Bitendelelu bidi mua kufila ditalala pa buloba anyi?

TSHIDI TSHISAKA BAMUE BUA KUITABA BUALU EBU

Badi bela meji ne: bamfumu ba bitendelelu ke badi mua kuambuluisha bua kuikale ditalala. Bamfumu ba bitendelelu batu ne tshibidilu tshia kulongesha bantu bua kuikala ne bulenga ne kunemeka bakuabu. Ke bualu kayi, bantu ba bungi badi bela meji ne: badi mua kukuata mudimu ne bukokeshi budibu nabu bua kujikija bilumbu bikadi bienze bidimu bia bungi.

Badi bela meji ne: bantu bobu batumikila bidibu babalongesha mu bitendelelu biabu, kuvua ne bua kuikala ditalala pa buloba. Mukebuludi kampanda wakamona ne: bantu batu badienzeja bua kukeba ditalala pa buloba batu bela meji ne: batu benzela Nzambi mudimu. Ke bualu kayi, batu badifila bikole mu dikeba ditalala, batekemene ne: nebakokeshe bua kudifila pa buloba.

BUALU BUA KUELELA MEJI

Nansha mutubu balongesha bantu mu bitendelelu bua kusomba mu ditalala ne bakuabu, kadi bantu batu pa tshibidilu baluangana bua malu a bitendelelu.

• Udi wela meji ne: bena mu bitendelelu badi mua kufila ditalala pa buloba pabu bitabuja malongesha mashilashilangane anyi?

• Paudi umona mudi bitendelelu bidibuinke mu mvita, udi wela meji ne: bidi mua kusangisha bantu anyi? Peshi nebitungunuke anu ne kubatapulula?

  

  Dibeji 8, ku diabakaji: Ku diabakaji: Danil Semyonov/AFP via Getty Images; dibeji 9: kuulu ku dia balume: Dmytro Smolyenko/Ukrinform/Future Publishing via Getty Images

  Bitendelelu bidi bitaba bua bantu kukinangana ne bibasaka ku dienzelangana malu ne tshikisu kabiena mua kufila ditalala pa buloba nansha kakese

TSHIDI BIBLE WAMBA

Mu mukanda wa Buakabuluibua mbakuate mudimu ne tshiambilu “Babilona Munene” bua kuakula bua bitendelelu bionso bidi kabiyi bitumikila malongesha a mu Bible.a (Buakabuluibua 17:5) Bantu ba bungi mbafue bua malu adi bitendelelu ebi bienze.

Nansha matuku etu aa, mvita ya bungi mmikebesha kudi dibenga kupetangana dia bena mu bitendelelu. Bamfumu ba bitendelelu batu bakankamija bena kuitabuja babu bua kuluisha bantu ba mu bitendelelu bikuabu anyi bena mu bitendelelu biabu abi kadi badi mu matunga makuabu. Bitendelelu bidi bitaba bua bantu kukina bakuabu anyi bibasaka bua kuenza nanku, kabiena mua kufila ditalala pa buloba nansha kakese.

Kadi Bible udi wamba ne: bantu badi mu tshitendelelu tshilelela “nebafule miele yabu ya mvita kuyivuija nkasu ya kudima nayi.” (Yeshaya 2:2-4) Mêyi aa adi umvuija ne: kabatu babuelakana mu mvita to. Batu kabidi badienzeja bua kuikala ne ngikadilu bu mudi: dinanga, bulenga ne didikanda.​—Galatiya 5:22, 23.

Bible mmuambuluishe Bantemu ba Yehowa bua kuikala mu ditalala nansha mudibu ba mu matunga mashilashilangane. Wewe welesha bualu ebu mpata, ndaku mu bisangilu biabu bua udimuenene bualu ebu.