Samalea muaba wa mêba matue ku anayi ne musoko wa Dotana. Pashishe wakalomba Yehowa bua abulule mêsu abu. Pakabulula Yehowa mêsu abu bakashisha kumanya muaba uvuabu, kudisanganabu mu tshimenga tshikulu tshia Isalele; bienze bu ne: bavua bakuatshibue mu buteyi. Mukalenge wa Isalele ukavua ukeba kubashipa. Luse luakakuata Elisha, kulombaye mukalenge bua abapeshe biakudia ne abapingaje kudi mfumuabu. Bible udi uleja muakajika bualu ebu ne: “Bisumbu bia benzavi bia bena Sulia kabiakalua kabidi mu buloba bua Isalele musangu nansha umue to.”
Muprofete Elisha uvua mumanye ne: tshiluilu tshia banjelu tshivua tshibanyunguluke. Uvua ‘mubamone’ ne mêsu ende a ditabuja. Mu bidimu bionso bivuaye muenzele Yehowa mudimu abi, wakapeta dilongesha dia ne: Yehowa ne banjelu bende kabena kule ne batendeledi bende ba lulamatu to, batu anu pabuipi bua kubambuluisha. Bualu ebu ke buvua bupetesha Elisha dikima. Budi butupetesha bietu dikima.
Bala bualu ebu mu:
Lukonko lua kuelela meji:
Mmushindu kayi uvua Elisha muenze malu ne dikima?
Buela mu buondoke
1. Mmunyi muvua Elisha muleje ne: uvua ne dianyisha dia bungi pavua Yehowa mumuteke muprofete wende? (1 Bak. 19:19-21; it “Elisha” §1-wcgr) A
Tshimfuanyi tshia A
Tshimfuanyi tshia A
2. Bua tshinyi Elisha wakalomba “bitupa bibidi bia nyuma” wa Eliya? (2 Bak. 2:9; w03 1/11 31)
3. Bua tshinyi tudi tuamba ne: Yehowa kavua mushiye bena Sulia bampofu balelela to? (it “Bufofo” §6-wcgr)
4. Mmidimu kayi mishilashilangane ivua Elisha muenze? (it “Elisha” §26-27-wcgr)
Keba malongesha
Kumanya ne: banjelu batu pabuipi bua kutuambuluisha kudi mua kutupetesha dikima mu nsombelu kayi? B
Tshimfuanyi tshia B
Mmunyi mutudi tuetu ne bakulu mua kukankamija bakuabu anu muvua Elisha mukankamije muambuluishi wende?
Mmu mushindu kayi muudi mua kuidikija dikima dia Elisha?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja Elisha pabishibuaye ku lufu?
Bia kutangila kabidi
Tshilejilu tshia Elisha tshidi tshilongesha bana betu badibu bapesha mudimu mupiamupia tshinyi?
Longa malu makuabu a mu nsombelu wa Elisha.
“Elisha wakamona makalu a kapia, kadi wewe?” (w13 15/8 28-30)