NKONKO YA BABADI

Mbipungidi kayi bibidi bivua Paulo muakuile mu Galatiya 4:24?

Mupostolo Paulo mumane kuakula bua malanda avua pankatshi Hagâ ne Abalama ne mukajende Sala, wakamba ne: “Tudi mua kuangata malu aa bu tshifuanyikijilu; bualu bakaji aba badi baleja bipungidi bibidi.” (Gal. 4:22-24) Kumpala tuvua tuamba ne: tshipungidi tshia Mikenji ne tshipungidi tshipiatshipia ke bipungidi bibidi abi. Kadi patudi bakonkonone kabidi mvese ayi bimpe, tudi bamone ne: mbimpe tuakaje ngumvuilu wetu. Bidi bimueneka ne: Paulo uvua wakula bua tshipungidi tshia Abalahama, kavua wakula bua tshipungidi tshipiatshipia to. Mona tshidi tshitusaka bua kuamba nanku.a

Paulo wakamba muvua Hagâ uleja mukuna wa Sinai. (Gal. 4:25) Hagâ uvua uleja tshipungidi tshia Mikenji tshivuabu bafile ku mukuna wa Sinai mu 1513 K.B.B. (Ekes. 19:5, 6) Bena Yuda bonso bavua bantu bapange bupuangane kabavua mua kutumikila Mikenji yonso ayi ne mu katoba to. Bivua ne bua kuikala bibambuluishe bua kujingulula ne: bavua bapika ba mpekatu. Tshipungidi atshi tshivua tshiambuluisha kabidi tshisamba tshia Isalele bua kumanya Masiya, bualu anu yeye ke uvua mua kutumikila Mikenji yonso ayi ne mu katoba. Pakafila Masiya muoyo wende mupuangane bu mulambu, wakambuluisha bantu bena mapanga bua kupikudibua ku mpekatu ne ku lufu. (Gal. 3:19, 24, 25) Pakakumbajaye disua dia Nzambi, Mikenji kayivua kabidi ne mushinga to.​—Lomo 10:4.

Paulo wakaleja muvua Hâga mushilangane Sala uvua “mukaji uvua ne budikadidi” uvua mulele “ku butuangaji bua mulayi.” (Gal. 4:23) Mulayi au uvua tshipungidi tshia Abalahama. (Gal. 3:29; 4:28, 30) Yehowa udi umvuija tshipungidi atshi mu Genese 22:18 ne: “Ku diambuluisha dia [muana wa Abalahama], bisamba bionso bia pa buloba nebipete dibenesha buabi biobi, bualu udi mumvue dîyi dianyi.”

Tshipungidi tshivuaye mudie ne Abalahama atshi tshiakaleja malu makuabu avua atangila mulayi wa Yehowa wa mu Edene. (Gen. 3:15) Tshiakaleja ne: ‘muana’ uvuabu balaye au uvua ne bua kuikala wa mu ndelanganyi ya Abalahama. Paulo wakumvuija ne: ‘muana’ au udi utangila nangananga Yezu Kristo. Muana au udi kabidi uleja “bantu ba Kristo” anyi bela manyi 144 000 bakokesha nende mu Bukalenge buende. (Gal. 3:16, 29; Buak. 14:1-3) Bantu badi bitabuja Yezu ne bamutumikila nebapete mabenesha a bungi pakumbana mulayi uvua Nzambi mulaye Abalahama au.

Bua tshinyi Paulo uvua muenza mudimu ne “tshifuanyikijilu”? Uvua usua kubalongesha ne: bena Yuda ba tshikondo tshiende bavua ne bua kuikala bapika anu bu Hagâ pavuabu basumisha bua bantu bikale anu batumikila Mikenji ya Mose. Kadi pavuabu bitaba Yezu Kristo udi nangananga ‘muana’ wa Abalahama, bavua bapeta budikadidi anu bu Sala. Bavua bapikudibua ku mpekatu ne ku lufu. (Yone 8:32-34) Pavuabu babenga kutumikila Yezu, bavua bapangila tshipatshila tshinene tshia tshipungidi tshia Mikenji tshia kubafikisha ku Kristo.

Bena mu Galatiya ba bungi bavua Paulo mufundile mukanda kabavua bena Yuda to, ne kabavua ku Mikenji ya Mose nansha kakese. Bamue bena Yuda bavua basumisha anu bua bena Kristo ba bisamba bikuabu batumikile Mikenji ya Mose, bu mudi wa ditengudibua. Paulo wakabeleshisha meji ne: kabivua bimpe bena Kristo abu bikale kabidi ku “bupika” bua mikenji to, bualu bakavua bapete “budikadidi” pavuabu bitabuje Kristo.​—Gal. 5:1, 10-14.