Anyisha tshiudi wenza mu dikumbana dia bishima bidi bienzeka lelu

1-2. a) Tela bimue bishima bidi mu Bible. b) Tshishima ntshinyi? c) Netuikale banganyi mu dienzeka dia bishima bidi Yehowa wenzeja lelu eu? (1 Kolinto 3:9)

ELABI meji muuvua mua kuikala mumvue disanka dia bungi bu wewe munkatshi mua bena Isalele bavua ku muelelu kua Mbuu mukunze, umona muvua Yehowa upandulula mâyi a mbuu au bua numone mua kusabuka panuvua nunyema tshiluilu tshia bena Ejipitu. Ela kabidi meji bua disanka diuvua mua kumvua bu wewe mumone muvua Yezu wondopa babedi, ubisha too ne bantu ku lufu. Tudi batele bishima bibidi patupu bia ku bidibu bakuile mu Bible. Muntu yonso wa muoyo muakane uvua mumone bishima abi uvua pamuapa mujingulule ne: Nzambi ke uvua muenze bua bienzeke. (Mat. 15:31) Kadi bishima abi mbienzeke kukadi bidimu bia bungi. Bishima bitshidi bienzeka lelu anyi? Eyowa! Bua tshinyi tudi tuamba nanku?

² Tshishima mbualu buonso budi muntu kayi mua kukokesha bua kuenza anyi budiye kayi mua kumvua menemene to. Mbualu budi Yehowa wenzeja ku bukole buende. Mu tshiena-bualu etshi, netuakule bua bishima bisatu bidi Yehowa wenza mu bulongolodi buende lelu. Mbishima bualu anu Yehowa ke udi mua kubienzeja. Patuikala tuakula bua tshishima tshionso, netumone mutudi mua kuikala “benzejanganyi ba mudimu” ne Yehowa padiye utshienza.​—Bala 1 Kolinto 3:9.

DIVULANGANA DIETU NTSHISHIMA

3. Bua tshinyi tudi tuamba ne: batendeledi ba Yehowa mbalue “tshisamba tshia bukole”? (Yeshaya 60:22) (Tangila kabidi tshimfuanyi.)

³ Muprofete Yeshaya mmuambe kukadi bidimu bipite pa 2500 ne: batendeledi ba Nzambi bavua ne bua kuvulangana tshikondo tshietu etshi. (Bala Yeshaya 60:22.) Dîyi dia buprofete edi ndikumbane. Tshilejilu, mu 1914, anu bantu batue ku 5000 ke bavua benzela Yehowa mudimu pa buloba bujima. Kadi katshia anu ku tshidimu atshi, “udi mushadile,” mmumue ne: kasumbu ka bantu 5000 abu, mmulue tshisumbu tshia bamanyishi ba Bukalenge bapite pa miliyo 9. Bungi buabu mbupite bua bantu badi mu matunga mapite pa 130! Kumpala kakuvua bantu ba bungi nunku pa buloba badi bamanye Yehowa ne bamunange to. Badi mu matunga ne miaba mipite pa 240. Nansha mudi bungi bua batendeledi ba Yehowa bushadile ku bua bena mu bitendelelu bikuabu, katuena mua kuamba ne: dîyi dia buprofete adi ki ndikumbane to. Bushuwa, “udi mushadile” mmulue “tshisamba tshia bukole.”

4. Bua tshinyi divulangana dia batendeledi ba Yehowa didi dikemesha?

⁴ Bena mu bitendelelu bia bungi batu babatiza too ne bana batekete bua bavulangane, kadi tuetu katutu tuenza nanku to. Katutu nansha tuitabila bantu badi kabayi batumikila mikenji ya Yehowa bua kuluabu Bantemu ne meji a ne: tuvulangane to. Kadi yonso wa kutudi mmulonge Bible ne muitaba bua kulonda tshidiye wamba. Biakalomba ba bungi ba kutudi bua kushintulula ngelelu wabu wa meji ne bikadilu biabu. (1 Kol. 6:9-11) Ke bualu kayi tuakakumbana bua kulua bamanyishi ba lumu luimpe ne kutuadija kuyisha bantu bakuabu bua bamanye pabu Yehowa ne batuadije kumutendelela. Pashishe tuakadilambula kudi Yehowa, tumulaya bua kuenza disua diende nansha mu nsombelu kayi, ne tuetu kubatijibua.​—Mat. 28:19, 20.

5. Mmalu kayi avua Yezu muambe ne: avua ne bua kufikila bayidi bende?

⁵ Divulangana dietu ntshishima bualu Yehowa ke udi wenza bua tuvulangane. Yezu ukavua muleje ne: kabivua ne bua kuikala bipepele bua bantu kulua bayidi bende to. Wakamba ne: “Biasua muntu kundonda, adibenge, ambule mutshi wende wa makenga ne atungunuke ne kundonda.” (Mat. 16:24) Bidi biumvuija ne: bayidi bende bavua ne bua kuitaba bua kukenga anyi mene bua kufua bua ditabuja diabu kudiye. Tshilejilu, Yezu ukavua muambe ne: bayidi bavua ne bua kuakuila ditabuja diabu kumpala kua banguvena ne bakalenge. (Mat. 10:17, 18) Uvua mubadimuije kabidi ne: bamfumu ba bitendelelu ba bukole bavua ne bua kubaluisha. (Yone 16:2) Wakamba kabidi ne: bavua ne bua kuluisha bamue bantu kudi bena mu mêku abu pavuabu batuadija kutendelela Yehowa.​—Mat. 10:34-36.

6. Bua tshinyi bamfumu ba bitendelelu kabavua mua kutshimuna bena Kristo ba mu bidimu lukama bia kumpala?

⁶ Anu muvua Yezu muambe, bena Kristo ba mu bidimu lukama bia kumpala bavua batuilangane ne buluishi bukole. Matuku makese Yezu mumane kupingana mu diulu, bamfumu ba bitendelelu bena Yuda bakakeba bua kuimanyika mudimu wa bayidi bende. Bakakuata bapostolo, kuyabu nabu ku Sanedren, Tshilumbuluidi Tshinene tshia bena Yuda. Bamfumu ba bitendelelu abu “bakakeba bua kubashipa”; kadi Mufalese mukuabu, diende Gamaliele, wakabadimuija ne: “Kanubuelakanyi mu malu a bantu aba to, kadi balekelayi. Bualu bikala bualu ebu anyi mudimu eu ufumina kudi bantu, nebawutonkole; kadi bikalawu ufumina kudi Nzambi, kanuakukokesha bua kubatonkola to. Tshianana, nudi mua kumueneka nukadi nuluisha Nzambi muine.” (Bien. 5:33, 34, 38, 39) Anu tshivuaye muambe atshi ke tshiakenzeka. Bapostolo bamane kupatuka mu buloko, bamfumu ba bitendelelu abu bakatungunuka anu kubaluisha. Nansha nanku, bantu ba bungi bavua anu benda bitaba bulelela ne balua bena Kristo! Nunku kabavua mua kutshimuna bayidi ba lulamatu abu to. (Bien. 6:7) Bua tshinyi? Bualu Nzambi ke uvua wambuluisha bantu bende bua bananukile ne bavulangane nansha muvuabu babaluisha.​—Bien. 1:8.

7. Mmunyi mudi bena Kristo ba lelu bidikija bena Kristo ba mu bidimu lukama bia kumpala? (Tangila kabidi kazubu ka ne: “Tuvulangana nansha mudiku buluishi.”)

⁷ Lelu eu, bantu ba bungi menemene mbasue kulonga malu a Yehowa ne mbasue kumuenzela mudimu nansha mudibu babakengesha anyi bababenga kudi bena mu mêku abu, bena mudimu nabu, ne kudi bantu bakuabu bua bualu abu. Bua tshinyi bayidi bapiabapia batu bapangadija bua ‘kuambula mutshi wabu wa makenga’? (Mat. 16:24) Badi benza nanku bualu mbanange Yehowa ne mbatuishibue ne: neakumbaje mulayi wende wa kubatabalela. Yehowa pende udi ubapesha “bukole budi bupite bua pa tshibidilu” bua bamone mua kunanukila. (2 Kol. 4:7-9) Padibu babaluisha kudi bena mu mêku abu, badi bumvua anu bu mufundi wa misambu wakamba ne: “Nansha biandekelabu kudi tatuanyi ne mamuanyi, Yehowa yeye neangakidile kuende.” (Mis. 27:10) Etshi ntshishima bua kumona bantu ba bungi menemene balua bayidi ba Yezu pabu babaluisha bua bualu abu.

8. Ntshinyi tshitudi petu tuenza mu divulangana dietu?

⁸ Dîba dionso ditudi tuyisha, tudi tueleshangana diboko ne Yehowa ne Yezu padibu benza tshishima bua tuvulangane lelu; ne bobu ke badi kabidi batuambuluisha. Yezu mmutulaye ne: “Ndi nenu matuku onso too ne ku nshikidilu kua ndongoluelu wa malu eu.” (Mat. 28:20) Banjelu batu pabu batuambuluisha patudi tuyisha.​—Buak. 14:6, 7.

BUOBUMUE BUETU NTSHISHIMA

9-10. Leja mudi Mika 2:12 wenda ukumbana lelu.

⁹ Muprofete Mika ukavua muakule bua tshishima tshikuabu tshia dikema tshitudi tumona lelu eu. Tshishima atshi mbuobumue bua bantu ba Nzambi. Yehowa uvua mumusake bua kuakula bua bantu balume ne bantu bakaji bavua ne bua kudisangisha ne kusomba pamue mu buobumue. (Bala Mika 2:12.) Bantu ba Nzambi badi bakumbaja dîyi dia buprofete edi lelu bualu badi mu buobumue nansha mudibu ne bikadilu bishilangane ne bafume miaba mishilangane. Badi badimuenena mudi mêyi a Davidi aa malelela: “Mona mudibi bimpe ne bienza disanka bua bana ba muntu kusomba pamue mu buobumue!”​—Mis. 133:1.

¹⁰ Lelu eu buobumue buetu budi bumuenekela ku malu a bungi. Tshilejilu, nansha tuetu basombele muaba kayi, tudi tulongeshibua malu a muomumue mu bisangilu, mu mpuilu ne mu mpungilu. Pa buloba bujima, Bantemu ba bilele bishilashilangane ne ba mu matunga mashilangane batu benza mudimu pamue ku Betele anyi bua kuibaka nzubu yetu. Tutu balamatangane bikole. Bilele bia kuetu, dikala babanji anyi bapele peshi mmuenenu itudi nayi bua malu a tshididi ki mbitutapulule to. Elabi meji bua bualu ebu: miaba yonso itudi mua kuya netupete bena Kristo netu badi batunange bikala mua kutuambuluisha ne kutukankamija bua tutungunuke ne kuenzela Yehowa mudimu. Kabitu bianji kuenzeka bua bantu ba bungi ba mu matunga a bungi ne ba bilele bishilangane kuikalabu ne meji amue ne bikadilu bia muomumue nunku to.

11. Bua tshinyi tudi tuamba ne: buobumue buetu ntshishima?

¹¹ Buobumue buetu ntshishima bualu tudi mu buloba mudi bantu batapulukangane bikole. Dituku dionso edi tudi tumvua mudi bantu baluishangana, bajula bimvundu, batombokela mbulamatadi ne belangana mvita; bileja mudi bantu batapuluke bikole ne benzelangana malu mabi menemene. Bible ukavua muambe ne: bantu bavua ne bua kuikala ‘kabayi ne lulamatu, kabayi ne lungenyi lua kumvuangana, bashiminyinyanganyi ba malu, kabayi badikanda, bena luonji, kabayi banange malu mimpe, batungidianganyi, bena mutu mukole, ne badiuwuja ne lutambishi.’ (2 Tim. 3:2-4) Nansha mudi ‘ba pa buloba bonso ku bukokeshi bua mubi’ ne bua bademon, tuetu tudi tutungunuka ne kuenzela Yehowa mudimu mu buobumue. (1 Yone 5:19; Buak. 12:9) Bushuwa, etshi ntshishima!

12. Ntshinyi tshitudi mua kuenza bua tuikale anu mu buobumue mu bulongolodi bua Nzambi?

¹² Tudi ne tshitudi mua kuenza petu bua tuikale anu mu buobumue mu bulongolodi bua Nzambi. Ntshinyi atshi? Mbimpe tuikale tuteleja ne ntema malu adi Yehowa utulongesha ne tuatumikila. Malu au adi atuambuluisha bua kuikala ne lutulu, kubuikidilangana, kuepuka matandu, ne bua kuenzela bakuabu malu mimpe. (Ef. 4:2, 31, 32) Dîba dionso ditudi tulengulula tshilema tshia muena Kristo netu, ditudi katuyi tuakula bibi bua bakuabu, anyi ditudi tubuikidila muena Kristo netu, tudi tueleshangana diboko ne Yehowa padiye wenza tshishima bua tuikale mu buobumue mu bulongolodi buende.

DINANGA DIDI MUNKATSHI MUETU NTSHISHIMA

13. Mmushindu kayi uvua bena Kristo ba mu bidimu lukama bia kumpala baleje ne: bavua banangangane? (Yone 13:35)

¹³ Yezu uvua muambe ne: dinanga didi munkatshi muetu ntshimanyinu tshivua ne bua kuleja ne: tudi bayidi bende. (Bala Yone 13:35.) Bena Kristo ba mu bidimu lukama bia kumpala bakaleja mu mishindu ya bungi muvuabu banangangane. Tshilejilu, bavua bapesha bantu bavua bakenga bintu. (Bien. 2:44, 45) Bavua basambila bua bantu bavuabu bakengesha. (Bien. 12:5) Bavua batabalela bana ba nshiya ne bakaji bakamba. (Yak. 1:27) Too ne bena Kristo bavua bapele bakatumina bena Kristo nabu bakuabu makuta bua kubambuluisha. (2 Kol. 8:1-4) Mufundi mukuabu wa mu bidimu bia lukama ne bia mu njila, diende Tertullien, wakatela mêyi avua bantu bambe bua bena Kristo ba mu bidimu lukama bia kumpala, wamba ne: ‘Monayi mudibu banangangane ne mudibu badiakaje too ne bua kufua bua bena Kristo nabu.’

14. Mmushindu kayi udi bena Kristo baleja ne: mbanangangane lelu? (Tangila kabidi bimfuanyi.)

¹⁴ Batendeledi ba Nzambi mbanangangane pabu bikole anu bu bena Kristo ba mu bidimu lukama bia kumpala. Tudi banange too ne bantu badi kabayi Bantemu bualu tutu tubayisha. Tutu tufila mapa bua kutua mudimu wa diyisha mpanda. Kabatu batuenzeja anyi batusengelela bua kuafila to. Katutu tufila tshia dikumi to. Tutu tuambuluisha bena Kristo netu padibu batata bualu tudi babanange.a Tutu kabidi tuambuluishangana bua kusomba ne ditalala, kuikala ne disanka, ne bua kukolesha bulunda buetu ne Yehowa. Bidi bileja mutudi tutumikila mubelu wa mupostolo Paulo, wa “kuakula ne mêyi a busambi kudi badi babungame, kuambuluisha badi batekete, kuikala ne lutulu kudi bantu bonso.” (1 Tes. 5:14) Yehowa mmutubueje mu dîku dia bana betu ba pa buloba bujima badi banangangane ne banange bantu bakuabu.

15. Bua tshinyi tudi tuamba ne: dinanga didi munkatshi muetu lelu ntshishima?

¹⁵ Dinanga didi munkatshi mua batendeledi ba Nzambi ntshishima bualu badi mu buloba mudi bantu ne budinangi. Mupostolo Paulo ukavua muambe ne: bantu ba matuku etu aa bavua ne bua kuikala ‘badinangi, banangi ba makuta ne banangi ba masanka,’ kabayi banangi ba Nzambi ne “kabayi banange bana babu” ne bena mu mêku abu menemene to. (2 Tim. 3:2-4) Yezu ukavua muambe ne: bantu bavua ne bua kutungilangana ne kukinangana. Wakamba kabidi ne: ‘dinanga dia ba bungi divua ne bua kukepela.’ (Mat. 24:10, 12) Kuena mumone mudi malu aa enzeka lelu anyi? Bukole bua Yehowa ke budi buenza bua bantu ba Nzambi batungunuke ne kunangangana bikole. Etshi ntshishima tshidi tshienzeka lelu bushuwa!

16. Ntshinyi tshitudi mua kuenza bua kuleja ne: tudi banangangane?

¹⁶ Patudi tuela bakuabu tuasakidila ne muoyo mujima bua tshilejilu tshiabu tshimpe ne patudi tudienzeja bua kusomba nabu mu ditalala, bidi bileja mutudi babanange. (Mâko 9:50) Tuetu tuleja bakuabu ku mêyi etu ne ku bienzedi bietu mutudi babanange, nebileje mutudi bantu ba Yehowa ne mutudi tueleshangana nende diboko padiye ukumbaja tshishima tshia dinanga dikole didi munkatshi muetu edi.

MONA MUDIMU UUDI WENZA NE MUSHINGA

17. Ntshinyi tshidi tshikujadikila ne: Yehowa udi wenza bishima lelu eu?

¹⁷ Mushindu utudi tuvulangana, bikale mu buobumue, ne banangangane mu bulongolodi buetu, udi ujadika ne: Yehowa udi wenza bishima lelu. Nansha mudi bantu ba bungi batuluisha, tuetu tudi anu tuvulangana. Bena panu mbatapulukangane bikole, kadi tuetu tudi mu buobumue. Nansha mudi bena panu kabayi ne dinanga, tuetu tudi banange Nzambi wetu bikole ne banangangane munkatshi muetu, ne bidi bileja ne: tudi bayidi balelela ba Kristo. (Yone 13:34) Katuena bavunge maboko, bashale batangile mudi bishima ebi bienzeka to, kadi tudi “benzejanganyi ba mudimu ne Nzambi.”​—1 Kol. 3:9.

18. Udi umvua bishi bua bishima bidi Yehowa wenza lelu ebi?

¹⁸ Bidi bikemesha bua kumona ne: nansha mudiku ntatu mitule mipuwe, batendeledi ba Nzambi ba pa buloba bujima badi anu benda bavulangana, badi mu buobumue, ne mbanangangane bikole. Etshi ntshishima! Bidi bitushindikila ne: Yehowa neakumbaje malu onso adiye mulaye bua matuku atshilualua. (2 Pet. 3:13) Ikala uvuluka misangu yonso diakalenga diudi nadi dia kuikala muenzejanganyi wa mudimu ne Nzambi padiye wenda wenza bishima ebi lelu eu.