42 MARIYA
Wakitaba bua kuenza mudimu uvua Yehowa mumupeshe
KUVUA nsongakaji mukuabu utshivua kamama uvua musombele mu tshimenga tshia Nazaleta wa mu Galela, diende divua Mariya. Dimue dituku, muenyi wakamukuata. Kavua muenyi wa musempasempa to. Uvua muanjelu! Diende divua Gabaliele. Uvua mulue kumuambila bua mudimu munene uvua Yehowa mumupeshe uvuaye kayi muanji kupesha muntu nansha umue musangu mukuabu to.
Pakabuela muanjelu, wakamuambila ne: “Muoyo au, wewe udi muanyishibue bikole, Yehowa udi nebe.” Mariya wakanji ‘kupampakana bikole’ bua mêyi a muanjelu au bualu kavua udimona mukumbanyine butumbi buvuaye umupesha abu to. Gabaliele wakamukolesha ku muoyo, kumuambilaye ne: uvua “muanyishibue kudi Nzambi.” Pashishe wakamupesha mukenji wa pa buawu wa kudi Yehowa. Wakamuambila ne: “Newimite difu, neulele muana wa balume. Yeye eu neikale munene, nebamubikile ne: Muana wa Mutambe Bunene, ne Yehowa Nzambi neamupeshe nkuasa wa bukalenge wa tatuende Davidi.”
Bu mukavua muanjelu mumukoleshe ku muoyo, wakamuela lukonko bualu kavua mumanye muvua bualu buvuaye mumuambile abu mua kumuenzekela to. Bavua bamubangile, kadi kabavua banji kumusela to. Kavua nansha muanji kusangila ne mulume to. Nunku wakamuebeja ne: “Bualu ebu nebuenzeke mushindu kayi?” Gabaliele wakamuleja ne: bukole bua Yehowa, tuambe ne: nyuma wende muimpe, uvua ne bua ‘kumubuikila’ ne kuenza bua imite, alele muana mupuangane uvuabu ne bua ‘kubikila ne: Muana wa Nzambi.’ Wakamuambila kabidi tshikavua Yehowa muenzele mulela wende Elizabeta. Tshivua tshienzekele Elizabeta tshivua tshikumbane bua kumutuishisha ne: bualu buvua muanjelu mumuambile buvua ne bua kumuenzekela. Ke yeye kuamba ne: “Mona! meme nsongakaji mupika wa Yehowa! Bingenzekele anu muudi muambe.”
Muanjelu wakashiya Mariya. Pashishe Mariya wakaya kumona Elizabeta. Bubidi buabu bakakoleshangana bua midimu ivua mibindile. Mariya wakambila Elizabeta muvuaye umvua bua Yehowa, kulejabi kuvua dikima diende difumina. Anu mu diyukidilangana diabu adi, wakatela mêyi a mu Mifundu ya tshiena Ebelu misangu mipite pa 20. Wakaatela nanku bualu uvua welangana meji a Dîyi dia Nzambi bikole. Uvua mumanye Yehowa bimpe ne uvua weyemena milayi yende. Wakashala kua Elizabeta ngondo mitue ku isatu, pashishe wakapingana kuende. Biakamulomba dikima dia bungi bua kuambila Jozefe bua difu divuaye nadi ne muvuaye mudipete. Jozefe kavua muanji kuitaba tshivua Mariya mumuambile to. Wakalua kutshitaba pakalua muanjelu kumumvuija tshivua tshienzeke.
Jozefe mumane kusela Mariya, bubidi buabu bakashala bindile diledibua dia Yezu. Pakavua Mariya pa kulela, Kaisa wakela mukenji bua muntu yonso apingane mu musoko wabu bua kudifundisha ku mikanda. Bua bualu abu, Jozefe wakaya kuabu ku Beteleheme ne Mariya. Tshivua nsombelu wa lutatu kudi Mariya bua kuenza luendu lule pa nyama wa mpunda, pamuapa munkatshi mua matuku muanda mutekete. Pakafikabu, Mariya wakalela muana mu tshikumbi tshia nyama, kumuladikaye mu tshidiilu tshiayi. Nansha nanku, uvua anu ne dikima ne wakatungunuka ne kueyemena Yehowa. Uvua mudisuike bua kuenza tshionso tshivua tshikengela bilondeshile muende muvuaye ukokeshila bua kutabalela muanende munanga au.
Muanjelu wakambila Mariya bua mudimu uvua Yehowa mumupeshe uvuaye kayi muanji kupesha muntu mukuabu to
Mariya wakenza malu ne dikima matuku akalonda. Tshilejilu, wakenza malu ne dikima pavuaye yeye ne Jozefe banyemene ne Yezu mu Ejipitu, tshikondo tshivua mukalenge Helode ukeba kumushipa. Uvua ne dikima dia kukolesha bana bakuabu muanda mutekete anyi kupita apu bavuabu balue kulela ne Jozefe nansha muvuabu bapele. Uvua nadi pakafua Jozefe, pamuapa kumpala kua Yezu kulua Masiya. Uvua kabidi nadi pavua Yezu uvua umutabalela mumbuke ku mbelu muye mu mudimu wa Nzambi. Kupita bionso, uvua ne dikima pakamonaye muvuabu bashiminyina muanende Yezu malu, bamukosela tshibawu tshia lufu, ne bamushipa. Wakenza kabidi malu ne dikima pakaluaye pende umue wa ku bayidi ba muanende nansha muvua bena Yuda babakine.
Tshivua mudimu mukole wa dikema uvua nawu Mariya! Nkuepi kuvuaye mupetele dikima dia kuwenza bimpe? Bible udi uleja ne: pavuaye ulonga bualu buvua bukolesha ditabuja diende, uvua ubulama mu muoyo wende. Nanku uvua ne malu a bungi mimpe avuaye welela meji ku musangu ne ku mukuabu. Amue a kudiwu, uvua muabadile mu Dîyi dia Nzambi, makuabu bavua bamuambilawu kudi banjelu ne batendeledi ba Yehowa, ne manga kudi muanende Yezu. Pavua Mariya welangana meji a malu aa, uvua upeta dikima dia kutantamena lutatu luonso luakatuilanganaye nalu too ne pakafuaye.
Bala bualu ebu mu:
Lukonko lua kuelela meji:
Mmushindu kayi uvua Mariya muenze malu ne dikima?
Buela mu buondoke
1. Ntshijadiki kayi tshidi tshileja ne: Kulenio uvuaku ne difundisha bantu ku mikanda diakenzeka? (g 4/11 11 §4-5-wcgr) A
British Library, London, UK, from the British Library archive/Bridgeman Images
Tshimfuanyi tshia A: Mukenji uvua Kaisa muele mu 104 P.Y.
2. Bua tshinyi kabivua bipepele bua Mariya kuenza luendu lua kuya ku Beteleheme? (ia 153-155 §4-7)
3. Patshivua Yezu muana wa mu maboko, muprofete mukuabu wakambila Mariya ne: “Muele wa mvita mule newukutubule.” Mmunyi muakakumbana mêyi au? (Luka 2:35; w08 15/3 30 §8)
4. Ntshinyi tshidi tshitufikisha ku diamba ne: Mariya udi pamuapa mu diulu patudi tuakula apa? (w18.07 10 §14) B
Tshimfuanyi tshia B: Mariya ne bana bende ba balume bavua mu Yelushalema matuku makese kumpala kua Pentekoste wa mu 33 P.Y.
Keba malongesha
Pavua Mariya dijinga ne dikakankamija, wakaya kutangila Elizabeta. (Luka 1:39, 40) Bua tshinyi mbimpe kulomba bena Kristo netu lungenyi patudi mu lutatu anyi padibu batupeshe mudimu udi mutupite makanda? C
Tshimfuanyi tshia C
Nansha mukavua Jozefe mulue mfumu wa dîku pavuaye mubangile Mariya, Yehowa wakanji kutuma muanjelu kudi Mariya. Ntshinyi tshidi bualu ebu butulongesha bua mushindu udi Yehowa umona bantu bakaji ba lulamatu?
Mmunyi muudi mua kuenza malu ne dikima bu Mariya?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Bidi bimueneka ne: Yehowa uvua musungule Mariya bua aye kukokesha ne Kristo mu diulu. Biobi nanku, mmunyi muudi umvua? Udi umvua nanku bua tshinyi?
Bia kutangila kabidi
Difuanyikijila muvua Mariya muenze mudimu mukole bua kukolesha bana bende.
“Tshidi tshilejilu tshia Mariya tshitulongesha” (w09 1/1 5 §5–6 §2-wcgr)
Udi wela meji ne: Mariya uvua mumvue mushindu kayi pavua muanjelu Gabaliele mumuambile ne: Yehowa uvua mumusungule bua kuenza mudimu wa pa buawu?