Mukanda wa kudi Kasumbu kaludiki

Bana betu bananga,

Mu mukanda uvua Yezu mutumine bena mu tshisumbu tshia ku Semuna, wakabambila ne: ‘Kanutshinyi malu akadi pa kunukuata to.’ (Buak. 2:10) Dikankamija diende dia kubenga kutshina edi didi kabidi ditutangila tuetu badi ne muoyo mu “dituku dia Mukalenge.” (Buak. 1:10) Bikondo bitudi ebi bidi bushuwa “bikondo bia malu makole bidi bikole mua kupita nabi.” Kadi bidi bitukolesha bikole bua kumona mudi yonso wa kunudi wenza malu ne ditabuja dikole ne dikima bua kushala anu ne lulamatu kudi Yehowa.​—2 Tim. 3:1-5.

Kadi mmunyi mutudi mua kulama dikima dietu ne kushala ne lulamatu kudi Yehowa? (Eb. 10:39) Kabitu anu bipepele to, bualu kudi misangu idibu mua kutuluisha, bafuane ne kutukengesha. Kadi tudi anu mua kuitaba bua kulamata Yehowa ne dikima dionso ne kuenza tshidiye umona tshiakane nansha tuetu bikale bantu ba bundu anyi bapangile dikima. Tshidi mua kutuambuluisha ntshinyi?

Bible udi mua kutuambuluisha bua kupeta dikima. Mmuwule tente ne bilejilu bia balume ne bakaji bavua ne dikima. Mukanda eu mmuenza bua kutupetesha mushindu wa kulonga malu avuabu benze ne kuelangana meji a bilejilu biabu. Paudi ubala bualu bua muntu yonso wa kudibu, sambila, ulombe Yehowa akuambuluishe bua kumona muudi mua kutumikila malu au mu ntatu iudi nayi lelu ne mu iwapeta matuku atshilualua. Ela meji a mudi Yehowa mua kukupetesha dikima. Ukebe kabidi bua kumanya mudi dikima diabu mua kukolesha ditabuja diebe bua kuenza malu adi alonda aa:

Bua kuenza tshidi Yehowa musue. (Yak. 3:17) Ela meji a Yonatana. Uvua pamuapa mudiambile ne: uvua mua kupingana tatuende Shaula mu nkuasa wa bukalenge. Kadi Yehowa wakasungula Davidi uvua muana kudiye bua alue mukalenge. Yonatana wakitaba dipangadika dia Yehowa, kudituaye mpanda. Yonatana uvua bushuwa muenze malu ne dikima dia bungi ne mulamate Yehowa.

Bua kulamata anu ku mikenji ya Yehowa. (Eb. 11:32-34) Ela meji a Hananiya, Mishaele ne Azaya. Bakabenga kuinamina lupingu. Kadi bavua bitabe bua kufua mu tshikutu tshia kapia kakole anu bua kushala ne lulamatu kudi Yehowa.

Bua kuambila bakuabu malu a Yehowa ne Yezu. (Mat. 22:16) Ela meji a Shaula wa ku Tâso. Bantu bavua bindile bua abambuluishe bua kukengesha bayidi ba Yezu, kadi wakashintuluka, kubambilaye malu a Yezu ne dikima dionso.

Tudi tujinga ne: mukanda eu unuambuluishe bua kukolesha ditabuja dienu ne dikima dienu. (Mis. 27:14) Yehowa abeneshe bionso biudi wenza bua kuambuluisha bena mu dîku ne bena mu tshisumbu tshienu bua kutua Bukalenge bua Nzambi mpanda ne dikima dionso!