Kolesha ditabuja diebe
PAUVUA mulonge Bible ne Bantemu ba Yehowa, ntshinyi tshivua tshikujadikile ne: uvua mupete “ditabuja dimue,” mmumue ne: mushindu umuepele udi Nzambi musue bua bantu bamutendelele? (Ef. 4:4-6) Dinanga didi nadi batendeledi ba Yehowa ke divua dikukoke kudibu anyi? Bikadilu biabu bimpe ke bivua bikusake bua wewe kubananga anyi? Bantu ba bungi badi bitaba bulelela bualu bulongolodi bua Nzambi budi buenza bua badiumvua mu bukubi ne banangibue bushuwa. Bidi ne bua kuikala nanku bualu badi ne bua kumanyina bena Kristo balelela ku dinanga diabu ne ku bikadilu biabu bimpe.—Yone 13:35; 1 Pet. 2:12.
Kadi ntshinyi tshiwenza muena Kristo nebe yeye mukunyingalaje anyi mukuenzele bualu bubi peshi muenze mpekatu munene wa buena uvua muntu kampanda wa mu tshisumbu tshia mu Kolinto muenze? (1 Kol. 5:1) Wewe wimanyina pa mushindu uudi umvua bua bidi bakuabu benza, ditabuja diebe kadiakukola to. Ntshinyi tshiudi mua kuenza bua kukolesha ditabuja diebe?
MUA KUKOLESHA DITABUJA DIEBE
Wewe mutungunuke anu ne kuikala mutuishibue ne: malu audi ulonga mu Bible mmalelela, nebikoleshe ditabuja diebe. Ntshinyi tshidi mua kukuambuluisha? Tuakule bua tshilejilu etshi.
Umue musangu, bayidi ba Yezu ba bungi bakamulekela. Bavua balenduke bua muvuaye muambe ne: bivua bikengela kudia mubidi wende ne kunua mashi ende. Bakamba ne: “Edi dîyi ndibi ditambe.” Tshivua Yezu muambe tshiakatonda bantu ba bungi, kubafikishatshi ku dilekela kumulonda.—Yone 6:56-60, 66.
Yezu wakalua kuebeja bapostolo bende ne: “Nuenu kanuena basue kuya penu to, ki mmuomu?” Petelo wakamuandamuna ne: “Mukalenge, netuye kudi nganyi? Wewe udi ne mêyi a muoyo wa tshiendelele. Tudi bitabuje ne bafike ku dimanya ne: wewe udi Wa Tshijila wa Nzambi.”—Yone 6:67-69.
Ntshinyi tshivua tshienze bua Petelo ne bapostolo bakuabu bikale bashilangane ne bayidi bavua balenduke abu? Bavua ne ditabuja dikole. Nunku diodi edi ke divua dienze bua kabimanyinyi pa mushindu uvuabu bumvua to. Petelo wakamba ne: “Tudi bitabuje ne bafike ku dimanya ne: wewe udi Wa Tshijila wa Nzambi.” Bapostolo ba lulamatu abu bavua bamanye malu avuabu bitabuja ne tshivua tshibasaka bua kuitaba. Bu muvuabu bafuanyikije malu avuabu balonge mu Mifundu ne avua Yezu wamba ne wenza, biakabajadikila ne: uvua Masiya. Ke bualu kayi ditabuja diabu divua dikole, ne bakatungunuka bobu ne kumulonda.
Tshilejilu etshi tshidi tshitulongesha tshinyi? Malu atudi bamanye adi mua kuikala ne bukole bua bungi kupita mushindu utudi tumvua. Bua tshinyi? Bualu malongesha a nshidamenu a mu Bible, bu mudi kumanya dîna dia Nzambi, malu adiye mulongolole, ne tshiakupikulangana natshi kaatu ashintuluka to. Bidi bantu bamba anyi benza bidi mua kushintulula mushindu udi muntu umvua, kadi kabiena mua kushintulula bulelela bua mu Bible to. Nunku wewe mutuishibue ne: malu audi mulonge mu Bible ne adi bulongolodi bua Nzambi butulongesha mmalelela, kuakulekela kuenzela Yehowa mudimu bua malu adi bakuabu benza to.
Tuetu tuimanyina anu pa mushindu utudi tumvua bua bidi bakuabu bamba anyi benza, ditabuja dietu neditekete
Kakuyi mpata dinanga didi nadi bana betu ne bikadilu biabu bimpe bitu bitukankamija, ne ke tshitu Yehowa musue. Kadi tuetu batuishibue ne: malu atudi balonge mu Bible mmalelela, ditabuja dietu kadiakuteketa to, nansha muntu yeye mutunyingalaje. Nebituambuluishe bua kuikala batuishibue ne: tudi mu bulongolodi bumuepele mudibu batendelela Yehowa mudiye musue; kabuakulua bubi anu bua malu mabi adi bamue bena Kristo mbenze to.
Tuetu ne tshibidilu tshia kudilongela Bible, nebitushindikile ne: malu atudi balonge mu Bible mmalelela. Nebituambuluishe bua kuikala batuishibue ne: tudi tutendelela Nzambi mu mushindu udiye wanyisha. Dîba adi bidi bantu bamba anyi benza kabiakutekesha ditabuja dietu to.—Mis. 16:8; tangila kazubu ka ne: “Kulekedi bulongolodi bua Yehowa to.”