Teka malu a Nzambi pa muaba wa kumpala anu bu Manaene

Manaene uvua umue wa ku bana betu ba balume bavua balombola malu mu tshisumbu tshia Antiokia tshia mu bidimu lukama bia kumpala. “Uvua mulonge pamue ne Helode mukokeshi wa distrike.” (Bien. 13:1) Nunku uvua mulonge bikole ne uvua pamuapa mukolele mu dîku dia babanji.

Nansha nanku, wakasungula bua kulua muena Kristo ne bua kuambuluisha tshisumbu. Kakakeba ne: tulasa tuvuaye mulonge ne dimanyangana diende ne bantu bavua ne bukokeshi kampanda bimupeteshe bintu to. Kadi uvua udifila bua kuenzela bena Kristo nende mudimu.

Tshilejilu tshiende tshidi tshitulongesha ne: kuenzela Yehowa mudimu ke bualu bua mushinga wa bungi kupita dikeba bua kuikala ne lumu ne makuta a bungi. Anu bu Manaene, tudifilayi petu bua kuenzela Yehowa mudimu pamutu kukeba bua kupeta lumu ne kulua babanji mu ndongololuelu wa malu eu. (Mat. 6:33) Bualu bukuabu, nansha mutudi tuangata kulonga tulasa ne mushinga, tudi ‘tukeba bua kumanya malu adi ne mushinga wa bungi’ ne tudi tuenza bua malu makuabu kaatupangishi bua kuenzela Yehowa mudimu to.​—Filip. 1:9, 10.