MBANGILU
Udi mua kupeta dikima dia bungi!
1-3. Bua tshinyi mêyi a Yezu a ne: “Jukayi, tuyayi” avua mêyi a dikima?
“JUKAYI, tuyayi.” Aa mmêyi a dikima atu pamuapa muntu mukuabu kayi muanji kuamba to. Udi mua kuikala udiebeja bua tshinyi tudi tuamba nanku anyi? Bua kupeta diandamuna, tukebayi bua kumanya muena mêyi au ne tshivuaye muambidile.—Mat. 26:46.
“Jukayi, tuyayi.”—Mat. 26:46
2 Yezu ke uvua muambile bayidi bende mêyi au. Ukavua kabidi muambe musangu mukuabu. (Yone 14:31) Kadi a musangu eu, uvua muambe mu tshikondo tshia pa buatshi mu budimi bua Getesemane pabuipi ne tshimenga tshia Yelushalema. Butuku bukavua buile, ngondo uvua mupeme kuulu. Yezu ukavua mumanye ne: tshisumbu tshia bantu bambule bia mvita tshivua tshilua tshitangile kudiye. Uvua mumanye bimpe tshivuabu bajinga kumuenzela. Ukavua pa kukenga mu mushindu utu muntu kayi muanji kukenga to. Uvua mumanye kabidi ne: uvua ne bua kukenga nkayende.
3 Yezu kakajinga bua kunyema dikenga adi to. Nansha muvuaye ne mushindu wa kulomba Yehowa bua amutumine banjelu ba bukole, kakamulombabu to. (Mat. 26:53) Kadi wakamba anu ne: “Jukayi, tuyayi.” Ukavua mumanye ne: bantu abu bavua ne bua kumukuata, kumukengesha bikole, ne kumushipa. Uvua muitabe bionso abi bualu uvua munange Tatuende ne bayidi bende.
4-5. Kuikala ne dikima kudi kumvuija tshinyi? Bua tshinyi tudi ne bua kuikala nadi?
4 Yezu uvua muntu wa dikima dia bungi kupita muntu kayi yonso; bualu ebu kabuena kuela mpata to. Biwikala muyidi wende, udi biebe ne dikima. Bena Kristo balelela badi ne bua kuikala ne dikima. Tshikondo tshitudi ntshikondo tshikole tshia njiwu, nanku tudi ne bua kuikala ne dikima kupita dia pa tshibidilu.
5 Mmushindu kayi udi muntu mua kuenza malu ne dikima bu Yezu? Bamue batu bela meji ne: kuikala ne dikima nkubenga kutshina malu, kudibueja mu malu makole avuabu mua kuepuka, anyi kuamba ne: bualu nansha bumue kabuena mua kubafikila to. Badi kabidi bela meji ne: kudi kumvuija kuenza malu a tshikisu bua kuleja mudibu ne bukole. (Mis. 11:5) Kadi dikima divua Yezu nadi kadivua dia mushindu au to. Diodi didi diumvuija bukole budi butusaka bua kuenza malu adi makane ku mêsu kua Nzambi nansha padibi bikole.
Udi mua kuidikija dikima dia Yezu
6. Mmunyi mudi mêyi avua Yezu muambile bayidi bende mua kutukolesha tuetu katuyi ne dikima?
6 Pamuapa udi udiebeja ni udi mua kuenza biebe malu ne dikima bu Yezu mu dikenga. Bikalabi nanku, vuluka ne: Yezu katu ne malu makole to. Mmufuane Yehowa bualu katu utulomba malu atudi katuyi mua kuenza to. (Mis. 103:14; Yone 14:9) Tshilejilu, butuku buvuaye mu budimi bua Getesemane, wakambila bapostolo bende bua bashale batabale pamue nende, kadi kabakashala batabale to, bakalala. Nansha nanku wakabambila ne dîyi dimpe ne: “Bushuwa, muoyo mmusue, kadi mubidi udi ne butekete.” (Mat. 26:41) Uvua ubumvuila mu matekete abu, ke mudiye ukumvuila biebe.
7-8. Mmushindu kayi uvua Yezu mukoleshe bayidi bende ku muoyo?
7 Yezu uvua kabidi mukoleshe bayidi bende ku muoyo. Ela meji a muvuabu ne bua kuikala bapete muoyo mukole pakabambilaye ne: “Koleshayi muoyo! Ndi mutshimune ba pa buloba.” (Yone 16:33) Mêyi aa adi aleja muvuaye mutuishibue ne: bayidi bende bavua mua kuenza malu ne dikima bu diende. Ke tshiakenzabu. Yezu wakamba mêyi a ne: “koleshayi muoyo” misangu ya bungi. Tshilejilu, wakaambila muntu uvua tshibombo kumpala kua kumujadikilaye ne: bavua bamubuikidile mpekatu yende. (Mat. 9:2) Wakaambila kabidi mukaji uvuaye muondope disama dikole. (Mat. 9:22) Wakalua kuambila bayidi bende pavuabu ne buôwa mu tshipepele tshikole. (Mat. 14:27) Pakavuaye mu diulu, wakaambila mupostolo Paulo katupa kakese yeye mumane kupanduka ku bianza bia balumbuluishi bavua bajinga kumushipa.—Bien. 23:9-11.
8 Lelu, Mukalenge wetu wa dikima udi anu bu udi ukuambila ne: ‘kolesha muoyo!’ Mmusue bua ukoleshe muoyo. Mmutuishibue ne: neuwukoleshe. Tatuende Yehowa mmukupeshe bionso bidi bikengela bua wewe kuwukolesha.
Mmunyi mudi Bible utuambuluisha bua kuikala ne dikima?
9. Mmunyi mudi Dîyi dia Nzambi mua kutukankamija?
9 Yehowa mmufundishe bilejilu bidi mua kutupetesha dikima mu Dîyi diende. Tudi tupetamu miyuki milelela ya balume ne bakaji ba bidimu bionso ne nsombelu mishilashilangane. Yonso wa kudibu “uvua udiumvua anu bu mututu tudiumvua petu.” (Yak. 5:17) Bavua pabu bapange bupuangane, bikale ne biabu bilema. Bavua ne ntatu mishilashilangane ne misangu mikuabu bavua mu njiwu. Nansha nanku, bavua batantamene bionso abi anu bu Yezu. Bakenza malu ne dikima. Tuetu babale malu abu netupete petu dikima.
10-11. Mmunyi mudi mukanda eu mua kukuambuluisha? Mmunyi muudi mua kulonga nawu? (Tangila kabidi kazubu ka “Mua kudilongela ne mukanda eu ne kuenza nawu Ntendelelu wa mu dîku.”)
10 Mukanda eu mmuenza bua kukupetesha dikima. Mu nshapita 54 idi ilonda, neumone muvua Yehowa mupeteshe bantu bavua anu bu wewe dikima divuabu nadi dijinga. Bala muyuki wonso, pashishe wenze makebulula bua kumanya malu makuabu a muntu udibu batelamu. Wewe muenze nanku, neumanye bantu bonso abu bimpe menemene.
11 Bilejilu biabu bikupeteshaku dikima dia bungi bua umone mua kunanukila mu ‘matuku makole a ku nshikidilu’ atudi aa. (2 Tim. 3:1) Nebikoleshe dishindika diebe mu mulayi wa Yehowa wa ne: “Tshiakukushiya nansha kakese, tshiakukulekela nansha kakese.” Mêyi aa adi mua kutuambuluisha bua “tuikale ne dikima dikole ne tuambe ne: ‘Yehowa mmuambuluishi wanyi; tshiakutshina to.’”—Eb. 13:5, 6.